" احمد "
اتحركت على الكافيه اللى البيه قاعد فيه .... لقيته قاعد مع واحده من البنات اللى يعرفهم .... لو بس كنتى موجوده وتشوفيه وهو قاعد معاها ازاى وبيهزر معاها ولا كأنه مزعلك او انتى فى دماغه اصلا ..... بص مكان ما أنا قاعد .....تقريبا خد باله منى .....مش مهم كدا كدا مش هيفرق معايا المهم انتى .....قام دخل الحمام ... محستش بنفسى غير وانا قايم داخل وراه ......
- استاذ حسام .. أزيك
= أزيك
عامل نفسه مش عارفنى ....بيحاول يتجنب يتكلم معايا بس أنا لازم افكره بنفسى ...
- انت فاكرنى .. أنا احمد اللى كنت انقذت خطيبتك
= ايوا ايوا فاكرك ...
اظن كدا مش صعب عليه يفتكرنى ...بس بيحاول يتجنب يتكلم معايا تانى ... ميعرفش انتى عامله إيه اصلا او انتى فين دا كمان تجاهل الرد على سؤالى لما سألته وقولتله ...
- امال مين اللى قاعده معاك برا دى
رد برد سخيف زيه ورخم .... مش مهم اهو خرج ليها وقاعد يهزر معاها ....ايوا زى ما كان بيعمل معاكى كدا بظبط ..... مش فاهم انتى حبيتى فيه إيه دا ... دا مريض نفسى يا روان ....مشيت وراه لحد شغله و وقفت استنيته لحد ما خلص .... اهى فرصتى اهيه .... ولسه بيفتح باب شقته وروحت خبطه على دماغه بعصايه خليته يفقد وعيه ..... أنا مش قاتل او سفاح ...ومعرفش أنا عملت كدا ازاى .... بس زى ما قولتلك قبل كدا الضرورات تبيح المحظورات ....وهو ضايقك وانا مش هقدر اسمح انى اشوف اى حد بيضايقك واسكت ....خدته على اكتر مكان عمر ما حد هيقدر يوصله او يعرفه فيه ....ربطته كويس اوى ودخلته المكان اللى محدش يعرف عنه حاجه ....سرى اللى اكيد فى يوم من الايام هعرفك عليه وهحكيلك عنه بس مش دلوقتى ... ابتدى يفوق اهوو
- حلوه الضلمه مش كدا
= انت مين و عاوز إيه
- عيب لما تسألنى سؤال زى دا انت شايفنى غبى
= أنا عارف انت مين كويس
- وانا عارف انك عارف أنا مين
= امال ليه مستخبى فى الضلمه ما تنور النور وخلينى اشوفك
- إيه ...خايف
= انت عارف انى مش خايف ...انت اللى خايف
- وانا هخاف منك ليه
= لانك لو مش خايف منى مكنتش ربطتنى
- ومين قالك انى خايف منك أنا خايف عليك .... انت متعرفش حاجه عن المكان دا
= طب ما تنور النور و ورينى نفسك
- انت إيه حكايه نور النور معاك ..ادى يا سيدى النور اهو ...عيل جبان
= طب ما تفكنى ...ونشوف مين فينا الجبان يا دكر
- انت عارف كويس أنا لو فكيتك هيحصل ايه
= يا ابن الك...
- اوعى تكملها ...متقولش كلام تندم عليه وخصوصا لو انت فى موقفك دا
= انت عاوز إيه بظبط
- انت اللى عاوز إيه بظبط
= هو مين اللى خاطف التانى
- ومين قالك انى خاطفك
= امال دا اسمه إيه
- أنا باخد حقى منك
= حقك ... حق إيه هو أنا اعرفك اصلا
- جايز انت متعرفنيش بس أنا اعرفك كويس اوى
= انت مين يالا
- أنا اللى انت واخد حبه منه ... ومش حاسس بقيمه النعمه اللى معاك اللى غيرك بيتمنى ربعها
= قصدك مين
- ليك حق متاخدش بالك او تركز ..عشان انت مش مهتم بيها اصلا
= قصدك روان
- هو فى غيرها
= روان دى بنت مجنونه وهبله ... عبيطه وبتصدق اى حاجه ... انت لو كنت قولتلى كدا كنت سيبتهالك دى مفيش فى دماغها غير الجواز والكلام دا ....دى بنت و..
