الإهداء
إلى من أمسكاني قلمًا لأول مره ليعلماني الكتابة.. ولم يدركا أنهما صنعا بيني وبين القلم قصة عشق أبدية..
أمي النقية وأبي المثابر
إلى الذين لم تهتز ثقتهم أبدًا في كوني موهوبة
إخوتي
ولاء.. حسناء.. كمال
رفيق حياتي أسامة
إلى القطعة التي فارقت روحي، أخي ضياء رحمة الله عليه
إلى (ضياء، مكة) أبنائي
ربما اليوم أنتما صغيران لا تجيدان قراءة كلماتي أو تفهمان معنى الشعر جيدًا
ولكن تأكدا أن لولا أهداكما الله لحياتي ماكان هذا الديوان موجودًا
إلى ذلك الشاعر العظيم الذي لقبني بالشاعرة الحرة.. ولم أكن أدرك وقتها ما معناها.. الذي أهداني عشرات الكتب من مكتبته الصغيرة بشارع المكتبات بأسيوط ليثقل موهبتي.. شكر خالص من القلب على كل ما علمتني
مؤمن حسني عطية
*****
زاهد
زاهد في الدنيا
كأني
سافرت
كل البلاد
وشبعت
من
كل الحاجات
عشت
كل الحيوات
صاحبت الموت
كأني
مت قبل كده ٣ مرات
مؤمن بالله
ومؤمن بحب حبيب
للأبد
شبه إيمان سيدنا بلال
رغم الحجر
ع بطنه
ورغم
العذاب كان بيقول
أحدٌ .. أحدٌ .. أحد!
*****
أنا العاشق
أنا العاشق أنا الدايب
مفيش ف قلبي
حتة سليمة
ورافض أكون
أنا التايب
أنا الكاره للفظ قيود
مغرم البراح
أنا والوجود
ولو قيدك
سبب موتي
دا أعدل موت
عشان قربك لوحده وجود
بتحامى فيك من الوجع
فبلاش أنت توجعني
ولو كل العالم
بقوا قوم نوح
سدوا ودانهم عني
ولا يحرك لي ساكن
المهم أنت تسمعني
أنت سفينة النجاة
ولو تضيق الحياة
مفيش غيرك
يسعني
*****
أنت حرام
أنت حرام
حلال
ارتكابه
ضريح
واقف
أتمنى على أعتابه
أنت دار
عبادتي
تستقر في حضنك
دعواتي
توبة
وتكفير عن
سيئاتي
مسجدي
وبيتي
المقدس
هدوء يسكن
بعيد عن
ضوضاء
العالم
المكدس
*****
ونسي
الدندنة معاكِ
والونس بيكِ
زي نور هادي
لامس ضي عيني
نور روحي من تاني
زي مقطوعة حلوة للست
كتر الكلام في حضرة وجودك
فسكت
يدور الكلام في بالي
و١٠٠٠ سيناريو و١٠٠٠حوار
آجي أقدم خطوة فاتكلم
ييجي الكلام يحتار
ويرجع السكوت
يبقى سيد الموقف
وتبقى الدندنة معاكِ زي نور هادي
زي مقطوعة حلوة للست
كتر الكلام في حلا عنيكِ فسكت
فيه كلام أوقات قلة كلامه أريح
فيه كلام لو نطقه اللسان يجرح
والسكوت أوقات بيبقى رد بليغ
معناه إنه كلانا حاسس بنفس الشيء
ويرجع يبقى السكوت هو سيد الموقف
وتبقى الدندنة معاكِ زي نور هادي
زي مقطوعة حلوة للست
كتر الكلام في حلا عنيكِ فسكت
*****
أنا الرومي
أنا الرومي
وفين شمسي
تايه في دروب
العشق
أدور ع ونسي
عايش
بنص قلب
وفين نصي
سالك
بضل روح
دروب
أدور على
أصلي
أنا وحدي
مع نفسي
أتأمل
في حوالي
الكون
ع أد عقلي
أوعظ
فيَّ أنا نفسي
ولما أتعب
من الدوار
أداوي بالرضا
نقصي
أشد ع إيدي
بإيدي
وأكد باليقين ظني
وأقول
مسيرها يوم
تكمل
وألاقي
في
الحياة شمسي
*****
اتدروشت
أنا اللي في حبك اتدروشت
وقالوا عليا متوكل
أنا بالفطرة مولاوي
وقلبي بنبضك أتوصل
ولو الروح تروح تدبل
ببسمة ترجع تتشكل
ابعد عنك دواير وأدور
حبك يقوي ويغلغل
ولو عذابي يطول للدهر
ولا أتراجع ولا أتخوف
أنا وياكِ حد الموت
وزاهد فيكِ متصوف
أنا نقطة في مسار الكون
ويجوز أكون هايم
لكن في هواكِ متعفف
*****
الحلم
شايف الحلم
بعيني براح
ولوحة رسم
والريشة لها مفتاح
ونيل صافي
وريحة الطين
مسك فواح
وبحر أزرق
بموج عالي
بيسحرني
من كتر ما بشوفه
هادي ومرتاح
شايف الحلم
فراشة كبيرة
لها من كل لون طيف
٧ ألوان
شايف الحلم
أنا بستان
مليان ورود
مطمني أنا جاي
وأنت موجود
شايف الحلم
فك رموز
وبيبشرني باللي جاي
أفرح أيوه أنت محظوظ
شايف الحلم تعويذة
من شر اليأس وفكر النفس
ونهاية لكلمة ممنوع وعيب وبس.
*****
إعجاب سخيف
مواستهاش في بعده
غير قعدة حزينة ع الرصيف
ودموع ف عنيها
رافضة تكون ضيف خفيف
كل ما تفتكر كلامه
يزيد جرح ملوش آخر ف النزيف
أصل تمسكها بيه
بقى في نظره حاجة عادية
وشيء سخيف
تخاف هي من الفراق
وف بعده هي قلب ضعيف
علاقته بيها شيء لطيف
بس ناوي ع الفراق
مع سبق الإصرار
يمكن استحلى
الكلام معاها
أو حبها ع الخفيف
أو جايز
إعجاب سخيف
بس الأكيد
إنها حبت بجد
وشافت ف وجوده الربيع
ولو كل الناس شايفاه خريف
*****
القطة العميا
بمزاجك اخترت تكون
القطة العميا
جبت شريطة
وغميت عنيك
وعجبتك أوي القعدة
بلاش تلوم وتلعن العمى
أنت اللي استسهلت اللعبة
زي ما أنت
استمر
واقفل كمان ودنك
وما تسمعش لحد
أصلًا الكلام
ولا ليه معنى
وأما يفوت الأوان
وتحب تفتح
وتحكم بعنيك
مش بعنيهم
متزعلش لو صابتك اللعنة
وبقيت بجد
واحد أعمى
*****