في تمام الساعة التاسعة صباحًا تعالت أصوات الزغاريد في {دوار} المرحوم عبد السلام أرسلان، وتهافت الجيران على {الدوار} لمعرفة أسباب الزغاريد، وخرجت الحاجة فاطمة وفي يديها كاسات الشربات وهي تقول: - باركولي حمزة ولدي نجح وأخد الشهاده الكبيرة.
تعالت أصوات الجيران: - مبروك يا حاجة فاطمة وعقبال مروان أخوه إن شاء الله.
تسأل إحدى الضيوف: - أمال فين حمزة؟ يا حاجة فاطمة..
تقول الحاجة فاطمة: - على وصول مروان راح بالسيارة يستناه عند المحطة في سوهاج ودقايق ويوصل إن شاء الله اتفضلوا... اتفضلوا...
وتم سماع طرق على الباب وصوت ينادي: يا حاجة فاطمة.
تقول الحاجة فاطمة: مين بينادي؟
قالت: أنا أم ريهام يا حاجة فاطمة.
تقول الحاجة فاطمة: انتي محتاجة استئذان وانتي أختي!!
تقول أم ريهام: دي الأصول يا حاجة فاطمة، وألف مبروك لحمزة وعقبال نجاح مروان يا رب. قالت الحاجة فاطمة: الله يبارك فيكي وعقبال ريهام إن شاء الله.. صحيح أمال فين ريهام يا حاجة عواطف؟
قالت الحاجة عواطف: أهي لسه واصلة.. تعالي يا ريهام سلمي على خالتك فاطمة وباركيلها.
تاخذ الحاجة فاطمة ريهام في حضنها وتقبلها وتقول: ليه يا ريهام؟ شهر يا بنت أختي مشوفكيش برضو ده كلام!
تقول ريهام: ألف مبروك لحمزة يا خالة، ومعلهش أنا كنت مشغولة في الامتحانات، وأمي اتصلت بيا وأنا جاية من سوهاج دلوق عشان كده جيت عليكي على طول..
تعالت أصوات الطلقات النارية أمام الدوار، فصاحت الحاجة فاطمة قائلة: أكيد حمزة ولدي وصل. وخرجت مسرعة من الدوار، وجدت حمزة أمامها فأخذته في حضنها وهي تقبّله وتقول له: مبروك يا ولدي مبروك.
يقول حمزة: يبارك ليا فيكي يا ست الحبايب.
يلتفت حمزة: ويقول كفاية ضرب نار يا عم يوسف.
يقول الحاج يوسف أرسلان: يا حمزة يا ولدي فرحتنا اليوم لا تتقدر بمال الدنيا كله كان نفسي أخويا عبد السلام الله يرحمة يكون في اليوم ده. بس معلهش البركة فيك وأخوك مروان.. تعالى يا حمزة سلّم على أهل النجع كلهم منتظرينك يهنوك ويباركولك في الدوار، تعالى يا ولدي وسيب الحاجة فاطمة تقابل حبايبها من أهل النجع، وسلم الأول على ولد عمك مصطفى، وهات يا مصطفى البندقيه من إيدك. وحمزة يأخذ ابن عمه بالأحضان ومصطفى يقول له: ألف مبروك يا بو عمو ويدخلون الدوار مع بعضهم ومصطفى يهمس في أذن حمزة ويقول له: إنت شفت ريهام ولااا لسه؟
يقول حمزة: بس لؤم يا مصطفى هو أنا لحقت يا راجل؟
ويقوم حمزة بالسلام على أهل النجع واحدًا واحدًا، وبعد السلام يجلس ويقول: الشربات يا مروان. يقول الحاج يوسف أرسلان: الناس شربت شربات يا ولدي، اعمل قهوة يا مروان.
يقول مروان: حاضر يا عم يوسف. ويدخل عند خلف مسؤول الدوار ويبلغه بعمل القهوة ويخرج وبعد قليل يدخل الدوار الحاج عبد الرحمن محمد الجيار عضو مجلس الشعب
ومعه ابنه عادل وحوالي تسعة من رجالته، ومعهم الحاج صلاح الدين أبو رحاب زوج خالة حمزة، وأبو ريهام.
وقام حمزة بالسلام عليهم
فقال النائب عبد الرحمن الجيار: ألف مبروك يا حمزة.
فيقول حمزة: الله يبارك فيك يا سيادة النائب.
يقول الحاج صلاح الدين أبو رحاب: ألف مبروك يا حمزة وعقبال أخوك مروان.
فيقول حمزة: الله يبارك فيك يا عم صلاح الدين وعقبال ريهام إن شاء الله.
اتفضلوا وهات القهوة يا خلف.
يقول خلف: حاضر يا حمزة بيه.
يبدأ النائب عبد الرحمن الجيار: الكلام ويقول ناوي على إيه يا حمزة إن شاء الله؟
يقول حمزة: في مشروع في دماغي أنا وصحابي في القاهرة هندرسه وإن شاء الله هيكون
مردوده الاقتصادي كويس.
يقول النائب الجيار: طيب ورأس المال معاك يا حمزة ولااا ناوي على إيه؟؟
يقول حمزة: وهو يرفع حاجبيه الحمد لله يا سيادة النائب الفلوس دي آخر حاجة نفكر فيها.
يقول الحاج صلاح الدين أبو رحاب: قولي يا حمزة المشروع عبارة عن إيه؟
يقول حمزة: المشروع يا عم صلاح الدين عبارة عن مصنع لإنتاج الكيماويات بس كله هيتأجل دلوق..
يقول الحاج صلاح الدين: ليه يا حمزة يا ولدي بعد الشر؟
يقول حمزة: إنت ناسي الجيش يا عم صلاح الدين إذا أخذت سنة (عسكري) هيبقى كويس، أما إذا أخذت ثلاث سنوات ظابط احتياط هيتأخر الموضوع شوية.
يقول النائب الجيار: أنا هعرض عليك فكرة حلوة هتخليك تعمل مشروعك بسرعة يا حمزة، إيه رأيك تبيع ليا أرض وبالمتر كمان مش بالفدان؟
يقول الحاج يوسف أرسلان: إيه اللي إنت هتقوله يا عبد الرحمن يا جيار إنت نسيت نفسك
ولا إيه؟
إنت جاي تبارك ولااا جاي تشتري أرض؟ هو حمزة ولد أخويا محتاج فلوس عشان يبيع أرض؟ دا إذا مكفاهش محصول الرمان معاه وربنا يبارك له موواشي تسد عين الشمس وكمان مزرعة الخيل العربي الأصيل الفرسة الواحدة معروضة عليه بالدولار كمان مش بالمصري وإنت جاي تقول بيعولي أرض!
يقاطعه حمزة قائلًا: بعد إذنك يا عم يوسف، يا حاج عبد الرحمن أنا عندي فلوس والحمد لله وبعدين أنا اشتكيت لك من قلة الفلوس! إنت بتسأل على المشاريع وأنا قولت لك لما أخلص جيش إنت جاي تشتري أرض!! دا احنا اسم النجع نجع أرسلان يعني على اسم جدي الله يرحمة عاوزني أبيع الأرض يبقى عازتنا بعد كده إيه؟ ولااا انت فاكر أنا بتاع جامعة وتعليم هفرط في الأرض دي بسهولة عشان مشاريع وكده؟ دا أنا عز الفلوس دي كلها اشتغلت في الصابون السائل. شكلك متعرفنيش يا حاج عبد الرحمن...
إن شاء الله هكبر الأرض لألف فدان بإذن الله ولاااا عشان ربنا كرمك واشتريت كم فدان بعد دخول البرلمان خلااص ناوي تقلع الناس والبلد من جدورها.
يقول النائب عبد الرحمن الجيار: لا يا حمزة مقصديش أنا قولت أخدم لو ناوي تبيع أنا أشتري.
يقول حمزة: شكرًا يا حاج عبد الرحمن على خدماتك. وعلى فكرة أنا عارف إن الأرض القبلية دخلت كردون مباني وإن الترعة القبلية جاي ليها صرف مغطى يعني أرضنا هتكون على أربع شوارع يا حاج عبد الرحمن، وبعد عمل الترعة القبلية صرف مغطى هيكون الشارع ستين متر أكبر من أي شارع في المحافظة.
