_ كنت قاعده بالليل ف الأوضة سمعت صوت عذب بيغني، سِبت الفون و ركزت
= ليلِ ليل
_ قومت من ع السرير و فتحت البلكونه، لَقيت البلكونه اللي قدامنا مفتوحه و في واحد قاعد ع السرير وقدامهُ لاب توب وبيغني و في دموع نزله من عينهُ، بصراحة ماقدرتش أمنع نفسي من إني اقف اسمعه و اتابعه للنهاية
= ليل ياليل يااااليل
ليل ياليل يااااليل
قُولو لها انني .. لا زلتُ أهواها
مهما يطول النوا .. لا أنسي ذِكراهااا، وفضل يدندن
_ بقول لنفسي معقول ف راجل يعيط عشان واحده !! عبيطه اللي سَبته دي والله، انا لو لَقيت راجل بالحنيه و رقة القلب دي أقسم بالله ما هاسيبه ابدااااااااً
= خرج البلكونه لقاني متنحالهُ راح قافلها
_ ايه ده يا كسفتك يا حازم ما هو برضو لقي واحده هبله واقفه متنحالهٌ طبيعي هايقفل ف وشها البلكونه، كفايه إحراج لحد كده بقي وادخل انام
تاني يوم الصبح ...
_ قومت خدت شاور و لبست عشان انزل الشغل، رايحه للعذاب برجليا 🥺، قبل ما أخرج من الأوضة أفتكرت الرجل الحزين بتاع أمبارح، ألهي ينكد عليكي يا شيخه زي ما منكده ع الراجل كده، خدت ورقة من ع المكتب و كتبت فيها صباح الخير .. أضحك، و رسمت سمايل وطبقت الورقه و فتحت البلكونه و خدت مشبك حطيته ف الورقه وحدفتها عنده ف البلكونه و خرجت روحت الشغل
بالليل ...
_ كنت قاعده برتب السرير سمعت نفس الرجل الحزين بيغني تاني، سِبت اللي بعمله برضو بس المره دي مادخلتش البلكونه وقفت اتابع من ورا زجاج البلكونه، بصراحه صعبان عليا اوي، ليه أكتر ناس بنحبها بتكسرنا، هييييييحح ربنا يريح قلبك و يرزقك ببنت الحلال اللي تعرف تحافظ عليك و ع قلبك، لَقيته طلع البلكونه و هو بيغني برضو شويه و خلص وبص للسما و اخد نفس طويل، عينه جت ع بلكونتي، يادي النيله إحراج لتاني مره مش عارفه أعمل ايه و هو واقف باصصلي، روحت رسمت ع الزجاج سمايل و أبتسمت، بص شويه وبعدين دخل و قفل البلكونه، انا بحب أجيب الأحراج لنفسي انا أستاهل والله، عملت الستارة ع البلكونه وقعدت ع السرير ظبطت منبه الفون و نمت
تاني يوم الصبح ...
_ لبست و خلصت وخدت ورقه من ع المكتب وكتبت، صوتك حلو ما شاء الله، فتحت البلكونه وخدت مشبك حطيته ف الورقه وحدفتها ف بلكونتهُ و نزلت
° سرحانه ف ايه يا بنتي
_ ..........
° إيماااااااااان
_ انا أتصرعت مش أتخضيت والله، ف ايه يا تالا هو انا تايهه منك
° عماله بكلمك بقالي ساعة و أنتي ف دنيا تانيه
_ سرحانه ياستي فيها ايه هو الواحد ميعرفش يسرح ف الشغل شوية
° ما انا عاوزه أعرف سرحانه ف ايه
_ هقولك ياكش نتبط بقي
° ضحكت، قولي قولي
_ الشقه اللي قدامي ف العماره القدمنا سكنت
° سكنت بالعفاريت يالهوي اعوذ بالله اجعل كلامنا خفيف عليهم يارب اشتاتاً شلوت
_ شلوت ده اللي هاديهولك دلوقتي، وعفاريت ايه اللي سكنت الشقه هاااا العفاريت دول هاخليهم يجو ينططوكي دلوقتي، ياربي انا عملت ايه ف حياتي عشان ترزقني بصاحبه هاتجبلي شلل نصفي
° ع فكره أنتي بقيتي نرفوزة اوي
_ اااااه يا مرارتي، بت بت انتي انا خُلقي ف مناخيري أبعدي عني عشان معطسش ف وشك
° خلاص خلاص انا اسفه هاسكت خالص لحد ما تخلصي
_استغفر الله العظيم، طب كان لزمته ايه ترفعيلي ضغطي من الأول طيب
° حقك عليا مش هاعمل كده تاني
_ ماشي ماسمعش صوتك بقي، الشقه اللي قصادنا سِكنت شاب سِكن فيها يعني، اول مره اعرف امبارح بالليل كنت قاعده ع السرير سمعت حد بيغني خرجت البلكونه لَقيت واحد قاعد ف أوضته وبيغني أغنيه حزينه و بيعيط
° معلش ممكن سؤال صغنن
_ أتفضلي شليني
° هو شكله حلو
_ كنت عارفه انك تافهه يعني ده اللي همك
° مش قصدي بس بحب أعرف التفاصيل
_ ايوه يا ستي عسول وطويل و بدقن، حبه تعرفي حاجه تانية حضرتك
° لا خلاص كملي
_ بقالهَ يومين بيجي بالليل ويغني أغاني حزينة شكل كده حبيبته سابته وصعبان عليا اوي ببعتله الصبح مسج صغننه كده جايز تفرحه ولو دقيقه، بس بتحرج اوي لما ببقي واقفه ف البلكونه بسمعه اول ما يشوفني يقفل البلكونه ع طول
° 🥺 يا حرام مين الحيوانه اللي تسيب واحد بيحبها كده
_ والله ده اللي قولته عبيطه
