*فلاش باك*
في المحكمة، بعد مرافعة دامت لساعات، حكمت المحكمة حضوريا على المتهم (جابر منصور) بالسجن لمدة 6 سنوات، مع الشغل والنفاذ رفعة الجلسة.
- ماما فوقي يا ماما إسعاف، حد يجيب الإسعاف بسرعة
-البقاء لله يا بنتي شدي حيلك
*باك*
-مكنتش هبقى مبسوطة يا يسر لو اخد حكم، انتي اكتر واحده عارفه انا مريت بإيه .
امي ماتت في قلب المحكمة بعد الحكم على بابا، وفضلت لوحدي في شقتنا، ومامتك كانت بتهتم بيا لحد ما بقيت زي ما انتي شايفه كده. انا كنت كبيره واستحمل لكن شوفي البنت صغيره ازاي!!
-انا اسفه، مكنش قصدي خالص والله والحمد الله القضية نجحت. يلا بقى عشان الشلة مستنيه
-لو الواد (شادي الملزق) ده موجود مش هاجي
-لا مش موجود يا ستي يلا بينا
-متجمعين عند النبي إن شاء الله
-(أحلام) أخيرا جيتي، انتي وحشاني اوي اوي اخبارك أيه؟؟
وانتي كمان يا (فريده)، والله معلش عارفه اني مقصره معاكم كلكم، بس انتو عارفين الشغل كتير قد أي والله
-ربنا معاكي يا (أحلام) يارب
- يارب يا (مهاب) يلا احكولي كلكم بقى إيه الجديد في حياتكم؟!!
-طب نبدأ بمين! بيا انا ولا أيه؟
-لا استني يا (مها) معلش خلينا نبدأ (بميار) مالك قاعده فجمب من ساعة ما جيت! حتي مسلمتيش عليا فيكي إيه؟!
-مفيش يا أحلام شوية مشاكل مع جوزي
-لسه زي ما هو يا ميار تحبي أرفعلك عليه قضيه؟ من ساعة ما شفت الراجل ده وانا مش مسريحة ليه
-وبعد ما ننفصل هصرف منين انا وبنتي!؟ ولا هقعد فين؟ انا مليش حد، وانتي عارفه اهلي ماتوا وانا مليش غيره.. فمستحمله هعمل إيه يعني؟
-إيه الكلام ده وانا رحت فين يعني؟
-استنى يا عم النحنوح انت شويه على جمب.. انتي عارفه يا (ميار) إن بيتي مفتوح ليكي انتي وبنتك في أي وقت، وغير كده هتشتغلي معايا..
- انتي ناسيه انك خريجة حقوق بتقدير عالي كمان، هتنزلي معايا المكتب هو انتي جوزك فين دلوقتي؟
-تلاقيه بيتسرمح مع أي واحدة كالعادة
-طب يلا قومي، هاتي بنتك ونروح عندك تلمي هدومك وحاجتك، ونطلع على البيت عندي
- (أحلام) انا خايفه جوزي ده مفتري، خايفه على بنتي ياخدها مني، انا مقدرش أعيش من غيرها وبعدين تعبها ده لوحده كفاية، هو مش هيعرف ياخد باله منها..
- متخافيش يا حبيبتي، كله هيبقى خير ان شاء الله
يلا بسرعه لمي حاجتك كلها، هاتي (يارو) وخلصي بسرعه
-أحلام أحلام
-قلب أحلام انتي.. نعم يا يارو
-هو احنا هنروح فين؟؟
-هنروح عند (جدو) جابر يا حبيبتي
-الله انا بحبو اوي اوي يا(أحلام) طب هو كده بابا مش هيجي ويزعق ويضرب ماما تاني؟
-لا يا روحي مش هيجي تاني متخفافيش
(ميار) خلصتي.؟
-اه يلا بسرعه قبل ما يرجع ..
(احلام) استخبي بسرعه الباب بيتفتح
-ادخلي يا جميل.. المقرفة مراتي مش هنا ادخلي
-اه يا (صلاح) ال.. جايبها لحد بيتي كمان
-وطي صوتك يا( ميار) اسكتي، طلعي موبايلك وصوري بسرعه
اخذت ميار هاتفها ويدها ترتعش و فكرت لبرهة كيف امكنها ان تحب شخصا كهذا..
-حاضر حاضر
***
بعد ما نزلنا(ميار) طبعا كانت بصدمه ودموعها تنهمر على خديها من الحزن..
-انا ليه بيحصلي كده يا( أحلام)؟؟ انا عملت أيه عشان يحصلي كل ده؟ بابا كان غني.. والكلب ده اتجوزني عشان كده عشان فلوس بابا وبس.. ولما بابا اعلن افلاسه تعب فتره هو وماما وماتو.. ومن ساعتها وانا في سواد معاه، انا بكرهه بكرهه
-طب خلاص اهدي.. هجيبلك حقك والله العظيم
وبعد وصولنا لبيت بابا
- بابا ي بابا انت فين..
-انا في البلكونة.. تعالي
-جدو حبيبي جدو حبيبي
-(يارو) حبيبة جدو جابر عامله أيه؟
-انا الحمد لله.. انت كويس؟
-الحمدلله تعالي خشي الاوضه يلا، وانا جاي العب معاكي كتير اوي
- هيه.. هيه.. هيه..جدو جابر هيلعب معايا انا داخله بسرعه اهو، متتأخرش
- مالك يا ميار عملك حاجه تاني؟
- لسه جايب واحده الشقه دلوقتي يا عمي، وهرفع قضيه عليه خلاص
- خلاص يا بنتي ادخلي مع أحلام ارتاحي، وانا هدخل العب مع يارو لحد ما تنام
يعم الليل على الجميع في هدوء وسلام ..
تشرق الشمس بأشعتها الذهبية الجميلة على جميع انحاء القاهرة لتعلن عن بداية يوم جديد..
ذهبت الى ميار وانا في شفقة عليها وعلى ابنتها الصغيرة يارا..
- صباح الخير يا( ميرو)، يلا اجهزي عشان نطلع على المكتب ورانا شغل كتير
استيقظت ميار ورأسها يكاد ينفجر من الصداع واعضاءها خاملة بسبب الحزن..
- صباح النور، هروح ابص على( يارو)، وأجهز على طول حاضر..
***
وفي مكان آخر
- البنت زودتها اوي مفيش قضية غير وتكسبها.. دي بقت شبح المهنة.. واحنا لسه عندنا شغل كتير لازم يخلص وبكده مش هيخلص طول ماهي واقفة على رجليها وعمالة تخلص القضايا بسرعة وأحتراف ، لازم نخلص منها بأي طريقة، النهارده يجيني خبر موتها انتو فاهمين..
***
في مكان آخر..
- يلا يا (بابا) يا (ميار) يا( يارو)، الفطار جاهز..
قعدنا نفطر وخلصنا..
- تسلم ايدك يا أحلام..طول عمرك طباخة هايلة..بجد تسلم ايدك
- تسلمي يا قلبي يلا بقا نلحق نروح الشغل.
- حاضر..
- بابا.. تاخد علاجك كله.. وخلي عينك على يارا.. خلي بالكو من نفسكوا
***