في غيابك
في غيابك عني مقدرتش أداري
كل اللي شافني سألني عن حالي
باين عليا سهر الليالي
وحاجات كتير شغلاني
وأهم حاجة فيهم إنك... وحشاني
في غيابك عني بدوّر في الوشوش
بقيت حد تاني واحد معرفوش
تايه في صورة على الحيطة محفورة
مبحبهوش mood وده
في غيابك عني... أيامي
أيام متعادة وبلا داعي
أطلب قهوتي فتيجي في بالي
وأشوف صورتك في فنجالي
وأسرح فيها بخيالي
كإنك لسه قدامي
أكلم قهوتي عنك... يمكن تكوني سمعاني
وأول كلمة ينطقها قلبي على لساني
وحـــــــشــــــانـــــــــي
تبرد قهوتي فأطلب تاني
في غيابك... تمن القهوة على حسابك
أنا مستني على بابك
آخد تمن وحشة... دفعت تمنها بالغالي
غيابِك طال
غيابِك طال
ومقدرتش في لحظة أنساكي
عايش محتار
وبتمنى في يوم ألقاكي
في يومي وحيد
مع إنه فيه زحمة
وبدعي أكيد
أشوفك حتى لو لحظة
وشمس تغيب
وكون بلا واجهة
وليله كئيب
غاب قمره وساب عتمة
وبمشي طريق
بلا وجهة
زي غريب
وتاه من رحلة
غيابِك طال
وحاجات كتيرة بتتغير
وقلبي ما زال
في بُعدك لسه متحير
بقيت أعمى
عين مش شايفة حياة بدونك
وعين سارحة في مضمونك
غيابِك طال
وأنا أصبحت مجنونِك
أول مارس
بكره أجمل يوم في مارس
فتّحت أجمل عيون
جوهرة وعليها حارس
شمس بتنوّر في كون
بكره أول يوم في مارس
وانتي أول كل شيء
زي الندى بيلامس
في الصبح صافي وبرئ
بكره أجمل يوم في مارس
لإنك جيتي فيه
شيء كان في اليوم ده ناقص
وانتي جيتي تكمليه
بكره أول يوم في مارس
لما الشتا أثره يضيع
سما ونجوم بتتهامس
انتي زينة الربيع
باختصار... انتي أجمل ما في مارس
نفسي أقولك
مش لازم أقول إني بحبك
ولا حتى عارف أشرحلِك
أنا بعمل اللي يوضحلِك
إن أنا موجود
أنا نفسي أقولِك والله
وأوصفلِك وأحكي في أشواقي
وازاي من غيرِك أيامي
بتفوت في حدود
وجناين أحلامي
بتموت فيها ورود
أنا نفسي أقولك والله
على كل اللي بيشغل بالي
أنا نفسي تشوفي في أفعالي
وفا بوعود
أنا نفسي أقولِك والله
إنك ماشية في شرياني
ونفسي جوابِك يجي في عنواني
في يوم موعود
أنا نفسي أقول إني بحبِك
وإني بميل لك
وإني عمري ما أمِلّك
لو لكلامي مفيش ردود
أنا نفسي أقول إني بحبك
وإني بقيت منك
وإني بآمنلِك... لأبعد حدود
أنا نفسي بس تحسيني
وتشوفي الحب اللي في عيني
وتخطي بروح حافية على الجاي في سنيني
زهايمر
أنا لو جالي زهايمر
أنسى الدنيا ومنسكيش
أيوه أكيد هتغير
بس ازاي من غيرك أعيش؟
ليكي حب كبير جوايا
وانتي ليه مبتحسيش
يمكن مايبنش عليا
ولسان حالي ما بيحكيش
أنا لو جالي زهايمر
يمكن أتوه وأتغرب
ويمكن أبقى طفل صغير
وجوه حضنك أهرب
ما انتي الدينا بكل ما فيها
نظرة عينك بتحليها
وتخليني أعيش لياليها
وأصبر على المتقدر فيها
أنا لو جالي زهايمر
ومش جنبك وقريب
يمكن أعيش متحيّر
وأكون في الدينا غريب