#أحباب_الله😭😂
**********************
مينفعش يتساوى اللي خد قراره بإرادته الحرة بإختياره ... باللي اتغصب على قرار ما وتم امتحانه من ربنا .
وفي الحالتين مينفعش يحمل الآخرين تمن اختياراته وامتحاناته.
**********************
سبحانك يارب..عجيب أمر النفس البشرية!
ساعات عقد الطفولة متبقاش وحشة أوي.. وساعات بتوجه مسارنا لسبل كويسة..
مش هخجل إني أقول إن كل حاجة بعملها دلوقتي بإفراط كان فيها نقص يوم ما..
فيه كام حاجة بتخلي اللى حواليا بيستغربوا مثلًا.. حبي للصور .. وللعرائس اللعبة.. الإكسسوارات.. ولأني أجيب هدايا للناس.. وتحديدًا للأطفال..
وإني أعمل بعض الحاجات من غير مقابل مادي أو ملموس..
أي حاجة اتحرمت منها زمان مخلتنيش اطمع بالحاجة اللي اتحرمت منها أو أحتفظ بها لنفسي بس دلوقتي لما قدرت أحصل عليها .... بالعكس تمامًا....بيبقى نفسي إن محدش يتحرم أبدًا أبدًا من أي حاجة أنا اتحرمت منها يوم ما.. وبقى عندي قناعة إن طالما ربنا إداني أي حاجة وعوضني بيها لازم أغمر بيها كل اللي أقدر عليه من اللي حواليا..
زمان وأنا طفلة مكنتش بحب الصور أبدًا لأني كنت بحس إني بطلع فيها وحشة أو شكلي مش حلو..معرفش كان بيجيلى الشعور ده منين.. فكبرت ووثقت في نفسي، وبقيت بحب الصور والتصوير.. وبتصور في كل حالاتي وأنا رفيعة وأنا مكلبظة.. بتصور في أي حتة.. وبحب أصور الناس.. وبحب صور الناس وهي بتضحك .. وعندي ما يزيد عن 70 ألف صورة لشغلي وأصحابي وحبايبي.. موبايلي اللي فات بس كان عليه 14 ألف صورة.. بقيت مغرمة بتوثيق اللحظات الحلوة بالفيديو وبالصور.. وإن كتير من هداياي لأصحابي تكون صور..
زمان مكانش عندي ألعاب ولا عرائس إطلاقًا.. إلا من حاجتين ملهمش ثالث.. تليفونات وحصالات فقط.. وكانت عرائس ماما بتصنعها لي من بقايا القماش كانت جميلة وبحبها.. غير كدة مكانش عندي حاجة ومكانش حد بيجيبلي.. لما كبرت مازال عندي العشق الطفولي للعرائس.. جبت أغلب عرائس ديزني..وبقى عندي كمية من كل الأحجام والأشكال.. وبقيت أفرح لما أجيب للأطفال لعبة حلوة وأشوفه وهو بيقلبها أو بينورها أو بيخليها تغني..كل ما بشوفهم بفتكر الماضي وببتسم..
نفس الكلام بالنسبة للهدايا.. كان بيجيلى هدايا.. بس كتير قبل ما أشتغل مكنش بيبقى عندي قدرة مادية إني أجيب هدية لحد مع إني بحب الهدايا جدًا.. وبحب الناس لما أجيب لها هدية وأشوف الفرحة في عنيهم.. لما كبرت قدرت أحقق ده.. وبقى الموضوع بيخلق لي لحظات سعادة لا توصف..
أما بالنسبة لعشقي للأطفال وإني أجيب لهم حاجات وبالذات البنات..توك، ومناكير، وحنة وإكسسوارات، وحاجات ... برضه أنا مكانش حد بيجيب لي دا.. إلا عمة من السعودية كانت كل زيارة تجيب لي مقدار من الحاجات دي ...كانت عيني تنور وقلبي يرفرف مع كل حاجة بتطلعها لي.. فبقيت أعشق إني أعمل ده مع الأطفال ولاد قرايبي وأصحابي بعد ما بقى عندي كم هائل من الإكسسوارات والميك أب وغيره.. بقيت بجيب لهم اللي عندي وأجيب لهم الجديد ...
وبشوف في عنيهم نفس فرحتي وسعادتي لما بشوف اللعب والإكسسوارات..
كنت بشوف فيهم نفسي..
**********************
ربنا بيجعلنا سكك لبعض... مجرد سكك...
يوم ٢٥ مارس...صديقة بعتت لي عشان قطة في البحيرة حالتها صعبة ومحتاجين دكتور .. دورت بين أصدقائنا في البحيرة على أكثر صديقة نبيلة لها الإهتمام ده ..ودلتني بالفعل على طبيب بيطري كُفء ...وبعت رقمه لهم ...وصاحبة القطة وديتها له بالفعل ولحقها ألف حمد وشكر لله..
ممكن تكون حاجة بسيطة.. بس محدش عارف إيه في عملنا اللي هيدخلنا الجنة..
**********************
الان ريكمان ❤️
الشرير الجميل ...
العمدة في روبن هود ... راسبوتين الرهيب ...
وسناب القاسي الشرير في هاري بوتر و اللي كنت بخاف منه طول السلسلة لحد ما عرفته في النهاية ...
صاحب الأداء المؤثر الرائع ... والصوت المميز جدا ...
بالرغم من قلة خبرتي أو تركيزي مع الفنانين الأجانب ... إلا دة وقلة قليلة غيره ... كنت بقرأ عنه وأعرف إنه كان محبوب ومهذب ... ودة في نظري شيء عظيم لما يبقى فنان بتحبه يبقى حلو كمان في الواقع ...
كان بيدعم الجمعيات الخيرية و بيساعد مرضى السرطان والتشوهات
كان عضو في حزب العمال البريطاني ...وله مواقف سياسية تخص اللاجئين والدول الفقيرة والقضية الفلسطينية
أخرج مسرحية اسمها اسمي راشيل كوري ..اتكلمت عن قصة الناشطة اللي دهستها الجرافات الإسرائيلية ...
كان إنسان ...
