فضفضة راجل عجوز
اتعكزي
اتعكزي على قلبي
لو إيدي وهنت من الزمن
واتسندي
اتسندي على روحي
روحي تشيلك ونفسي تفديكي
اللي بيننا مش مجرد عمر عديناه سوا
اللي بيننا عمره أكبر م الوجود
اللي بيننا مكتوبله الخلود
اللي بيننا مش هيموت بموتنا
دا هيتولد
فاكره الشباب؟
فاكره الصبا؟
كان عنفواننا زي نهر النيل في عزه
شقينا طريقنا وبالعرق مليناه
وبجهدنا
عملنا عمرنا مركب
ركبت عليه عيالنا
وعديناه
كان أملنا يكبروا
ويعمروا
ونسينا شيبة شعرنا
ولا خدنا بالنا
إن كل يوم بيعدي كان من عمرنا
بين الشباب
والشعر اللي شاب
كانت هي لحظة
والزمن مكار كبير
في السرسبة والدحلبة خبير
أخف من أخف إيد لساحر
أستاذ في إنه يديك الأمل
ويطوله
وفجأة ياخده
ويسلمه
لجيل جديد
جيل عنيد
ويلعب عليه اللعبة هي نفسها
مفيش جديد
بيقولوا النجوم
عمرها ملايين
ليه البشر مش زيهم
مبيلحقوش يشبعوا من عمرهم
من شبابهم
وبيكبروا قبل أوانهم
ليه البشر مساجين
مساجين للزمن
بين الشباب والشيب مفيش عشرين سنة
مساكين
متضحكيش
مبحسدش العيال
انا زعلان عليهم
زعلان لغفلتهم
لغباوتهم
لتصديقهم
لنفس الخدعة من نفس الزمن
أنا مش عايزهم يشقوا زي ما شقينا
ويضيع شبابهم عليهم زي ما ضاع علينا
ومتقوليش إني معدوم الرضا
أنا لسه مؤمن
بس الحزن عمره ما كان حرام
زي ما يعقوب عماه الحزن على ابنه اللي ضاع
بحزن أنا على عمري اللي ضاع
حزين على كل لحظة عدت ولا خدت بالي من السما
شوفي ازاي واسعة السما
شايفه النجوم ازاي بترقص
شايفه السكون
شايفه البراح
حزين وأنا بفتكر عمري اللي راح
من غير ما أبص للسما
كنتي دايماً بتقوليلي إني حالم
طب ليه نسيت الحلم
وليه نسيتي تفكريني
غرقنا جوه العلم
وإيه يفيد في الحلم لو وقته انتهى
متقلقيش عليا
ومتمسحيش عني الدموع
سيبي الدموع تغسل
اللي علق بيا
من قهر وخوف
واللي ياما اتحججنا بيه من الظروف
متقلقيش على مخي
متفكريش صابه العطب
يمكن كبرت
يجوز
ودي مجرد فضفضة
راجل عجوز
عتاب في الحلم
ومين قال إني مش هتجن؟
ومين قالك دا مش هيحن؟
وإيه شوفتيه في يوم مني
بيثبت فكرتك عني
ده لو كان في ميزان للحزن
يقيس أحزاني وشجوني
ببصة واحدة في عيوني
والله ..... كان نطق واتجن
كلام الفرقة متكرر مفيهش جديد
بيتغير ويتحور لكنه في نفس الفلك بيدور
كلام ع الوعد والمواعيد
ولبس جديد في يوم العيد
وعيدية وهدية وفرحة بصتك ليا
وشوق بتفضحه عنيا
ولوم وعتاب في آخر سطر
عن اللي اتساب
وليه اتساب
وعايش قد ايه في عذاب
وده العادي وده المألوف ما بين الاحباب
فليه نضيع ثواني الحلم؟
ده من رحمة ربنا بينا خلق قدرتنا ع الأحلام
ده لولا إني بشوفك كل يوم في الحلم
ده كان عقلي زمانه اتجن
وإيه مصبرني ع الدنيا وبلوتها وقسوتها
غير الحلم
اللي بسرق فيه بوسة وحضن
يا أمي لو حكيت عن فرحتي ببوسة وحضن
في الأحلام
بحار الدنيا مش هتكفي حبر للأقلام
ده يوم موتك
سكوت صوتك
وصوت الضحكة اللي بتجلجل
وصوت نفسك اللي بيشخلل
لما تنامي من التعب
ماهو أنا أصلي عمري ما حكيتلك
زمان
لما كنتي بتنامي
كنت بتسحب على أوضتك
كأني كنت بسرق م الزمن لحظات
أتأمل فيهم وشك المرهق
أقولك ...
أنا مش هكمل
ملوش لازمة الكلام يتقال
أنا لو سبت نفسي أقول
ولا يكفيني مية موال
ولا يكفيني ألف مقال
خلاصة القول عشان الشمس بتشقشق
وهصحى وأنا ببكي
عشان كان نفسي الحلم يتحقق
أنا تعباااااااااان ...... من غيرك
ولولا بوسة على جبينك
ويدينك
وحضن سرقته في الأحلام وأنا بجيلك
أكيد كان عقلي مني اتجن
يا أعظم أم
يا أجمل أم
يا ست الكل
وحشتيني
آه ع الزمن
آه ع الزمن .... كداب
قالوا حرام تلعنه
مخلوق وليه أسباب
وكل اللي عابوني اتكووا بناره
وأنا عبد مؤمن بس ليا عتاب
ليه يا زمن تغدر .... توعد ومتوفيش
مش كنا يوم شلة صحاب
مش كنت شاهد
يوم ما اتواعدنا نفضل صحاب
قمت انتا جاي فرقتنا
أخدتنا
زي ما أخدت كتير قبلنا
وفي عتمة الليل توهتنا
حتى اختلف كل شيء
لا الطريق نفس الطريق
ولا البيوت نفس البيوت
ولا الصحاب نفس الصحاب
آه يا زمن قلاب
كام بنت يا زمن وعدتها تفضل شباب
وعدتها
تفضل فراشة طايرة
تلمس بأحلامها السحاب
وفي لحظة
وقفتها قصاد المراية
شافت شبابها سراب
فاكر سعاد حسني؟
كانت بس تضحك
توقع في حبها
قلوب ملايين الشباب
آه يا زمن قلاب
مش كنت حلفتك على أمي
ووعدتني تفضل عيونها تبصلي
ووعدتني يوم ما أتوجع
تسيبلي حضنها
فيه اترمي
فين أمي يا زمن دلوقتي
تحت التراب؟
لما كانت دموعي سايبة تكوي في جفوني
مين كان بيمسحها
غير كفوف أمي
مين كان يريح قلبي
غير ضحكة أمي
وفين هي يا زمن؟
تحت التراب؟
آه يا زمن ألعوبان
سريع ومبتتشافش
كما الدبان
تفوق غلاستك غلاسته
فالح بس ترازينا
وتفكرنا باللي كان
طب كنت سيبته
طب حتى كنت مسحته
من عقولنا
وكنت شيل الشجن
من قلوبنا
وساعتها كانت تنتهي الأحزان
حقي عليك يا زمن
وإن عبت فيك
حقك عليا
أنا إن لعنتك يوم
فده م اللي بيا
بس إنت زيك زيي
مخلوق
وليك أسباب