° اه والله وغبيه
_ ما علينا يلا نكمل شغلنا قبل ما مستر عادل يجي يعمل مننا شاورما ولو حصل جديد بعد كده هقولك
° ماشي يلا بينا
_ خلصت شغل و رجعت البيت، دخلت الأوضة حدفت نفسي ع السرير، ااااااخخ ياااااني أبو أم الشغل اللي هايجيب أجلي ده، سمعت حاجه خبطت ف باب البلكونه، يا ماما ده فار ده ولا ايه مش هفتح و أفضل الف حوالين نفسي ف الشقه خليني أقوم أكل احسن، قومت فتحت التلاجه طلعت العيش و الجبنه و عملت سندويتشات و دخلتها المكرويف
دقيقتين وطلعتها وكلت، هيييه أمتلئ الكرش بنجاح أعمل كوباية شاي باللبن بقي و ادخل اشربها ف البلكونه، عملت و فتحت البلكونه و قعدت ع الكرسي، شوفت ورقه بمشبك ع الأرض خدتها وفتحتها لَقيت فيها كلمة شكراً
أبتسمت وبصيت ع بلكونتهُ كانت مقفوله اتنهدت ورجعت بصيت للفون وانا بشرب الشاي باللبن، سمعت صوت بلكونتهُ بتتفتح كنت عاوزه اقوم جري ادخل الأوضه بس ملحقتش هو كان وقف خلاص وشافني فَ قولت خليني عامله من بنها وبصه للفون احسن بس شايفاه بجنب عيني طبعاً باصصلي وحساه عاوز يتكلم
= احم احمم
_ انا لا إرادياً إلتفت ليه
= أبتسم ع خفيف، مساء الخير
_ أبتسمت، مساء النور
= بيحاول يداري توتره، اااا ..انا تيام جارك الجديد
_ اهلاً بيك انا إيمان
= اهلاً بيكي ك ..كنت عاوز أشكرك ع المسجات اللطيفه اللي بتبعتيها
_ عيب عليك الجار للجار وانا مش بحب اشوف حد زعلان و محاولش أفرحه بحاجه بسيطه حتي لو بكلمة
= شكراً ليكي بجد
_ ما قولت عيب احنا جيران
= طيب لو أحتاجتي اي حاجه ف اي وقت انا تحت أمرك
_ اكيد تسلم
= تصبحي ع خير
_ و أنت من أهل الخير
= عن أذنك
_ اتفضل، دخل وقفل البلكونه، وانا دخلت و قفلتها، ودخلت المطبخ غسلت الكوباية ورجعت مكاني ع السرير، خطوه كويسه انه أتكلم و قدرت أفرحه شويه، ربنا يقدرني و أقدر أخليه يتخطي الحاجه اللي مزعلاه
حديث مع عقلي .. ليه ؟
ليه ايه؟
ليه بتعملي معاه كده
ما ده العادي بتاعي لما بشوف اي حد زعلان بحاول افرحه
متأكده؟
ايوه انا بس دموعه أثرت فيا و وجعتلي قلبي و ماحبتش أشوفه كده وما أعملش حاجه، و عندي فضول الصراحة أعرف حكايته
طب ما تحلي حكايتك أنتي الأول و فرحي نفسك وطلعيها من اللي هي ف
ما اللي بعمله ده بيفرحني، وبعدين أسكت بقي عاوزه انام، نكدت عليا الله يسامحك، نمت
بعد أسبوع .. كل يوم ببعتله مسج الصبح عشان أفرحهُ شويه
بالليل ...
_ خرجت البلكونه لَقيت نور أوضتهُ منور و ف كذا شاب جوا اللي قاعد ع السرير و اللي قاعد ع الارض و اللي واقف وبيتكلموا و بيضحكوا، انا أرتحت شويه ان ف حد معاه وبيطلعه من اللي هو ف، قولت هقف شويه اشم هوا عشان مخنوقه و هادخل، وانا واقفه حطيت الهاند فري ف ودني بس مش مشغله آغاني، أتنين من صحابه طلعو البلكونه و أول ما شافوني تنحوا، وانا عامله نفسي من بنها وبصه للشارع، سمعتهم بيتكلموا
- ولا شايف الصاروخ اللي انا شايفه ده
* وطي ضوتك يا عم زمانها سمعتنا
- لا دي شكلها بتسمع أغاني، بس جامده اوي
_ انا خدت بعضي و دخلت قبل ما لساني يفلت و أمسح بكرامتهم الأرض، قفلت زجاج البلكونه و عملت الستارة عليها و قفلت نور الأوضه و وقفت ورا الستارة أتفرج عليهم، سمعتهم بيتكلمو معاه
- مش تقول انك عندك جاره تقول للقمر قوم وانا اقعد مكانك
= مش فاهم
- جارتك اللي ف البلكونه اللي قدامك يا عم جميله
= مسكه من التيشيرت، انت تعرفها
- لا يا عم شوفتها واقفه ف البلكونه من شويه
= سابهُ، و خرج البلكونه لَقي بلكونتي مقفول دخل تاني، وليييد أوعي تكون ضايقتها
- والله ما أتكلمت معاها، غمزلهُ بس شكلك بتغير عليها
= أنت عبيط انا ما أعرفهاش أصلاً
- أمال اتضايقت ليه لما جبت سيرتها
= عشان دي مش أخلقنا اننا نتكلم ع بنات الناس و نضايقهم
- بس انا مضايقتهاش و ما قولتش عليها حاجه غلط انا كنت بمدحها بس
= مش قدامي بقي عشان انا مابحبش كده
* ما خلاص يا جماعه صلوا ع النبي كده و اهدوا
كلهم، عليه أفضل الصلاة و السلام ، و بعد كده غيروا الموضوع خالص
_ انا بصراحه اتبسط من رده جدا، هيييييح انام بقي
تاني يوم ...