وكان جميل ... وكنت بحبه ❤️
**********************
صديق كريم بعتلي ليه مكتبتش حاجة عن حادث قطارات النهاردة ( مارس 2021)
مكتبتش؟!
ابتسمت بمرارة لما افتكرت أن أول حادثة قطار أوعى عليها كانت قطار الصعيد 2002.. كنت 15 سنة تقريبا...شفت فيه طفل محترق من بين شباك القطر ومفارقتنيش طول عمري .. وتبرعنا من مصروفنا لضحايا الحادثة اللي كانت قبل عيد.. ومن بعدها حوادث قطارات كثير وكثير.. وتوالى الكلام وحزنا وتوجعنا وتكلمنا وقهرنا وحاولنا.. وخلاص.. فرغت جعبتي من اللي أقدر عليه...
الفرق إن سمر بنت 33 معدتش تقدر تشوف دم، ولا موت، ولا احتراق خلاص.. بقت تغمض عينيها عشان تعرف تبدأ يومها.. أو تعرف تنام..
**********************
قعدت أسأل نفسي أنا ليه مزاجي وحش النهاردة..
لقيت إني نزلت من البيت ولقيت واحدة قاعدة على الأرض موطية وحاطة دماغها بين إيديها..
فضلت أبص للمشهد 10 دقائق.. وأنا مش عارفة أعمل إيه .. خدت إجراء ما.. وعملته ومشيت..
بس اكتشفت إن المشهد ده منين ما بشوفه يومي بيتقفل.. مشهد قلة الحيلة وإن حد حمل دماغه تقيل فوضعها بين يديه..
يارب خفف عن كل عبادك اللي محدش يعلم به غيرك..
**********************
عينك دايما عالاشخاص اللي بيساعدوا الناس ويسعدوهم ...لان الناس دول في الأغلب دايما مجروحين .. ومتقولش أن دول جبال مبتنحنيش أو ناس مبيخافوش أو مبيزعلوش ... هما بس عندهم عزة نفس وشمم وكبرياء يخليهم ظاهرين أقوياء ...
عشان كدة إحرص وحاول انك تطمن على الأشخاص الأقوياء دول.. وبشكل ذكي وغير محسوس.. لان الناس دي محتاجة للحب والدعم والتشجيع والفخر بشكل أكبر مما تتصور !
**********************
- العالم قاسي جدا يا أمي ...
= أيوة يا سمر معلش
...
- خدي يا أمي والنبي فكيلي الـ٥٠ دي عشان اركب مواصلات
= هاتي الـ ٥٠ ... وخدي ..٣٥ فكة اهم حلوين كفاية عليكي!
- واضح إن مش العالم بس اللي قاسي والله يا أمي ..!
**********************
في إحدى صولاتي وجولاتي المعتادة مع التعب والدكاترة الفترة الأخيرة ...
لقيت خبير مصري واستشاري جراحي في ألمانيا عامل يومين للكشف ...فقلت أروح اكشف عنده واطمن برضه...رحت وبعد انتظار فترة دخلت ...
لقيت دكتور بسم الله ماشاء الله ...وسيم جدا - استغفر الله العظيم - " مع إني أنا وهو كنا لابسين الكمامة ...وأنا كدة كدة مبقيتش ابص للمغريات الدنيوية دي ..وتوني ستارك والأسطورة ماليين عليا حياتي زي ما أنتوا عارفين "😌
أول ما دخلت الدكتور فضل مبتسم - وأنا نقطة ضعفي الإبتسامة✋ - وقال لي وريني الأشعة والتحاليل واحكيلي...سكتت شوية ...فقال لي متوترة ليه ؟...وراح ناده للممرضة برضه وقاللها خليكي قاعدة عشان الأنسة متخافش " والمصحف ما خايفة أنت جبتها ليه دي " 😂😂😡
كلمته عن التعب وعن ظروف الكورونا العامة والخوف منها وقال لي بعد الشر عليكي فيه كورونا في البلد بس منوهمش نفسنا بيها ومتتوتريش ...وقعد يتأمل في الورق بتاعي ...وأنا بتأمل بنظره ذئبية ثعلبية صوابعه الخالية من الخواتم والدبل .. وبتخيل حفل زفافنا في قاعات أفراح الباخرة علاء الدين اللي في الزمالك ... وبشوف فرش القاعة وأكل المعازيم والفرقة
بس قطعت تخيلاتي الدبلة اللي أنا لابساها بلا ادنى داعي...يعني أنا ألبس دبلة في اليوم اللي اصادف فيه طبيب وسيم فخر الصناعة المصرية وبدون دبل ...!!
لسة هتخانق مع نفسي ... لقيته بيكلمني وبيقول لي هنحتاج نعمل مقطعية نطمن ...وبصي أنا معنديش كشف بكرة ...بس لو عملتيها هجيلك أشوفها ...ولو هتتأخري في عملها ...خلاص خلي دكتور إبراهيم يشوفها ...كنت هرمي الورق في الأرض...ليه ...ليه دكتور إبراهيم !!
رد وقال لي لأنه مسافر ... ومش هيلحق يجي تاني ...
نزلت لفني الأشعة المقطعية عشان أعملها دلوقتي مش بكرة ...فطلع للآسف فيه ناس ربنا يعافيهم عملوا حوادث وبحاجة للمقطعية...طب بكرة ؟ لا فيه حالات تانية....لملمت الورق ومعاه جراحي وفؤادي الممزق وألقيت نظرة وداع على العيادة و منعت دموعي تنسكب على قصة الحب اللي عاشت 15 دقيقة وتم وأدها قبل أن تولد...على إيدين موظف الأشعة المقطعية ..!
الله يسامحك يا مصر !
#جيش_مصر_ الابيض
#الحب_الضائع
**********************
خواطر مبعثرة ومن غير رابط ..
حبيت اقفل الفيس بوك والتليفون لمدة أسبوع تصفية للذهن وهروب من الأحداث والاحزان اللي مفيش منها فرار ..
قضيت جزء من الإجازة في واحدة من قري الدقهلية ..
دايما بشوف في مصر وجهها الجميل الطيب وبخشى وجهها القبيح ...
