واگفه گدام المرايه وصافنه ع تفاصيل شكلي ....جسمي الرشيق وطوله الحلو لاقصير كولش ولاطويل وسط....وبشرتي الحنطاويه وملامحي البارزه وخدودي الكبار يعني حلوه لعد ليش محد بيوم دگ بابي!؟
اني ملاك من مواليد 1994/1/1كل الحواليا يشيدون بأني اسم على مسمى ..من اني وصغيره هادئه وقليله الكلام واعيه وذكيه وتصرفاتي اكبر من عمري وهذه الحجي بشهاده الكل بحيث كبرت وماذكر بيوم اتعاركت وخاصمت او اذيت احد ....دائما كافيه خيري شري عن الناس وبعمر صغير التزمت بصلاه والصوم واتحجبت كبرت على اني مااحب الفتنه والگراضه وهسوالف واخاف من رب العالمين بادق تفاصيل ....لابيوم سويت علاقه ويه احد او خابرت ولد او حتى راسلت مثل سوالف هالبنات ...صاينه شرفي واهلي ..واخلاقي ينحلف بيها...ورغم كل هاي الامور والصفات الحلوه الممكن تكون حلم كل رجال بس محد يخطب...رغم اهلي ناس معروفين بلمنطقه ..
جدوو عندو محل انشائيات ووكاله طحين يشتغل بي هو ووالدي ..وعندي عمام ثنين اصغر من بابا عمو رائد مزوج وعنده جهال 3اكبرهم صف ثالث متوسط وعازل بس عايش ويانا بنفس المنطقه بطارميه ...وعندي عمات 3هم مزوجات ببغداد واخر شي عمو وعد هم مصارله هواي من ازوج تقريبا سنتين وعنده بس ولد واحد اسمه وائل من روحي كولش احبه وعايش ويانا او بلاحرى احنه وهم عايشين ببيت جدوو وبيبي ...
وبحكم بابا ممتوضف وهم لان هو الجبير وبيبي كولش تحبه ومتعلقه بي وبينا ..فصار القرار انه عمو وعد لانه متمكن هو مرته ثنينهم موضفين يبنون بيت بصفنا ويطلعون ...
وبهيج حنبقي بس اني وماما وبابا وبيبي وجدو واختي مللك اختي عمرها 18سنه واخوان 3اصغر منهايعني بل مجمل الحمدالله عايشين مرتاحين بس اكو مشكله صغير وهي
ماكو احد يتقدملي رغم الصفات الذكرتها قبل شويه والي ممكن تكون حلم اكثر الرجال والي خلتني الاگي التقدير والاحترام من اهلي وگرايبي بس للاسف ما أهلتني اني اكون من البنات التجيهم خطابه هواي ...
اليسمعني احجي هالكلام هسه اباله اعشق شي اسمه زواج...بس اني بلعكس ماحب الزواج ودوم انضرله رابط يقيد المره وجنت اشوف اي وحده ازوج خلص انتهت حياتها...وبقيت هاي نضرتي لحد العام تقريبا ..
صرت اشوف بيي وماما دوم يحجن وشايلات همي وبس يريدن يزوجني واني ماجنت اهتم لحد ماصار عرس بنت خالي ورحت ونتبهت كل بنات گرايبنا البعمري مزوجات والعدها طفل وثنين والاصغر مني كذالك...
