*صراع*
صراع كامن وخنقة روح
ومليون صرخة ما بتطلعش
وكتمان في النفس والبوح
وقلب مريض وما بيوجعش!
شعور للعشق قال هيروح
يادوب مشوار سريع مارجعش
وبين ينفع ومش مسموح
آديه واقف لكنه ما طاعش !
وعايش بالآنين والنوح
ورغم الإنكسار ما خضعش
وبعد حروب ونزف جروح
مازال شايف يقينه ماضاعش
*مر الوجع*
ادوق مر الوجع في الجوف
واعانق كل لحظة بخوف
عشان الجاى مش معروف
ومش مضمون مصيرنا معاه
فبتحايل علي الايام ..
ماتبدلش الأمانى حطام
ولا يكتف يقينى لجام
وخدعة فرحتى المعاناه !
مفيش تفسير بيرضي عقول
وقلبك مُتّهم علي طول ..
مصير الورد اخره ذبول !!
ده مهما هيتسقى وترعاه
كلامهم منطقى ومحسوم
في واقع بالقيود محكوم
محدش كان مكانك يوم
ولا عنيك شايفة من زواياه
وكله بينتقد و يلوم . .
دفاعك حقه فيك مهضوم
لقيت الحل جوة النوم
هروب واخدك لأقصى مداه
*يصاحب بوحى*
ده الحد اللي يصاحب بوحى
ومايلقطليش منه اللوم
يسمع صرختى يشهد نوحى
ويتحمل احساس مكتوم
يسمح للأوجاع تحكيله
عن قلبي اللي بيسهر ليله
والحلم اللي تملى يجيله
فينسيه بقي طعم النوم
يسمع طيشي في عز شقاوته
ويهون علي عقلي غباوته
يبلع ريقي في عز حلاوته ..
بعد ما كان منها محروم ..
بعد المر ما سكنه و زانه
والخوف ياما زن علي ودانه
يتحمل فرحه وهزيانه ..
ويبقي معاه مطرح ما يقوم
يلمح دمعه في عز سكونه
فى اللمعة اللي بتضوى عيونه
وفي ضعفه يكون مدده وعونه
وما يسبهوش ابدا مهزوم
يتعود علي خوفي وحيرتى ..
ويروض عصبيتى وغيرتى..
ويزود في الحب مسيرتى
ويكمل نصي المقسوم !
*صوتك*
بمجرد صوتك ما سمعته
الخوف مبقاش بين اركاني
وفي بعدك قلبي اللي وجعته
مبقاش موجوع ولا بيعاني
بيوديني البعد بعيد ..
أفكار ماتجيش بالتمهيد
بغضب وازعل وابكي اكيد
وافتكرك مش راجع تانى
خليني في بالك علي طول
حتى ولو دايما مشغول
إبعت طمن قلبي وقول
فاكرك وفي بالى و وحشاني
ماتخليش الظن يحوم
و يزود في القلب هموم
والعقل يصدق ويلوم
انى ضحية وكنت الجانى
ماتسبنيش ابدا لظنونى
بتقولي مسيرك هتهونى
متغامريش واتراجعى وصونى
واستسلم والخوف يملانى
أسئلة ملهاش عندى إجابة
حوالية وفية أهى متسابة
وبقيت كتلة خوف وكآبة
فبلاش تتغير علشاني
*غيابك*
على قد غيابك عن عيني
مابيتعبني وبقي يإذيني
علي قد ما انا اللي بقولك روح
قربك مبقاش بيكفيني
غلطان لو فاكر هستنى ..
واتعشم في رجوع واتمنى
خليتنى اتعود وأستغنى
وعمرك ما هترجع تلاقيني
كتر الحرمان مرة في مرة
خلاني خلاص مش مضطرة
أتطمن ليك وبقيت حرة
وبتحكم أكتر في حنيني
هتعود علي بعدك تاني
واتعود بقي علي نسيانى
من بدرى رسالتك وصلاني
وبكدب إحساسي وأديني
عارفة ان الغلطة اكيد عندى
يوم ما اتخليت بيك عن عِندى
ورضيت وأمنتك علي ودى
وأتاريك للخوف بتوديني
*قصص محفوظة*
عبيط لو تفتكر انك
مهم لحد أو تعنيه
واشهدلك وأضمنلك
بإنك عادي جدا ليه
فضول ليك واخده فيقرب
ولو ده الحل ما يجرب
وبعد ما يكشفك يهرب
ويبعد وانت روحك فيه
قصص محفوظة ومعادة
و تقريبا بقت عادة..