الطريق مكسر وصعب .. وكويس أن فيه مواصلات بتمشي فيه ...ركبت معانا سيدة ابنها الصغير بيعاني من القئ..ركبت من اول السكة لاخرها - وهي طويلة - عشان تودي ابنها وحدة صحية تكشف عليه .. زعلت على طول الوقت والمسافة اللي بتكابدها الفلاحة البسيطة عشان تكشف على ابنها .. مفيش مستشفى او مستوصف قريب .. مفيش صيدلية قريبة ممكن تروحلها... وفكرة أنها تطلب الخدمة بالتليفون شكل من أشكال الخيال العلمي ..
لقيت مبادرة حياة كريمة عاملين وحدة صحية فخمة جدا وشكلها حلو اوي .. كان نفسي القرية كلها تكون حياتها كريمة !
وصلنا القرية اللي الزمن وقف في حيطانها عند ٢٠١٠ !
اسماء المرشحين في انتخابات ٢٠١٠..خالد ابو شعيشع... الهامي عجينة .. عادل صقر .. احمد عيد .. شكل الثورة وما بعدها معداش على هنا ..؟
لقيت مسجد كبير وجواه مصلين كتير بسم الله ماشاء الله .. الشيخ كان بيخطب عن اللبس الشرعي وتبدل أحوالنا وسوءها بسبب اللبس .. فأصغيت السمع لقيته بيتكلم عن الرجالة اللي سابوا لبس الجلباب وبيلبسوا البنطلون اللي بيبين الجزء الأوسط من جسمهم حيث العورات ... " ابتسمت غصب عني بخبث وقلت الحمدلله بيتكلموا عالرجالة المرة دي مجابش سيرة الستات " 😂
ثم ايه دة .. خطبة ايه دي اللي يوم التلات !🙄
والله كنا يوم تلات بس تقريبا بيبقى فيه خطب استثنائية في الأعياد ..
المساجد كتيرة وشكلها جميل وفخم ودة أسعدني .. ومنظر المصلين الكثر فرحني جدا جدا .. بس كان نفسي كان يبقى فيه كيانات تانية صحية وتعليمية مثلا تحظى بنفس الدعم والكثرة .. وكان نفسي الخطبة تبقى بناءة وتمس الوجوه اللي قاعدة قدامك يا فضيلة الشيخ وتمس حياتهم اكتر من البنطلون ...
شفت من تاني قصر كبير فخم ..موقعه بالظبط أمام المصرف ..! وتساءلت ايه الفائدة اني ابني مكان غاية في الفخامة في قلب مكان فقير كله بيوت بسيطة جدا جدا .. وقدامي مصرف ؟!
المظهرية .. آفة تفكير قطاع كبير من المصريين .. لكن في النهاية هما احرار في مالهم وطريقة إنفاقه ..
اتكلمنا عن جهاز العروس في الأرياف ..واللي بيتقطم ضهر أهلها لأنهم بتجيب من كل حاجة ٢ ( وبالذات الأجهزة الكهربائية ) ومستغربتش أنه يبقى فيه ناس مديونة أو بتتسجن من جهاز بناتها .. الأسرة بتتعاير والناس بيتكلموا عليهم لو جابوا جهاز اقل مما يجب .. لان الناس بتتفرج عاللي العروسة جايباه حتى أدق أدق التفاصيل - عفوا- مثل ملابس النوم بتاعة العروسة .. فيه ناس بتعدهم وبتعرف العروسة جايبة كام واحد .. وان كنت مش عارفة المعلومة الخاصة الخطيرة دي هتفيدهم هما كضيوف وأهل البلد في ايه !!
رحنا البيت وحظينا بكرم وحفاوة رائعة واطلاله على أرض زراعية جميلة لمحصول الرز .. مشهد اتمنى اصحى عليه كل يوم ..
درجات اللون الاخضر قدامك .. طيور اول مرة اشوف زيها منها طائر جامع الوان الازرق والأحمر والأبيض وشكله شبه البطة بس مش بط ..ابو قردان والنحل والفراشات 😍... طبيعة جميلة هادئة بتتنفس بحرية على مهل مش ضبابية سريعة عجوزة ملوثة زي القاهرة !
الكلام عن الحاجة اللي عمرها ٨٢ سنة واتطلب منها تجيب قسيمة جواز ..ومينغعش مميكنة لانها كان فيها غلطة .. وازاي داخوا السبع دوخات عشان قسيمة جواز العجوز!..كوميديا سوداء...
كانوا بيتكلموا عن أن المتنفس بتاعهم هو جمصة .. بحر .. وهما نفسهم في البحر من السنة للسنة ... دي اكتر حاجة بيفرحوا بيها وبيحبوها ..
بقيت اسمع واشوف واتفرج وعقلي موقفش لحظة عن التفكير ...كل الناس اللي هنا يستاهلوا تيسير جزء من حياتهم وتسهيلها.. مواصلات .. مؤسسات .. فرص عمل .. وسائل ترفيه ...
كل الناس هنا وفي مصر كلها يستحقوا حياة مختلفة .. حياة أفضل ومش مجرد حياة ..بل جودة حياة كمان ...
رحلة لطيفة جميلة خرجتني نوعا من أحزاني الخاصة عشان ألتحم بأحزان عامة ...
يارب اسعد مصر والمصريين ...
**********************
كنت بتعشى إمبارح في مطعم المدينة شارع خيرت في لاظوغلي..
على بعد خطوات منه لقيت محل بتاع فضة مغلق بس محطوط جنبه علبة مية لقيت القطط كل شوية تشرب منها وعارفين مكانها منها قطة حامل كان شكلها كوميدي جدا ❤️😍
سألنا الراجل بتاع المقهى اللي جنب بتاع الفضة.. قال : آه صاحب محل الفضة هو اللي بيحط لهم المياه بالرغم من أنه عليه ديون ومش بيفتح المحل كتير.. بس بيجي يضع لهم الميه..
وكمل وهو بيضحك: إحنا في القهوة نحط لهم الأكل والراجل ده المية..
ولما لمحت قطط وقفت طويلا عشان تشرب ..بصيت للراجل ودعيت لهم هما الاثنين من جوايا.. وبالذات بتاع الفضة اللي في كرب ده.. ادعوا له بظهر الغيب زي ما دعيت له...
