مفقراتي..
يـــلـــف أرض الله ف تـــأذن له
يـنادي خلق الله ف تأمن له
إهداء
للي ماكنش ينفع يمشي بـدري
للي ماكنش ينفع يمشي خـــالص
إهـــداء لأبــويـا "الـنبيــل" علشـــــــان
مــــشي وســــاب الحســـاب خــالص
*****
"استفتاح"
بنسمي بسم الله
لجل ما ننسى
نوضي قلب الخلق
بالذكر والوِنسة
نصون عيون الأرض
ب الوحدة والملكوت
****
أجري كالعيال بدون راسي
أسري ف القلوب بلا راسي
أدندن الدندنة أنا.. إن دنى
ده أنا قلبي قداسي…
****
مسحور ملفلف ف الحضور بالخمر
مفتون بلا أجوبة عن الضياع العام
مرثي قلبي وفوق عيوني أضرحة
وراجي م الأوليا تسوق ضياع العام
*****
أنا اللي لابس قلبي فوق مني
أنا اللي داير على دف جنني
سرقوا السِبح من بعدها فني
ورجعت أفقر ف الليالي الخام
قصير كلامي بس له معنى
ب طول لجامك يا رب جمعنا
اقفل جفون الحزن.. دمعنا
وصلي ع اللي اصطفيته م الفطام
"تفقير"
فواصل
مفاصل
متفصل
في الحلقة أنا ذكر مأصل
ولسه بجري لي وراكي
ولسه منك بتنصل..
****
تترأوح روحي بدون روحك
يتناوح نوحي عشان دوحك
بيقاوح قلبي بواح بوحك
وأنا واجد واحد ومحصل
***
ف الحب أنا عندي المفاتيح
جريحXداخل ف حرب قتيل
لافف عيون غأوية التسبيح
بالشاش وبالقطن موصل
فقير وعيني كلامها عفيف
عشان ماعيش سعر التوصيف
وإيدي تكسف عرق الصيف
لو مرة فكر يستحصل..
****
عربيد ف حضرة بدون تفقير
وشيخها داعر وأنت فقير
شبعان غنا وزهد وتفسير
وأنت اللي سابق متحصل
****
شيطان وغنى ف حلقة ذكر
وزاد ف مدحه نتيجة سكر
ونار ف جنة تحسها وكر
وأنت اللي طينة ومتصلصل
****
" مُريد"
يا مريد الله تعالى
يا مريد الله.. تعالى
لف حلقة ذكر كاملة
واستوى ع الأرض واغفل
ننتوي م الرب غيمة
نستحي وقلوبنا تعشق
بنت من مصر القديمة
بنت لو تدبل هتحيي
كل ما ف مصر القديمة
يا مريد الله تعالى
انزوي ف الركن وانشد
واكتوي بالعشق تُرشد
فوق كتافي لو هتُشرد
أوعي تنساها بصبابة
كل ما ف الحضرة يُفقد
لو هتعزف ع الربابة
****
سبحوا لله ف القلوب السود
وانشدوه ف الزقاق والحي
واجروا جري الملايكة عشان
مافضلش من البشر ولا حي
"شيكابالا"
ب اتمزج بالفرص الضايعة
ب استهبل ويقول مش لاعب
مزاجنجي وحريف بالفطرة
وأدرجي وغلباوي مشاغب
ب استنى الكورة أما تجيلي
واستعبط قبل ما ب العبها
اللعبة الصعبة عشان حلوة
اللعبة السهلة ب اصعبها
ترزجي وب اخيط ف كباري
بتشوفها وتيجي تسنترها
وعيونك دي بتشبع متعة
وتخاف لا الكورة تسفرها
أنا حابب أقولك معلومة
الكورة دي عارفة إني صاحبها
***
"استيتاب"
النهاردة..
جاي وأنا خسران ومعترف
جايلك تشوفني ب انحرف
ماشي مافيش عندي سوايا
أو زايدني أو ناقصني..
هنختلف؟!
كل اللي عدى كان يا دوب عادي
ف لو أنت حابب..
أنا مش هاشيلك ف الألف..
مش هامنعك..
هتعيش بتاكل أكلة بتجوعك..
وأنا عارف أكتب
بس مش عارف أقول
مشغول كلامي بس مش مسطول
خايف تواجه؟
لأ..
خايف أزول..
كل اللي بقى قديس وف المصلى
كان زاني وابن بتول..
باكتب
وأنا مش لاقي كام موضوع
ب اكتب عشان بنوجع وب انوح
ب اكتب عشان ساكت ومن مدة
سكتتي طولت ف يا روح ما بعدك؟!
ويا روح ف بُعدك روح...؟!
ماتطلبش مني سلام مانيش عايزة
ماتشطبش مني كلام مانيش حافظة
ماتدنيش ف وعود وتخلفها
تقولي مين موجود وشايفها
كل اللي بينا كلام مالوش داعي
كل اللي بينا آيات مألفها..