ذهل النائب عبد الرحمن الجيار من معرفة حمزة بكميه هذه المعلومات، وفتح فمه وأخذ: يتأتأ.. أنا أنا أ...نا
يقاطعه حمزة قائلًا: هتأتأ لييه يا سيادة النائب؟ عامل إني معرفش وقولت في بالك أروح أضحك على الجماعة دوول.
يقول الحاج يوسف أرسلان والفرحة تخرج من عينيه: امتى يا حمزة عرفت بالموضوع ده؟؟
يقول حمزة: مش هتفرق يا عم يوسف لييه؟
علشان الأرض مباني مش مباني لا للبيع وعلى فكرة يا عم يوسف نص أرضك اللي على الترعة القبلية دخلت كردون مباني.
يقول الحاج يوسف أرسلان وفي صوته رنة سخرية: صحيح يا حاج عبد الرحمن صحيح الكلام اللي بيقوله حمزة ده؟
يقول الحاج عبد الرحمن الجيار: كلام حمزة صحيح بسم الله ما شاء الله عليه يا حاج يوسف.
يقول حمزة: تشكر يا حاج عبد الرحمن بس الكلام اللي قولته عيب وعشان الأصول
أنا مهزعلكش عشان إنت في دوارنا...
ينتفض النائب عبد الرحمن الجيار: ويقول إنت بتقول إيه يا واد عيب عليك؟
يقول حمزة: العيب عليك إنت وبعدين أنا ميتقليش يا واد يا عبد الرحمن دا أنا كبير عائلة اللي زيك مشغلوش عندي ورب الكعبة كلمة يا واد دي لولاا عشان إنت في دوارنا كنت علقتك إنت واللي معاك على الشجر بره عبرة لمن يعتبر ومن لا يعتبر وأوعى تفتكر الحصانة تفرق معانا ودي أولًا.
ثانيًا: العيب على عمي صلاح الدين أبو رحاب اللي عارف موضوع شراء الأرض وجاي معاك.
يقول الحاج صلاح الدين أبو رحاب: لااا والله العظيم يا حمزة يا ولدي أنا معرفش حاجة عن الموضوع ده ولو أعرف كنت عقلته.
يقول حمزة: ساهلة يا عم صلاح الدين نتعاتبوا بعدين.
يقوم واقفًا النائب عبد الرحمن الجيار: ويقول أمال مكناش في دواركم يا حمزة كنت عملت أكتر من كده إيه؟ السلام عليكم.
يقاطعه الحاج يوسف أرسلان يقول: بلاش الشوية دول يا سيادة النائب لينا عندك واحدة والحساب يجمع والسلام عليكم ورحمة الله وبركاته. ويقوموا بالانصراف.
ينصرف معهم الحاج صلاح الدين أبو رحاب ويسلم على حمزة والحاج يوسف أرسلان يقول له: أبقى أعاتبك بعدين يا حاج صلاح الدين. ويوصلهم للسيارات، ويرجعوا لداخل الدوار ويقول الحاج يوسف: يا مرحبا بحبايبنا.
هات يا خلف حاجة ساقعة للحبايب.
يقول خلف: حاضر يا عم يوسف.
يا حمزة؟؟
يقول حمزة: نعم يا مصطفى.
يقول مصطفى: الجزارين وصلوا هندبح كم عجل يا حمزة؟؟؟
يقول حمزة: تلات عجول إن شاء الله يا مصطفى وإذا مكفوش ندبحوا تاني. ادخل المزرعة
وهات أكبر عجول وخد مروان معاك.
يقول مصطفى: حاضر يا حمزة.
يا حمزة يا حمزة..
يقول حمزة: نعم يا عم يوسف.
يقول الحاج يوسف أرسلان: أنا رايح أشوف الجزارين عاملين إيه وإذا عوزتني ابعتلي.
يقول حمزة أرسلان: حاضر يا عم يوسف.
وفجأة دخل الدوار أحمد أبو الدهب، وعبد السلام أبو الدهب، ويوسف أبو الدهب، ويسلموا على حمزة وياخدوه بالأحضان ويقولون له: ألف مبروك يا أبو عمه.
يقول حمزة: ويبارك فيكم وفي أولادكم. وينادي: يا خلف.
يقول خلف: نعم يا حمزة بيه.
يقول حمزة: هات حاجة ساقعة لأبناء عمي أبو الدهب بسرعة.
يقول خلف: حاضر يا حمزة بيه.
وبعد شوية يدخل الدوار عماد عبد الرحيم السيوفي، وطارق عبد الرحيم السيوفي وياخدوا حمزة بالأحضان ويقولوا له: ألف مبرك يا أبو عمته.
فيقول حمزة: الله يبارك فيك يا أبو خالو اتفضلوا.
يقول عماد: لااا يا حمزة لازم أسلم على عمتي فاطمة الأول ونباركوا ليها ولاا انت عايزها تزعل مننا؟ يقول حمزة: لا يا بو خالو تعالى اتفضل.
يدخلوا المنزل والحاجة فاطمة تأخذ عماد وطارق بالأحضان وتقول: أمال فين اولاد اعمامك يا عماد
يقول عماد: احنا اللي عرفنا الأول يا عمه وأولاد أعمامي جايين في الطريق وألف مبروك لحمزة.
تقول الحاجة فاطمة: الله يبارك فيكم يا ولدي أخباركم إيه؟
يقولوا: الحمد لله يا عمة، الحال تمام.
ينادي الحاج يوسف: يا حمزة.
يقول حمزة: اتفضل يا عم يوسف.
يدخل المنزل الحاج يوسف: ويقول أخبارك يا حاجة فاطمة أنا سمعت إن أولاد أخوكي
عبد الرحيم السيوفي عندك قولت أسلم عليهم.
تقول الحاجة فاطمة: يا مرحبا يا حاج يوسف الله يسلمك ويبارك فيك.
يسلم طارق وعماد السيوفي على الحاج يوسف أرسلان.
ويقول الحاج يوسف أرسلان: أسيبكم مع عمتكم براحتكم وأروح أشوف الجزارين السلام عليكم. يقول حمزة وأولاد خاله: وعليكم السلام ورحمة الله وبركاته. بعد ما نوزع اللحمة عاوز أتكلم معاك شوية يا عم يوسف.
يقول الحاج يوسف: ماشي يا حمزة يا ولدي، نوزع اللحمة على الحبايب ونتكلموا براحتنا.
*********************************************************
يدخل المكتب النائب عبد الرحمن الجيار: ويتصل بالنائب مصطفى أحمد الخولي
نائب مدينة نصر.
ويقول: ألو سيادة النائب مصطفى أخبارك وأخبار الأولاد عاملين إيه؟؟؟
يقول النائب الخولي: الحمد لله يا سيادة النائب الحال تمام وكلنا بخير إنت أخبارك إيه؟؟
يقول الجيار: والله عايزك في خدمة يا سيادة النائب مفيش حد هيحل ليا المشكلة دي غيرك إنت.
يقول الخولي: مشكلة إي بس قلقتني؟؟
يقول الجيار: لا دي حاجة ساهلة بالنسبه ليك.
يقول الخولي: خير إن شاء الله.
يقول الجيار: معايا واحد هيقدم على الجيش ومعاه شهادة جامعية.
يقاطعه النائب الخولي: ويقول يا راجل دي حاجة ساهلة انت عاوزه عسكري؟
يقول الجيار: لا يا سيادة النائب أنا عاوزه يدخل ضابط احتياط ثلاث سنوات ويدخل أصعب سلاح
الداخل فيه مفقود والخارج مولود!
يقول النائب الخولي: ياه يا عبد الرحمن بيه دا انت كاره الراجل ده لدرجة لا توصف!
يقول الجيار: انت هتخدمني ولا لا؟
يقول الخولي: هكلم سيادة اللواء أبو طالب الخولي وهبسط له الموضوع علشان هوه لا يحب الواسطة ولاا المجاملات وإن شاء الله خير، وبعدين إنت أصلًا حالل الموضوع.