لعل اللي عمله يفك ضيقته وكربه يارب ❤️🌹
**********************
بمناسبة عيد ميلاد صديقتي ياسمينا الله يرحمها (شابة جميلة توفيت بالسرطان )..
هبتسم وأنا بفتكر موقف لطيف فرحني جدًا أنا وهي.. وبقينا مزقططين.. ومن أكثر المفاجآت اللي أسعدتني ...
كنا قاعدين وسط أصحابنا مرة في مول.. وصديق لينا حب يفرحنا بطريقة إبداعية جميلة فقال لنا اختاروا جيب من جيوبي ... واللي هتختار جيب صح هتاخد اللي فيه 😂
أنا وياسمينا اختيارنا كان في الجون أنا اخترت جيب وكان فيه مبلغ "سافرت بيه بعدها شرم الشيخ " 😂😂..وياسمينا كذلك طلعلها في جيبه الثاني مبلغ محترم.. بقينا قاعدين أنا وهي زي فيروز وأنور وجدي بنسقف ونغني ... معانا ريال معانا ريال ده مبلغ عال ومش بطال 😂❤️
ربنا يسعد قلب صديقنا ده ويفرحه.. ويرزقك جنة ربنا ورضوانه يا ياسمينا..
وتكوني هناك سعيدة وفرحانة زي يوم الريال..
**********************
" كان بيكلمني كل يوم ... بعدها بقت محادثة أسبوعية وقت ما يجيله مزاج يسأل عليا أو يدردش أو حتى يسلي وقته وهو بيطبخ أو بيشتغل أو بيتمشى ... بيقول نفس العبارات ..بس بقى ألطف من الأول .. مجرد تسلية وقت ".
" ده أشبه بالمجانين.. كل يوم بحال.. كل لحظة بحال.. يضرب ويلاقي، عايز اللي مهتمة بيه ويوم ما تهتم ينسل منها ويدعي الصداقة.. ويوم ما يحس بانفلاتها من بين يديه وذهابها بلا عودة يعود للسؤال عما حصل وعما بدر.. وما سبب تغيرك يا صديقتي العزيزة".
يرحب كثيرًا بالإهتمام عنه والسؤال عليه وعن عمله ومهاراته وأناقته وسطوع إبتسامته ... يحب تمامًا أن يكون النجم الأوحد في سمائها.. بينما يفخر أن سماءه مزدانه بالنجوم التي يعجز عن عدها.. بينما لم تقدم له نجومه تلك ذرة حب صادق مثلها!
قد يكون الفأر المذعور العاجز أمام الكاذبة والخائنة والظالمة والمدعية ومن أفسدت حياته..كالبندول المربوط بالخيط.. أو عروسة الماريونيت التي لا تتحرك بدون أصابع المؤدي.. ويتحول في لحظة لإنسان غاب ويتعملق ويتوحش أمام من تحبه بصدق.. ويذيقها مما لا تستحقه.
حينما يختار إحداهن يحب أن يختار الأفضل والأصغر سنًا والأصح جسدًا والأشد أناقة والأكثر مهارة والأعلى تعليمًا ... بينما هو في متجر الرجال لا يملك الكثير.. إلا في قلب من تحبه، وعينيها الحمقاواتين ...عين الحب التي تحول الذرة لجبل..والنقطة لبحر.
" يرغب في أن يأخذ من المرأة روحها وقوتها وجهودها وحبها وحنانها وأشياء أخرى..ولا يعطيها إلا الفتات.. فهو حتى لا يستطيع أن يمنحها السكينة، والهدوء، والرحمة، والإطمئنان معه لغد أفضل.. كيف لمن قضى العمر متحيرًا مذبذبًا أن يعطي مالا يمتلك! "
" يدافع بكل قوته عن فضيلة ما ... ويبكي بعبرات حارة ... وهي تعرف يقينًا أنه كاذب ... يقسم بمقابر المسلمين جميعًا أنه لا يتحدث مع سواها بينما هو كسنترالات القاهرة قبل إختراع المحمول..كل حجرات قلبه شاغرة ومشغولة.."
" يضيع عليها الوقت.. ويسرق منها العمر.. ويمتص منها رحيق الحياة كدراكيولا في كل أفلامه.. ولا يتركها إلا كخرقة قماش بالية لا تصلح للحياة.. بينما ينحني أمام الأخرى التي تمتص حياته.."
" يتركها في مهب رياح محملة بحبه وبألمها.. وبعد فترات يعود طالبًا الصفح.. نعم.. إنه رحيم.. رحمة من يمسح عن جبينها العرق برقة.. بعد أن ألقاها في قرار بركان!"
"لا يجيد التمسك بالبلسم البرد السلام والإستشفاء بنوره. .بينما تجيد يديه الإمساك بالجمر والإحتراق بناره"
ردت الثالثة بإبتسامة هادئة:
مسكينتان أنتما يا عزيزتي!..بل مسكين هو صنف الرجال!
لا يدري أن مطبخ اللعبة بكامله هو عقل المرأة هي من قد تعد الخطط مع إبليس ذاته.. الرجال من الطراز المذكور أعلاه يحتاجون لماتا هاري وسالومي.. أو امرأة سرقت مجرد خيط منهما.. فالمرأة تدرك جيدًا بحاسة الأنثى من يرغب في التسلي ومن يرغب في التخلي..تحب لعبة القط والفأر بكامل الإرادة الحرة..هي من تخفي ما تريد إخفاءه.. وهي من تصرح بمنتهى البراءة بما ترغب فقط في إعلانه!
هي تتركه يختار ويدقق بينما هي الأخرى لها مقاييسها غير المعلنة.. فقد يغطي هو نقص لديها، أو لديه مزية لن تلقاها في مجتمعها.. قد تحب سيطرته وسطوته.. أو تشغل الوقت هي الأخرى بينما تبحث عن الأفضل.. أو حتى قد تحبه لأنه يشبه حبيبها السابق!
هي من تستطيع إسعاد رجلها.. وهي من تستطيع تعذيبه..هي من تخلص حتى الموت.. وهي من تغرق في الخيانة دون أن يطرف لها جفن !