_ كنت أجازه، صحيت وعملت قهوة و طلعت البلكونه و حطيت المج ع السور وبعدين فردت أيدي وبتمطع بقي، لَقيته فتح البلكونه و اول ما شافني أبتسم
= صباح الخير
_ انا كمان أبتسمت، صباح الياسمين
= عامله ايه
_ الحمدلله، أنت عامل ايه
= الحمدلله، احم ده شاي باللبن
_ لا دي قهوة
= امممم فطرتي ولا بتشربيها ع الريئ
_ لا بشربها ع الريئ
= بس غلط كده
_ عارفه بس أتعودت
= طيب تسمحيلي أعزمك ع الفطار وبعدها نشرب قهوة
_ امممم و لو رفضت
= الأبتسامه راحت من وشه وبان عليه الأحراج، اااه حقك طبعا واضح أني اتسرعت انا اسف عن اذنك
_ انا رديت بسرعه، ايه ده ما صدقت شكلك بخيل
= لا والله بس واضح ان طلبي ضايقك
_ لا يا عم بهزر معاك اوكي موافقه تعزمني ع الفطار و انا اعزمك ع القهوة
= ماشي ياستي
اتقابلنا ف الشارع بعد نص ساعة
= يلا بينا
_ ضحكت و قولتله، يلا بينا وماشيه لَقيته بينده عليا بصيت جنبي مالقتهوش ببص ورايا لَقيته واقف مكانه، رجعتله، ايه مامشيتش ليه
= عشان ها نركب
_ انا استغربت، ها نركب ايه ؟؟
= شاور ع العربية اللي جنبه، دي
_ عربية مين دي
= بيقولوا بتاعتي
_ اهاااااا معلش مكنتش اعرف
= عارف، يلا اركبي
_ لفيت و ركبت، وصلنا المطعم
= تحبي تقعدي برا و لا جوا
_ لا جوا، دخلنا وقعدنا، وبنبص ف المنيو
= ها هاتطلبي ايه
_ بص انا نقطة ضعفي البيتزا فَ هاخد بيتزا، وانت ؟
= وانا كمان هاخد بيتزا، عاوزاها ايه
_ تشيكن رانش وجبنه كتشيييير بقي
= ضحك و قالي، تمام، وطلبنا و بناكل
_ هو انت عايش لوحدك
= لا
_ اتكلمت بأستغراب، بس انا ماشوفتش معاك حد ف الشقه
= ماما و اخواتي البنات قاعدين الفتره دي مع خالتي عشان جوزها لسه متوفي
_ اممممم الله يرحمه
= يارب
_ عندك اخوات قد ايه
= عندي ليليان و ليليَ
_ ربنا يخليهم لك يارب، مين الكبير
= انا
_ طب ليه الاتنين اسمهم شبه بعض
= عشان توأم
_ يا روووحي انا بحب التواءم اوي
= لما يجوا خديهم هايجننوكي والله
_ ياريت والله، هما صغيرين؟
= 20 سنه
_ فكرتهم صغيرين
= الفرق بينا 9 سنين
_ واضح انهم هاديين ومش بيضايقوك خالص
= يااااااااه يا إيمان مش عاوز اقولك نسمه كده محدش بيحس بيهم ف البيت نهائي يعني ما شاء الله عليهم مش عاوز احسدهم
_ حساك بتتريق
= لا أتأكدي انا فعلاً بتريق، احنا عايشين ف مورستان بسببهم حضرتك دول هيموتوني ناقص عمر انا ماشي بمهدءات بسببهم
_ حاسه انك بتتكلم ع شياطين
= ياااالهوي دول ألعن يا إيمي هاتشوفي بنفسك لما يجوا، بس بصراحة هما طيبين دي الحسنه الوحيده اللي فيهم
_ يااااااه شوقتني أعرفهم واتعامل معاهم
= متستعجليش، وانتي شكلك عايشه لوحدك برضو
_ اه عشان شغلي
= بتشتغلي ايه ؟
_ كول سنتر
= ربنا يوفقك
_ يااااارب، وأنت؟
= محاسب
_ ربنا يوفقك، خلصنا أكل، وطلبنا القهوة، ممكن اسأاك سؤال و ليك حق تجاوب او لا
= اتفضلي
_ ليه كنت بتغني أغاني حزينه و بتعيط، هل كنت ف علاقة حب و فشلت
= بصي أوعدك إني هجاوبك ع سؤالك بس مش دلوقتي
_ خلاص وقت ما تحب تتكلم انا موجوده
= تسلميلي
عدي أسبوعين من بعد اليوم ده و قربنا من بعض أوي وبقينا أصدقاء ...
كنا واقفين ف البلكونه بالليل
= شكلك بتحبي الشاي باللبن
_ جدااااااااااً
= ماشي يا جميل، أستنيني هروح أعمل قهوة وأرجع أتكلم معاكي
_ أووووكي، حديث مع عقلي..