يسأل النائب الجيار: ازاي يا مصطفى بيه؟
يقول الخولي: سيادتك غالبية الناس عايزة أولادهم يدخلوا الجيش مرتاحين أما انت طلباتك مختلفة أنا لا أظن إن سيادة اللواء هيعارض متقلقش، بس في سؤال الواد صحته كويسة ولا نص نص؟
يقول الجيار: صحته ميه ميه وبيلعب تايكوندوا.
يقول الخولي: طيب كده تمام قولي الميعاد اللي هيقدم فيه الأوراق ولا تحمل هم في الموضوع ده.
يقول النائب الجيار: متشكرين يا سيادة النائب ونردها ليك في الأفراح إن شاء الله، مع السلامة.
يقول الخولي: الله يسلمك.
يدخل عادل الجيار المكتب ويقول لأبوه: ناوي على إيه؟؟؟ وليه التلات سنين اللي سمعتها في الهاتف دي يا أبويا؟
يقول الجيار: علشان يغور من وشنا شوية نعرف نلاعبهم يا ولدي. حمزة شوكه واعرة في ضهر أبوك وإمكن يسافر بعثة مع قوات حفظ السلام وينفجر فيه لغم ولا قنبلة أو أي زفت تبقى جات من عند ربنا.
فهمت يا عادل يا ولدي؟ ولعلمك أنا هجهزله في مصيبة قريب بس الأول هكلمه تاني بالذوق مقتنعش يبقى هوه اللي جابه لنفسه ويبقى قضي الأمر الذي فيه تستفتيان.
-------------------------------------------
يُمسك النائب مصطفى الخولي الهاتف ويتصل ويقول:
ألو سيادة اللواء أبو طالب أخبارك وأخبار الأولاد؟
يقول اللواء أبو طالب: الحمد لله يا مصطفى. مريم ومصطفى انت واحشهم أوي بيسألوا عليك دائمًا.
يقول النائب الخولي: إنت فاضي امتى عاوز أتكلم معاك وأشوف الأولاد وأسلم عليهم.
يقول اللواء أبو طالب: الأسلوب الأمريكي يا مصطفى لسه متغلب عليك. السرعة والمصلحة أهم حاجة.
يقول النائب الخولي: معلهش يا سيادة اللواء ما أنا مقعدتش في أمريكا يومين دا أنا قعدت 8 سنين.
يقول اللواء أبو طالب: ماشى يا مصطفى اسبقني على البيت وأنا أقل من 30 دقيقة هكون معاك أقعد مع الأولاد على ما أوصل. السلام عليكم.
يقول النائب الخولي: وعليكم السلام ورحمة الله.
يصعد السيارة النائب مصطفى الخولي ويتجه إلى منزل أخيه اللواء أبو طالب في التجمع الخامس ويصل وينزل من السيارة، ويدق جرس الباب الأمامي في السور الخاص بالفيلا.
ويفتح عويس الجنايني الباب ويهلل: يا مرحبا يا سيادة النائب.
يقول النائب الخولي: اازيك يا عم عويس؟
يقول عويس: الحمد لله يا سيادة النائب.
يقول الخولي: خد مفاتيح السيارة واركنها جوه.
يقول عويس: حاضر يا سيادة النائب.
قبل ما يدق جرس الباب الخاص بالفيلا تفتح الباب السيدة سوزان علم الدين زوجة اللواء أبو طالب
وتقول: يا أهلًا يا سيادة النائب اتفضل في الرسيبشن. سيادة اللواء أقل من ربع ساعة ويوصل. يدخل النائب الخولي الفيلا يجلس ويقول: أخبار مريم ومصطفى يا مدام سوزان؟
تقول مدام سوزان: الحمد لله دقائق ويسلموا على سيادتك .
ينزل مصطفى ومريم أبو طالب من على السلم جري في حضن عمهم مصطفى.
ويقولا وحشتنا يا عمو مصطفى.
يقول الخولي: وانتوا كمان وحشتوني أوي أوي.
أخبارك يا مصطفى في الدراسة؟ وأخبار صحتك؟
وانتي يا مريم طمنيني عليكي الصحة والتعليم أخبارهم إيه؟
تقول مريم ومصطفى: الحمد لله يا عمو كله تمام.
تقاطعهم مدام سوزان قائلة: قهوة سيادتك مظبوط يا سيادة النائب؟
يقول النائب الخولي: تمام يا مدام سوزان.
تقول مدام سوزان: دقائق والقهوة تكون عند سيادتك .
يقول النائب الخولي: شكرًا يا مدام سوزان.
ويدخل اللواء أبو طالب ويقول خليهم 2 يا مدام.
تقول مدام سوزان: الحمد لله على السلامة.
يقول اللواء أبو طالب: الله يسلمك الحقيني بالقهوة دماغي هتنفجر.
تقول مدام سوزان: حاضر دقيقة واحدة.
يقول اللوء أبو طالب: مشغول عنا يا مصطفى يا راجل المسافة قريبة جدًا من مدينة نصر للتجمع الخامس.
يقول النائب الخولي: معلهش يا سيادة اللواء طلبات أهل الدايرة مبتخلصش.
يقول اللواء أبو طالب: الله يكون العون.
بعد شرب القهوة وبعد أن تجاذبا أطراف الحديث مع بعض تدخل مدام سوزان
وتقول: الغداء جاهز.
بعد الانتهاء من الغداء..
يقول اللواء أبو طالب: لو سمحتي يا مدام ابعتي الشاي في الجنينة. تعالى يا مصطفى نقعد في الهواء الطلق وتقول إيه الموضوع اللي انت عاوزني فيه؟
وبعد أن ارتاحا في الجنينة والانتهاء من شرب الشاي
يقول النائب الخولي الموضوع بالنسبة لسياتك عادي في واحد عاوز خدمة لواحد قريبه رايح الجيش.
يقاطعه اللواء أبو طالب: ما انت عارفني يا مصطفى أنا محبش الواسطة خالص!
يقول النائب الخولي: لا سيادتك الموضوع مختلف الخدمة إنه يدخل أصعب سلاح عندكم في الجيش.
يقول اللواء أبو طالب: إيه نية الراجل اللي عاوز الخدمة يا مصطفى؟
يقول النائب الخولي: هو عاوزه يدخل أصعب سلاح وإنه واخد شهادة جامعية كمان عاوزه ياخد ثلاث سنوات علشان يتربى.
يقول اللواء أبو طالب: هو مين اللي طالب الخدمة يا مصطفى؟
يقول الخولي: النائب الجيار يا سيادة اللواء وأنا عارف إن سيادتك مش مرتاحله بس أنا وهو فيه مصالح بينا والخدمة ديه مش ضد مبادئك ولا إيه؟
يرد اللواء أبو طالب: خلاص يا مصطفى بس السلاح اللي هيدخله سلاح جبار ومفيهوش لعب وهيتم توقيعه على أوراق إذا تطلب الأمر لمد الخدمة لأكثر من ثلاث سنوات ميكونش في اعتراض.
يقول النائب الخولي: موافقين يا سيادة اللواء وهو ده المراد.
يقول اللواء أبو طالب: خلاص لما يقدم أوراقه في التجنيد هات اسمه ومتحملش هم في الموضوع ده.
يقول النائب الخولي: هو هيدخل أي سلاح يا سيادة اللواء؟
يقول اللواء أبو طالب: شوف يا مصطفى عشان متسألش عليه تاني عشان هتكون أسرار عسكرية بعد كده هيدخل سلاح القوات الخاصة.
وهيتدرب على القتال بالسلاح الأبيض، والقفز بالمظلات، والقفز الحر، والاقتحام الجوي، والاشتباك بجميع الأسلحة الخفيفة والثقيلة.
وهيتدرب على تفكيك جميع أنواع المتفجرات وزرعها ويتم عمل برنامج رماية خاص بالقناصين حيث يتم تدريب المقاتل بحيث يكون قناص ماهر يصوب من بعد 3000 متر وفي جميع أنواع الظروف بالنهار والليل بعد التدريب هتكون الفرقة جاهزه لعمل مهام خارج أرض الوطن حيث يتم إسقاط الفرقة مجتمعة أو أفراد من الطائرات فوق الجهة المراد تنفيذ العمليات بها من تدمير العدو بالمتفجرات أو قنص الهدف من بعيد.