هي من قد تقنع أحدهم بحبها وهي غارقة في حب الآخر مثلا !
قد تحتفظ بأحدهم في قائمة المعجبين أو "الاستبن" وتقسم له دامعة بأنه الأوحد..
كل شيء يمكن إجادته وتصنعه وتمثيله.. حتى اللهفة والرقة.. حتى لهجة التأثر والنحيب.. حتى الليونة والغيرة..
حتى الدموع ذاتها..
كل شيء يمكن تعلمه بسهولة يا عزيزتي!
أين أنتم من هذا الصنف ؟
جلست بعين محملقة استمع لهذا كله..
وابتسمت وأنا أرد على ثلاثتهم بأن النفوس لا يعلم مكنونها إلا الله.. وأن من يظن نفسه يتلاعب بطرف.. لا يعرف حقًا من يعد عدة التلاعب به.. أو ماذا يجهز له الآخر.. أو ماذا تعد له الأقدار غدًا من ضربة يحمر لها قفاه وتصفر لها أذناه!
أقول وبمنتهى الهدوء إنه لا يحيق المكر السيء إلا بأهله.. وغالبًا من ذكرتم جميعا
من.. أهله!
**********************
" طبقا لقناعاتي الخاصة "
* مش أمر اخلاقى الارتباط بشخص متجوز وعنده اسرة وعلاقة قائمة وانت عارف دة ..او حتى شخص مرتبط او فيه حاجة بينه وبين حد ....هدم علاقة او بيت عمران وتخريبه مش امر سهل وهيفضل متعلق فى رقبتك ...ابعد فورا وربنا هيعوضك بكل خير.
* مش امر اخلاقى الايقاع بشخص لسة خارج من تجربة سلبية ..لو بتحبه ممكن تدعمه من بعيد لحد ما يستعيد طاقته ويختارك بنفسه " لو فيه زمان ومكان ومساحة لدة "...او يختار اللى هو عايزة بكامل وعيه وقوته واتزانه وتبقى فرحان عشانه وراضي جدا ...
انما دعم بني ادم فى فترة تخبط عشان عاوز منه حاجة... مش تصرف أخلاقى
* اللى بيعوز كل حاجة بيخسر كل حاجة ... ولازم قدر من التضحية ..كل حاجة جميلة فى الدنيا بتيجي بقدر من البذل ...فابذل مع الحاجة اللى تستحق .
* انك تخرج من ارتباط وانت مقدر الشخص اللى قدامك ومبتتكلمش عنه بالسوء دة بيدي احترام ليك فى نظر نفسك ... انما انا انفصلت عشان دي صفتها ونعتها وتوصم الناس بحاجة كذب ....وترجع تزعل لما تلاقى مدافع عن اللى انت شتمته وتزعل لما ميحترمكش ويبقى مش طايق يبص فى وشك ومش عاوزك تتعامل معاه لا فى شغل ولا فى انسانيات .
انت مجنون ؟!!!
* العلاقات اللى بالمزاج مش هتعمر يا جماعة... احنا مرهقين بالقدر الكافي...فيوم ما هنرتبط هيبقى عشان دة الجنب المريح اللى بيكمل الناقص وبيضفي سعادة وروح حلوة ...دة الركن اللى لقينا فيه شئ من الاطمئنان... مش بترتبط عشان نتعوج على بعض ونبهدل بعض عقد نفسية وندخل مارثون وادغال ومجاهل وبلاوي زرقا .
خليني اقول فى البوست الملخبط اللى فيه خواطر متباينة ..ناتجة عن مواقف مختلفة
هقول انه فيه فى كل مرحلة من الحياة محكات مخيفة وحاجات ممكن تمر بشكل راقي ومحترم ومميز ... تليق بيك وبقلبك وبضميرك ...وكل ما هتيجي على بالك وتحطها قدام نفسك وبس هتعرف انك كنت عادل فيها مش استغلالي او حقير او رخيص .
**********************
كان اسمها أم سيد.. كانت من البسطاء المقعدين عندنا في عزبة النخل مكانش ليها طلبات أبدًا إلا مروحة لأن الغرفة التي تعيش فيها أشبه ببدروم ..فكان الحر قاسي...وبطانية لأن البرد كان شديد ..
ويوم ما اتجابوا كانت بتسقف زي الأطفال ...وتقول لي دي بطانية حمراء جميلة تنفع عروسة.. هو أنا عروسة؟!.. وتضحك وتضحكني معاها❤️
اللي كان لافت نظري في الست أم سيد حاجتين:
الأولى: أن روحها جميلة جدًا وبنت نكتة.. كانت بتخلي صوت ضحكتي يوصل للشارع بسبب خفة دمها.. في الصورة دي كنت بضحك من قلبي ..
والثانية: إنها كان لها ابن بار.. كل ما نروح عشان نوزع حاجة أو نوصلها ليهم نلاقيه بيمسح ويغسل لها هدومها بيأكلها ويشربها وكل الأمور.. خلوق بشعر أبيض.. متجوزش وعايش لخدمتها وبرها كأفضل ما يكون البر..
جه موعد توزيع بعض وجبات الطعام من أهل الخير اللي كان بيبقي ليهم منها نصيب.. بس المرة دي كان الابن لوحده ومش مبتسم زي ما كان بيستقبلنا.. سألناه عليها من على الباب.. فبص على الداخل بعيون دامعة وقال لنا إن والدته الجميلة.. توفت..
وقال لماما إنها كانت بتحبنا وبتسأل علينا.. وطلع برة كالمعتاد يجيب لنا إزازة الحاجة الساقعة الإزاز المشبرة.. اللي مكنتش عارفة بيجيبها منين.. واللي كان مذاقها عندي أشهى من كل الكانزات المألوفة.. بس مكانش ده وقتها.. ومكانش هيبقى ليهم طعم من غير ترحيب أم سيد وروحها اللي كانت بتملا المكان..
عزيناه.. وشكرناه ... وقلت لماما إن اللي كان بيتعمل مع أم سيد.. هيفضل قدر ما نستطيع معه هو أيضًا..
