وفاء : دلوقتي إحنا رايحين لطنط مني لو سمحتوا زي ما قولتلكم الأدب الأدب الأدب مش هتكلم تاني
وفاء : إستعجل شوية يا أحمد
أحمد : أكتر من كده تعالي إنتي سوقي
وفاء : سارة نلم نفسنا وبلاش خناق مع ولاء
سارة : هي أصلا غلسة ياماما وإنتي عارفة
وفاء : عارفة يا حبيبتي بس نلم نفسنا ومش لازم نقعد نقول أنا جايبه درجات أحسن منك والافلام دي وإنتي يا عروسة
سلمي : نعم
وفاء : مش عاوزة رغي كتير مع الزفت إبنها فاهمة هي كلها ساعة بالكتير نعمل الواجب ونمشي
سلمي : خلاص أنا هتكتم مش هفتح بوقي أصلا
وفاء : يبقي أحسن برده وإنت يا كوكي
كريم : أنا عاوز أعمل بي بي
وفاء : إنت يابني مابتبطلش هاتي الإزازة يا سلمي
سلمي : أنا بقررف ياماما إيه بقي ده
وفاء : يا حبيبتي أنا اللي همسكها مالكيش دعوة هاتيها إنتي بس وأنت بالراحه يا أحمد عشان ما يغرقش العربية
وفاء تستطرد : إتفقنا يا حبابيبي مش عاوزة أمد إيدي علي حد هناك أو أهزأكم قدام الناس .
أحمد : عادل جوزها ده بارد أوي بكلمه بقوله أحنا في السكة بيقولي تشرفوا
وفاء : عاوزة يقولك إيه يا أحمد يزغرط يعني وبعدين سيب الموبيل وركز الله يكرمك
أحمد : لا بس مفيش حماس كده في الرد
وفاء : حماس وفتح مين بس حقك عليا نعمل أم الواجب وننقطها عشان العيل الجديد ونمشي مش هنناسبهم إحنا
أحمد : ماتعرفيش بيقدموا إيه في الاحوال دي
وفاء : مغات يا أحمد بيقدموا مغات الست لسه والده هيقدموا إيه يعني خروف مشوي علي الفحم
سلمي : ماما أنا مش بحب المغات
وفاء : أحسن يا حبيبتي هتوفري قلعي أخوكي البنطلون يلا
احمد : خلي بالكم الحته الجاية دي فيها مطبات
وفاء : إنت اللي خلي بالك الواد بيعمل في الازازة
سارة : ماما لو ولاء غلست عليا أعمل إيه
وفاء : ماتعمليش أقعدي جنبي وماتنطقيش
سارة : بس أنا بزهق
وفاء : معلش أزهقي شوية إنتي مزهقانا علي طول
سلمي : بابا سيب الموبيل عشان الطريق
أحمد : إنتي مالك يا زفته إنتي
وفاء : أحماااااااااد حاسب الميكروبااااااااااااص
دششششششششششششششششش
.
.
.
وفاء : سلاموا عليكم
مني : أهلا أهلا يا وفاء إيه مالكم مبلولين ليه كده وإيه الريحه دي
كريم : اصل بابا ...
وفاء : بس يا كيمو هههه لا مفيش يا حبيبتي حد منه لله دلق علينا ميه مش نضيفة من البلكونه وإحنا معديين
مني : وفين أحمد مجاش معاكم ليه ؟
وفاء : لا بيزور واحد صاحبه في المستشفي مراته فتحت دماغه عشان يركز وهو سايق
قصص مرعبة قصيرة
وجدت زوجها في إنتظارها بمطعم صبحي كابر حيث ذهبت لتعزم صديقتها بمبلغ الألف جنيه التي أعطاها لها لتذهب لدكتور التخسيس