كان ليه
كان ليه حبي
كان ليه
كان ليه قلبي حبك
ودارى ليه
عشان نظرة كان فيها
كلمة حب
والا ضحكة كانت بتفرح
شوق قلب
والا إيه
لو هلوم... ألوم مين
قلبي والا دمعي الحزين
ياريتك يا قلبي ما حبيته
ويا ريتك يا عينيا ما شوفتيه
ده هو الجرح اللي أسيته
وهو الوهم في لياليه
حبيتك ومكنش على بالي
وجافيتك وإنت مش داري
ونسيتك وقولت دي أوهامي
وليه ليه يا أيامي
كان ليه!
كفاية جروح
وجاي تقولي أنسى
طب جاي تقولي ليه
ما قلبك باع بأسوه
خايف على قلبي من إيه
صدقني كان صعب عليا
أنسى حبك ولو ثانيه
أو أفكر إني أنساك
لكن ده مش بإيديا
قلبك غدر يا عينيا
وقدرت أنسى هواك
كان بيني وبين قلبي
شيء من التحدي
ميعرفوش إلا المجروح
كنت ساعات ببكي
والفكر كان بيقتلني
مع كل دمعة بتروح
وأحزن لما ألقى نفسي
تايهة ما بين نفسي
والأمل زي الروح
بيسافر بعيد عني
ويحلم أحلام التمني
يرجع يلاقي النوح
أرجوك كفايه
وصلنا للنهايه
كفايه جروح.
فراق مكتوب
مش قادرين أبدًا نفهم بعض
ولا عارفين إيه معنى الحب
كلامنا بقى كله صعب
كلام مش طالع من القلب
جايز تكون غلطتي
جايز يكون عنادك
جايز تكون أسوتي
جايز يكون بعادك
اتقابلنا من زمان
وكان لقانا صدفه
وكان بينا حنان
وكان بينا ألفه
دارت بينا الأيام
والفراق كان علينا مكتوب
خصام وراه خصام
مبقاش فيه خلاص محبوب.
ذكرى مكان
ساعات ياخدني خيالي
أعيش وأفتكر الماضي
وأحن لذكرى في بالي
كانت يوم تحلالي
وأسرح لو شفت مكان
مشينا فيه زمان
قلبي يطير فرحان
أعيش مع النسيان
وأقول زمانه جاي
حبيبي نسيني إزاي
أتاريني بعزف ناي
لذكرى وعمر مش جاي
المكان له ذكرى عندي
مش شيء عادي وبيعدي
ده محفور على قلبي
ده عمر تاني جوه عمري
وأصحى على أماكن تانيه
ناس رايحه وناس جايه
مش حاسس بيهم ولا ثانيه
عايش ومش عايش في الدنيا.
أغلى ذكرى
فرقتنا الدنيا واتقابلنا
دوبتنا الغربة وعذبتنا
كل شيء اتغير هنا
حتى إنتي... حتى أنا
ولا يوم اتغير حبنا
فاكرين أسامينا
فاكرين خطاوينا
ولحظة لقا كانت بتضمنا
فاكرين الخوف
وأسوة الظروف
إننا مش لبعضنا
مرت سنين وعدت
ولا مرة يوم قدرت
تقتل الحلم جوانا
كان فيه شيء أكبر
إن حد يوم يقدر
ينسينا هوانا
لكن القسمة والمتقدر
ده حقيقي أكبر وأكبر
والنصيب ينسانا
فيه شيء بياخدنا
من بين صحابنا
ونهرب بعذابنا
لما نفتكر أيامنا
بنكون ماشيين
ونتقابل صدفه
قلبي الحزين
بيسافر لغربه
غربة حنين
كلها ذكرى
ذكرى سنين
وأغلى ذكرى.
بحب بلدي
أول ما حب قلبي
حب اسم بلدي
مصر الغالية أمي
أفديها بروحي وعمري
أنا بحبك يا بلدي
حب فوق قوة قلبي
حب دايم.. حب أبدي
لأجل ولادي بعدي
يعيشوا على أرضي
أرض أبويا وجدي
الأرض اللي ضحا عشانها ولادك
لأجل ما نعيش في عزة لذاتك
وأول الحضارة كان على بابك
يحميك المولى من حسادك
بحبك إنتي
لذاتك إنتي
وكل اللي بيحبك
بحبه يا بلدي.