حبتيه يا إيمان
حبيت مين يا عم ده صديقي مش أكتر
بس قلبك بيقول غير كده
ما تاخدش ع كلامه ده مش بيفهم
مش عيب تحبي يا إيمان بس أختاري صح مش زي المره اللي فاتت
لا ما تقلقش هي المره اللي فاتت قفلتني خالص
= أتأخرت عليكي ؟
_ .....
= إيمااان
_ فوقت من شرودي، ايه نعم
= روحتي فين يا بنتي
_ سرحت شويه بس، انت واقف من بدري؟
= لا لسه حالاً
_ عملت القهوة؟
= اه أتفضلي
_ تسلملي بالهنا، خير كنت عاوز تكلمني ف ايه
= اممممم، أنتي كنتي سألتيني قبل كده ليه كنت بتغني أغاني حزينه و هل كنت ف علاقة حب و فشلت
_ اه بس لو الموضوع مضايقك ومش عاوز تتكلم خلاص مش مشكله
= لا لا انا عاوز أحكيلك و الموضوع مبقاش يضايقني خلاص
_ أتفضل سمعاك
= كانت معايا ف الشغل هي أول واحده جت أتعرفت عليا و انا مش من النوع اللي بيصاحب بنات او بيختلط بيهم عموما، بس هي قدرت تخليني أتعامل معاها و أرتحتلها و بقينا أصدقاء و شويه شويه بقينا أقرب و حبيتها
أعترفتلها بعد سنه وخطبتها ع طول بس حبيتها من قلبي بجد ما كنتش متخيل حياتي من غيرها نهائي، قعدنا 6 شهور مخطوبين بعدها بدأت تتغير معايا و ف الشغل كل ما أجي أتكلم معاها تفضل تقولي لو سمحت بلاش تتكلم معايا و أحنا ف الشغل عشان المدير ما يزعقش، بعد كده كلامها بدء يقل معايا عموماً و لما بروحلها بيتها أهلها ع طول كانوا بيقولولي نايمه تعبانه من الشغل
بعدها ما بقتش متحمل الوضع ومش فاهم ف ايه روحت بعتلها رسالة ع الفون، بعد الشغل عاوز أتكلم معاكي، ردت تمام، وبعد الشغل ركبنا العربيه وبعدنا عن الشركه وبعدين وقفت العربيه و سألتها مالك يا هاجر قالتلي مالي ايه قولتلها بقالك فتره متغيره معايا ف ايه انا عملتلك حاجه ضايقتك من غير ما أخد بالي قالتلي لا مفيش حاجه قولتلها أمال مالك يا بنت الناس بتتعاملي معايا كده ليه ده انا بحبك، سكتت شويه وبعدين وبعدين قالتلي خلاص مش قادره أكمل
ما فهمتش قولتلها مش قادره تكملي ايه قالتلي مش قادره أكمل ف علاقتنا، لما سمعت كده قلبي وجعني و الخوف تملكني قولتلها ليه بس يبقي شكلي زعلتك جامد طيب انا بعتذرلك ع أي حاجه عملتها وضايقتك أنتي عارفه ماقدرش أزعلك ومش بيهون عليا زعلك، أتكلمت هي بس أنت مزعلتنيش، قولتلها أمال ايه اللي حصل بس، قالتلي انا انا اللي خلاص مش قادره أكمل معاك مش قادره أستمر ف العلاقه خلاص كفايه لحد كده
هنا انا أتحولت لطفل صغير وقولتلها لا والنبي يا هاجر أنتي عارفه إني مش هاقدر أعيش من غيرك وعارفه برضو انا بحبك قد ايه دموعي نزلت و انا بترجاها، عشان خاطري ماتسبنيش بصي أنتي شكلك مضغوطه من الشغل و الجهاز و كده ف خُديلك يومين أرتاحي فيهم وبعدين نبقي نتكلم ماشي انا هاروحك دلوقتي ولما تحسي نفسك بقيتي كويسه كلميني و انا جنبك ما تقلقيش، وروحتها وماكلمتنيش فعلاً وبعد يومين لقيت أبوها بيكلمني و بيقولي انا أسف يا تيام يا أبني كل شئ قسمه و نصيب و هانبعتلك حاجتك مع أخوها
انا أتصدمت و معرفتش أرد بعدها فتحت عيني لقتني ع سريري و أمي و أخواتي حواليا و زعلانين و قلقانين، انا سألتهم هو ايه اللي حصل ماما قالتلي بعد ما حماك كلمك أنت أغمي عليك، انا أفتكرت اللي حصل و قومت قعدت ع السرير بسرعه و بدأت أعيط وأتكلم يا ماما و النبي ماتخليهاش تسيبني والله انا بحبها و مش هاقدر أكمل من غيرها روحي قوليلها هاعملها كل اللي هي عاوزاه ومش هازعلها ابداً بس بلاش تفسخ الخطوبه ماما و أخواتي كانوا بيعيطوا عشاني، ماما قالتلي حاضر والله بس أنت أهدا انا هالبس و أروحلها دلوقتي
وفعلاً راحتلها بس للأسف هي مصممه ع رأيها و ف ناس كتير حاولت معاها عشان نرجع وبرضو هي رافضه وبعتولي حاجتي فعلاً و قالوا لماما خلاص كفايه لحد كده فضلت يومين بحاول أتواصل معاها بكل الطرق بس هي كانت بترفض و عملتلي بلوك من كل حاجه بدأت أدخل ف أكتئاب و ف مره لقيت أختي داخله عليا و ماسكه الفون و بتقولي الحق هاجر أتخطبت، انا مصدقتش راحت ورتني الفون و شوفت صور خطوبتها و شكلها سعيدة اوي و اللي يصدم أكتر أنها اتخطبت لمديرنا، انا تعبت جامد و دخلت ف حالة أكتئاب شديد وفضلت سنة أتعالج منه و أتعالجت من الأكتئاب بس ماقدرتش أتعالج منها هي لحد من فتره قريبه بس و هي دي كل الحكاية
