إذا غاب الأب غابت الحياة
إزيك ياللي مفيش في الدنيا دي زيك
طمني عليك لو حتى ثانية أشوفك فيها في منامي
إزيك وقولي منين ألاقي حد زيك
في الطيبة.. وفي الحنية
إزيك يا بابا بين القبور والأموات
قولي عامل ايه وطمني عليك
وحشني بزيادة وانت كنت بتوحشني وإنت موجود
فيه حاجات متنفعش غير منك
والحنية والطيبة في عيونك فعلًا وحشاني
قولي إزاي يجي علينا العيد وإنت كده بعيد
أنا كنت راضية بمكالمة على التليفون
تعيد بيها عليا
بس إنت روحت بعييييد
مع إن فيه مواقف وحكايات نفسي أحكيهالك
وآخد رأيك فيها
ما انت عارف إني ما بثقش غير في رأيك
وأهو غاب أكتر شخص في الدنيا
كنت بثق فيه
طب قولي إزيك
أنا نفسي ترجع تاني تطمني وتكلمني
لأني في غيابك قلبي مش مطمن
فيه مواقف وحكايات أنا محتاجالك فيها
لسه فيه وعود وحاجات كان لازم تكون فيها موجود
أرجوك عوووووووود
إرجع لقلبي علشان يطمن
في غيابك قلبي مش مطمن
إنت السند والأمان والدنيا بحالها
أنا فعلًا وحشاني ضحكتك
ونفسي أخدك في حضني وأطمن بوجوك
ونرجع نحكي حكاياتنا وذكرياتنا
ونتخانق على وجهات النظر
فيه لسه عندي كلام كتير نفسي أقولهولك
وحكايات ومواقف من غيرك حملها عليا تقيل
كنت متعودة إنك معايا بتشيل
مين ليا غيرك في الدنيا
طب ارجع قضي معانا العيد .
بيت العيلة واللمة الجميلة
بيت العيلة واللمة الجميلة
هما قالوا لي كده
لما حبوا يجوزوني في بيت عيلة
وقالوا القعدة على الطبلية قاعدة هنية
واللقمة الهانية تكفي مية
ولما أقع أو أتعب العيلة كلها هتتلم حواليا
بس الحقيقة غير الكلام
الحقيقة كلها آلام
لما اتجوزت الحال اختلف
ما لقيتش في بيتي حرية
وحماتي بتتحكم فيا
لابسه إيه
رايحة فين
جاية منين
عندي شقة بالاسم بتاعتي
بس مش ليا
وجوزي ابن أمه...
وبيراضي أمه على حسابي
ولما أقول له والدتك بتهني
بتتمسكن وتتمكن
وتضيع حقي
وابنها يقول لي بوسي على دماغ أمي
ولو غلطانة أمي عمرها ما تغلط
ديمًا في بيت العيلة مرات الابن متهانة
وبعد شهر قالوا لي عايزين عيال
عايزين الولد يشيل اسم أبوه
وبلاش خلفة البنات
شوفي سلفتك وخلفتها
يا ما شاء الله عليها أم الأولاد
وخلفت بنتي الأولى والتانية
وينادوني بأم البنات
ويعايروني بنعمة ربنا عليا
وسلفتي تتريق عليا
ويقولوا الحيطة هتميل عليا
أما سلفتي التالتة
لأنها بقى لها سنة متجوزة
ومخلفتش لجوزها عيل
سعادة البيه بيقول لها يا أرض بور
وأمه تقول لها هجوزه
علشان يخلف ويملى البيت عيال
نسيوا إنها لسه في بداية حياتها
لسه عروسة من حقها تفرح
وبكرة الأرض هتطرح
غير إني بقيت خدامة هلكانة في بيت عيلة والساقيه دايرة.. ما بتقفش
وما ينفعش يوم أتعب وارتاح
كان مالي ومال بيت العيلة
أنا كان نفسي أتجوز وابني عيلة جميلة مترابطة سعيدة
إيه دخلني في شغل العقارب
وأهل التجارب ليه ما نصحونيش
ليه سابوني أكمل
ولما أقول كفاية
يقولولى عيشي
ضل راجل ولا ضل حيطة
غيابك طول
غيابك طوّل
طب كنت قول لي من الأول
إنك هتغيب
ما كنتش أعرف إني ظني فيك هيخيب
تستحق بطولة وميت جايزة
إنك نجحت فى إني أحبك
أيوة حبيتك.......
وكنت الأمل والدنيا والأمان
مكنتش أعرف إن قلبي هيتهان بالشكل ده
وإن حبي ليك له فاتورة ولازم أحاسب عليها
مكنتش أعرف
طب كنت تسيب قلبي الغالي خالي
كنت تسيبني بدل ما تعذبني
لما إنت مش قد الحب
ليه خلتني أحبك
فيه كلمة كل ما أشوفك نفسي أقولها
ياريتني ما حبيتك
ياريتني ما عرفتك
ياريتني ما شوفتك
أنا بتحاسب ليه على حبك
وليه حبك عذاب بالشكل ده
ليه مش شايف الحب في عنيا
أنا اللي كنت زمان تتمنى تسلم عليها
أنا الوردة
أنا النسمة
أنا النجمة العالية الغالية
أنا جولييت فاكر ولا نسيت
وقولي ليه قسيت
كان حبك ليا مجرد فضول
سؤال وجواب
أنا القمر اللي نور حياتك
أنا شمس نهارك
فاكر ولا نسيت
وقولي ليه قسيت
مكنتش أعرف إنك هتبيع بالشكل ده
طلما مش هتصون ليه تعلق قلب بيك
قررت خلاص أحذفك من قلبي
ولو التمن بحر دموع
اذهب إلى قائمة البلوك من حياتي
وخلاص مش هدور عليك
ولا هشتاق إليك
خلاص مش هتوحشني
أنا