على فكرة يا مصطفى التدريب ده مكلف جدًا وفي شباب كتير مبتكملش التدريب بس ال هيكمل وياخد الفرقة هيكون الواحد بعشرين من أي راجل عادي.
يقول النائب مصطفى الخولي: شكرًا يا سيادة اللواء لما أعرف الميعاد أبلغك السلام عليكم.
يقول اللواء أبو طالب: وعليكم السلام.
************
يسلم حمزة أرسلان على ولاد خاله عماد وطارق السيوفي ويقول لهم سلمولي على خالي عبد الرحيم.
يقول طارق: الله يسلمك يا حمزة ويسلم على عمته فاطمة.
تقول الحاجة فاطمة: الله يسلمك يا طارق استنى خد اللحمة معاك.
يقول عماد: معلهش يا عمه بلاش موضوع اللحمة ده دلوق خليها بعدين.
يتدخل حمزة ويقول: خلاص يا أمي يبقى مروان ياخد اللحمة يوصلها بالسيارة لغاية بيت خالي.
يقول عماد: السلام عليكم.
يقول حمزة: وعليكم السلام ويوصلهم لغاية السيارة.
ويسمع حمزة عمه يوسف وهو ينادي أحمد أبو الدهب.
ويقول له: تعالة يا أحمد انت واخواتك ساعدوا في وزن اللحمة، وخلوا الكيس واحد كيلو وشوفوا الشباب يوصلوا اللحمة لغاية بيوت أهل النجع.
يقول حمزة: أبدأ يا مروان انت ومصطفى ببيوت أعمامك الأول وبعد كده متخليش بيت في النجع إلا وتديهم لحمة، وبعد كده روح يا مروان لخوالك كلهم.
يقول مروان: حاضر يا حمزة هات مفاتيح السيارة الجيب علشان مصطفى يصعد المرسيدس.
يقول حمزة: ماشي يا مروان خد المفاتيح بس أسرع. خد اللحمة الجاهزة في شنط عشان ننجز
بعد ما تأكد الحاج يوسف أرسلان إن الأمور تمام والشباب مش مقصرين قال لأحمد أبو الدهب: هوصل أنا وحمزة البيت عندي شوية تابع الموقف ولو عوزت حاجة اتصل بيا.
يقول أحمد أبو الدهب: حاضر يا عم يوسف.
بقول الحاج يوسف تعالى يا حمزة: نروحوا بيت عمك يوسف نشربوا الشاي ونتكلموا براحتنا.
يوصلوا البيت ويقول الحاج يوسف: يا أم مصطفى.
تقول الحاجة تحية: يا مرحبا يا مرحبا ازيك يا حمزة يا ولدي وألف مبروك النجاح.
يقول حمزة: الله يبارك فيكي يا مراة عمي وعقبال محمود وعمر لما يخلصوا الجيش بالسلامة.
تقول الحاجة تحية: الله يسلمك يا ولدي وعقبال ما نفرح بيك.
يقول الحاج يوسف: اعمليلنا كوبيتين شاي عشان عاوز حمزة في موضوع مهم..
تقول الحاجة تحية: حاضر يا حاج.
وبعد شرب الشاي يقول الحاج يوسف: خير يا ولدي إيه الموضوع؟
يقول حمزة: الجيار يا عم يوسف شكله مش ناوي على خير خالص ومناويش يجيبها على بر.
يقول الحاج يوسف: لي يا حمزة اللي خلاك تقول كده؟
يقول حمزة: يا عم يوسف انت مش شايف وسامع هو كان بيقول إيه؟
يقول الحاج يوسف: داا انت خليته يا حمزة ميسواش تلاتة تعريفة ومشي قفاه يقمر عيش
إيه اللي قالقك تاني؟
يقول حمزة: اللي قالقني يا عم يوسف النوعية دييه من عينة الجيار اللي شبع بعد جوعه وربنا كرمه بسُلطة ميتأمنش وعامل زي الحية لسعته والقبر وأنا حاسس إنه هيفكر في حاجة مؤذية عشان كده لازم نحرص في الأيام اللي جاية يا عم يوسف.
يقول الحاج يوسف: يعني إيه يا حمزة؟
يقول حمزة: يعني يا عم يوسف نحطوا عينينا وسط راسنا ونحرصوا على أولاد عمنا وعلى الأرض وعلى المواشي وعلى كل حاجة.
ينتفض الحاج يوسف ويقول: مين يا حمزة اللي يقدر يهوب ناحية العيال ولااا الأرض! داا أنا أمحيه من على وش الأرض.
يقول حمزة: يا عم يوسف الضربة القاضية تيجي من الأمان الزايد عن الحد.
عشان كده نحرصوا والجيار مش غبي لو هيعمل حاجة مش هيعملها اليومين دول.
ولكن مناموش في العسل ناخدو حذرنا عشان لما يضرب نكونوا مستعدين ليه ألف مرة.
يقول الحاج يوسف: ننتظروا عمك أبو الدهب لما يجي من السفر من (سوق دراو) وإن شاء الله هيوصل بكراا بالجماال.
ولما يوصل نقعدوا مع بعض نشوفوا هنعمل إيه؟
يقول حمزة: تمام يا عم يوسف على ما يوصل إن شاء الله ناخدوا حذرنا ونعرفوا ولاد عمنا إن في مشكلة ونأمن كل شيء وسيب الموضوع ده عليا يا عم يوسف.
يقول الحاج يوسف: ماشي يا ولد أخويا اعمل اللي فيه المصلحة.
يقول حمزة: السلام عليكم. ويتحرك نحو الدوار.
يقول الحاج يوسف: وعليكم السلام.
************
يتم سماع طرق على الباب فتنادي الحاجة عواطف على ابنتها ريهام:
يا ريهام افتحي الباب.
تفتح ريهام الباب فتجد أبوها الحاج صلاح الدين أبو رحاب فتقول له: تعالى يا أبويا إنت نسيت المفتاح زي كل مرة؟
يضحك الحاج صلاح الدين ويقول: معلهش يا ريهام يا بنتي.
تقول ريهام: ولا يهمك يا أبويا انسى براحتك.
يكمل الحاج صلاح: انتوا جيتوا من عند أختك امتى يا عواطف؟
تقول الحاجة عواطف: جيت أنا ور يهام من ساعة أو أكتر، خير يا حاج صلاح في حاجة؟
يقول الحاج صلاح الدين: لا سيبي اللي في يدك وتعالي عاوز أتكلم معاكي شوية.
تقول الحاجة عواطف: حاضر يا حاج أديني جاية.
دخل الحاج صلاح الدين غرفة النوم وبعد قليل دخلت خلفه الحاجة عواطف
وقالت: قلقتني يا حاج صلاح الدين فيه اييه؟
يقول الحاج صلاح الدين: بس النهارده حصل موقف غريب
النائب الجيار رمى طعم لحمزة أرسلان وقاله لو عاوز تعمل مشروع ولا حاجة وممعاكش فلوس أشتري أرض من أرضكم.
تقول الحاجة عواطف: يا لهوي يا حاج صلاح وحمزة ولد أختي قاله اييه؟
دا حمزة مبيكرهش سيرة كد سيرة بيع الأرض
يقول الحاج صلاح الدين: يا حاجة عواطف دا حمزة بهدل النائب عبد الرحمن الجيار وفي نفس الوقت بالأدب.
تفول الحاجة عواطف: ازاي يا حاج صلاح الدين؟
يقول الحاج صلاح الدين: أقولك يا حاجة، حمزة قال للنائب الجيار انت طمعان في الأرض علشان موضوع الكردون والأرض هتبقى مباني علشان كده النائب الجيار معرفش يرد على حمزة وقعد يتأتأ يتلخبط في الكلام.