_ ياااااااااه يا عبد الصمد ده أنت حكايتك صعبة أوي
= ضحك، شوفتي معلش بقي نكدت عليكي و عيطك حقك عليا
_ لا مافيش حاجه بس فكرتني بالماضي الأليم
= ضحك، ألاه أنتي برضو كنتي ف علاقة و فشلت
_ ضحكت، و أنهي فشل ياخويا
= طب أحكي وفضفضي ياختي
_ بص انا هختصرهالك ف جمله او أتنين عشان متعيطش أنت
= انا اللي معيطش ولا أنتي
_ تؤ تؤ أنت، انا إندبندت مش بعيط
= ضحك جامد، ما هو واضح جدا الصراحة، طيب أتفضلي يا أستاذة إندبندت أتكلمي
_ كنا مخطوبين
= برضوا
_ لا بقولك ايه ماتعملش زي المتخلفه صاحبتي و تفضل تقاطعني كل شويه سيبني أخلص كلمي الأول
= ضحك، كملي
_ مش هفضل أشرح انا حبيته قد ايه، بس كفايه أنه حبيته بالمعني الحرفي، المهم قبل الفرح بشهر كنت بَودي حاجات الشقه اللي هي الرفايع يعني كنت انا و أخويا، وصلنا قدام الشقه قولتله خليك إنت وانا هتطلع أحط الحاجه و أنزل ع طول، طلعت الشقه سمعت صوت ف الشقه أستغربت فتحت و دخلت سمعت صوت خالد ف أوضة النوم، روحت ناحيتها و فتحت لقيت منظر ماكنتش أتوقعه انه يحصل من الأنسان ده
= ايه كان بيسرق حاجتك
_ ضحكت، يااااااريت أقسم بالله، بس للأسف لا، لقيته مع بنت ع السرير
= كان بيشرب القهوة ولما سمع مني كده، راح تفها و فضل يكح
_ انا أتخضيت، تيام مالك
= بعد ما هدي، أنتي بتقولي ايه
_ أتنهدت، كان بيخوني، سكت شويه
= عينهُ دمعت، وبعدين عملتي ايه
_ ندهتله وانا مصدومه وبعيط، قام وقف قدامي و قالي بقلق و توتر إيمان هافهمك كل حاجه، بصتله بإحتقار و قرف و رمتله الدبلة ف وشه و نزلت جري، ركبت مع أخويا العربيه و قولتله أمشي بسرعه وبس، هو طبعا حاول كتير يتكلم معايا ويترجاني نرجع وانه مش هايعمل كده تاني ويبوس ايدي ورجلي ويهدد انه هاينتحر، بس انا خلاص قرفت منه و نزل من نظري و لو أخر راجل ف الدنيا مستحيل أتجوزه، شوفت بقي قولتلك مش عاوزه أحكي عشان متعيطش و آديك بتعيط اهو
= ضحك، لا ابداً دي دبانه دخلت ف عيني، ومسح دموعهُ
_ يا راجل، قولتلك انا أندبندت وشطورة ومش بعيط
= ايوه فعلاً، وأبتسم، لسه بتحبيه ؟
_ يا راجل بقولك قرفانه منه و نزل من نظري أبقي بحبه ازاي
= طيب تخطتيه ؟
_ اممممم من فتره قريبه برضو
= هيييييييح ليه بيحصل معانا كده
_ عشان نتعلم
= بس الدروس قاسية أوي أوي
_ طبيعي مافيش حد بيتعلم ببلاش و مافيش جنه من غير نار
= معاكي حق
_ لن يصيبنا إلا ما كتبه الله لنا
= و نعم بالله، بأذن الله ربنا هايعوضنا قريب
_ ان شاء الله
= بص ف الساعة، يااااااه الوقت جري بسرعة اوي لما ببقي معاكي مابحسش بالوقت
_ مي توو يا برو
= طب يلا نلحق ننام شويه قبل ما ننزل الشغل
_ دخلت نمت، وقومت الصبح رنيت عليه صحيته زي كل يوم و بعدها لبست ونزلت أستنيته تحت، ببص ف الساعه فاضل ساعه إلا ربع ع البصمه بتاعتي، ما تنجز بقي يا تيام أنت مش بتجهز لفرحك، برفع راسي لقيته واقف قدامي بأبتسامته المُشرقه كالعاده
= صباح الجمال
_ صباح العسل، كل ده يا تيمو ما كنت نزلت بعد معاد بصمتي
= ضحك، سمعتك قولتي ايه من شويه ع فكره
_ أحم بجد ايه الأحراج ده، ما بصراحه أنت أتأخرت، انا البنت اللي المفروض أتأخر بلبس بسرعة
= ضحك، حقك عليا، كنت بدور ع الفون كان تايه مني
_ يا حرام و لقيته
= اه يا لمضه يلا أركبي خليني أوصلك قبل ما يتخصملك
_ أووووكي، وصلنا بعد ربع ساعة
= كلميني لما تخلصي، و ما تروحيش كده ولا كده عشان مفضلش الف حوالين نفسي
_ ضحكت، حاضر يا بابا أي أوامر تانيه
= اه أي حد يقولك تعالي أجبلك حاجه حلوه قولي لا ولو حد قالك تعالي آوديكي عند ماما صوتي و لمي عليه الناس و ما تتكلميش مع حد غريب فااااهمه
_ حااااضر ف توصيات تانيه ولا أطلع الحق البصمه
= لا خلاص خلصت أتفضلي
_ طب لو حد جبلي عصير و قالي أشربي
= خدي الكوباية و أدلوقيها ف وشه وبرضو صوتي و لمي الناس عليه، لا انا قلبي مش مرتاح حاسك هتتخطفي تعالي أركبي بلا شغل بلا نيله أنتي لسه صغيرة ع الكلام ده
_ فضلت أضحك، سلام يا أوفر
= سلام، ومشي
بعد أسبوع ...
