" روان "
قومت دخلت الحمام اغسل وشى بعد ما احمد الح عليا .... أنا مش مصدقه ان حسام يعمل معايا كدا بعد كل دا ... بعد كل وعود الحب والغرام والجواز وصبرى عليه ..ييجى ببساطه ويعمل معايا كدا ....حقيقى أنا مش مصدقه ..... أنا لازم اعمل زى ما احمد قالى ... لازم اتجاوز حسام وكأنه مش موجود ... هو الخسران ... أنا اللى كسبت مش هو ... هنساك يا حسام ...صدقنى هنساك وهعيش حياتى .... أنا مش عارفه هشكر احمد كام مره .... هشكره انه انقذنى من الموت ... ولا هشكره انه ورالى حقيقه حسام وبينلى قد إيه انه اقل من انى احبه ... ولا اشكره عشان واقف جنبى دلوقتى ومسابنيش ... حقيقى أنا مش عارفه اقوله إيه ... بجد أنا فرحانه ان فى بنى ادم زيه كدا فى حياتى .... الواحد قليل لما بيلاقى بنى ادم محترم وهادى وعاقل وجدع وبيقف جنب الواحد حتى لو هو ميعرفوش كويس ... أنا هغسل وشى واخرج ليه ...
- اسفه اتأخرت عليك
- لا خالص مفيش تأخير ولا حاجه ... أنا معرفش انتى تحبى تفطرى إيه ..فطلبت ليكي معايا بيتزا
- بيتزا
- أنا عارف انه فطار غريب شويه ...بس أنا بحب افطر حاجات دسمه اوى على الصبح ومبيفرقش معايا
- لا أنا مش مستغربه على الفطار
- امال إيه
- أنا اكتر اكله بحبها هى البيتزا ومستعده اعيش عليها حرفيا
- بجد
- اه والله
- طب كويس والله انى طلبتلك معايا ... لو فضلتى بقا تضحكى كدا على طول هعزمك كل يوم على بيتزا
- دا لو كدا بقى أنا مش هبطل اضحك خالص
- وانا مش عايز حاجه غير كدا " يبتسم "
- بجد شكرا ليك يا احمد انك جيت و وقفت جنبى وساعدتنى أنا مش عارفه لولاك كنت ممكن اعمل إيه
- طب ممكن متقوليش كدا تانى عشان مش الغى البيتزا
- لا بجد والله أنا مش عارفه اقولك إيه.... شكرا انك جنبى
- أنا معملتش غير اللى اى صاحب فى مكانى ممكن يعمله.. ولا احنا مش صحاب
- لا صحاب طبعا
- طيب خلاص يبقا أنا معملتش حاجه
- ماشى يا عم احمد "تبستم"
- طب يالا اهى البيتزا جت اهيه ..متكسفيش بقا وكلى براحتك
- لا انت متعرفنيش فى الاكل معنديش ياما ارحمينى
- اما نشوف
- ماشى
خلصنا فطار وقعدنا شربنا القهوه الصباحيه المعتاده بتاعتنا وفضلنا قاعدين نتكمل كتير جدا لدرجه ان الوقت خدنا وبقينا العصر واحنا مش حاسيين بالوقت ....
- يااه الوقت عدى بسرعه
- فعلا عندك حق
- أنا مضطر امشى بقا عشان عندى شغل وكدا ...انا مبسوط بالقعده دى جدا واتمنى متبقاش اخر مره
- إيه دا انت نسيت وعدك ولا إيه كل يوم بيتزا لو أنا مبطلتش اضحك
- خلاص لو مبطلتيش تضحكى النهارده بكرا هنفطر بيتزا
- أنا موافقه
- ماشى يا ستى يالا سلام
- باى باى .....
" احمد "
" يحلم احمد بحلم غريب ...يرى والدته و والده يتشاجران مشاجره عنيفه جدا ..
المرادى مش هتقدرى تنكرى او تكدبينى اظن كل حاجه باينه ..