تقول الحاجة عواطف: يا حاج صلاح الدين حمزة ولد أختي عاوز فلوس دا كفاية الأرض اللي معاه إذا كانت الأرض الطينية ولا الأرض اللي جنب الجبل ولا مزرعة المواشي ولا مزرعة الجمال ولا إسطبل الخيل العربي الأصيل كله ده ويعوز يبيع أرض باين الجيار اتجنن!
يقول الحاج صلاح الدين: دا أنا فاكر لما حمزة دخل كلية العلوم وآخر سنة أولى جامعة عمل مع أصحابه مشروع المنظفات وهو اللي صنع التركيبة ووزعها للعاوز وهو له نسبة خلى سوهاج كلها فيها منظفات كويسة ورخيصة في نفس الوقت.
وقال لي أيامها جملة لن أنساها خالص
تقول الحاجة عواطف: إيه الجملة ديه يا حاج صلاح الدين؟
يقول الحاج صلاح الدين: قال لي " الطموح بلا عمل مثل سفينة على اليابسة"
أنا أيامها قولت له يعني إيه يا حمزة يا ولدي
قال لي يعني يا عم صلاح الدين اللي عاوز يكبر يشتغل في أي حاجة حلال وميستناش مصروف من أبوه حتى ولو كان غني زي أبويا يا عم صلاح الدين، وميستناش شغل الحكومة واللي معاه فكرة ينفذها على طول إذا نجحت الحمد لله وإذا فشلت يكفيه شرف المحاولة وعندها يكون معه خبرة من الفشل ويكون دافع له حتى ينجح
وميقعدش الواحد نفسي أعمل نفسي أروح نفسي أتحرك!
ولا اييه رأيك يا عم صلاح الدين؟
تقول الحاجة عواطف: طب انت قولت له اييه يا حاج صلاح الدين؟
يقول الحاج صلاح الدين: أنا أيامها كنت فرحان بيه قوي وقلت له طيب المشروع بتاع المنظفات لو الناس قلدتك هتعمل اييه؟
قال لي يا عم صلاح أنا عارف إن المشروع ده بتاع سنة أو سنتين بالكتير وبعدين هيرطرط في السوق وأنا عامل حسابي على كده
أنا شغال فيه علشان أشتري السيارة الجيب بتاعتي من فلوسي وماخدشي من فلوس أبويا
أما بعد التخرج في مشروع تاني خالص يا عم صلاح الدين.
شفتي يا حاجة عواطف حمزة اللي قاله حصل بعد سنتين بطل المنظفات واشتري السيارة الجيب من فلوسه وكان هيصرف على نفسه في الكلية من فلوسه ومحملش أبوه ولا جنيه طوال مدة دراسته.
واللي يفرح يا حاجة عواطف كام شاب دخل كلية العلوم قبل حمزة ومجاتش فكرة المنظفات في دماغهم الواد شاطر يا حاجة عواطف وفي نفس الوقت يتخاف عليه.
تقول الحاجة عواطف: ليه وقعت قلبي يا حاج صلاح؟
يقول الحاج صلاح الدين: حمزة يا حاجة عواطف انتي شيفاه شاب محترم ومؤدب وزينة الشباب صح؟
تقول الحاجة عوطف: صح اييه المشكلة يا حاج صلاح؟
يقول الحاج صلاح الدين: المشكلة إن خلف الأدب والاحترام والحجات الكويسة دي مستخبي وراها براكين وأعاصير يا حاجة عواطف ولو حد نكش حمزة وهو ميعرفوش سعتها البراكين والأعاصير اللي جواه هتتطلع ومحدش هيعرف اللي هيحصل سعتها والدليل النهارده الجيار بس نسي نفسه وقال لحمزة يا واد فقال له حمزة: علشان انته في دوارنا كنت علقتك على الشجر انت واللي معاك.
تفول الحاج عواطف: إن نشاء الله ربنا هيسترها يا حاج صلاح الدين قوم نتعشى.
************
يا حمزة يا حمزة.. أخذت الحاجة فاطمة تنادي على حمزة وهو في الدوار يرد حمزة: نعم يا أمي؟ يحضر حمزة لعند أمه الحاجة فاطمة ويقول: نعم يا ست الكل.
تقول الحاجة فاطمة: اتصل عمك يوسف على الهاتف الأرضي وهيقولك عمك أبو الدهب وصل من دراو وتعالى اقعد معاهم.
يقول حمزة: حاضر يا أمي نص ساعة وأركب السيارة وأروح لعمي.
تقول الحاجة فاطمة: بس خلي بالك عمك أبو الدهب عصبي وأنا معوزاش تزعل من أعمامك.
يقول حمزة: متخفيش عليا يا ست الحبايب ولدك راجل السلام عليكم يا أمي. ويرجع حمزة على الدوار وبعد قليل يصعد السيارة ويمشي على الطريق الرئيسي وهو ماشي بالسيارة يقول: السلام عليكم يا حاج متولي.
يقول الحاج متولي: وعليكم السلام يا حمزة يا ولدي اتفضل.
يقول حمزة: شكرًا يا حاج متولي مرة تانية إن شاء الله.
يمشي حمزة في الطريق الواصل لبيت عمه أبو الدهب وفجأة تقطع عليه الطريق سيارة جيب وينزل منها رجلين طول بعرض ويقولوا لحمزة: انزل عوزينك معانا.
يتجمع الناس من أهل البلد فيرد حمزة ضاحكًا: عوزيني معاكم على فين الأول إيه قلة الأدب ديه وبعدين الأشكال ديه مش من أهل النجع انتوا مين ومعرفينش انتوا بتكلمو مين؟
يقول له الأول هتيجي معانا بالأدب ولا لأ؟ قبل ما يكمل كلامه يقفز حمزة أرسلان من السيارة وتدور معركة صغيرة بينه وبين البودي جارد وفي أقل من خمس دقائق يكونوا متكومين على الأرض بعد ما كتفهم حمزة مع بعض سألهم: انتوا مين هتتكلمو بالذوق ولا لأ؟
يصل الحاج عبد العاطي ويقول: يا حمزة يا ولدي دول رجالة النائب عبد الرحمن الجيار أنا شفتهم في دواره من كام يوم.
يسألهم حمزة: انتوا تبع الجيار؟
يقولون: أيوه دا هو عاوز يتكلم معاك شوية.
يقول لهم حمزة: طيب متكلمتوش من الأول بالأدب ليه؟
يقول حمزة: طيب الجيار عارف الدخلة ديه هتاكل معايا وراح ضارب البودي جارد في وشه.
يتدخل الحاج عبد العاطي ويقول: خلاص يا حمزة يا ولدي علشان خاطري عديهه المرة دي.
يقول حمزة: خاطرك غالي يا عم عبد العاطي وهسيبهم متكتفين وبس الأول أشوف الراجل اللي باعتهم الأول عاوز إيه
يصعد حمزة السيارة ويتجه إلى فيلا عبد الرحمن الجيار يصل حمزة لفيلا الجيار يجد مبنى إن دل فإنه يدل على بزخ شديد وإظهار مقصود للثراء الفاحش ينزل من السيارة ويقول: يا عبد الرحمن يا جيار. ويخرج من الفيلا الجيار ويقول وهو هادئ ومكر الثعالب يقطر من فمه: مش المفروض تقولي يا سيادة النائب؟
يقول حمزة: وهو المفروض تبعت لي بودي جارد هي حصله لي كده
يقول الجيار: لا يا حمزة دا سوء تفاهم صغير متكبرهاش امال وبعدين يا حمزة أنا المفروض أزعل دا انت اللي ضربت رجالتي وبهدلتهم آخر بهدلة وكمان كتفتهم يا راجل!
يقول حمزة: بالسرعة دي وصلولك الأخبار؟
يقول الجيار: انت ناسي يا حمزة الهاتف المحمول والتصوير كمان دا صورك صوت وصورة وانت بتضربهم يا راجل وبعدين تعالى داخل الفيلا نتكلمو مع بعض حققك عليا اتفضل.
يدخل حمزة الفيلا ويقعد ويقول للجيار: نعم!