_ كنت نزلت انا وهو نجيب طلبات للبيت وبنتمشي ف الشارع
= إيمو عاوز أتكلم معاكي ف موضوع كده و أخد رأيك
_ ادخل ف الموضوع ع طول
= امممممم اناااا عاوز أخطب
_ انا وقفت و قولت بأستغراب، تخطب !!
= أستغربي و أنتي بتمشي
_ كملت مشي، تخطب ازاي يعني
= يعني شوفت بنوته و عجبتني و أرتحتلها و عاوز أخطبها
_ ايوه شوفتها أمتي دي ما أحنا 24 ساعة مع بعض
= بس ف 6 ساعات مش بنبقي فيهم مع بعض
_ بجد !! اه صح ساعات الشغل، يعني لعبت بديلك ف الفترة دي
= ايه لعبت بديلك دي ما تحسني ما لفظك يا ست أنتي
_ أنطق عرفتها أزاي و فين و أمتي
= ف اييييه والله ما سرقت حاجه
_ أخلص يا ظريف
= حاضر يا لطيفه، هي عميله عندنا ف الشركة
_ جاسوسه يعني
= مين اللي بيستظرف دلوقتي
_ ضحكت، كمل كمل
= بنت جميله و رقيقة و محترمة اوي و طيبه و كيوت و دمها خفيف
_ أخلص خُلقي ضيق
= حاضر، أتعاملت معاها كذا مره و قلبي أرتحلها بصراحة قولت بس هي دي اللي عليها العين و النني
_ و يا تري هي كمان شايفاك العين و النني
= اممممم بحس منها أنها معجبه بيا برضو
_ بتحس، طيب ده مش كفاية ما أنت لازم تتأكد
= ما انا فكرت أفاتحها ف الموضوع بكرا ولو وافقت ها أخليها تاخدلي معاد من أهلها و أروح أتقدملها
_ تمام و أهلك
= كلمت ماما وقولتلها و وافقت وقالتلي روح أقرا فاتحه بس ولما نرجع من عند خالتك نروح نحدد الخطوبة
_ طيب واثق ف البنت دي
= جداً
_ كنت مكتومة طول ما هو بيحكي مش قادره أفرح مع إني المفروض أفرحله ده صديقي المقرب يعني مش عارفه كنت مضايقه اوي و عاوزه أعيط، طيب الف مبروك يا برو ربنا يسعدك يارب ويوفقك
= الله يبارك فيك يا جميل، بس ليه حاسك مش مبسوطه
_ رسمت الأبتسامة بالعافيه ع وشي، لا طبعاً ده انا طايره من الفرحه و لو مكناش ف الشارع كنت زغرطت و رقصت والله
= ربنا يخليكي يا أيمي و عقبال ما أفرح بيكي قريب كده و أزغرطلك انا
_ ضحكت، طيب يلا وقفلنا تاكسي عشان تعبت خلاص
= حاضر، وقف تاكس وركبنا و روحنا
_ يلا هاسيبك انا بقي و انام لأني فصلت خلاص مش قادره
= ماشي يا جميل، بس حاسس ف حاجه مضايقاكي
_ يا عم أنجز هنام و انا واقفه زي الحصان
= ضحك، خلاص أطلعي يلا
_ و أنت ؟!