كل دي أوقات مقضيها
كل دي أنماط بتكسرها
كل دي بلالين بتنفخها
كل دي ماتشات بتخسرها
لعبت ليه لما أنت مش حريف
راهنت ليه وأنت قلبك نحس
شوفت إيه وانت بتجري لها
عجبك ترابها.. قلت تنزل لحس؟!
خسران خساير مقرفة..
كسبان مكاسب مؤسفة..
ذكريات ومالية الأرصفة..
وأنت قاسي ويا مين بالظبط..
بتشوفك وانت بتجري لها؟
بتدقق فيك وأنت معاها؟
ده كلب جميل جدًا يعني
ده التوصيف وأنت المعني
ماتقولش كلامك ده واجعني
مش واجعك ذُلّك وأنت هناك
بتوطي عشان قلبك تعبان
تفتكر القرب إن فاض هيفيد
وتلاقي جحيمك فيضه حنان
بأذيك بكلامي أكيد عارف
بتموت وبتكدب.. تتعايش
بتقولي عياري أكيد طايش
وبترجع تمشي لوقت بعيد
خايف على مين راح يستناك
ضيعت فرص وقلوب عايشة
بتقضي حياتها بتتمناك..
وأنت الأجوف ف عينيها
لو شيلنا عينيها..
ف مين جواك؟!
****
"دي مش قصيدة"
وأنت بتقرأ ف ده دلوقت
جايز أكون ماشي مسافر
جايز أكون زهقان جداً
أو قلقان ماشي باعافر
أو بتلغبط بيني وبين
كل اللي أنا سيبته ومليت
كل اللي أنا خونته وحنيت
ولإنك مش حابب تقرا
يستحسن إنك تبقى بعيد
لأول مرة..
باكتب بدون ما أكتب
لأول مرة
نِفسي بس مش هاشتم
لأول مرة
باعرف إني كبرت
ولأول مرة أفهم..
إزاي رغم طولي قصرت
وإزاي أنفاسي بتتسلى
وإزاي ف عيوني بقيت سلة
وازاي بعياطي
أنا هابقى فطرت
لأول مرة..
أكبر وماقولش كبرت
اكتب زي صاحبنا اياه
امشي كافر وسط درب إله
أتغنى مع الدوريش وباستحضر
روحك الحاضرة فاتبسط وألقاه
يا خوفي عليكي يا فاضلة
يا رعبي ف كل يوم بليل
يا كل زعلي يا صاحبي
يا كل صاحبي
اللي مش صاحبي
يا ذلي وأنا حاسس
إني لسه جميل
****
لو أبويا كان عايش دلوقت
ماكنتش هاعرف إني وحيد
جايز عمري ما قلتله لكن
كات إمتى بتظبط ف المواعيد
****
لو ماكنتش كاتب العراف
أو ماكنتش سامع الخَرّاف
أو ماكنتش كامل الأوصاف
أو ماكلتش عمر أبويا الحاف
أو ماشوفتش
تلاجةً "الموتى"..
لو بس كان قساني فً الخوتة
كان زماني أكيد بقيت عارف
الفرق بين غيابه لجل العيش
والغياب.. لما يكون ورطة
****
مداد ف حب الله لا يهاب الحق
مداح ف ذكر البيت بلا تفريق
موال يراضي المولوية عشان
زهقان زهق الأبالسة م التسريق
"مُمهَل"
الخوف..
الخوف الذي يمهل
الخوف يستحي يهمل
الخوف لا يسكن ولا بينام
الخوف تشم روحه زكام
الخوف عابر .. عابر مُستدام
أنا لسه بحبك مش هاكدب
ولسه مصاحبك جوايا
لو يوم هتعوزني حنان صافي
أنا قابل إنك ويايا
يا ضحكي ف كل يوم بتموت
يا دمعي ف كل ما أشتاق لك
يا وجعي في لما بندهلك
يا كل شيء بيردده سكوتك
يا قهرة قلبي عليا وعليك
وع الماتش اللي هيفوتك
لو كنت عارفك
كنت التقيت ماضي
لو كنت صارفك
عفريت ماهوش قاضي
تقدر تحقق لنا الأحلام؟!
تقدر..
بس مش فاضي
أنا بعد ما أخلص مش هاعرف
رتبت كلامي منين ل منين
ومشيت ف حكاية ازاي وازاي
وطاوعت حنيني وخوفي الجاي
وسكرت صيام مفطور بكاسين
أنا الذي.. أنا اللي أذى
أنا اللي ما يملك من قلبه
غير طرق وعيون وكوكب هذى
***
أنا ممكن أشوفك مرة كمان
أنا قابل حتى بدون ما ألمس
أنا غايب عني بقالي زمان
إني أتأخر وأنا ب البس
وإني إتاخد مني أمان
وإني بقيت شايل ألوان
وإني بقيت باهت بهتان
وإني بقيت خايف أهمس
وإني بقيت جاهل علشان..
من يوم ما ضحكت ماعيطش
من يوم ما سكتت ومانطقتش
من يوم ما خلصنا خلاص يعني
أنا آسف إني رغيت تاني
وإن أنا ف سكوتي مريحكم
وإن أنا لو أهلفط مش هاعني
أنا آسف إني حكيت مرة
عن أول جرح بيوجعني
****