يقول الجبار: أنا اتكلمت معاك على الأرض وانت فهمتني غلط
يقول حمزة: طيب فهمني الصح
يقول الجيار: أنا عاوز أشتري أرض الإصلاح الزراعي اللي جنب الجبل يا حمزة والأرض ديه اشتراها المرحوم أبوك الحاج عبد السلام أرسلان الله يرحمة بتراب الفلوس لو حسبناها بأسعار اليومين دول.
يقول حمزة: يااه يا سيادة النائب دا انت فكرتني بحكاية الأرض اللي جنب الجبل ودي حكاية غالية عليا قوي.
****************************
يا ريهام؟
أخذت الحاجة عواطف تنادي على ابنتها ريهام فحضرت ريهام وقالت: نعم يا أمي.
فقالت الحاجة عواطف: تعالي يا بنتي خدي مفتاح السيارة علشان جهزت الأكل للرجالة اللي شغالين في الأرض علشان أبوكي اتأخر والظهر على أذان.
تقول ريهام: حاضر يا أمي هاتي المفتاح. وخرجت ريهام وفتحت شنطة السيارة ورجعت للمنزل وأخذت تضع الأكل في السيارة ورائحة الأكل الجميلة تملأ المكان.
وريهام تغازل أمها قائلة: أيوه يا عواطف الأكل يهبل علشان كده أنا عرفت أبويا واقع في حبك لشوشته ليه؟
تضحك الحاجة عواطف وتقول: ربنا يخلي أبوكي ليا ويديه الصحة يا رب وبعدين على مهلك وانتي على الطريق سوقي بالراحة.
تقول ريهام: حاضر يا أمي متخافيش عليا وبعدين أنا مش أول مرة أسوق السيارة يا أمي
تقول الحاجة عواطف: ماشي يا ريهام آدي اللي أخدناه من الجامعة الرد الجاهز على طول روحي يا بنتي ربنا يجعلك في كل خطوة سلامة يا رب.
تمشي ريهام بالسيارة وعلى الطريق الرئيسي الواصل للأرض التي تقع بين نجع أرسلان ونجع سعفان التابعان لمركز ومدينة سوهاج
وفجأة سيارة ربع نقل تقطع الطريق على ريهام فتوقف ريهام السيارة بسرعة وتنزل ريهام من السيارة وقبل أن تتكلم ينزل من السيارة المعترضة الطريق ابن عمها جاسر أبو رحاب
فتقول ريهام: دي وقفة يا جاسر؟!
يقول جاسر: انتي رايحة فين يا ريهام؟!
فتقول ريهام: انت مرديتش على سؤالي يا جاسر وبعدين انت مالك أنا رايحة فين ولا جاية منين
يقول جاسر علي أبو رحاب: انتي متكبرة على اييه يا ريهام هو مفيش حد غيرك دخل الجامعة ولا اييه؟
تقول ريهام: برضو ده ميخصكش في حاجة المهم انت واقف في طريقي ليه؟
أنا عاملة حساب للقرابة اللي بينا لغاية دلوق.
يرد جاسر: يعني انتي هتقدري تعملي اييه يا بت انتي؟
بكره هجوزك لأخويا وائل وبعد كده الأرض والسيارات والدوار وكل حاجة هتكون ملكنا وبعد كده إذا اتكلمتي نص كلمة هخلي وائل يضربك بالجذمة.
تقول ريهام: اتجوز مين ياد وائل الساقط إعدادية! يا معفن وكمان يضربنى بالجذمة!!
وتفتح طابلوه السيارة وتخرج المسدس وتضرب جاسر بالرصاص حتى أفرغت المسدس ولم
تصبه ولولا أن دخل جاسر السيارة بسرعة كان الرصاص غربلة.
وريهام تكمل وهي في كامل غضبها عايز يا جاسر تورث أبويا وهو على قيد الحياة
طيب (ورب الكعبة) إن شاء الله في خلال سنة هيكون معايا أخ من صلب أبويا وهيورث
كل حاجة يا جاسر.
ولو راجل أيامها ابقى اتكلم نص كلمة. وترجع بالسيارة للخلف وتمشي بجواره على الطريق
وتكمل على الطريق حتى تصل لأبوها الحاج صلاح الدين أبو رحاب.
وتنزل الأكل والشاي والمياه الباردة من السيارة وريهام صامتة وبعد انتهاء العمال من الغداء : يا ريهام يا ريهام.
تقول ريهام: نعم يا أبويا.
يقول الحاج صلاح الدين أبو رحاب: مالك يا بنتي ساكتة؟ في حاجة؟
قبل ما تتكلم ريهام نصف كلمة أخذ الحاج عبد الحميد أحمد الضوي عمدة نجع سعفان
يُنادي على الحاج صلاح الدين ويقول: يا حاج صلاح الدين.
يقول الحاج صلاح الدين: تعالى يا حاج عبد الحميد اتفضل.
يجلس الحاج عبد الحميد الضوي ويبدأ الكلام قائلًا: إيه اللي حصل على الطريق يا حاج صلاح الدين؟
يقول الحاج صلاح الدين: خير يا عمدة إيه اللي حصل؟
يقول الحاج عبد الحميد الضوي: أنا سمعت الناس على الطريق ممعهاش سيرة غير بنتك.
ينتفض الحاج صلاح الدين واقفًا ويقول: مالها بنتي يا عمدة؟!
يقول الحاج عبد الحميد الضوي: متقلقش يا حاج صلاح الدين بنتك ب100 راجل.
يقاطعه الحاج صلاح الدين ويقول له: اتكلم يا عمدة هات من الآخر.
يقول الحاج عبد الحميد: شوف يا حاج صلاح الدين الناس بتقول إني في سيارة قطعت الطريق على بنتك وهي جاية لك على الأرض هنا وبنتك ضربته بالرصاص والحمد لله متصابش.
يقول الحاج صلاح الدين: عشان كده انت جاى يا عمدة؟؟
يقول الحاج عبد الحميد الضوي: وهو يقسم بأغلظ الأيمان أنه أتى يطمئن على ريهام
ويقول: احنا إخوة يا حاج صلاح الدين
يقول الحاج صلاح الدين أبو رحاب: احنا أكتر من الاخوات يا عمدة
يقول الحاج عبد الحميد الضوي: طيب أنا اطمنت على بنتك والحمد لله قبل ما أمشى انت عرفت إيه اللي جرى في نجع أرسلان يا حاج صلاح الدين؟
يقول الحاج صلاح الدين: لا يا عمدة أنا في الأرض من بعد الفجر خير فيه ايه؟
يقول الحاج الضوي: شوف يا حاج. حمزة أرسلان ضرب الحرس الشخصي للنائب عبد الرحمن الجيار عضو مجلس الشعب وبعد ما ضربهم كتفهم في السيارة بتاعتهم وبعد كدا راح لفيلا الجيار وحتى اللحظه دي أعمام حمزة عبد السلام أرسلان وأولادهم والعائلة كلها متجمعين عند الدوار بسلاحهم وربنا يستر وتعدي على خير، هو انت متعرفش المشكلة دي سببها إيه
يا حاج صلاح الدين؟
يقول الحاح صلاح الدين أبو رحاب: والله يا عمدة عبد الحميد النائب الجيار غلطان غلط شديد وانت عارف إن حمزة أرسلان زي ولدي بالظبط وأمه أخت أم ريهام بنتي.
يقول الحاج عبد الحميد الضوي: أنا عارف صلة القرابة عشان كده أن قلت لك عشان الموضوع يهمك بس إيه الغلط اللي عمله النائب الجيار بالضبط؟
يقول الحاج صلاح الدين: الموضوع إن النائب الجيار عرض إنه يشتري أرض من حمزة أرسلان وحمزة قال له لا أنا معنديش أرض للبيع. شكله يا حاج عبد الحميد النائب الجيار بعت الحرس لحمزة قلو أدبهم عليه علشان كده عمل اللي عمله
والناس يا عمدة عبد الحميد شايفة حمزة أرسلان شاب محترم ومتربي ومتعلم تفتكر إنه ده ضعف ولكن يا حاج عبد الحميد الأدب والاحترام اللي في حمزة أرسلان وراهم إعصار لو حد قرب منه أو من حاجة تخصه وعلشان الإعصار ده ميتفتحش ربنا يهدي النائب الجيار.
