لولا كان انفجار عظيم ما كان الكون اتوجد
ولا كان شمس وقمر ولا كان نجم اتولد
يا ريتك يا إنسان ما وصلتله بعملك
ده اللي خدناه من علامك قنبلة تدمر بلد
ياللي عشقت السهر في ليالي السحر
وكتبت أشعارك على ضي القمر
ليه بس رميتها وطلعت تجري
دا أحلى كلام.. يتقال تحت المطر!
قاعد مهموم باللي جاي وحزين أوي ع اللي فات
ولا عارف إن كانت بلوتي في الكلام والا السكات
لقيت جنبي طفل مهموم زيّي، سألته مالك؟
قالي معايا جنيه محتار أجيب بيه فشار والا حلويات
كام مرة في حياتك.. نجيت م الغرق
يأسك وإحباطك كان شيطان واتحرق
إيه جرالك المرادي.. مالك كده؟
دا حياتك كتاب ولسه مليان ورق!
صحيح كل شيء موجود.. لكنه بتمن
صحة وسعادة وراحة بال ويمكن شجن
تعيش كل عمرك تسعى لامتلاكهم
لكن تقدَر قيمتهم بس لما يعدي الزمن
تحت المطر وكان برد الليل بيرعشني
وصوت الرياح عويل أشباح بتلبشني
وأنا في انتظار عفريت يطلعلي يهبشني
جريت سبقت عفاريتي والجدع يقفشني
واحنا لسه الصبح، خد بالك النهار ده عيد الحب
خدها نصيحة صادقة إن كنت عجوز والا شاب
انزل وهاتلك دبدوب والا وردة
بدل ما تاخد البوز المتين.. وحياتك تبقى كرب
في دخلة الشتا بيتنا القديم دا كان أعجوبة
وأنا عيل صغير بريء عبيط لكن أروبة
معرفش وقتها كان إيه أجمل
طعم الدفا والا ريحة المطر ونشع الرطوبة
وتعيش أيام وسنين حزينة وقاسية ومريرة
وتفرح وترقص وع الحصان تخطف أميرة
وترجع في يوم تحكي كل ده وتبتسم
بعد ما راح تترسم على وشك تجاعيد المسيرة
إنسان وعلى هذا الكوكب من زمان اتوجد
وعاش كام وأربعين سنة من يوم ما اتولد
كان عنده كام سؤال عاوز يجاوبهم
وكل إجابة جاوبها طرحت أسئلة مالهاش عدد
حتى لو بتعرف تعوم حتكون نهايتك مؤسفة
في بحر غويط لو اترميت وإنت إيديك متكتفة
يا تعافر، تفك قيودك وتتمرد
يا تهرب م البداية بعيد.. عن بحور الفلسفة