رحم الله الأم الجميلة.. وبارك اللهم هذا الابن البار وآنس وحشته..
**********************
the shawshank redemption
Forrest jump
هيفضلوا من أحب الافلام لقلبي وممكن اشوفهم كتير بدون ما ازهق ... بياكدوا على أن الحياة ممكن متبقاش عادلة احيانا - أو غالبا - بس دورك انك متبقاش مفعول به ... وتعتبر وتقاوم وتقوم من الكبوة مهما كانت ... وتنجو ..
ومتسمحش لا لظرف ولا لمخلوق ايا كان أنه يسفه منك او من قدراتك أو مجهودك ...
اعتقد الافلام دي أثرت في جزء من شخصيتي واشوف نفسي اغلب الوقت بعيني بس مش بعين الناس خصوصا لو كانت ناس محبطة ...
وابص دائما عالبدايل والحلول في كل أمر ..
اللي خلاني ابتسم المفارقة لما قرأت أن توم هانكس اتعرض عليه شاوشنك لكنه رفض لانه كان مشغول بتصوير فورست جمب !
افلام فعلا ملهمة وبحب اشوفها في الأوقات الصعبة ❤️
**********************
بعض الناس المظلومة لما بتتحط في موضع أعلى ممكن تبقى أسوأ من الظالم ذاته ... لإنها بتكون مشحونة ومحملة بقدر من الشطط والغل اللي يخليها تنسى كل حاجة كانت بتدور عليها أو بتنامي بيها و تحيد عن كل حق ...
**********************
Take action ...
افتكرت الكلمة دي النهاردة وابتسمت.. كان فيه دكتور في الجامعة الأمريكية إدانا كورس قبل كده وقال فيه كلمات عمري ما نسيتها :
" لو تقدر تمنع الخطر فورًا.. امنعه
لو تقدر تقول كلمة الحق قلها.. وأيًا كان مكانك لازم تتحرك وتأخذ خطوة صحيحة، ومتستناش وتقول ربنا هيحلها لوحده.. ربنا سبحانه وتعالى دايمًا سايب لنا خطوط الحل ودورنا نتحرك.."
العبارة دي سمعتها من قائلها من 6 سنين وآمنت بها كل الإيمان..
إنه أي خطوة صغيرة بتفرق في الآخر في الصورة الكبيرة.. ولازم تحدث أثر وتغيير مهما بلغت ضآلته!
متستهترش ببوست تكتبه، أو كلمة ترددها، أو قرش تنفقه، أو دفعة أمل، أو جملة تشجيع..
فعل المبادرة مع الحماسة بيبقى ليهم مفعول السحر..
أما عن سبب الإبتسامة.. فهي إن النهاردة حصل حدثين ليهم علاقة بده..
إن واحدة من النساء اللي كان أهل الخير بيساعدوها معانا.. بقت هي النهاردة من أهل الخير وساعدت معايا ناس تانية بعد ما جمعنا لها من فترة عشان نعمل لها مشروع صغير وبالفعل نجح.. والنهاردة الست بقت بتعطي بعد الأخذ!
السبب التاني؛ إن محاربة السرطان اللي كتبت عنها وعن منتجاتها وعملت أكثر من فيديو عن ده.. وكان نفسي إن حد يشتري منها عشان يجبر بخاطرها.. ربنا رزقنا النهاردة باللي يشتري منتجاتها بالكامل.. وفي نفس الساعة فاجأتني مذيعة من التلفزيون المصري شافت البوست عشان تعمل معاها لقاء، وتظهر على التلفزيون وتتكلم عن حكايتها وتعرض منتجاتها..وهي نفسها مكانتش مصدقة ..
أنا مكانش على لساني غير عبارتي المعتادة ... سبحانك يارب.. سبحانك يارب!
**********************
سبحانك يارب..
كنا في يوم ترفيهي عاملينه لمحاربات سرطان
لفت نظري واحدة ست كبيرة منهم دمها زي العسل بتضحك مع دي وتهزر مع ده وترمي إفيهات.. ففضلت قاعدة جنبها عشان وشها اللي البشوش وروحها الحلوة...
رحت اظبط مع صديقتي عدد الوجبات وغيرها وبسألها... في الرحلات الترفيهية بتاخدوا ناس تانية مختلفة كل مرة صح؟!
قالتلي كل مرة بنغير الناس عشان الكل يفرح.. ما عدا واحدة بس هي اللي بناخدها معانا على طول.. لأنها كبيرة في السن ووحيدة ملهاش حد.. والسرطان عندها انتشاري.. قلتلها يعني ايه انتشاري؟! قالتلي يعني انتشر في جسمها كله....فبنحاول إنها تبقى معانا دايمًا..
قلتلها مين الست دي فيهم؟! طلعت هي الست البشوشة الباسمة اللي أنا كنت قاعدة جنبها!
غالبًا رب العالمين بيدي لكل شخصية مُعينات تقدر تخليها تقاوم..
يارب يشفي كل مريض في الدنيا
ويشفيها ويقويها ويديم عليها روحها الحلوة..
**********************
شوف يا سيدي... ما يبقي الواحد حي لحد اللحظة دي وعنده شوية اتزان ورضا... هو شوية الحاجات اللي مؤمن بيها أو بيحبها وقابض بإيديه الاتنين عليها ...
كانت بقى معتقدات دينية... أراء سياسية ... أيديولوجية فكرية معينة ... عادات مجتمعية مؤمن بيها ومحافظ عليها .... بعض القيم الأخلاقية... وشوية حاجات في صميم الشخصية كدة .
الحاجات دي بعد فترة من النضج اخترناها بكامل إرادتنا الحرة وآمننا بيها...
فطبيعي أن الحفاظ على أي حاجة من دول - واللي مش شرط تكون صح في نظر الآخرين بالمناسبة - يستلزم بذل وتضحية ...
بوقت وعمر... أعصاب وطاقة ... لحظات ألم ...فلوس ... فرص تضيع عشان حاجة من الإنتماءات دي ... بشر ممكن ميتوافقوش معاك ومع أي حاجة من اللي فوق ... وحاجات تانية أصعب.
فأنت ممكن تبقى أقلية !