ماتتعشمش بزيادة..
ولو آد العشم فأطفيه
خطط متنفذة بإحكام
على قلوب صافية نبضها خام
ف يابني بلاش تعيش اوهام
وتخلق جسر تمشي عليه
مسيره هينصهر و يبوش
ويتبخر عشان مغشوش
وجع بالورد ليك مفروش
ومكتوبة النهاية عليه
*حضن رقيق*
الايد بتحضن بس حضن رقيق
مفيهوش طمع في مزيد من الاحضان
تلمع عيونكِ فاجأة م التبريق
وتقاومي شغفك بالكسوف لا يبان!
عقلك سرح لبعيد وضل طريق
وإستحلي غيبته وطوّل السرحان
وانتي إتغلبتي وبان هواكي عتيق
قلبك برغم الجرأة دى غلبان ..
وياخوفي بكرة يعود مالهوش رفيق
والحزن يطغي وتتفتحله بيبان
وياخوفي يرجع تاني مش بيطيق
القرب من أصناف بني الإنسان
جواكي خوف ف الجوف بيضوى حريق
وطفلة تنزل فوهة بركان !!
لا تخاف لهب ولا تخشى م التحليق
طايرة في سماها كأن ده البستان
أمنية ليكي عليكي مش هتليق ؟!
يافراشة غاوية العشق والهيمان
حلمك مالهوش نصيب من التحقيق
فبلاش تسيبي الوهم يملي مكان
دى إشارة يعني لا كدب ولا تلفيق
إزاى هتعمي عنيكي عن دى كمان؟
وفي حاجات مايجوزلهاش تذويق
لو كان مصيرها الكسرة والخذلان
العشق لو هيذل يبقي غريق ..
كالبحر هايج يبلع جرئ وجبان
لا يهمه مين قادر يغوص في غميق
ولا مين يادوب بيطل م الشطآن
ثورة مشاعرك فيها عشق عميق
غلب العناد وإحتله احلي جنان
*صباح الفل*
صباح الفل بيك وعليك
يامتعشم في ناس حواليك
في منهم قد عشمك فيه
ومنهم اللي راح يأذيك
صباحك يشبهك في اللين
وإحساسك بناس تانيين
وراحة تعم بعد يومين
من التعب اللي ماسك فيك
صباح هادى وبسيط وجميل
بتعشق فيه غنا التفاصيل
يبدل خوف وهدة حيل ..
ويمحي آثار لهم ماليك
*شكرا*
وشكرا عالوجود والدعم
برغم أن انت مش مضطر
لكن حسيت بطعم الهم
في جوفي وقد ايه كان مر
فجيت حليت مرار جوفي
وهونت افتراس خوفي..
لاحظت اليأس في حروفي
ولبيت طلبي ده وبتصِر
ياركن لطيف قوي وهادي
بيجي يزورني في معادي
يبدل كسرتي لعادي..
ومافكرتش في لحظة تضر
بشوف جواك مكان دافي
يساعني وفيه علاج شافي
دراع محطوط على كتافي
يطبطب رغم صمت وفر
من القرب اللي مش مفهوم
وحلم جميل ياريته يدوم
وما تغيب عني ابدا يوم..
ولا يعود قلبي منك حُر
ونسك
خليك صاحي الليلة شوية
وخليك سهران جنبي ياريت
من غير أسئلة صعبة علية
ويمكن اندم لو رديت
جايز من التفكير تمنعني
من غير ما اضطرك تسمعني
ويخف الجرح اللي واجعني
واهدي عشان بيك إستقويت
أو وارد ونسك يلهيني
عن ضغط الوضع اللي أذيني
وغيابي اكيد كان على عيني
بس رجعت قوام و هديت
ليه هتتاخد بذنوب غيرك
وماشوفتش منك غير خيرك
حنية في قلبك وضميرك
شوفته بروحي وبيه حسيت