---(رسالة حب) ---
في وسط الليل
جالي الهوى بمراسيله
جايب لي معاه
أشواقه، وتفاصيله
ضحكته، نظرته
جنونه لما اتكسف
أبص في عيونه
ما أنا من عينيه
بهرب ساعات
وسط حكايات
تحضني عينه بنظرة حنان
يزرع فى قلبي بيها الأمان
فأرجع وأبص تاني فى عينيه
فاهمني جدا
فاهمني جدا عارف تفاصيلي
ومهما ابعد
بردوا بيجيلي
الحب بينا مش كلام بحروف
الحب بينا روح بتسكن روح
الحب نظرة
تدواي كل جروح
الحب قلب يطمنك
فبكل سر تبوح
قرب لقلبي فهم خوفي
بكلمة منه يمحو لي كسوفي
ويقول ملاكي
روحي ساكناكِ
عامله قوية
وعيني فاهماكِ
فأضحك وأقول:
الحب لي مراسيل
ساكن ضلوعي بس للي يميل
الحب بينا يجري يشبه سيل
يروي يخضر قلب زي الطير
الحب كون يملكك
أو تملكه وتكون
يفرد شراعه ع القلوب
في أي زمن أو كون
الحب بينا نهر يروي العطشانين
ويطفي نار المشتاقين
الحب وقت الحزن إيد تلمس ايديا
تمسح دموعي
تنزع الحزن اللى فيا
الحب وقت التعب
حضن يدوايني
ولو في يوم أحتاج له
يجري ويجيني
يكتب ما بيني وبينه
رباط قوي ومتين
الحب اسمي واسمك
بين قلوب العاشقين
الحب دعوة لرب الكون
يجمعنا يوم الدين.
وعن الغرام نحكي
فاق حبنا كل السنين
عنتر، وعبلة
قيس، وليلي
يروحوا جنبنا فين
وفى الغرام نوصف
وبوصفنا عاجزين
سطر الغرام بينا
العشق بين الاثنين
سكن، ومتسكن
من قلبنا أتمكن
وبقينا روح واحده
لكن ما بين قلبين
والحب يجمعنا
والناس تقول عاشقين
لكن بروح واحده
مقسوم بين قلبين.
***************
--(عادات صنعوها) ---
عشقها الواد، عشقها الواد
طفل ومحروم محتاج لحنان
ودخل حبها قلبه
أذن بأذان
ضحكتها احتلت فيه كل الاركان
حَبها كان حب أسير
كان حب عليل
محتاج لدواه، ولاقاها معاه
ولقيت الناس
عايشه بتسرد تفاصيل
قالوا:
فرق السن ما بينهم بان
راح نحكم على الحب بإعدام
بعادات صنعوها
بقيت سجان
وفى وسط الجهل
يخاف الحب
ويتحول قوته لجبان
وبأعراف صنعوها
بقيت قران
ممنوع الحب فى كل زمان
وكلام تحريف
أقوال تخاريف
والحب ما بينهم
صار ذنب بيتعاب
رجس، وتكفير
محتاج لمتاب
ونسيتوا الحب
بيخترق الأبواب
وقرار الناس
يندفن الحب ما بين الاثنين
نكتب بتعاسة وخط حزين
كان بينهم أيام وسنين
والبنت تستاهل الموت
ودفنوها في سكوت
وفى قلب بلادها بقيت تايهه
والقطر يفوت
ضحكتها اللي اترسمت لحظة
تتحول موت
حلمها كان فرح
اتحول جرح
بينزف نزف م الشرايين
وسكَنها الحزن
وزاد يا حزين
والفرق ما بينها وبينه كبير
واي ذنب قلوب تشبه للطير
تقتلوا فيها ومن غير تبرير
ويا ناس عن دينا
بقيتوا بعيدين
ما تشوفوا رسولنا اتجوز مين
دي عادات واعراف باطله
صنعتوها وقولتم دين
والحب لو سكن القلب
هيقتل بينهم اي سنيين
وعشان يرضوكم
قتلوا الحب ومش عايشين
وقلوبهم ماتت مطعونة
بغرز السكاكين
ويقولوا عايشين
ما بقوش عايشين
ما خلاص الناس بكلامهم
قتلوا ما بين قلبين
تبرير للقتل
الفرق ما بينهم أصله كبير
وياريت تقولوا في عادات
محتاجة تغيير.
*******************
--(مظلومة الثورة) --
مظلومة الثورة العربية
و صحينا خرجنا في الميادين
بنادي ونهتف بالملايين
عيش، حرية،
عدالة اجتماعية
سألتني أمي:
رايح فين؟
أنا رايح أجيب لك حق سنين
وفى وسط ميدان
هجموا الغربان
خطفوا بلادنا وفين هي
تتحول من خضرة بلادي
لخراب ودمار
ثورة خطفوها ناس أشرار
وسمائنا الصافية
ملاها النار
وبلدنا الخضرة بقيت فى دمار
ده الوقت محتاجه لإعمار
وفى وسط هدوئنا
يعم الخوف
أصوات لصراخ، وعويل
شعب في تهجير
ده الوقت نطالب بالتحرير
اليمن، لبييا
سوريا، عراق
أنا عارف إن الحال قد ضاق
دي فلسطين جوا وفى دمي
أنا عربي
وهمومك همي
كان نفسي أعلامنا ترفرف فوق
نلم الشمل
خلاص ونفوق
كان نفسي أرجعلك
والكون شاف
راجع محمول
أنا على الاكتاف
شدي يا أمي طوق الأحزان
قولي:
أنا ابني ماكنش جبان
لو مات غدر
فى وسط ميدان
عندي أخواته فداها كمان
مهما ضعفنا خليكوا فاكرين
بكرة أكيد
ليكم راجعين
ضحكة أرضي
اترسمت هم
بكرة أرويها
منكم دم.
************
(ملعون حبي)
ملعون أبو حبي
اللي اتبخر
والعمر ده كان
وقته أتأخر
ملعون العوم ضد التيار
والقلب ضعيف
جوا الإعصار
ملعون وحزين
اللي يحب شخص بوشين
قدام مني حنون وبيضحك
وفي ضهري
بيطعن سكاكين
واه م الليل
بجروحه طويل
ونور الضي
عليا بخيل
واه من كدبه
في ضاحكيه
سرقت مني
أحلى حكاية
صرخ القلب
وقال بكفاية
مات الحب
فى كل رواية
لو قالوا حب
أقول: راح فين
فيه حب بيقطع
فى الشرايين؟
فيه حب في أكفان
دافنينه، والقلب حزين
ياسلام على قبري
اللي حفرتوا بيدي
وجواه سنين
وبيكسر قلبي
وجع دامع
وأضحك واأعمل
مش سامع
مش كل الحب
دهب لامع
في كتير منه
حديد، ونحاس
بيسيب القلب المحتاس
حب يدمر
في الاحساس
ملعون الحب الملعون
يقتل في القلب بطاعون
لا علاج ولا طب بيدواي
وتعيش والحزن إليك حاوي
ملعون ده الحب وابو سينينه
لو لحظه يضربني حنينه
هنزع للقلب وهرميه
وكفايه ذنبه أتوب فيه
ملعون أبو حبي وملعون.