(فصل الشتا)
أهو فصل الشتا عاد من تانى
واللمة أنفضت من حولك
والخل اللي ف فرحك جاورك
هيسيبك ترجع وحداني
من طبع الشتا أنه أنانى
الشتا بتكون قهوته سادة
مع صوت فيروز أو ميادة
الشتا موال حزن ودمعة
دخان بيفارق كام شمعة
وبيهرب وبيصبح غيمة
ننساه وتعدي عليه فترة
يتبخر وبيصبح مطرة
المطرة دى أصلاً م الأول
دى دموع متحاشة وبزيادة
طلعت من موقف نفتكره
على صوت فيروز أو ميادة
وانا لسة قصايدي بتفتكرك
من صورة قديمة ف برواز
أو مشهد من خلف أزاز
لكافيه كان دايماً يجمعنا
والمعني اللى ف أى قصيدة
من بعدك بقا ملهوش معني
البنت الحلوة اللعبية
دلوقتي عليا بتتفرج
كسرتني وكانت بتهرج
قال وانا من خيبتي وتغفيلي
فكرتها كانت بتجيلي
علشان مشاعرها بتتحرك
مش وحدي بعاني من الوحدة
والوحدة بتكسر كام واحدة
والواحدة بتجرح كام واحد
والواحد بيخون كام واحدة
كلاكيت وأكشن وأعادة
على نفس القصة المتعادة
وان كنت هويتك بزيادة
بزيادة خلاص جرحك طول
لكن ياخسارة الليل يجي
برجع وافتكرك م الأول
طب ليه الشتا بيكون جارح
وبيرجع بينا على امبارح
وامبارح يرجع على أول
والحب الأول فى حياتي
مطلعتش فى حياته الأول
تأثير الشتا ع الشعراء
كام شاعر أصبح مشهور
وقصايده بتطلع للنور
والنص الموزون بزيادة
كان ناتج شاعر مكسور
بيعاني من الشتا والليل
لو كان للشتا بس بديل
لو مثلا طول السنة مايو
أو مثلا طول السنة يونيو
أو تبقي السنة كلها أبريله
(أمي روحها شعر خام)
يعني أيه اكتب عليكي
وانتي روحك شعر خام
رمز معناه السلام
أخري بس اكدب عليكي
م الحضانة والابتدائي
ف اللي ناقص واللي باقي
وانتي راضية
وصابرة ترضي
ترضي فيا عشان ضناكي
واما حد بيشتكيلك
من شقاوتي
من غباوتي
من كلامي
ومن سكاتي
يبقي ردك
ابني نور عيني وحياتي
أيوة طايش بس طيب
أبني مفيهوش شئ يعيب
بس واخد طبع جده
راسه أنشف م الرخام
ويقولولي اكتب عليكي
دا انتي روحك شعر خام
أمي يعني عملت عملة
واما خوفت جريت عليها
أمي حب الكون دا جملة
يوم نجاحي يبان عليها
أمي أرضي وأمي داري
أمي دايمأ عرض ساري
بالمحبة وبالسماح
أى أدمان يبقي كارثة
إلا أدمانك مباح
أمي وقت الفرحة زينة
وردة بتزين جنينة
بس وقت الشدة ثابتة
صالبة طولها متنحنيش
نعمة ديمها يارب ليا
خد عافيتي وخد حياتي
وإدي أمي عشان تعيش
أمي لما أحتاج لشئ
تبقي جاهزة أوام ردودها
لم نفسك ما تعوذوش
ياواد اكبر بقي واخشن
ياض استرجل وبطل زن
واستعيذ بالله وصلي
أمي أجمل شئ حصلي
أصلي عمري ما هونت مرة
بصحي بدري ألاقيها برة
واما ترجع أبص ليها
كنتي فين؟
وانت مالك
خد يا زفت الحاجة دية
جيبهالك
أمي معني وأمي لون
أمي ريحة فى الهدوم
أمي مهما تبان سعيدة
خزنة مقفولة بهموم
أمي وقفة وأمي عيد
أمي دى القلب الوحيد
اللي بيساع وقت ضيق
دعوة تفتحلي الطريق
كل شئ يصبح تمام
ويقولولي اكتب عليكي
وأنتي أصلا شعر خام
والله يا اما غصب عني
اني أتحرم من أغلي صوت
لكن فرض الحياة الموت
بفعل الوقت زاد سنك
وزانت وجهك الشيبة
لسانك كان ميزان حساس
وعمره ما ينطق العيبة
لسة يا اما باقيلي فيكي
كام قصيدة مقولتهاش
كام مصيبة داريتها عنك
بس لجل متزعليش
فاكرة لما دعيت لربي
خد عافيتي وخد حياتي
وإدي أمي عشان تعيش
بس وقت الموت مزاد
كل شيء يرخص قصاده
لو بخاطري اديكي عمري
بس اشوف عينك ف عيني
لجل اطول فى الوداع
تلمسي بخدك جبيني
ياللي طينك نفس طيني
كنت مكتوب فوق جبينك
قبل حتي ما تجيبيني
نفسي كنت أخدك فى حضني
قبل ما تقوم القيامة
حتي أقولك بالسلامة
ولا أقولك متخافيش
سايبة راجل من وراكي
أيوة غيبتك كاسرة روحه
بس مسنود من دعاكي
وإن كل حرف منك
درس جوايا اتحفظ
كان فى جوفي كلام كتير
بس هعمل أيه ياأمي
أدي أمر الله نفذ
واما عيدك جيه بدونك
جوم قالولي اكتب عليكي
بس هكتب ايه عليكي
وانتي أكبر م الكلام
بس هكتب كلمة واحدة
كل حد بيغضب أمه
فى الكبائر تتحسبله
كل عام بالخير ياأمي
وانتي أطيب م اللي قبله
.........