خسرت حاجات وحاجات كتير كمان... بس كسبت نسخة أصلية من نفسك اللي أنت راضي عنها ... لا تتشابه ولا تتكرر ولا تسير مع أي قطيع بدون عقل او تفكير ... متعايش مع الخسارات بس بتكسب اللي أكبر منها ...
أنا جربت دة من سنين ...من أول الدين وتفسيره ورحابته وحبك له وايمانك بيه....لحد بوست اجتماعي صغير عالفيس بوك !
وبمقاييس المادة خسرت شوية حاجات...بس عمري ما ندمت ولا زعلت عالمعسكرات اللي اخترتها ... لأنه حتى بعد المرونة وإعادة التفكير... ملقتش نفسي إلا هنا وسط الحاجات اللي بحبها وقلبي وعقلي رضيوا بيها وضميري أيدها وروحي مالت إليها ... ولو الزمن رجع بيا تاني هختار نفس الإختيارات مع علمي بالخسارات!
لإني خسرت حاجات بس كسبت قوة وصلابة و إرادة حرة وتفرد وروح محارب حتى لو فضل لوحده ...
كل دة مش بالساهل ومش ببلاش..
ويستحق...
**********************
كل البشر بنلاقي فيهم مزيج غير متجانس من درجات الخير والشر.
لكن فيه ناس بحس إنهم كائنات نورانية جميلة.. يستحقون وصف إن ربنا نفخ فيهم من روحه بينما كائنات أخرى بحس إنهم بذور شيطانية صرف معرفش تواجدوا إزاي في هذا العالم.
أخو صاحبة العقار اللي إحنا فيه اتقتل من فترة.. وحكت اتقتل ازاى خصوصا إني سمعت عنه من ناس غيرها كتير إنه إنسان طيب جدًا ومسالم ومحترم وبيعمل خير كتير.. من الناس اللي الخير اللي في إيديها متوزع على الخلق واللي زيه بيمشوا وسيرتهم ونور وشهم وقلبهم سابقهم.
طلع إن عامل عنده في المحل بتاعه هو كان بيعطف عليه جدًا..لكن العامل ده سيء الخلق والتصرفات واترفد من الشغل.. فلجأ له مرة تانية، وعيط عشان يطلب منه إنه يقول للإدارة ترجعه تاني عشان محتاج وعايز فلوس..
قاله ولا تزعل أبدًا وهرجعك شغلك.. وعزمه إنه يتعشى معاه في بيته فرصة إن زوجته وأولاده مش موجودين، ومن بكرة إن شاء الله ينزل شغله.. الراجل دخل بيه البيت وقاله البيت بيتك لحد ما يغير هدومه وياخد دش من إرهاق اليوم؛ البيه ساب الراجل دخل وطلب 3 أصحابه يجوله.. وضربوا الراجل بالسكاكين أول ما خرج من الحمام قتلوه ونيموه على سريره وسرقوا اللي في البيت كله من دهب وفلوس..
الراجل الطيب المعطاء خسر حياته.. والشاب ده اتحبس وخسر حريته..
السؤال.. بيعمل دة مع أكثر شخص في الدنيا عطف عليه وجبر خاطره ؟! أمال اللي داسوا عليه بالجزمة كان هيعمل معاهم إيه!
وإيه الغل في أنه ميكتفيش بالسرقة ؟لأ قتل! بحاول أفهم النفسيات اللي زي ده ومبقدرش..
الراجل ده طوب الأرض بكى عليه.. لأنه زي ما قلتلكوا كان معطاء و جواد كريم.. وعمره ما رد سائل أو كسف مخلوق.. آخر حاجة عملها كانت عروسة بسيطة طلبوا منه مساعدة لجهازها.. بعت عربية كاملة بالجهاز لقدام بيتها وأهلها مكانوش مصدقين كرمه..آه والله كان من الناس النادرة اللي يتحكي عنهم وتسمع سيرتهم وأنت بتتمنى تكون ربعهم..
الشيطان الزنيم دة عمل فيه كده ليه؟ وأنهى حياته النهاية الدموية دي بأي ضمير؟.. معرفش!
ربنا يطيب ثراه ويحسن مثواه ويكثر من أمثاله الطيبين..
ويمحي كل نبت شيطاني ناكر للجميل..
**********************
لا الطاقة ولا العمر ولا الحقبة الزمنية اللي احنا فيها دلوقتي مستحملين صراع الديكة اللي بقت في أغلب العلاقات دة.
كلنا دلوقتي بندور على اللي يمنحنا الراحة والأمن قبل أي حاجة تانية ... ودول لو متوجدوش في أول أي حاجة مش هيتوجدوا أبدا.
**********************
٢٠١٢ كانت أصعب سنوات عمري في أولها وفي نصفها الحياة انقلبت تمامًا، خصوصًا إنسانيًا فقدت ناس مهمة.. لكن في الربع الأخير من السنة المؤلمة نفسها، وتحديدا يوم ٣٠ سبتمبر، قابلت شخصًا أصبح من أعز وأغلى خلق الله لقلبي ويمكن الشخصية دي كانت العوض عن السنة كلها.. وأهم المُعينات على ما بعدها من سنين.
٢٠١٥ كانت سنة قاسية جدًا.. كلها قلق ومخاوف وتحديدًا مهنية، وفي مجال الشغل.. كنت بين اختبارين قاسيين.. لحد ما ربنا أكرمني فجأة..و في الربع الأخير برضه من السنة وتحديدًا في يوم ٤ سبتمبر بالعمل مع إنسان من أفضل الناس اللي قابلتها في حياتي نقي، و حي الضمير، ومحب لوطنه ..قوله زي عمله وطيب السيرة والسريرة .. اتعلمت وبتعلم منه أكثر ما اشتغلت.. ودايمًا كان وبيكون مثيرًا لفخري!
قاعدة بفكر وبفتكر دة كله وأنا مذهولة وبقول لنفسي يعني لو ماكنتش الأزمات دي حصلت.. مكنتش هقابل الناس دي ولا أعرفها!! معقول ربنا بيسبب الأسباب، بما فيها من ألم وإبتلاء ظاهر، ونعمة ورحمة خفية.. عشان يخلينا نلتقي برزق حلو زي البشر دي؟!
