ما تقولش: قلبك فضي م الحـب يـــوم ليمـــــوت
ده الحب هوّ اللّي خلاّ، دق القلوب له صــــــــــوت
و القلب أيه فايـــــدته، لو كان مــــا بيـــدقّـــش ؟
و ح يبقى أيه لازمته؟، شوف لك مكانه ريمـــــوت!
أنا اللي قلبي انكـــوى، من قســـــــوة الأحبـــــاب
ما حد منهم سأل، و لا مَرّه دقـّــــــــوا البـــــــاب
مستكتــــــرين يبعتــــــــوا كلمـــــــه تريّحـــني
و ان قــلت: ليه يا تــرى ؟.. بيكتّروا الأسبـــاب!
يا قلبي أيــــه هَمّدك، خلاّك صبحـــــت جمــاد؟!
نارك خلاص انطفِت، صَبحت تُــراب و رمـــــــاد!
لا عُـــدت حاسس بشيء، و لا عُدت بتقــــــــاوح
و تقـول: يا محلا الحياه، و يا ريت كمان تنـعاد!
عارف أمـــــور الهـــوى، و صبحـــت فيها خبيــــر
و عن جــــروح الأحبـّـه، بيســـــألوني كتيـــــــر
و اللي يجيني أنا، باوصــف له أيـــــــه يشفيــــه
لكـــــن ف جرحي و دواه، عـــاجز عن التفكيـــر!