- اوعى تتكلم عنها كدا تانى عشان مندمكش على اليوم اللى نطقت فيه
= إيه انت بتحبها ولا إيه
- إيه ... مضايق
= أنا اضايق ليه ...انتوا الاتنين لايقين على بعض جدا ... مجانين زى بعض
- انت عارف يا حسام ان أنت أنا فى حاجات كتير
= أنا شبهك فى إيه بقا ان شاء الله
- انا كمان كنت زيك كدا عنيد ... وبقول كلام أنا مش عارف هيسبب ليا إيه قدام .. وكنت متسرع زيك كدا بظبط ...بس مكنتش مريض نفسى زيك كدا
= مريض نفسى ... أنا
- متستغربش ...اه مريض نفسى طبعا ... انت بتسمى اللى عندك دا إيه ...انت بتحاول تدارى ضغفك وعجزك فى أنك تعرف بنات كتير ...بتحاول تسد الفراغ اللى عندك بعلاقاتك النسائيه الكتير .... انت عاجز يا حسام ودا باين عليك جدا .. حتى لو معترفتش بدا فأنت كدا كدا مفضوح
= " يبصق حسام على وجهه "
- " يصفعه احمد " أنا مش هعملك حاجه دلوقتى أنا هسيبك هنا لحد ما تتربى وتعرف غلطك إيه ...وتسمحلى استلف منك التليفون الغالى دا وهاخد كل حاجتك .... اه معلش نسيت اقولك متحاول تزعق او تصرخ لاننا فى حته مقطوعه اولا و ثانيا الاوضه دى عازله للصوت ... سلام
" روان "
عدت تلت ايام كاملين وحسام مكلمنيش او فكر حتى يتواصل معايا ومتعمد يتجاهل الرد على رسايلى اللى عماله ابعتهاله ..... مجاش فى دماغى ان الموضوع هيوصل للدرجه دى .. لدرجه انه يتجاهلنى ... لانه عمره ما عملها ... عمره ما عملها بشكل مباشر كدا .... مقدرش اقول انه عمره ما تجاهلنى ... انشغاله بشغله عنى دا تجاهل ... خناقه معايا بسبب او بدون سبب دا تجاهل .... تأخره عليا دايما دا تجاهل ... بس عمرى ما تخيلت انك تشوف رسايلى يا حسام ومتردش عليا .... حقيقى أنا مش مصدقه ....
- يا بنات أنا نازله اشرب قهوه حد فيكم ييجى معايا
لا مش قادره
وانا فى مشوار
وانا هنام
- تمام
" احمد "
عدى تلت ايام من ساعه ما حبست حسام وخدت تليفونه ... تلت ايام ومن تانى يوم و روان عماله تبعت ليه وتسأل عنه وتكلمه وانا اشوف الرسايل ومردش ومش عارف اعمل إيه او اتصرف ازاى .... دى مش لاقي ليها حل يا روان سامحينى ... وبعدين انتى اللى حطانى فى المشكله دى دلوقتى ... فارق معاكى يعنى هو فين ....نسيتى اخر مره كلمك عمل إيه .... دا بيخونك يا روان ... دا طلع يعرف بنات كتير اوى وبيكلمهم كلهم و بيقولهم نفس الكلام ... أنا مكنتش بحب اقلب فى تليفونه عشان دى حاجه متخصنيش .... بس لما تليفونه بقا معايا وملكى فضولى كان هيموتنى .... كان لازم اشوف كلامكم القديم و اول مره شافك وكلمك ... ملاحظتيش قد إيه هو كان هيموت ويكلمك ..... حسام دا مريض يا روان وميستحقكيش ....صدقينى بعده عنك نعمه ... أنا بعملك خدمه وبعملك جميل هتفضلى تحبينى بسببه ...... أنا عرفت انك قاعده لوحدك دلوقتى ... أنا هجيلك اقعد معاكى شويه ... متخافيش مش هتاخر عليكى ..مقدرش .......
- انك تشوف حد مره فى مكان ممكن تقول صدفه ..لكن مرتين دا يبقى اكيد القدر باعتك ليه
- أزيك يا احمد
- أنا كويس الحمد لله ..ازيك انتى
- تمام
- مع انه مش باين عليكى
- لا يعنى ..شويه مشاكل كدا وحوارات
- طب ما تحكيلى يمكن اقدر اساعدك
- لا مش عاوزه اشغلك مخك
- لا يا ستى ولا تشغليه ولا حاجه ...الا لو انتى مش عاوزه تحكى
- لا خالص والله
- طب احكيلى فى إيه مالك
- أنا وحسام اتخانقنا من 3 ايام كدا .. ومن ساعتها مكلمنيش وبيشوف رسايلى وميردش ومعرفش عنه حاجه
- طب ما تكلمى حد من صحابه القريبين يمكن يقدر يفيدك
- معرفش ليه صحاب ومعتقدش حسام عنده صحاب
- طب ما يمكن مشغول فى شغله وكدا او لسه مضايق من الخناقه
- معرفش يا احمد بقا بس أنا حاسه انى غلطانه
- ليه
- معرفش
- هو إيه سبب الخناقه
- اممم ... حوار بين اى اتنين مخطوبين عادى
- لا دا باين عليه مش حوار عادى يعنى ..طلاما انتى بتقولى مبيردش وكدا
- يعنى مش اوى .. بس حوار مش كبير اوى يعنى
- طيب هو من الواضح انك مش هتقوليلى إيه الحوار بس أنا بطمنك ان شاء الله مفيش حاجه ممكن يكون هو مش عاوز يكلمك وهو مضايق بس مش اكتر وهيكلمك تانى
- والله مش حوار مش عاوزه اقولك... بس أنا مش عارفه اقولك إيه الحقيقه يعنى
- على العموم أنا مش هضغط عليكى او اخليكى تتكلمى بالعافيه يعنى .... بس اسمعى منى كل حاجه هتبقى كويسه ان شاء الله
- ان شاء الله .. أنا هقوم امشى معلش
- تحبى اجى اوصلك
- لا لا أنا هاخد تاكسى من برا ..معلش مش قادره امشى
- لا عادى ولا يهمك
- باى باى
- سلام
مكنتش متوقع انك هتزعلى كدا على حسام ... زعلانه انه مش بيكلمك بعد اللى عمله فيكى ....دا ميستاهلش يا روان ...بس أنا مش هقدر اتكلم معاكى ...انا هتصرف واخليكى تكلميه وتسمعى صوته ....