تفائل خير
بتحلم حِلم على أدك
تقيس مشوار يطول مدّك
صبرت كتير وزاد عدّك .. تفائل خير
إيديك مسابِتش يوم خدك
عِنيك شايفة الجميع ضِدك
مافيش ولا حد بيساعدك .. تفائل خير
بتزرع أرض غير أرضك
وتبني أصول تصون عرضك
ظروف العيشة بتعارضك .. تفائل خير
ساعات الحظ يكتِبلك صباح الخير
وحظك لما يرسملك خطوط السير
بيطرح فرح إجباري
يِطيب جرح متداري بقالوا كتير
تفائل خير وزي الطير
هيطلعلك جِناح وتطير
ورزقك مهما غاب عنك
وفرّط العقد من سِنك
دي حِكمة ربنا إنك
هتقصد خير هتحصد خير
متستعجلش
ساعات الدنيا بتساندك
وتبنيلك طريق في النور
سنين والحظ بيعاندك
ويرميك في الأراضي البور
سنين محسوبة من عُمرك
بتتمنىٰ الرضا ترضىٰ
جِبال متحاشة علىٰ ضهرك
بتستنىٰ القضىٰ يقضىٰ
هموم مِتشالة من صُغرك
علىٰ أمل الأمور تهدىٰ
حاجات بعد أما فاض صبرك
يفوتك وقت تتوضىٰ
متستعجِلش
متستعجلش وإتأنىٰ
وعِيد حساباتك الأول
تخيَّل نفسك إن إنت
فى دور غيبوبة ومطوِّل
مفتَّح بس مش شايف
بتقلق بس مش خايف
تفوق علىٰ أتفه الأسباب
كإن عليك حزام ناسِف
متستغربش
متستغربش وتبلِم
متستعجِلش وتسلِم
ما داقِت إلا ما أتسعت
وركِز وإنت تتعلِم
إبتهال
يارب بحق إسم الحق
وحق البعث يوم الحق
لــ رؤية جنّة وجمالها
تقويني بلسان الصدق
يارب بحق ليلة القدر
وحق الجمع يوم الحشر
لــ خوف مـالنار وأهوالها
تنجيني في سؤال القبر
يارب بحق كل آدان
وحق رسالة الأديان
لــ وهم الدنيا ومتاعها
تنور قلبي بالقرآن
يارب بحق نور علىٰ نور
وحق المصطفىٰ المنصور
تنجيني وتحميني
وتهديني لـ طريق النور
دليل إثبات
كل اللي فات إثبات إن اللى فاق فـ الغرق
غير اللي فاز بـالسبق
غير اللي عاش قبطان
كل اللي فات إثبات إن اللي قلبه إتحرق
غير اللي عمره إتسرق
غير اللي نام زعلان
كل اللي فات إثبات إن اللي كتب الورق
غير اللي قال عــالملأ
غير اللي عاش إنسان
كل اللي فات إثبات إن اللي في المبتدأ
غير اللي بين مفترق
غير اللي نام في أمان
كل اللي جاي إثبات إن اللي أكل النبق
غير اللي سِمع النبأ
واضح في كل آدان
الحِكمة في الملكوت
الحكمة في الملكوت
إنك تعيش مبسوط
والسيرة بعد الموت
إنك جدير بالذِكر
يا تعيش وتفضل بطل
يا يقولوا حِلمه إتقتل
يا تلاقي فرصة وبدل
يا إما تفضل بِكر
نُص الصحاب في المحن
بتكون في حالة سُكر
وأنا حلمي لما إتركن
بعتولي ورد وشُكر
بعد اللي صابه البدن
نرجو إلتماس العُذر
وإن مال عليك الزمن
إحسبنا في الــ باي باي
قلبي اللي صابه العفن
معرفش ليه وإزاي
من غير حساب ولا تمن
واقف بيعمل شاي
بيقولوا عنه عويل
أو إنه غير مُلتزم بالوقت والمواعيد
وميعرفوش إنه مُهتم بالتفاصيل
وميعرفوش عنه غير شُغله بالتحديد
وميسمعوش مِنُه
غير أيوة حاضر جاي
في إكمنه مش رغاي
بيقولوا عنه كئيب
أما الغريب في الأمر
بيقولوا كاتِب شِعر وبيحضر الندوات
أهو دا اللي قالوا عليه
شكل الغلاف مضمون
غير محتواه جوا
معقول يكون هوا
بيقدم الطلبات من غير ماحد يحِس
شئ مُنتهىٰ القوة
لما الحياه تجبرِك
أو تمشي عكس السير
وتكون عزيز النفس
دار الحوار بينهم
حوالي ساعة ونُص
وبشكل غير مقصود
سِمعت هذا النص
في المهنة دي بـالذات
واحد معاه شهادات
زى الهدوم والبُقع
وانا زي أي زبون
معرفش ليه رافض
دور الصنايعي يكون
من صفوة المجتمع
وبكل رقة وذوق
خدت الأمور بهدوء
وكأني مش موجود
او وقت شغلي انتهىٰ
سقّف وقال يا برنس
إعمل له أحلىٰ عصير
وإعمل لي شاي نعناع
وشوف حسابك كام
لحظة دخول بياع
ومعاه سِبح وأقلام
بيقول يا باشا يا بيه
نفعني لو بــ جنيه
وإكسب ثواب أيتام
محتاج دخل بعدها
إيده اليمين قدام
والتانية شايلة علاج
كل الحضور تنح
كل الحضور تنح
إلا اللي كان بياع
كان لسة مستفتح
قام مدي للمحتاج
خادني الفضول وقتها
فسألته عن حاله
وإزاي في عز الحر
من حسنة جياله
طلع وقال لله
والوقت مهما يمُر
كان ردُه صعب أنساه
جايز يكون مضطر
والدنيا واقفة معاه
خادني الفضول تاني
فسألته باستغراب
بين كل يوم والتاني
بيجينى ناس أغراب
إلا إنت
إلا إنت فيك مني
جواك كلام متحاش
او حلم ضاع منك
وإديت لنفسك سبب
إن الظروف صعبة
هوا العلام ببلاش
وكبرت عن سنك
ولا إنت مش مقتنع
إن الحياه لعبة
دمّع وقاللي كلام فكرته بيخرف
خريج آداب إعلام معرفش يتوظف
فأختار يبيع أقلام
راس ماله في شنطة علىٰ كتافه
كلها شهادات مالهاش قيمة
معرفش يحقق أهدافه
فأختار مشوار صبر وعلقم
يا يكون بياع عنده عزيمة
يا يموت حِلمه ويستسلم
سُبحان الله ب نية سليمة
طبطب ع كتفي يودعني
وإداني نصايح بالمجان
كُترالأعذار دقة قديمة
متقولش شهادتي هتنفعني
وتقضي بقيت عمرك ندمان
دور في حياتك علىٰ صفحة
تكتبها ب حِبر يكون عرقك
ماتسيبش سطور فاضية ف ورقك
وتنام علىٰ حلمك وتمدد
كلها أيام وهتتأكد
إن إنت كسبت ٢٠٠ منحة
وإن رزقك قل من المادة
هتزيد أضعاف ستر وصحة
خليك شيال وقت الشدة
وإكتب أسبابك وإشرحها
خليك سندال أطول مُدة
وإكسب غلطاتك صلحها
هستأذن معلهش سامحني
وسامحني يا صاحبي إني لبختك
أو خدت دقيقتين من وقتك
أنا كنت بفضفض مع نفسي
دلوقتي إرتحت أما حكيتلك
أنا كنت بفضفض مع نفسي
دلوقتي إرتحت أما حكيتلك