طلع النهار ..
وانا حالي على حالي
بفرح يدوبك من مفيش
والحزن شاغل فكرتي وبالي
وإن جيت عملت الفهلوي
تمسك دراعي ويتلوي
لو كنت حتى أجدع قوي
ملهاش عزيز ولا حد غالي
عملالي زي المطرقة
وتدِب فوق راسي الحديد
مضروب بذنب إن الحياة
عملتني مسمارها البليد
مع إن عمري بحبها
ولفجر بكرة الجاي جديد
مستني خيط الشمس يجي من الفضا
ويدوّب الحزن اللي فينا
زي ما يدوب الجليد
عشمان وعشمي راح هدر
إيه صعب من إنك تعيش
عشمان في حاجه تفرحك
والوقت رافض بيك يفوت
وتضَل قاعد مطرحك
متروك ما بين أرض وسما
شارد ما بين الجاي وأمس
سايب رسالة في جبهتي
ممنوع الإقتراب واللمس
تايه في كهف من الظلام
مشتاق لعين تغمزلي غمز
صاين وعودي وكلمتي
باعد ما بين همزٍ ولمز
العمر أشبه ما يكون
عداد بدون حق إنتفاع
العمر ضاع ..
وفضلنا ليه مستغربين
علشان محدش فينا باع
كان رفضي دايما للخداع
بجنِي اللي فيه من باب ضميري
الوصول مش من عاداتي
عادتي أقطَع خط سيري
حظي مش بركَبلُه حاجه
عارف إن الجاي مصيري
رد فعل الناس تجاهي
نقطة سودة في بحر خيري
خايف أزعل من حبيبتي
تصطبح على وش غيري
حتى عصفورتي البريئة
باجي أحلّفها يوماتي
إوعي تمشي
أو تطيري
طلع النهار ..
وانا لسه قاعد مطرحي
تفتح عيون على رزقها
وانا عيني لسه بحُزنها
بتنَزِل الدمعة بِشَقى
كان نفسي أفرح بالنهار
وأضحك في وقت الشقشقة
وأشرب في فنجان قهوتي
وأبص من شباكي ع الدنيا البريئة
وأكتب قصيدة توصف شعوري
فتيجي الحقيقة وتمحي الستار
واللي إنكتب عن حالي يصبح
كُومَه قش في وسط نار
وارجع اضحك لمّا أعيط
وأمشي وانا واخد قرار
إن مهما الليل يطول
بردو هستنى النهار
إياك والقُرب في يوم مني
أحسنلك تفضل عني بعيد
مش بهرب خالص ولكني
متعود أعيش على إني وحيد
انا كنت زمان طيب وجميل
واضحك مع كل الناس عادي
دلوقتي الحِمل عليا تقيل
وعياطي بجد المرادي
انا نفسي أحس وأشوف النور
الضلمة خلاص مالية حياتي
بطلع من حيطة أخش في سور
أخلص من نهر ألاقي بحور
أوصِل في شوارع وأغاني
أنا عمري ما خوفت في يوم من النار
بس المرادي أنا بعاني
المشبوه
محدوف في بلاد
لا ليها أصحاب ولا مرسى
بحايل يومي بالنقصان
وأحايل روحي إني أنسى
لا عارف أمسي من بكرة
وجوايا حاجات ناقصة
مشاعري كتلة م التشويش
لا راضية تحن ولا تقسى
طريقي لو عِدل بيحيد
وعقلي بيفتكر لسه
طويت العمر والأيام
ولمتهم كما الكنسة
وبسأل نفسي إمتى هفوق
لا لاقي إجابة ولا حِسبة
قانون النسبة مش مظبوط
مقسّمش الفروض قِسمة
ليه ناس عايشة ورا الجدران
وناس عايشاها في العزبة
غريبة الدنيا بطباعها
بِتنصُر ديماً الكذبة
وتوهم بالضياع والفوت
تِبور الأرض لو خِصبة
وعِزة نفسي والملكوت
بتجبر روحي إني أصحى
وادوس ع الصعب برجولي
ولو في دماغي ١٠٠ بطحة
وميأسش في طريق مسدود
وادور حتى على فتحة
أطبق ويا ليلي نهار
وأشد الصبح للأضحى
أغازل شِعر في الحلوين
واداري عيوني لو فاضحة
هعود نفسي كله تمام
واسابق عمري واتقدم
مصيري في إيدي والأيام
مهوش في الأصل متحتم
ومهما نشوف
هنتحمل ونتعلم
هكون ثابت في عز الضيق
ولو جوايا متألم
هحاوط ع اللي فاضلين لي
واحس بروحي متأمن
هبطل عيشة المشبوه
وأعيش في الدنيا مطمن
معقولة !!