= هاطلع بس لما أطمن أنك طلعتي الأول
_ ماشي تصبح ع خير
= وأنتي من أهل الخير يا جميل
_ طلعت، كنت بمثل أني عاوزه انام عشان مش قادره أتكلم معاه تاني حاسه طاقتي خلصت، هو انا مضايقه ليه وانا مالي ما يخطب ولا يتجوز انا مااالي مضايقه ليه بس .. عقلي قالي
يمكن عشان حبتيه مثلاً
ل..لا لا هو أخ و صديق مش أكتر و بعدين انا قفلت باب الحب ده من زمان مش جاهزة للخطوة دي دلوقتي
حبتيه يا إيمان بس مش عاوزه تعترفي لنفسك اووو خايفه مثلاً اللي حصل قبل كده يتكرر تاني
قولت لا أسكت بقي عاوزه انام، نمت
مر أسبوع و انا مش عارفه أتأقلم انه هايخطب و هايبعد عني، بس كنت بحاول أتعامل معاه عادي و أخلي اللي جوايا جوايا و لما كنت بشوفهُ بيكلمها ف الفون بتخنق أكتر ولما بيغازلها قلبي كان بيوجعني حرفياً كنت بحس بنغزه غريبه ف قلبي هو لاحظ كذا مره تعبي وانا كنت بنكر بس ف مره تعبت جامد و مكنتش قادره أتنفس حرفياً من الوجع خدني و روحنا للدكتور بس قالي مافكيش حاجه عُضوية ممكن اللي بيحصل ده نفسياً، الله يحرقك يا دكتور مش قدام الواد، الدكتور قالي أنتي ف حاجه مضايقاكي، ااااه يابن الوَرمه، شكراً يا دكتور، يلا يا تيام انا بقيت كويسه
= حاضر، خدني ومشينا، مالك يا إيمان ايه اللي مزعلك لدرجة أنك تتعبي كده
_ مافيش يا تيمو أنت صدقت الدكتور العبيط ده، ده مش بيفهم حاجه
= نروح لدكتور غيرو يا إيمان
_ لا خلاص انا تمام يلا نروح بقي
= أستني خليكي واقفه جاي بسرعة
_ حاضر بس أنجز
= أتفضلي
_ كنت هاعيط من كتر اللُطف، جايبلي وردة
= الورد للورد يا وردة يا قمرايه أنتي
_ قد ايه هو لطيف و حبوب و هايوحشني هو ما ينفعش ياخدني أعيش معاهم ف البيت كأني قطعه من الأثاث، أبتسمتله، شكراً يا تيمو
= ايوه انا بحب أشوف الضحكه دي
_ سؤال صغنن معلش، ليه ما روحتش قريت فاتحه زي ما قولت
= باباها مسافر و مستنينهُ و أتكلمت مع مامتها و أخوها و فرحوا خالص
_ امممممم أوكي، روحنا و دخلت نمت تاني يوم الصبح برن عليه زي كل يوم بس ما ردش أستغربت خرجت البلكونه لقيت بلكونته مقفوله ببص ع العربيه ملقتهاش، راح فين من الصبح بدري ده و مش بيرد عليا ليه أستر يارب، دخلت لبست و روحت الشغل و كل فترة برن عليه مش بيرد ببعتله واتس مش فاتح، روحت و برضو فضلت أرن عليه مش بيرد
بعد أسبوعين ...
_ قابلت صاحبه ف الشارع، لو سمحت
* ايوه
_ مش حضرتك صاحب تيام
* ايوه ف حاجه ؟
_ انا جارته البلكونه اللي قصاده بقالي فتره مش بشوفه و كنت عاوزه أطمن بس هو بخير يعني
* اه بخير انا أخر مره كلمته من أسبوعين و قالي انه مسافر عند خالتهُ بس معرفش أي حاجه تانيه بعد كده و مش عارف أوصله
_ تمام شكراً لحضرتك و بعتذر أني أزعجتك
* لا مافيش أزعاج بس حضرتك محتاجه أي حاجه
_ لا تسلم، مشيت و انا حزينه طيب ليه ما قاليش انه رايح لخالتهُ و ليه مش بيرد ايه اللي حصل طيب عشان يسافر فجأه كده
عدا شهر وانا قلبي واجعني، يعني انا كده ممكن ماشوفهوش تاني لا مش ممكن لاحسن يكون أتجوز و قعد هناك جنب خالته .. عقلي رد عليا
طب ما يتجوز يا إيمان و يقعد مكان ما يحب أنتي مش قولتي انه مجرد صَديق
لا الظاهر كده أن قلبي خاني و حبه بس خلاص بقي شكلي مليش نصيب معاه، فضلت أعيط ع حالي لتاني مره قلبي بيتكسر، نمت من التعب
تاني يوم ...
_ صحيت ماليش نفس أروح الشغل أتصلت بصاحبتي تعملي أجازة قومت عملت قهوة و انا قاعده سرحانه سمعت صوت إشعار رسالة بفتح لقيت تيام بيقولي أنزلي دلوقتي قابليني ف الكافيه ده وبعتلي اللوكيشن، فرحت أوي أتصلت بيه مردش برضو، برضوا ماشي يا تيام لما أشوفك، لبست و نزلت ع اللوكيشن اللي بعتهُ و بفتح باب الكافيه لقيت حاجات بتفرقع و زينه و بلالين و تورته عليها صورتي، ولقيت ناس كتير أوي ماما و أخويا و زمايلي ف الشغل ايه ده و أصحاب تيام، النهارده عيد ميلادي و انا كنت ناسيه، حضنت ماما و أخويا جامد، النور أتطفي و الشموع منوره و سمعت صوته من ورايا بيغني
= هابي بيرث داي تو يووو .. هااابي بيرث داااي تووو يوووو .. هابي بيرث داي إيمي .. هابي بيرث دااااي تووووو يوووووو
_ لقيتهُ وقف قدامي و النور نور و هو مبتسم
= كل سنه و أنتي طيبه يا أمونتي و آداني بوكس هديه
_ انا كنت بعيط من الفرحه و مش عارفه أتكلم، وكل اللي موجودين قالولي كل سنه وأنتي طيبه و آدوني الهدايا و بعدين قطعنا التورته و قعدنا انا و ماما و تيام و أخويا ع ترابيزه واحده، انا كنت قاعده بين أخويا و تيام