(فيلم هزلي)
أدراكك بأن الوقت قد فاتك
لوحده ف حد ذاته يقين
بأنك كنت بعض الوقت
خطاك ماشية الطريق الصح
ومتعشم ف أبعد نور
ممثل شغلته المسرح
وكان شاطر ف عاش الدور
كتبت رواية تأليفك
وجسدت الخيال أشخاص
وراوي بيسرد الأحداث
وبطلة جميلة من وحيك
وشارع ماشية فيه الناس
وكام دوبلير وكام عازف
وشخص من الندم أسف
وفى موسيقار معاه نوتة
وضحكة ف خد بنوتة
وقهوة بوش مزبوطة
وأكمالآ لهذا النص
يوجد مخرج فى أخر الكادر
بيظبط كل هذا العرض
وعدسة بترصد الأحداث
على الشخص اللي من يومه
خرج عن كلمة المألوف
ما يملكش إلا بعض حروف
لكن خانه العشم فيكي
عيونك مش مكان أمن
وقلبك صعب يتأمن
وشايف جنته عينيكي
عجايب والعجب فعلي
عشان تصنيفك الفعلي
يدوب فارغ بواقي حروب
حروف ناقصة ف جواب مكتوب
وانا اللي بأيدي لميتها
وجمعآ كل شئ رافض
ومفرد روحت حبيتها
ياسالبة العقل حق النطق
وعاصرة القلب بأيديكي
أنا اللي لوحدي بسقيكي
جزاتي بأني أموت عطشان
تمر النسمة من جارك
أكونلك نار تدفيكي
فترميني لخريف بردان
وخلق الله تحذرني
بلاش هي..
دى مش توبك
هتشرب حبة من كوبك
وهتسمك......
هتاخد حبة من عمرك
وتسحب حبة من دمك
وتصبح كل شئ همك
وقلبي الندل شاهد زور
تملي يقول ولا يهمك
أكاد أجزم
بأنك كل يوم ف الليل
مع الشخص اللي عني بديل
وطبعا فاضلة تحكيله
عن الشئ اللي بيحبه
وعارفاه قبل ما يقوله
وعن لبسه اللي شيك جدآ
وعن شكله وعن طوله
وعن أول لقا بينكم
وعن أول كلام بينكم
وعن أول ، وعن أول
وكنت ف يوم انا الاول
وأصبحت الأخير ف الصف
وكل ما تكبر الخانة
بيتشال الأخير ع الرف
أنا الحر اللي كنت طليق
شوفيلي نهاية أخرى تليق
على المشهد و ع الموتة
عن المدة اللي محدودة
عن الشخص اللي بيكابر
جميع الناس وحبك عند
عن الشخص اللي مات فيكي
وبأيديكي كتبتي the end
ولو ع الغلطة مردودة
أنا أسف
أنا أسف عشان ضيعت
عمري معاكي بتمني
أنا اللي صبرت فوق صبري
وأخر صبري بستني
وانا اللي ف عز حر النار
عاندت وقولت دى الجنة
وانا اللي كتبت للمجاريح
بقيت غنوة بتتغني
يااللي حكمك حكم خايب
بس واجب للنفاذ
يااللي فرقتي الحبايب
غصب عن قلبي اللي عاز
يااللي مش همك همومي
حتي لو بولع بجاز
يااللي دايمأ كاسرة قلبي
قلبي لحم ومش فولاذ
ويبدو إن الجميع ماشيين
خلاص فركش ويلا سلام
أدي الدنيا وادي الأفلام
يقينآ كل دول زايفين
من الراوي إلى البطلة
الي الدوبلير إلى العازف
ونفس الشخص لسة هناك
ما زال من الندم أسف
ولما سألته أيه مالك
فرد من الوجع بهدوء
أنا الشخص اللي جيت بعدك
وخليتك تكون تاني
فضلت فى قلبها الأول
لحد ما حل ضيف تاني
....