يقول الحاج عبد الحميد الضوي: والله العظيم يا حاج صلاح الدين. حمزة أرسلان أنا قعدت معاه كام مرة من مدة فعلًا الواد ده محترم ومؤدب وكمان ذكي قوي وإنه يرفض بيع الأرض كبر في نظري قوي وعلى كلامك إذا ضغط عليه الجيار في الموضوع هيخلي حمزة أرسلان يقلب (طاغية).
يقول الحاج صلاح الدين أبو رحاب: ربنا يسترها يا عمدة
يقول العمدة عبد الحميد الضوي: طيب يا حاج صلاح الدين السلام عليكم
يقول الحاج صلاح الدين: وعليكم السلام ورحمة الله وبركاته شرفتنا يا عمدة.
يُنادي الحاج صلاح الدين: يا ريهام.
تقول ريهام: نعم يا أبويا.
يقول الحاج صلاح الدين: مين يا ريهام اللي قطع عليكي الطريق وخلاكي تضربيه بالرصاص؟
تقول ريهام: جاسر ولد عمي علي أبو رحاب يا أبويا.
يقول الحاج صلاح الدين طيب جاسر يقطع عليكي الطريق ليه؟ طيب لما أشوفه
تقول ريهام: لو سمحت يا أبويا سيب الموضوع ده واعتبر إنه محصلش أنا ضربته بالنار وحضرتك كإنك متعرفش حاجة ولو جاسر على أبو رحاب جالك قول له ريهام زي أختك
علشان خاطري يا أبويا قول له كده. تمام يا أبويا؟
يقول الحاج صلاح الدين تمام يا بنتي أنا واثق فيكي ثقة كبيرة قوي قوي
تقول ريهام بجمله الثقة: يا أبويا أنا عاوزاك تتجوز!!!
يندهش الحاج صلاح الدين ويقول انتي هتقولي اييه يا ريهام دي أمك عشرة عمري ازاي يا بنتي ازاي؟
تقول ريهام ده نعم العقل يا أبويا انت تتجوز سيب أمي أنا هعرف أقنعها وربنا يكرمك بولد أو أكتر يكونوا ضهر ليك وليا من بعدك بعد عمر طويل ليك يا أبويا انت راجل عارف ربنا
وبعدين علشان الأولاد وربنا حلل للراجل أربعة يا أبويا وبعد إذنك أنا عارفة عروسة مناسبة ليك. هي أرملة وسنها في حدود 28 سنة وكان معاها بنت ماتت يعني كان معاها أولاد وناسها طيبين وجمالها متوسط يعني ولا حلوة قوي ولا عفشة لا سمح الله هروح أجس نبض العروسة واهلها وبعد كده هكلم أمي في موضوع جوازك السلام عليكم يا أبويا.
يقول الحاج صلاح الدين وعليكم السلام يا ريهام يا بنتي
تركب ريهام السيارة وتمشي حتى تصل لمدرسة أرسلان الابتدائية وتقف تسأل عن منزل الحاج عبد العاطي علي عبد العاطي
تقول سيدة بيته آخر الشارع يمين بعد السوبر ماركت بتاع إسماعيل وتسألها انتي ريهام بنت الحاج صلاح الدين؟!!!
تقول ريهام نعم يا خالة.
فتقول السيدة بسم الله ما شاء الله تبارك الله فيما خلق اتفضلي اشربي معانا الشاي
تقول ريهام شكرًا يا خالة في الأفراح إن شاء الله
تصل ريهام لمنزل الحاج عبد العاطي علي عبد العاطي وتنزل من السيارة المرسيدس وتنادي يا عم عبد العاطي تفتح الباب هند عبد العاطي وتقول: يا مرحبا ريهام أبو رحاب عندنا! اتفضلي
تقول ريهام: الله يبارك فيكي حضرتك هند
تقول هند: مظبوط اتفضلي
تقول ريهام عمي عبد العاطي موجود؟
تقول هند زمانه جاي اتفضلي اشربي الشاي يكون وصل
تدخل ريهام منزل الحاج عبد العاطي وحضرت الست محاسن أم هند وقامت بالترحاب وبعد شرب الشاي قالت ريهام: صلي على النبي يا خالة محاسن
قالت الست محاسن عليه أفضل الصلاة والسلام
وأكملت ريهام قائلة: أنا جاية في نسب طالبة يد هند لأبويا الحاج صلاح الدين أبو رحاب
احمر وجه هند خجلًا ولم ترد. أكملت ريهام وقالت أبويا الحمد لله صحته كويسة والحالة المادية الحمد لله يقدر يصرف على عشر بيوت وقبل ما تقولوا أي شيء الجوازة دي علشان الأولاد وإن شاء الله إذا حصل نصيب هنبقى أنا وهند زي أختين ولما ربنا يكرمها بأولاد هيكونوا اخواتي وأولادي في نفس الوقت ومعاكم 24 ساعة وعاوزة الرد (أيوه تقضي مصلحة ولا تقضي مصلحة) ومهزعلش بس أنا عاوزة أجوز أبويا خلال 10 أيام ومتقلقوش من حاجة الجهاز عليا أنا ومتفهموش غلط انتوا ناس كويسين وعمي عبد العاطي محترم وكله فلوس بس جهاز العروسة نقوط (هديه) مني لامرات أبويا. والموضوع التاني أمي متقلقوش منها الحمد لله أبويا معاه بدل البيت تلاتة العروسة هتدخل في بيت لوحديها من بابه.
قالت الست محاسن: بسم الله ما شاء الله عليكي يا ريهام يا بنتي كلامك حلو ومرتب وانتي مخلتيش لينا أي سؤال وزي ما قولتي نشاور عمك عبد العاطي وإن شاء الله خير
وتم سماع طرق الباب وقامت هند عبد العاطي وفتحت الباب وقالت حمد لله على سلامتك يا أبويا
قال الحاج عبد العاطي: الله يسلمك يا هند
قالت هند سلم يا أبويا على ريهام صلاح الدين
يقول الحاج عبد العاطي ريهام عندنا يا مرحبا بالبنت اللي ب100 راجل بس الأول ضربتي ولد عمك بالرصاص ليه يا ريهام هو الموضوع كان مستاهل للدرجة دي؟
تفزع الست محاسن أم هند وتقول ليه يا بنتي إيه اللي وصل الموضوع لضرب الرصاص؟؟!!
تقول هند اهدي يا أمي أكيد الموضوع واعر قوي
قالت ريهام مظبوط يا هند الموضوع إنه قل أدبه عليا وقال لي هجوزك اخويا وائل وهخليه يضربك بالجذمة.
علشان كده ضربته يا خالة محاسن وبعدين متقلقيش المسدس مرخص باسمي وقانوني
تقول هند طيب مش انتي مخطوبة لحمزة أرسلان ولد خالتك
احمر وجه ريهام خجلًا وقالت موضوع الخطوبة ده كان شفهي بين أبويا وبين المرحوم عمي عبد السلام أرسلان أبو حمزة من مدة بس إن شاء الله هيبقى رسمي قريب
يقول الحاج عبد العاطي إن شاء الله نفرح بيكم قريب يا بنتي بس المشكلة اللي بين حمزة أرسلان والنائب الجيار تخلص على خير.
تقول ريهام مشكلة إيه يا عم عبد العاطي؟
يقول الحاج عبد العاطي ازاي يا ريهام انتي معندكيش خبر لدلوق الحكاية دي منشورة على النت حمزة أرسلان وهو بيضرب الحرس الشخصي بتاع النائب الجيار.
تقول ريهام: والله يا عم عبد العاطي أنا كنت في الأرض وانت عارف الأرض على حدود نجع سعفان وأنا جاية من الطريق الغربية ومبصيتش في الهاتف وربنا يهدي النائب الجيار!!
حمزة أرسلان ولد خالتي لو حط حد في دماغه ربنا يستر على ال هيحصل أنا بقول كده مش عشان حمزة ولد خالتي.
