خرابين البيوت مطلـوبين للعدالة من رب السماء والأرض ومن كل ضمير سعوا إلى أذيته.
لكم مني رسائل ساخنة لا تنسوا قراءتها!
لماذا كتبت هذا الكتاب؟
علشان في يوم من الأيام كان فيه طفل نفسه في حضن أمه لكن كان لازم يستني الزيارة الشهرية، وفي يوم أمه ماتت، لكن هو لسه مستني الحضن.
قبل أن أخوض في تفاصيل الكتاب، أحب أن أشكر هذا الكتاب وأمتن له على مساعدتي في الشفاء من مشاعر كتير اتحبست جوايا من سنين ومكنش فيه طريقة للتعبير عنها، ومشاعر ناس كتير كانت مؤلمة ومقدرتش أساعدهم ساعتها، ومشاعر ناس كتير عبروا عنها بقوة ولم يجدوا إجابة تريحهم.
في كتاب البعض يريدها ساخنة هنتكلم عن مشاعر كتير حلوة نحب نعيشها، ومشاكل كتير شائعة بتحصل لمعظمنا من ساعة ما بتحب وتتجوز لحد ما بيكون عندك أطفال.
في كل مرحلة بتتعرض لخرابين البيوت والعلاقات، دايمًا بيكون عندهم مبررات، علشان كدة كان لازم يتكلموا بشخصياتهم ويعبروا عن مشاعرهم، ومنهم الشيطان اللي قرر يعمل شركة للتدريب على فن التعامل مع الناس.
كل اللي مكتوب هنا هي اجتهادات ووجهات نظر شخصية تحتمل الخطأ والصواب، يعلم الله أني بذلت أقصى ما بوسعي في تقديم المعلومة بأبسط طريقة وأسهلها، يعلم الله بصدق مشاعري ووجع قلبي في كل كلمة كتبتها، من أجلك ومن أجل سعادتك وسعادة أسرتك.
هسيبكم تسبحوا في بحر من المشاعر والأفكار والصراعات والنجاة، هسيبكم تقرروا أي صف عايزين تكونوا فيه، صف نفسكم ولا صف الحرباية والشيطان اللي هنتعرف عليهم عن قرب مع بعض. كتبته بشغف وحب وإرادة، عارفين ليه كمان؟ هتعرفوا آخر الكتاب.