الأزمات اللي بعد إنجلائها وانقشاعها تبتسم عشان تقدر تشوف الصورة واضحة وتضع كل الأمور والأشخاص في منزلتهم المستحقة..
العامة بيقولوا عن الأمور دي إن ربنا بيقطع من هنا ويوصل من هنا.
وأنا بقول إن ربنا بيعوض بحاجات قيمتها أعلى بكتير من المفقود.. ودايما التعويض بيجي في وقته.. عشان كدة ساعات كتير مبخافش وبطمن مهما ساءت، عشان ربنا علمني أن عطاياه وهداياه دايمًا أجمل وأكرم وأبهى..
يارب لك الحمد والشكر كما ينبغي لجلال وجهك وعظيم سلطانك.
**********************
شفت لقطة في مسلسل حلاوة الدنيا.. البطل فيها بيقول للبطلة: "أنا هجيبلك الدنيا كلها لحد عندك".. لما سمعت العبارة دي.. افتكرت إني قابلت في مشوار حياتي ناس نظيفة ونقية جدًا جدًا، بني آدم جميل ربنا يبارك له ويسعد أيامه ويفرحه.. من سنوات اتقدملي شخص كان من أفضل الناس اللي عرفتها في عمري كله! وهقول لكم دلوقتي أفضلهم في إيه؛ كان مهندس محترم ومكافح بدأ من الصفر.. احترم عقلي جدًا وتقبلني زي ما أنا.. كان فيه كل المواصفات اللي الناس ممكن تتمناها بعد تقدمه حصلت مشاكل لا مجال لذكرها.. وبابا موافقش.. الرفض كان بيّن وقاطع..
أنا حاولت بعض المحاولات بس كانت بدون جدوى.. محاولاتي مكانتش حب وبس .. بقدر ما كانت تقدير للشخص اللي كان بكل معاييري ممتاز، وكان بيتمنى لي الرضا أرضى.. ويحب يشوفني سعيدة ومبسوطة ويحب يفاجئني..
المهم إن هو مسكتش وفضل في سعيه الدائم.. ويكلم بابا ويرفض.. ويحاول مع ماما مرارًا..الكلام ده أخد شهور وبعدها تفاجأت أنه جالي الشغل.. وقال لي اختاري شبكتك وخليها عندك وأنا هقنع باباكي تاني وأعتذر له.. وطلع فلوس كتير عشان يجيب الشبكة "يحجزني" أحسن ارتبط بحد !
حاول كتير وبطرق شتى ... وأنا كمان حاولت ومكانش فيه جدوى ..مأصابنيش بالذهول غير محاولاته للتمسك بيا برغم كل شيء ..
وفي لحظة قررت أوقف كل ده... رفضت ده كله...وأخبرته بعدها أنه مفيش جدوى من الإرتباط لرفض الوالد.. وأنا مش النوع اللي هيتجوز ضد رغبة أهله.. وبرضه مش من النوع اللي يظلم ويبهدل ولاد الناس أو يوعدهم بشيء مش واثقة من حدوثه..وهو من أنقى وأعز الناس عليا آنذاك...و حاول كتير وتعب جدًا..وأنا مفيش في إيدي شيء.. استمر أنا في إرهاقه وانهاكه ليه؟!..
قلتله ده بشكل قاطع واستأذنته في إني هلغي رقمه وأشيله من الفيس و ربنا يكرمه يارب ويكتب له الخير لأنه فعلا يستحقه ..وقلتها بصدق يشهد الله وحده عليه ...
ونسيت أو تناسيت الموضوع بعد فترة الموضوع عدى عليه أكثر من ٤ سنين.. كنت بكلم ماما عن حاجة وجت سيرته.. وقلت لها ربنا يسعده أنا مشفتش منه إلا كل خير.. قالت لي تعرفي إن فلان ده يا سمر كلمني كتير بعد ما قلتي له شوف حياتك ..عشان يحاول بس حلفني مقولكيش.. وإتجوز بعد فترة من الموضوع وعرفني.. ومن قبلها وبعدها وهو بيسأل عني ويتصل بيا بشكل دائم ويقول لي بمنتهى الأدب والأخلاق أخبارك إيه يا أمي؟ و سمر عاملة إيه؟ لو محتاجة أي حاجة أنا تحت أمرك.. أنا بتمنى لسمر أحسن الناس وبتمنى لها كل الخير!
أنا بقيت قاعدة استمع لماما وأنا فاتحة بُقي وساكتة!.. فعلًا لحد يومنا هذا معرفش أي حاجة عن الشخص ده وتقريبا ناسيه شكله..لكن تصرفاته، وجديته، ومثابرته، ومحاولاته المدهشة لإسعادي...وبعدها محاولاته للتمسك بي..كان هو كل اللي فاكراه بالرغم من عدم حدوث نصيب! بيسأل على ماما من ورايا..وبيطمن علي.وبيتمنى لي السعادة.. مع إن الفترة اللي اتقدم لي وعرفني فيها مكانتش كبيرة إطلاقا..!
ربنا يسعد أيامك يا عزيزي ويرزقك الذرية الصالحة، والسعادة، والرضا في حياتك، ويبارك لك في زوجتك.. فيه ناس في حياتنا بيبقوا نبلاء في الغيبة والحضور! عاملين زي سحابة صيف وردية.. يمكن مبتقعدش كتير بس بتسيب أجمل أثر.. وأما نرجع نفتكرها مبنفتكرهمش إلا بكل الخير!
يارب أرزق حياتنا القادمة بظروف أفضل..وأرزقنا بالنبلاء، والشرفاء، والأنقياء اللي مجرد دخولهم فيها يسعدها ويحييها.. اللي ميخذلوناش..اللي يتمسكوا بينا.. ونحافظ عليهم لآخر لحظة في العمر يارب 😊
الزمن علمني أحسن تقدير العلاقات المحترمة..
الشخص ده كان واحد من أفضل وأنقى الناس اللي ارتبطت بيهم في حياتي.. ومذكروش على الملأ أو بيني وبين نفسي إلا بكل خير..