روشتات نفسية أكوان للنشر والترجمة والتوزيع كتاب روشتات نفسية محاولة بسيطة للكلام عن حقوق نفسية مهمة محتاجينها؛ عشان نكتشف ذاتنا، ونعيش سلام نفسي إحنا أحق بيه، حقوق أهملناها بقصد أو غصب عننا من بداية الطفولة لغاية اللحظة اللي عيشينها. وبسبب الخلل اللي حصل في الحقوق دي بنعيش مواقف صعبة في حياتنا، أو بنتصف بصفات نفسية معينة، أو بنقابل ناس بصفات نفسية مضطربة، ونعيش معاهم في معاناة. في الحديث: "وإن لنفسك عليك حقًا"، حديث مهم أوي بيعلمنا إن النفس لها حقوق لازم توفيها؛ عشان تقدر تحقق الاتزان والسلام الذاتي. الحقوق دي كتيرة أوي ومهمة كمان. هنتكلم عن بعضها، وعليك إنك تجتهد وتدور وتبحث؛ عشان تعرف وتتعلم إزاي توفرها وتحققها في نفسك، وكمان في اللي حواليك. الحقوق دي فيه منها اللي حضرتك لازم توفره بنفسك ولنفسك، وفيه منها اللي المفروض يوفروه ليك اللي حواليك، زى الوالدين والأصدقاء والمجتمع، وفيه كمان منها اللي لازم حضرتك أنت توفره للي حواليك من الناس اللي بتتعامل معاهم. تعالى نمشي مع الحقوق دي على شكل روشتات بسيطة، ونفهمها كويس أوي؛ عشان نعرف أد إيه هي مهمة جدًا؛ عشان نشكل شخصية سوية، وعشان نقدر نعيش حياة نفسية متزنة وسليمة. هنتعرف سوا على خمس روشتات، كل روشتة فيها حق من الحقوق النفسية المهمة جدًا، ودي بتتحقق بالتربية، وكمان من التعاملات الحياتية. والحقوق النفسية دي هي: (حب بلا شروط، أو التقبل والاحترام، خليك مستقل وحس بقيمتك، اضبط سلوكياتك، عبر عن مشاعرك بأمان، كن لين القلب). حقوق مهمة، وفيها شرح وكلام كتير أوي ولازم تتوفر، وإن أي خلل يحصل في أي حق منهم بيأثر جدًا جدًا في تشكيل الشخصية، وفي التعرض للاضطرابات النفسية بمختلف أنواعها ومستوىاتها.
0.00 - 0 تقييمات - 0 مراجعات