خطرة كان انيس قاعد فالدار مكسل يشوف تيليفيزيون و يدور فالقنوات بسماطة حتى طاح في واحد البرنامج قالو فيه جملة جذباتو اللي هي " القلب كي يعجب مايحسش حتى يلقى الشخص هاداك مربع فيه" ،اول حاجة جات في بال انيس هي سيرين تبسم ممبعد قال في قلبو " يا انيس واش راك تخمم، طفلة جارة نورمال ماراكش تحبها" ، نحا انيس البرنامج و حكم تيليفونو و بقا يدور فالريلز ، طبطبو موخا و مالك الباب و جاو قعدو معاه تبسم انيس و قاللهم " وييي جيتو هادي غيبة" تسالمو ممبعد قالولو" راك عارف الامتحانات " ضحك عليهم و قاللهم " هيهيهي مساكن الحمدلله على نعمة الجامعة" موحا و مالك قلبو عينهم ممبعد ضحكو ، قال مالك" ياخو راني كاره واش رايك نلعبو شوية " قاللهم انيس " واش نلعبو تيليفوني ديشارجا باش نلعب فري فاير معاكم"، قال مالك " نورمال نلعبو جرأة و صراحة " ، قال انيس " ريڨل هيا نلعبو " ، قعدو فاللرض و جابو قرعة و دوروها جات في انيس يسقسي موحا ، قال انيس " موحا جرأة ولا صراحة؟" ، قال موحا " صراحة" ، ضحك انيس بخبث و قالو " موحا اوصفلي فتاة احلامك" ، ضحك موحا بحشمة و قال " تكون قصيرة و شابة و شعرها طويل و بني و عينيها بنيين" ، قال انيس " مالك راهو يبان يعرفها هادي " ، مالك غمز لانيس و قالو " اصبر ممبعد نفرجك فيه" ، عاودو دورو القرعة و جات في مالك يسقسي انيس ، مالك قال" انيس جرأة و لا صراحة؟" ، انيس قال " صراحة" ، مالك خمم شوية و قال " واش هو اول شعور يجيك كي تشوف واحد يعجبك" ، انيس خمم و جاتو تصويرة سيرين في بالو و قال " قلبي يبدا يخبط و نبقا نحوس غير وقتاش نشوفو" ، مالك قالو " اوه صح كاينة " ، عاودو دورو القرعة و جات في مالك يسقسي موحا ، مالك ضحك بخبث و قالو " موحا جرأة ولا صراحة" ، موحا قال " صراحة " ، مالك خمم و قالو " ياخو شكون هذي اللي وصفتهالنا ؟ واش اسمها؟" ، موحا تردد شوية ممبعد قاللهم " ياخو هاذا سؤال" ، انيس قال " ياخو هادي هي اللعبة هو سقساك نتا خيرت صراحة جاوب و بلع" ، موحا تذمر و قال " اسمها سيرين ، الجارة " ، مالك بدا يضحك و موحا ولا حمر ، اما انيس كان متبسم كي قال اسمها راحت الابتسامة و قلبو خبط بزاف كي سمع اسمها بصح في دقيقة عاود ضحك فوق قلبو و قالو " صحااا موحاا " ، موحا بقا يضحك بخجل ممبعد قاللهم " خلاص كملو لعبة " ، عاودو دوروها جات في موحا يسقسي انيس " موحا قال " انيس جرأة ولا صراحة؟" ، قال انيس " جرأة " ، موحا خمم شوية ممبعد قال " عيط لكاش طفلة تقرا معاك فالجامعة و قلها نحبك " ، قالو انيس " ماعنديش البنات اللي يقراو معايا فالتلفون ماشي مداصرهم" ، قال مالك " ياحي عليا بعدا يقراو معاك مداصرهمش", قال انيس" ايه ياخو انا عندي قلب واحد لمرتي المستقبلية" ، قال موحا " يادرا شكون هادي " ، المهم جوزو الوقت و هما يلعبو حتى جات نسيمة ( والدة انيس) و قالتلهم " ولادي راكم زاهيين ، انيس تروح تشريلي " ، قال انيس " ايه ماما واش نشريلك؟" ، قالت نسيمة " روح اشريلي فرينة و زيت و الخبز و فاردو ماء" ، قال انيس " اوكي ، دراري ارواحو معايا نروحو نشرو" ، انيس رفد المفاتح تع الطونوبيل و خرج و راحو