يقول الحاج عبد العاطي: يا ريهام يا بنتي انتي هتعرفيني على حمزة يا ريهام دا أنا من مدة اشتريت جمال (مفرد جمل) من الحاج أبو الدهب أرسلان والموضوع ده كان بعد وفاة الحاج عبد السلام أرسلان أبو حمزة الله يرحمة بشهر تقريبًا وأنا دفعت الفلوس مقدم واتفقنا على السعر
ولما جاب الجمال يا ريهام يا بنتي زود السعر عليا فأنا قولت ليه يا حاج أبو الدهب؟
احنا متفقين ساعتها صوته عليي عليه وأنا زعلت يا بنتي أبو الدهب أرسلان عائلتهم أساس البلد
وأنا راجل على قد حالي.
تقاطعه ريهام وتقول: انت أحسن الناس يا عم عبد العاطي.
يقول الحاج عبد العاطي: الله يبارك فيكي يا بنتي ويُكمل كلامه وأنا خارج من الدوار قابلني حمزة الله يبارك فيه وقال لي أخبارك إيه يا عم عبد العاطي قولت له وأنا زعلان الحمد لله فوقف وقال فيه إيه قولت له مفيش، فقال حمزة والله العظيم لتقول فيه إيه أنا مش زي ولدك فقولت له ربنا يعلم غلاوتك عندي يا ولدي بس مش عاوز أدخلك في مشاكل مع عمك أبو الدهب
رد عليا حمزة وقال لا يا عم عبد العاطي قول الحق حق يا عم عبد العاطي الحاج عبد السلام أرسلان خلف راجل ورب الكعبة الحق لو كان عند مين لتاخد حقك وزيادة فحكيتله الحكاية ودخل لعمه أبو الدهب وقال له يا عم أبو الدهب عم عبد العاطي مش دفع الفلوس مقدم
وقال الحاج أبو الدهب أرسلان له بس الأسعار زادت يا حمزة.
فقال له حمزة الله يبارك فيه يا عم أبو الدهب إذا الأسعار انخفضت كنت هتدي عمي عبد العاطي حاجة؟
فقال الحاج أبو الدهب ب: لا مهديهش حاجة
فقال حمزة: يبقى نفس المبدأ يبقى عمي عبد العاطي ياخد الجمال وبنفس السعر يا عم أبو الدهب.
أخذ الحاج أبو الدهب أرسلان يقول ازاي يا ولد اخويا هتحكم عليا
يقول حمزة لو هتخليها كده أنا هدفع الفرق من فلوسي يا عم أبو الدهب
يكمل الحاج عبد العاطي ويقول: اتكسف الحاج أبو الدهب وأعطاني الجمال بنفس السعر اللي متفقين عليه بسبب تدخل حمزة أرسلان الله يبارك فيه
فيا ريهام يا بنتي حمزة أرسلان بقبيلة وحدة وربنا يخليه لشبابه وانتوا مناسبين لبعض يا ريهام وربنا يتمم ليكم على خير.
تقول ريهام: الله يبارك فيك يا عم عبد العاطي وقامت بالسلام على هند والست محاسن أم هند وقالت السلام عليكم.
فقالوا: وعليكم السلام ورحمة الله وبركاته.
وهي خارجة من المنزل تخرج معها الست محاسن
وتقول لها ريهام: هستنى الرد على موضوع الجواز.
تقول أم هند: إن شاء الله قريب مع السلامة يا ريهام.
تركب ريهام السيارة وتخرج التيلفون المحمول وتدخل على الفيس بوك وتجد رسائل من صديقاتها فتفتح الرسائل فتجد فيديو حمزة أرسلان وهو يضرب الحرس الشخصي للنائب عبد الرحمن الجيار عضو مجلس الشعب عن الدائرة.
تبتسم ريهام وتقول في نفسها: ااااه يا حمزة امال أنا بحبك قوي ليه والله انت وحدك بقبيلة زي ما قال عمي عبد العاطي. وترجع وتقول ربنا يستر وتعدي على خير. وتتصل بالهاتف وتقول: ألو.
تقول المهندسة هالة عبد العال: ياااه يا ريهام لسه فاكراني برضو كده المدة الطويلة دي متتصليش بيا!
تقول ريهام: معلهش يا باشمهندسة.
تقاطعها هالة تقول: مهندسة اييه؟ اييه الرسميات دي هو احنا بينا الكلام ده؟
تقول ريهام سيبك من العتاب دلوق وخلينا في الشغل
تضحك هالة عبد العال وتقول اييه يا ريهام ناوية تشتغلي في المقاولات ولا اييه
تضحك ريهام وتقول مقاولات اييه يا هالة الموضوع إن معايا بيت عاوزاكي تشطبيه ليا في 10 أيام تقاطعها هالة وتقول الله أكبر يبقى خلاص فرحك قرب
تقول ريهام الله يسامحك ولو هو فرحي أنا مالي بالتشطيب طيب بلاش أشتم.
تضحك هالة وتقول صحيح طيب امال مين اللي هيتجوز.
تقول ريهام اللي هيتجوز هو أبويا الحاج صلاح الدين أبو رحاب
تفزع هالة وتقول مين يا ريهام وتكمل وتقول هتجوزي أبوكي على أمك يا ريهام اييه اللي حصل في الدنيا؟
تقول ريهام يا هالة صلي على النبي وقولي عليه افضل الصلاة والسلام انتي هتيجي امتى علشان تشوفي البيت؟
تقول هالة عبد العال أكيد الموضوع واعر قوي علشان تاخدي القرار ده طيب بكره هنعدي عليكي أنا وجوزي المهندس عماد نشوف البيت وتحكيلي الموضوع بالظبط
تقول ريهام مع السلامة يا هالة وميعادنا بكره إن شاء الله.
وتُغلق الهاتف وتنطلق للمنزل وتصل وتفتح أمها الحاجة عواطف الباب وتقول ليه اتأخرتي يا ريهام لغاية دلوق؟
تنفجر ريهام في البكاء وترتمي في حضن أمها الحاجة عواطف!!!!
تقول الحاجة عواطف: إيه يا بنتي اللي جرى وخلاكي تبكي؟ دا انتي عمرك ما بكيتي ولا مرة طول عمرك قوية، إيه اللي جرى؟ الموضوع ده يخص جاسر ولد عمك؟
تقول ريهام: عايرني يا أمي بأني من غير أخ علشان كده ضربته بالنار!!
تندهش الحاجة عواطف وتقول الناس ممعهاش غير سيرة ريهام بنت الحاج صلاح الدين أبو رحاب ضربت ولد عمها بالنار علشان قطع الطريق عليها.
اتصلت على أبوكي وطمني عليكي بس انتي رحتي فين؟
انتي ماشية من عند أبوكي من مدة!!
تقول ريهام كنت هشوف عروسة لأبويا يا أمي إن شاء الله هجوز أبويا في خلال 10 أيام يا أمي.
تجلس الحاجة عواطف على الأرض وتقول: اييه اللي بتقوليه يا ريهام عاوزة تجوزي أبوكي؟
تقول ريهام: أنا يا أمي أول مرة حد يقهرني النهارده
جاسر الخسيس يقولي هجوزك لوائل وهاخد الأرض والسيارات والبيوت وكل حاجة وكمان يقول هخليه يضربك بالجذمة.
علشان كده قلت له إن شاء الله هيكون معايا أخ من صلب أبويا في خلال سنة.
فأنا يا أمي عاوزاكي متزعليش من الموضوع ده الله يبارك فيكي
تقول الحاجة عواطف: أنا يا بنتي قلت كذا مرة لأبوكي اتجوز وهو مرضيش
تقول ريهام: المرة دي مختلفة علشان أنا اللي عاوزاه يتجوز يا أمي
لا أبويا عاوز يتجوز ولا حاجة أنا عوزاه يتجوز علشان الخلفة وبس
تقول الحاجة عواطف: ماشي يا ريهام اللي انتي عوزاه اعمليه
ويتم سماع طرق الباب
تقول الحاجة عواطف: ادخلي يا ريهام اغسلي وشك من الدموع علشان محدش يعرف إنك كنتي بتبكي.
تقول ريهام: حاضر يا أمي.
وتفتح الحاجة عواطف الباب.