كلمات
ميلاد و طفولة وشبيبة
ومشيب وممات
ميلاد بيجيبنا للدنيا
بيبعت للوجود اشارات
عشان يتلقّى ناس تانية
فيدّيهم رُخَص لحياة
طفولة بتاخد الراية
من المولد كعيل تاه
وتعمل منّها حكاية
تبان ساذجة لكن بتعيش
وما تطوِّلش؛ بتشبه جيش
بيعلن حربه ضد؛ مافيش!
يبات مهزوم و مستسلم
لحكم ف أرضه من أغراب
و يجرى بسرعة و يسلّم
زمام أمره لـ يد شباب
فيرفع رايته فوق؛ للنور
ويزهق منه قوم؛ ينزل
يشرّقها. يغربها
ويسكن تحسبه مجبور
وفجأة بتلاقيه بيثور
ويبنى للعلا ابراج
ومـ بيخضعش نفسه لـ تاج
ويتحرر فيتخبط و يتحيّر!
طريقه منين؟!
يتوه ف البحث و التنقيب
ويتعب فـ يسيب الراية
ساعتها يمد ايدُه غريب
ويرفع رايته بعناية
(عجوز) الشكل إسمه مشيب
وبـيسيب الشباب و يروح
مكمّل ف الطريق وحده
وقدّامُه الطريق مفتوح
وجسمانه الزمن هَدُّه
وشايف مشكلة ف مسعاه
لكنّه صعب يتغيّر
يبص بحزن للى وراه
فيتشائم و يتحسّر.
وفجأة بتسكن الخطوات
وروحه من الجسد تتشد
ويتغلف مشيب بممات
ساعتها بتسقط الراية
ومش بتلاقى ايد تتمد...
أعمى
ساعات بانسى اللى فات وأرجع
أفكر فيكِ من تانى
و بانسى أنّ اللى أنا عشته
معاكِ لسه سايب جرح
معاد الفرح
لسه مجاش
يا مستعجل على النسيان
لازملك كام سنة تتعاش
ف حزن و غلب وكآبة
وكام دمعة يروحوا بلاش
ومليون ضحكة كدابة
وقلبك يدخل الانعاش
وممنوع قربه أو يتزار
وعينك بعد مـ تسلم
دموعها للى مش هيحس
وللنوم ساعة تستسلم
تفوق على صفارات أنذار
بـ تعلن انتكاسة قلب
معاد الفرح لسه مـ جاش
ولما مننا يقرب
هنلقى طعمه متغير
و يا نوافق ونتأقلم
يا نرجع تانى للأول
و نستحمل و نتألم
ساعات الماضى بيعلم
لكن تعليمه مش بالسهل
وأنا فضّلت أعيش فـ الجهل
وأكون من بكرة مش خايف
ولو عارف
فـ هعمل نفسى مش عارف
أعزائى صُحاب العقل
هنيئاً ليكوا بالنعمة
و أنا لو جهلى خلانى
قليل الفهم مش شايف
فـ أنا قابل أعيش أعمى...
سُكّى البيبان..
الدار أمان
و النفس محتاجة الهدوء
اتدارى من غدر الزمان
قلبِك طلب حق اللجوء
والبيت دا بيته و حق ليه
سلمتيه ليه للى يجافيه ؟
علشان يطلّع كبتُه فيه
علشان من الاحزان يدوق
سُكّى البيبان. الخلق برة
ع الضعيف قايمين بـ ثورة
وأنتِ من النهاردة عَورة
لما قلبك هان عليه
سُكى البيبان
قلبك جريح
متخبّى منهم ف الضلوع
اللوم عليه قاسى وصريح
وأن صد لومهم بالدموع
سُكى البيبان
حواليكى ريح
شايلة سنين ذل وخضوع
البُعد دايما كان مُريح
والذكريات أسوأ رجوع..
مسافات
وما بين الحلم وتحقيقه
ومابين التايه وطريقه
وكلام القلب وتصديقه
طالت مسافات
ومابين العين و اللى تحبه
ومنابع شوقك و مصبه
ووصول العقل لشئ طالبه
طالت مسافات
ومابينك و مابين ناس فانية
وسكك خطاويك وسكك تانية
ورضا البنى آدم عـ الدنيا
طالت مسافات
سيب كل همومك يابنى هناك
وأرجع وطنك خالى الأزمات
وأنسى الجرح المحفور جواك
وكأن الغربة عدو ومات
وأرجع للى سنين استناك
دا ما بين دلوقتى وزمن فات
طالت مسافات
العشق
العشق مطر عـ القلب البور
بيرجّع فيه نبضه و روحه
ويخضّر أرضه و يطرح نور
بعد ما سِمع الكون صوت نوحه
ويوزع ضيه ف شرق وغرب
وينشر عِطره ف جو وأرض
ويعلن ع الأحزان الحرب
وطاعته عليهم تصبح فرض
وفجأة بيظهر طبع سخيف
ويطلب ان يكون ليه وجود
يحط مصير للعشق مخيف
ومهما أن غاب دا أكيد بـيعود
وتظهر شمس ظهورها عظيم
تصحّى شعور بالحزن قديم
وتوزع ضوء جارح وأليم
بـ يفيد. لكن أضراره كتير
و مافيش جو بـ يبدأ بالغيم
إلا ويخلص بـ أسىَ وتكدير