اتقسمت نُص الفولة
بنسطر خط حياتنا
ومع ذلك مش معدولة
معقولة !!
بعد اما كبرت وشوفت
اطلع لسه في سنة أولى ؟
وبقول خدعاني عيوني
أتاريها كانت مقفولة
مسطولة ورافضة تفوق
وبحِجّة نَقص الشوق
بعصُر على نفسي لمونة
ماشين بنعِد أيام
وسؤالنا عن الأحلام
يثبت في الأصل مقولة :
بعد أمّا نعيش هنموت "
قبل أمّا القطر يفوت
لازمَن هنطلع صوت
ونحارب لاجل القوت
ونرَجّع تاني الفولة"
طلب مجهول
ياريت الدنيا تسمحلي
أعيش كما طِيف
أجرّد روحي من جسمي
واحوّل قلبي للأرشيف
هفضل لإمتى كفيف
عن قلوب بشر تانيين
تشوفهم فجأة يغدروا بيك
ويوم في التاني يجوا عليك
مفيش ولا سلّمة تخلّيك
تجمد قلب عُمره ضعيف
وانا راضي ..
لا هفرِض حد في حياتي
ولا حتى هكون قاضي
بيُحكم تحت راية الحب
رفَعت قضية على قلبي
كسبها بداعي إنه القلب
وكأنه معصوم م الخطأ
مش مدركين حقيقته من أصلُه
لو جينا نِحسبها بصحيح
هنلقى القلب مش ولا بُد
بيقطع كل من واصلُه
وبيحن لبشر بايعين
زِهقت معافرة ومناهدة
وقلبي مُصِر يبقا حزين
كفاية عليا جرح قديم
يوماتي في لِيلي بيزورني
وفجأة أحس نفسي سجين
وحُزني بيصحى يؤمرني
ويمنع من عنيا النوم
ويفضل جنبي كالعادة
بقيت زي الشريط السف
وكل حياتي متعادة
رميت الوردة م الشباك
لاقيت الشوك معوّرني
يا دمعة بعد كُل فراق
يا ليل حالِف يسهرني
يا نجمة في السما بتحرق
في أي سبيل يفكرني
أخدت العهد على نفسي
هكمل عادي جنب الحيط
لا هتشرّط في يوم على حد
ولا هطلب طلب مجهول
أنا الفاشل في قصة حب
وبطلب سقفة م الجمهور
أنا العابر بدون أسباب
أنا المقصود في أي عتاب
أنا العايش حياتي غياب
وهنهي مسيرتي دلوقتي
فطالب منكم ابقا سراب
مخُدش مساحة في حياتكم
واكون بينكم ولا تحسوش
نزيل غرفة في فندق ما
وحيد عايش في ليل معاناة
براقب من بعيد لبعيد
يتيم ساكت في ليلة عيد
محسش يومها طعم الفرح
سيبوني عشان أداوي الجرح
واكون عليكوا حِمل خفيف
وحتى لا يطول الشرح
ياريت الدنيا تسمحلي
أعيش كما طيف