سنه لولي
عايز اعرف
سِنتي اللي رامتها للشمس ف صبايا
هي فين ؟
أمي وقعت منها سنه ومحتجاها
عايز أعرف
شعرك الشمس اللي ساحر كل نجمه ف السما
ليه يا أمي سحابه بيضه مبوخاها ؟
لسه مدرك ..
وقت لما بنام في حِجرك
غِيّه الاحلام بحالها كات بتيجي ..
مش جوزين
كنت بسأل
وقت لما تُوهتْ مني
إنتي فين ؟
شايفه إبنك ..
الزعل بقع جفونه
والهزايم واخده تارها
شايفه إبنك ..
اللي كان في اللفه نونو
عينه ليه فضت بكارها ؟
شايفه إبنك؟
_لا مشوفتش
فاكره إيده ؟
_مفتكرتش
كل ما يكتب قصيده يفتكر عِله صباعه
دمه يهرب من نخاعه
عاش يمثل يبقي ظابط
والقدر بيقوله فركش
فاكره إبنك ؟
_لسه برضو مفتكرتش
فاكره حضنك ؟
ياما علمني الحِبايه
علمني حضنك .. إن الأمان
مش شرط يبقي فيه معاهدات للسلام
علمني حضنك
خلاني ألون بالنجوم ريش السما
وفي ثانيه يتحول حمام
علمني حضنك
حدوته قبل النوم
وبقيت بقولها للمخده علشان تنام
ف إحضنيني
حسي بالضلع اللي نفسه يتعوج
فتمدي إيدك تعدليه
حني بربيعك
على غصن فاته كام خريف بيهد فيه فهتعدليه
وقفي شراع المراكب
وإسنديها بريح صَبا
شوفي اللي لسه في الصِبا
عايز يوقف الزمن ويشوف مفر
الليل يا أمي شوفته بِيّعَضْ القمر
الشمس ليه عماله تصرخ نور ؟
والريح بتعشق كل أرض تبور
وإنتي اللي أرضك سبحه ومصلي
والليل في حضنك ذِكر ويا بخور
يا محوشلنا الفرح حصاله
ومدوقانا الطيبه قبل الفول
مَسْت إيديها ع الغلال ضحكت
فَرح السنابل بَعزقْ المحصول
تسهر توشوش ربها
وبكوع إيديها تنْغز الليل لو هينْعس
تسهر تقول ..
فيه حد طمعان في الحياه
أديله قلبي الفل لابيض
في حد محروم م الضنا .. وانا
وحيات ضنايا إن يرضي ربي أخلعله مبيض
تسهر ..
وتقطف م السما أول ندي
وتجيبه لجل ما عود نعناعها يفطر
تسهر ..
وتزغزغ الليل الكئيب لو كان مِكَشر جوا عيني
خليني أقولك قبل ما يهل القدر
أعذريني ..
الزمن خد مني خانه
والقصايد حرف عطف
الأمل خيط في الهزايم
مدي إيدك هاتي طرف
إعذريني وأنا بوعدك
هفضل أحارب شمس لما تقول " آمين "
هخلق قصيده تبدل الليل الحزين
هفضل أسأل ..
سنتي اللي رمتها للشمس في صبايا
هي فين ؟
العتال
مايزعلشي
رجوعه من علام الله
عشان رايح بلا كوتشي
يعدي ع الملاذ مدبوح
بصرخه فقر بِتنتْع بيوت رمشي
يحس الروح
بتصرخ وقت حرت الأرض
فيسحبها .. مايركبشي
مايزعلشي
إذا استاذ حرقله كل رسوماته
لكن يزعل
إذا سأله في درس الدين
يرد يقول .. ما باعرفشي
بيرسم كل يوم نجمه في كراسته
عشان دوريه التفتيش
وأقصي طموحه في الدنيا
مابتعديش خطاوي الشيش
وكان يضحك علي المانيكان
كما همومه اللي مرصوصه
تقولشي النيش !
يحوش كل مصروفه
ويضحك خط في كفوفه
إذا بانِتْ جيوبه البيض
وقال معاييش
يموت عادي ..
ويتبسم
علشان اربع حيطان بتعيش
سألته مره عن حاله
وليه لما البعاد يكوي
بتنزل دمعه في هزاره ؟
وفتشته..