بيومها يلا صحيت وعرفت كلام امي وبيبي ابد مجان مبالغه وهنا جانن شايفات شي اني مشايفته
وهو الاصغر مني والحولي وحواليا كلهن ازوجن ومابقيت بس اني
ومن ذاك اليوم لهاليوم صار سنه واني الزواج من اهم واولى اولوياتي ..وصار شغلي الشاغل اني ازوج مو لان احب لا بس حتى اخلص من كلام امي وبيبي الماعدهن غير ملاك
كبرت
وحيفوتها القطار
وحتبقي بايره
اني هم اباوع لروحي لاعندي دراسه وملتهيه بيها وانتضر الشهاده ...ولاحتى موضفه وملتهيه بحياتي شو گاعده ومگابله حيطان البيت ليل نهار وكل يوم يمر نفس القبلوو ..يعني ماعندي شي اناضل ع موده وأسلي فراغي بي ...فصار هالموضوع هم الي والسبيل للخلاص منه هو الزواج فمن
منو
وشلون
وين
مومهم اهم شي ازوج
ـ ملك ...او ديلا شصار ماكملتي دفتحي الباب
ـ ملاك...اي اي شجاج كسرني الباب ع كيفج ..مديت ايدي وفتحت القفل وجان تدفعني وفاتت شايله بأيدها صحن جبير ثارده بي فاصوليا وفوگاه راس بصل ..وحجت
ـ هاي لهسه مابدله لعد صارلج ساعه شسوين
ـ هوب هوب وين فايته انتي وبصلج ولزمتها من ياختها
ـ والله اعتقد هذه الغرفه هم غرفتي فأذه مو عاجبتج وزاعجتتج ريحه البصل يا ملاك لكيوت اطلعي لحد ماكمل وارجععي وفلتت روحها ومشت گعدت ع جربايتها
ـ يي والسبلت يضل يشتغل ويسحب ريحه موو ....ومشيت سحبت الريموت وطفيتها
ـ لج ليش يضالمه انتي ماتخافين الله ..الدنيا تكتتل حر ومنا داكل فاصوليا انتي ناويه تموتيني لو شلون
ـ بربج اكو ةحده تاكل ب12بليل بصل وفاصوليا هاي عود انتي طالبت الكليه ...
ـ اولا اني موطالبه كليه ..بعدني مره توها مكمله الاعداديه وبعدني ممقدمه كليه ...وثانيا منو الگلج طالبات الكليات مياكلن هالاكلات لعد
الباميه و البصل والباجه البسوك وين دتروح؟ اصلا هنا رب هالاسوالف..تحجي بلكوه تفهم الكلام گد ماحلگها متروس اكل
- ادري مشبعين انتي مو اكلتي بلحفله ...
ـ لج وين اكلت وديت اللفه والببسي يم امج الحنينه تااضملي ياهن من ارجع اكلهن تامتخرب حمرتي وگايم ضرغام يبجي ومنطيتهن اله تايسكت كون سم وزقنبوت وحراگ يحرگ كلبك ياضرغام الجلب ....
ـ سم بلهاتج اي والله هاي ع لفه تدعين على اخوج!
ـ يي والله هو الدعاء بأمج كون ادعي عليها لان هي
اطته ياهن بس شسوي گلبي طيب ماينطيني ادعي عليها ..
ـ هو بس هذه البقى ادوره تدعين على امج
ـ اهووو ملاك دعوفيني ازقنب وروحي غسلي المكياج البوجج الضاهر ضرب ع هرمونانج الداخليه وصرتي كيوووت ..فروحي غسلي ورجعيلي جعفوري الخشن تانگرض ع الخطوبه
بقيت ابوعلها صفح ..ومشيت وخليتها واني اردد ادبسسز
رحت غسلت وجهي حتى هاي صارت بحساب صرت ماخلي مكياج هواي بس بلمناسبات ومن ارجع اغسله فورا ..لان المكياج يأذي البشره واوي بگد مامكابله المرايا ليل نهار صارت النمشه التطلع تضوجني وتقلقني اخاف لاتبقى ومتروح
اباوع لوجهي وبشرتي صح صافيه الى حد ما بس اكو اختلاف عن عمر 17و18جانت ع گولت بيبي تلهث وترن رن
بس هسه ملامحي خربت مو نفس قبل اصلا قبل سنه مجنت هيج احس بده يذبل ..وبلاخص لمن المره تدخل ال25يبدي الكولاجين يقل وتبدي المشاكل بلبشره لهيج حاليا كلش دااهتم بشكلي صارت كل يوم قبل لااانام انواع المرطبات والكريمات اخلي
هستوني اريد انام واستلمتني ملك سحبت الجرجف مني ...
ـ بس لا تردين تنامين
ـ ليش اليوم ليت ابقدر ونحيي واني مادري
ـ عود ههههه لا مو ليله القدر بس عندي كومه گراضه مثل ميگول ابو ابمثل كلشي بوكته جلوو واذا ماحجيتها هسه ميبقالها طعم
ـ لج عوفيني نعسانه خصير ب 2
ـ والله معليه شو الا هسه ..بعدين تعاي هنا هاي شبيج اتكاونين ذبان وجهج خاف لبالي صح ...ويطلع حمودي اكثر من عصفور ع الشجره وجنتي تحبي وضايجه لان خطب ..