اه بخونك ... وهخونك ...عارف ليه .. لانك مجنون ومحدش يطيق يعيش معاك .... ياخى احمد ربنا انى لسه موجوده معاك فى بيت واحد ومخدتش ابنى وطفشت ...انت مجنون ...انت مجنون ..
اخرصى "يصفعها "
مش بقولك مجنون ... أنا هسيبلك البيت وامشى ...انا هفضحك فكل حته ..اما وريتك ميبقاش الله حق..
أنا مش هسمحلك تعملى كدا ... انتى لازم تموتى ... أنا مش هخليكى تعيشى .....
انت اجبن من انك تعملى حاجه ... عارف ليه .... لانك مش راجل ... انت مش راجل ....
اسكتى ..."يسحب والد احمد سكينه ويطعن بها امه امامه " احمد .... احمد أنا مكنتش اقصد يا حبيبى اعمل كدا ... خد يا احمد...
- " يبدأ احمد فى الركض فيلاحقه والده ويقوم بضرب احمد بالسكينه فى ضهره فيسقط احمد على الارض "
يتغير المشهد احمد الطفل نائم على سرير بالمستشفى وبجانبه خاله و احد الاطباء
طمنى يا دكتور على الولد ...
الحمد لله الاصابه كانت كبيره بس الحمد لله ربنا بيحب الولد دا ... لولا ان ابوه افتكر ان الولد توفى قبل ما يقتل نفسه كان الولد دا زمانه ميت معاهم ...
طب الحمد لله الف حمد وشكر ليك يارب ...
نحمد ربنا ان الجيران دخلوا ولحقوه قبل ما دمه يتصفى ... المشكله ان الجرح هيفضل سايب علامه فى ضهره طوال حياته....
المهم انه عايش يا دكتور ...
الحمد لله .. هستأذن أنا بقا ....
اتفضل يا دكتور ... متخفش يا احمد أنا مش هسيبك .. متخفش أنا هاخدك معايا ... انت معايا هتبقى احسن .. انت فاهم .. معايا أنا بس هتكون احسن .. " يضغط خال احمد على صدره بقوه فيستيقظ احمد "
صباح الخير يا حبيبتى .... خلاص بقا أنا اتعودت على النومه دى وانى اصحى كدا ...... وانتى كمان وحشتينى على فكره .........انا هكلمك دلوقتى اشوفك بتعملى إيه ....
- الو ... أزيك يا استاذه روان
- شوف مين اللى بيقول استاذه وبيضايق منها
- أنا بقولها مجاز مش اكتر
- ماشى ياعم .... عامل إيه
- أنا تمام الحمد لله ..وانتى
- أنا كويسه اهو الحمد لله
- طب الحمد لله
- إيه مش هننزل نفطر فطارنا المعتاد سوا النهارده
- لا مش هينفع النهارده بقا معلش
- ليه يا ست روان
- ليا واحده صحبتى عملت عمليه وفى المستشفى دلوقتى ولازم اروح اقف معاها
- امممم ... الف سلامه عليها ..خلاص ماشى مفيش مشكله أنا هاكل اى حاجه تصبيره ونبقى نتغدى عادى
- لا مهو أنا مقدرش اوعدك بدا برضوا ...انا مش ضامنه ظروفى النهارده
- خلاص مفيش مشاكل خليها بكرا
- خلاص أنا موافقه جدا ..ومعلش
- لا ياعم ولا يهمك ..يالا عاوزه حاجه
- لا تسلملى
- خلاص يالا سلام
- باى باى
مش عارف بس حسيت كلامك مش منطقى خالص يا روان .... أنا مش بخونك او شاكك فيكى او حاجه .. أنا بس حابب اتأكد ان كلامك صح ... أنا بقالى مده كبيره مفتحتش تليفونك او اللاب بتاعك .. بس أنا هفتحهم اشوف واطمن عليكى مش اكتر .... عشان ابقا مستريح بس ...طلعتى رايحه لصحبتك فعلا مش بتكدبى عليا ... أنا بس كنت حابب اطمن عليكى واعرف انتى فين و كدا ... أنا مقدرش اشك فيكى ... ابدا ... أنا حاسس انى ناسى حاجه ... أنا ناسى .... حسام