حياتنا النفسية حياة مليانة بالعجب، وهي أعظم وأهم اكتشاف ممكن تكتشفه وتمتلكه؛ وعشان كدا حاول علماء النفس على مر العصور إنهم يدخلوا جوا النفس البشرية، ويعرفوا اللي فيها، إيه اللي بيفرحها وإيه اللي بيحزنها، إيه اللي بيخلي الإنسان كويس وسوي وإيه اللي بيخليه مهموم ومضطرب، محاولات كتير ونظريات ياما بتحاول بس تفهم سلوك الإنسان عشان تساعده إنه يكون في أحسن حالاته.
في الكتاب ده هنعمل محاولة سوا ندخل من خلالها جوا نفسنا ونعرف بناءها وإيه اللي بيأثر فيها بشكل مبسط؛ عشان نفهم نفسنا أكتر، ونفهم اللي بيدور حوالينا، وإيه اللي بيأثر على تعاملاتنا مع غيرنا، وهنقسم الكتاب إلى 3 فصول هي
الفصل الأول: في الفصل ده هنتكلم شوية عن تركيبتنا النفسية، وإزاي نفهم عقلنا اللاواعي بيشتغل ازاي.
الفصل التاني: هنتعرف من خلاله على مبادئ نفسية خطيرة أوي بتسير حياتنا لو منتبهناش ليها بسرعة.
الفصل التالت: هنشوف فيه ألعاب نفسية خطيرة بنلعبها يا إما على نفسنا أو على اللي حوالينا أو بتتلعب علينا من الآخرين في تعاملهم معانا، ألعاب ممكن توقعنا فريسة للمرض النفسي.
مستعدين!
ياللا بينا على بركة الله نكتشف نفسنا