آخر إنذار
آخر إنذار
يا جميل وملكش مثيل
سيبك من التقل وميل
غلبت كل المراسيل
وياك يا بو رمش كحيل
إرحم قلبي الولهان
ياللي لحبك عطشان
عطشان وبقالي زمان
تايه في هواك رحال
من كام شهر وكام يوم
سهران مخصمني النوم
وعليك ياحبيبي اللوم
وإنت على كدة مسؤول
على إيدك إتعلمت أكون
عاشق ومتيم مجنون
وأتحدى بهواك الكون
يا حلم بتمنى يطول
قررت وهو قرار
هديك آخر إنذار
وعليك وحدك تختار
يا محبة يا الفصال
مش عيزاك
سيبني في حالي مش عايزاك
أنا رافضة حبك وهواك
مش راح أكمل وياك
ومعدش يشغلني رضاك
سيبني في حالي مش عايزاك
ندمانة إني وعدتك إن أنا دايمًا أسعد وقتك
وأبقى معاك وأشوف مصلحتك
أعذرني آسفة إني جرحتك
سيبني في حالي مش عايزاك
أنا زهرة وحياتي ربيع
والعمر قدامي بديع
يا خريف شجر وبضيع
وده توضيح للمواضيع
سيبني في حالي مش عايزاك
بصراحة حاسة بصراحتك
طيب وحنون أنا برتاحلك
وبتسكن قلبي بسماحتك
لكني من عمري مسحتك
سيبني في حالي مش عايزاك
كلامك كان حلو كتير
ومعاه بسرح وبطير
وبرفرف زي العصافير
وكنت عليك أيوة بغير
سبني بحالي مش عايزاك
***
كورونا
توت توت قطر الموت
كل يوم علينا يفوت
ياخد حد من الأحباب
كبير السن أو لسه شباب
بس معاده تمام مظبوط
توت توت قضاء متقدر للبشرية
عم وباء حالة عالمية
فيروس انذار للغافلين
ارسلوا إلينا رب العالمين
توت توت كورونا ده حكمة إلهية
علشان نصحى بس شوية
ونبطل صراعات وهمية
لله وحده الألوهية توت توت
أعبد ربك مسا وصباح
اعرف حجمك تعيش مرتاح
وكفاية تلاعب بالدين
وغش وتدنيس للقوانين
توت توت ادعوا معايا رب العالمين
ندعي واحنا اكيد واثقين
تمشي كورونا ونكون سالمين
أنا بدعيلكم قولوا آمين
***