- وحشتينا اووووي يا حبيبتي
_ وأنتو كمان وحشتوني أوي أوي يا ماما والله وكنت هاخد أجازة قريب و أجيلكوا
= أحم طيب و انا مافيش حمدلله ع السلامه
_ بصتله من فوق لتحت، مابكلمكش أصلاً
= أصلاً طيب ممكن أدافع عن نفسي
_ لا
= ماشي، بعد ما طلعنا لقيت أختي بتتصل بيا رديت و قالتلي ماما تعبانه أوي، أول ما النهار يطلع تعالي ع طول، انا صليت الفجر و مشيت ع طول روحت ولقيتها تعبانه أوي أخدناها المستشفي و الدكتور قال لازم تدخل عمليات فورأ هاتعمل عمليه ف القلب، ودخلت العمليات و طلعت بعد فتره وفضلت ف المستشفي شويه تعبانه وانا كنت ف حاله نفسيه ما تسمحش أني أتكلم مع حد عشان كده ماكنتش عارف أرد عليكي و أهو لما بقت كويسه انا جيت و قولت أصالحك بحفله صغننه لعيد ميلادك
_ ما أتصالحتش ع فكره
= طب أعمل ايه يرضيكي
_ ما تختفيش فجأه كده و تقلقني عليك
= حاضر يا ستي و حقك عليا
_ خلاص سامحتك، اه صح انا نسيت أعرفكوا ع بعض، ماما و أخويا و ده تيام جاري
= ما انا اللي متفق معاهم اننا نعملك الحفله دي ويحضروها
_ أووووه واضح أن انا الهبله الوحيده اللي هنا
= ده العادي بتاعك يعني يا أيمي
~ والله يابني خدتها من ع لساني
_ بصتلهم هما الأتنين، والله يعني أتفقتوا عليا
= هو حد يقدر يتفق عليكي برضو يا أيمي ده أنتي مفترية
~ حصل والله يا تيام دي مفترسة
_ بصيت لأخويا بصدمه، أنت معايا ولا معاه
~ لبس النضاره، انا مع الحق، و حط رجل ع رجل بتناكه
= فضل يضحك جامد، هاموت مش قادر
_ انا فاتحه بوقي من الصدمه، و أخويا و تيام عمالين يضحكو
- ماما ضربت أخويا ع كتفه، بس يا ولا بطل تضايق أختك
~ هو انا أتكلمت انا بنكُشها بس مش أكتر
بالليل كنا قاعدين ف البيت عندي ...
_ ميلت ع تيام، عملت ايه ف موضوعك
= موضوع ايه
_ البنت اللي هاتتقدملها
= امممم تعالي طيب نتكلم ف البلكونه
_ حاضر، أستأذنت من أمي و أخويا ودخلنا البلكونه، ها أتكلم
= عاوز تجمدي كده عشان اللي هاتسمعيه هايصدمك شويه
_ انا أتخضيت، يالهوي أنت غلطت مع البت
= شششش، و حط ايده ع بوقي، أسكتي غلطت معاها ايه هاتفضحينا، ماغلطتش مع حد انا
_ أمال ايه اللي هايصدمني
= آديني فرصه أتكلم و أحكيلك
_ أتفضل
= هييييححح هو مافيش بنت أصلاً
_ 😳، نعم
= ااا ..ايوه ده كان حوار عامله عليكي
_ 😳😳، نعممم
= انا بحبك
_ ضحكت، يا راجل أفتك.....، 😳😳😳😳😳 أنت قولت ايه
= بحبك، و فكرت أعمل كده عشان أتأكد من مشاعرك ناحيتي قبل ما أقولك و رد فعلك أكدلي مشاعرك بس ماحبتش أبين أني فاهم و عارف، وكنت هصارحك بعد أخر يوم كنا مع بعض بس جه موضوع ماما ده و ماعرفتش أتكلم معاكي و قولت لما ماما تقوم بالسلامه هاتكلم معاكي بس، من أول مره بعتيلي فيها الرسالة وانا أتشدتلك و أتعافيت من اللي كنت ف بسببك وبعدها حبيت وجودك معايا حبيت الحاله اللي بقيت فيها و انا معاكي حبيتك و مش عاوز أكون غير معاكي ممكن تخليني أنول الشرف ده
_ انا قعدت ع الكرسي و أنهارت من العياط
= قعد ع الأرض قدامي و مسك أيدي وبيمسح دموعي، ليه كده طيب انا قولت حاجه ضايقتك
_ أتكلمت بضعف اول مره محاولش آداريه، انا كنت خايفه أوي حسيت أنك خلاص ضيعت مني و أني مش هاشوفك تاني ماقدرتش أتحمل فكرة أنك هتبقي مع واحده غيري و كنت بكابر و مش عاوزه أعترف لنفسي بحُبك كنت خايفه اللي حصل قبل كده يتكرر تاني، ااان ..انا برضوا أتشدتلك من أول مره سمعت صوتك فيها و أنت حزين وبتعيط حسيت بوجعك أنت جوايا مش وجعي انا، بعدها خدت عهد ع نفسي أني لازم أفرحك ب أي طريقه و أخليك تتخطي اللي وجعك و تنساه، وفرحت أوي لما قولتلي أنك تخطيت الموضوع بعدها اتأكدت أني بحبك بس ماكنتش عاوزه أعترف لنفسي بكده لحد ما قولتلي أنك عاوز تخطب والدنيا أسودت قدامي وأعترفت بحبك بس بعد فوات الأوان انا أسفه
= هو كمان كان بيعيط، مافيش حاجه فاتت والله متخافيش انا بحبك و هافضل دايما جنبك، مش عاوز غيرك ف حياتي يا أمونتي
_ بصتله وانا بعيط، يعني مش هاتخوني زي ما عمل
= مستحييييييل ده انا أموت نفسي قبل ما أفكر ف كده حتي، مسك أيدي و باسها، والله العظيم بحبك
_ و انا كمان بحبك أوي، شوفت بقي انا مكنتش عاوزه أتكلم عشان ماتعيطش، ضحكنا أحنا الأتنين، و لقيت ماما داخله علينا بتزغرط .
قُدر ل قلبي أن يقع بك
تمت
بقلمي/ إيمان أحمد