"انتي بتقولي اية؟ .." الخبر دة يمكن كان صادم اكثر من خبر موت كارين نفسه .. يعني اية؟ امال مين الي استضافها في بيته من ايام؟! ماجي قالتله يمكن يكون اختلط عليه الأمر او غلط في العنوان .. لكنها هي كمان اتصدمت لما سام شال غطاء اللوحة الي كانت في ايده وشافتها .. هي فعلا كارين .. والشي الاخطر من كدة .. انها كانت بنفس الملابس الي كانت لابساها يوم الحادث ..
كان واقف مصدوم وهو شايف عربيتها الي ماجي قالتله انها مركونة في جراج البيت من يوم الحادثة .. هي نفس العربية الي شافها من ايام .. لكنها مدمرة حرفيا وظاهر عليها اثار مرور السنين .. الي عرفه سام ان كارين في نفس اليوم الي زارته فيه لكن من 3 سنين .. وهي في طريقها للبيت اختل توازن عجلة القيادة منها وعربيتها وقعت من فوق مكان مرتفع ..
ما كانش عنده تفسير منطقي للي حصل .. هل ممكن تكون دي روح كارين؟! طيب كانت عاوزة اية؟! سام كان بيسأل نفسه من ساعة ما ساب ماجي وطول الطريق لبيته .. ماكانش متخيل ان ممكن يمر عليه موقف زي دة .. الحاجات الي زي كدة كان بيشوفها في الافلام ويسمع عنها من حكايات الناس .. لكن عمره ما كان بيصدق فيها ..
الشي الي كان شاغل تفكيره .. ومش قادر يفكر في حاجة تانية .. انه عاوز يعرف اية السر ورا الي حصل معاه دة .. لما روح البيت .. فضل مركز فـ اللوحة .. وكمان كان بيحاول يفتكر المقابلة العجيبة دي بكل تفاصيلها .. يمكن يكون فيه اي اشارة توصله للحقيقة .. كان متأكد ان الي حصل معاه دة له معنى .. وان الموضوع محتاج منه شوية جهد ..
الفكرة الي كانت في ذهنه ان ممكن يكون موت كارين مش مجرد حادث .. وان ممكن يكون جريمة قتل .. فكّر انه يتّصل بروس ويخليه يجمعله معلومات عن كارين .. لكن تراجع عن فكرته لانه ماكانش عارف يبرر لروس طلبه .. وماكانش عاوز يتكلم في التفاصيل الي اي حد هيسمعها مش روس بس هيقول عنه انه عنده مشكلة عقلية ..
عشان كدة ما كانش قدامه غير ماجي .. الّي لما كان شاركها بـ الّي فـ باله ..استبعدت الفكرة دي .. كانت بتقوله أن كارين ما كانش ليها اي اعداء .. وان عمرهم ما اشتبهوا ان الحادث يكون متعمد ..
لكن سام اكدلها ان فيه لغز ورا موت كارين .. وطلب منها انها تساعده بـ تفاصيل اكتر عن حياتها .. يمكن دة يوصله لشي .. يعني .. سألها اية الحاجات الي كانت بتحبها ومين صديقاتها الي كانت مقربة منهم .. وهل كانت مرتبطة او لا .. ماجي كانت متأثرة باهتمام سام .. وبرغم انها كانت مقتنعة ان موت كارين كان مجرد حادث .. الا انها وافقت تساعده وتقوله التفاصيل الي هو سأل عنها .. قالتله ان كارين كانت بتحب شغلها جدا .. وكانت كمان مهتمة بالفنون .. صديقتها المقربة هي صديقة الطفولة "كارول" .. بس بالنسبة للارتباط قالتله ان كارين شخصية كتومة شوية .. الي تعرفه عنها قبل الحادث بكام شهر كانت قالتلها انها اتعرفت على شخص وبمرور الوقت ارتبطوا بس هو عنده مشكلة واول ما يحلها هيعلنوا ارتباطهم .. لكن هي ماتعرفش مين هو الشخص دة ولا اية طبيعة المشكلة الي كانت عنده ..
سام راح تفكيره ان ممكن يكون الشخص الي كانت مرتبطة بيه كارين له علاقة بموتها .. ولأن ماجي ماكانش عندها اي معلومة عن هوية الشخص دة .. فكّر ان ممكن تكون كارول صديقتها المقربة تعرفه .. فطلب من ماجي انها تتواصل معاها وتسألها .. ماجي قالتله انهم على تواصل من وقت للتاني بس يمكن التواصل قل شوية الفترة الأخيرة بسبب انشغال كارول بمولودها الجديد .. فهتحاول تزورها في اقرب وقت وتسألها ..
كارول كانت مبسوطة بزيارة ماجي .. الي فضلت تدردش معاها في اكتر من موضوع .. وبعدين جت سيرة كارين .. وفضلوا يفتكروا مواقف ليهم سوا من وهم صغيرين ويضحكوا .. بعدها ماجي سرحت شوية وقالت ان كان نفسها تشوف كارين بفستان الزفاف .. لكن الموت كان اقربلها .. وسألت ان كانت تعرف الشخص الي كانت كارين مرتبطة بيه .. وهنا ظهر التوتر والارتباك على كارول .. وكأنها ماتوقعتش تتسأل السؤال دة .. وبعدين حاولت ترتب كلامها .. قالت انها ماتعرفش هو مين .. وان كارين كانت قايلة انها هتعرفها عليه في الوقت المناسب .. بس محصلش نصيب ..
سام زاد شكه اكتر وماجي بتحكيله الي حصل .. والحقيقة ان رد فعل كارول زرع بذور الشك في قلب ماجي نفسها كمان .. وبعد ما كانت بتحاول تساعد سام - بس - لأنها تأثرت بحالته .. اصبح عندها هي كمان رغبة انها تتأكد من حقيقة الي حصل يوم الحادث .. عشان كدة قالت انها هتدور في غرفة كارين الي من يوم الحادث وهي زي ما هي .. بيتم تنضيفها بشكل دوري .. بس مفيش حد بيستخدمها .. وحاجة كارين موجودة فيها زي ما كانت سايباها .. وقالتله ان اكيد لو دورت في حاجتها الخاصة هتلاقي اي شي يعرفها هوية الشخص دة ..
وفعلا اول حاجة عملتها لما روحت انها طلعت غرفة كارين وبدأت تدور في اشيائها لحد ما لقت صندوق صغير .. فتحته لقت فيه مجموعة من الهدايا .. ومعاها بعض الصور .. ولما مسكت صورة منهم عينيها اتفتحت من الصدمة!