ـ دولي لج شحب منه بس ضايجه لان جانلي اخر امل واليوم انتهى جنت دايما اشوفو بباوعلي بنضرات كلها اعجاب بحيث بكل عرس ومناسبه تصير ياكلني اكل بنضراته وانتي تدرين... فحسبالي لو خطب اول باب ح يدگه هو بابي..وحتى خالي لاكثر من مره يسمعني كلام ويگل راح يخطبني اله ..
ـ يمعوده هو انتي تمشين بكلام خالج ..هو كل شي بيد سماح يگدر يكيش يمها ..مو بس هو حتى بناتها ولدها مشيتهم بل قندرا ..ع طاري القنادر تذكرين مره من كاتله حمودي بلقندره ع مود مراجع لل12بليل هو رجال شكبره عمره27 وفوگها خالج مفتخر ويحجي بسالفه عود شوفو مرتي شون دتربي هههه
ـ يي والله هههه عيع شگد شخصيه ضعيفه اموت من هيج رجال
ـ لعد شكو گالبه الخلقه
ـ انتي الگلتيها عصفور وطار يعني شجرتي بقت فارغه شتريدين متي طبعا اگلبها
ـ هممم الله يعوضج بل احسن منه انشالله خيولي اصلا ميناسبج ...خل تفيده ام رگبه تضلع
ـ هههه ولج هاي شلج ببها اني سامعه الرجلين تضلع مرو الرگبه ...
ـ يي مشفتيها شون ترگث وتحرك رگبتها تكول طلي فاطس ويرگص لا والاحلى فوزيه واگفه وتصفگلها عود شوفوني اخذت بنت اختي وهي كلها يومين ويتكافشن وصياحن يوصل لسابع جار ...
ـ يمعوده هاي جاهل شتفهم من الزواج 2003بعدها مراهقه ومندفعه اني متأكده لو يرد بيها ابزمن بعد خمس سنوات انوب كو اكثر مراح تسوي رلع السوته اليوم
ـ ع گولتج اني اتهجب من هيج ناس يرحون ويزوجون بناتهم وولدهم اعمارهم15و14 والاهل الينطوم بناتهم هيجي عمر شمترجين منهن مثلا يگومن بمسؤليا بيت ورجال وعيال ويربن اطفال .الزواج مسوليا مو عرس وبدله ؤوجكليت ..الزواج مسؤليا يرادله
تنازلات
صبر
عقل
بربج هي هاي شتفهم من احترام الزوج والحياه الزوجيه ..باجر من اول كلمه تسويلها مشكله اني متأكده ولو هي متنقاس هيج اكو هواي بنات صغار بس عقلهم جبيرواعين ويفتهمون بس من ةجهت نضري اشوف انسب عمر للزواج من 25وفوگ للبنيه لان تصير اكثر
عقلانيه و
تحمل و
مسؤليه وقادره ع اداره بيت
ـ صح بس تعال جيب اليفهم هالاكلام هسه الاكثريه صارو لمن ييخطبون لو شگد ماتحمداللهم بلبنيه وتگللهم خوش بنيه بس يعرفون عمرها فوگ 25يتراجعون ويگولون شنسوي بيها هذي هرمه...تفكيرهم سطحي ومايفكرون بس بلمضهر ميدرون بعد الزواج ميبقى قيمه للشكل ولا حتى للحب ومايبقى غير الاحترام والتفاهم وهشغلتين ترجع وتعتمد عل اختييار
ـ ملك ..دتحجي ملاك وعرفت دتقصد ع نفسها فگمت حضنتها وحجيت
ـ محضوض اليختارج ولاضوجين فرصه وراحت وربج كريم اكيد ضاملج فرصه احسن من هيج وهسه كافي نعست امش نام ربج يدبرها
ملاك
ثاني يوم گاعده دااصفط بلكتنور صاير لوخه من وره البارحه مختلطات ملابسي ويه ملك ..فاتت ملك تركض
ولج هاي شدسووين عوفي البيدج ام احمد يمنه
ـ شسويلها مشوفيني داارتب روحي انتي ةدي مي وسوي جاي لو سووي عصير
ضربت ع گصتها وحجيت
ـ لج ياغيبه يامي وياجاي ..جايه تخطبج
شنو وهي نطقه وهي وگفه ع طولي
يتتبع