لقيته مخبي في جفونه
حكاوي كتير
وفتشته..
لقيته مخبي في الغربه..
ملامح فَرحه لعياله
وقالي حكاوي وقت الحرب
وعن ناصر وعن سينا
وعن أسرار ..
نستنا وإحنا ما نسينا
وقالي كيف جريد الدار
بيتباها بحيطانه النّي
وقالي إزاي صفار البوص
بيضحك عن بياض الطي
ووطي الصوت .. عشان الحيط
بيسمع كل حكاوينا فينزف شرخ
وفاجئُه سؤال علي لساني
كإنه غزاله يصدمها الوقوع في الفخ
وكرمش فقره في عيونه
بنظره تسد في ديون البكا للدهر
وقال ..عتال
مبعرفشي الهموم بالشكل
لكني أشيل
وصبري والله لو تعرف يكيل .. ويكيل
ومَزعلشي
عشان الفقر غمسني
ومَزعلشي
عشان سقفي الجريد عَجْز
ح اعرشها بضلوع جسمي
ومَزعلشي
عشان سِابني العلام بدري
وعيني الكُحل لو تنزف
بتشحت من دموع ولدي
ولو سببه..
بياكله اليُتم ماشبعشي
ولو سببي ..
ماراحشي المدرسه إمبارح
عشان كوتشي
زايد
كلني جوز اقلام ولا نستهومش ابدا
ولا عمر مره هتنكسف منهم خدودي
بعدين.. لبسني ف صدره وكإني السديري
تسوي ايه الدنيا يا ابن الكلب بعدك !
تسوي ايه الغيّه لو تطفش يا طيري !
حسيت غريق جواه
عمّال يطبش في الضلوع مش لاقي قشه
حستني بعد ما كنت اخبط ف السحاب
قفصين .. وعِشه
وبدأنا حرب الدمع ع الكتفين
وبدأت أبوش مني ودا ..
ابسط دليل على إننا من طين
وبدأت أهلفط بالكلام واقول
احنا ايه غير آهه وشويه حنين !
أقوي ما فينا لسان
وأضعف ما فينا عنين
هي آه الدنيا عقب سيجاره مرمي
بس تسوي كتير إذا عشنا بروحين
..
حاجَا عليا كإني مقصوف القلم
في إيدين ضفاير ..
لسه مبترسمش
خد مني قلبي ومت م الضحكه
علشان فرحت إن الضلوع مبكتش
قالي أما شوفتك والشُنط سحباك
مبقتش أخاف لو شوفت مره النعش
قولت السنين والتجربه رخمه
قالي ..
إن كنت ألين م الرغيف ماهتنكسرش !
وانا أصلي عارفك يا ابن صحن المش
لو تنكسر ..
بتقولي جيت ف التبن
لو تنكسر ..
بتموت عشان" معلش"
في اللحظه دي
كان البكا جاب آخره من حبه عنيه
كان قلبه آخر طريق لسؤال مهوبتوش
كان قلبي ..
متذنب علي السبوره وبيرفع إيديه
أخبارها إيه القمحه في بلاد الرحايا
أخبارها إيه ؟
قالي ..
أمك يوماتي ع الغدا
هي والطبليه متفوتهومش سيرتك
بينها وبين الليل عمار وسر مينكتمش
تتثورج الدار وتهيج لما تسأل
فاضل مناب في الحَله يا ولاد
مين مكالش ؟
قالي..
إستفردت بينا اللي متتسماش
والحزن ابن امبارح لسه
نخور عودي
وبقيت بخاف الليل واعمله ألف حساب
علشان مشفتوش غير حانوتي
قالي ..
بهتت حيطان القوضه في غيابك
سوره "يس" ناصبه الصوان بتعزي في البروايز
وانا كل يوم إذا أعطش بتشربني القُلل
وانا كل يوم بحتاس
يعني أرقْع ضحكتي .. ولا اطبطب ع المُلل
قالي ..
مكنتش أبدا يوم دموع
حزن الكانون بعد إكتشاف الغاز
قهرة سنين الراكيه ع البتوجاز
لمتنا حوالين الشموع بنسيح
وقت أما شكوا في الخضار الڤولت
قالي .. لأ مقالش
كالني جوز إقلام .. وفوقت