لما رجع سام من السفر كان عاوز ينقل في بيت بعيد عن دوشة المدينة .. يكون في مكان منعزل عشان يقدر يركز ويرسم لوحات المعرض الجديد .. بقاله فترة ما عملش معرض .. وفيه افكار كتير في ذهنه .. صديقه المقرب روس والي هو في نفس الوقت المحامي بتاعه قاله ان فيه بيت كان اشتراه من فترة لما كان هو مسافر .. وانه بالظبط بالمواصفات الي هو طالبها .. يقدر ينقل فيه فـ أي وقت .. واذا عجبه يعتبره بتاعه .. سام لما سمع كدة رحب جدا بالفكرة وخصوصا ان روس قاله ان البيت مجهز بالكامل ومش محتاج اي حاجة ..
اول ما دخل البيت شعر بألفة شديدة حتى انه قال لروس "البيت مريح اوي .. ومألوف جدا .. مع اني اول مرة اشوفه بس .. عارف الاحساس الي هو كأنك تعرفه كويس؟! .." روس ابتسم وقاله :"زي ما قلتلك .. انا مش محتاجه .. اتصرف كأنه ملكك .." سام كان فعلا شاعر بارتياح وصفاء ذهن .. لدرجة انه في خلال ايام قليلة قدر ينجز شغل كتير .. وكان مبسوط جدا ومتفائل .. وحاسس ان المعرض دة هيحقق نجاح كبير ..
الساعة كانت حوالي 6 مساء .. كان بيشرب حاجة سخنة وهو واقف بيراقب المطر الي كان بينزل بغزارة .. كان بيتابع العربيات من بعيد الي رايحة وجاية في الطريق القريب من بيته .. لحد ما لاحظ عربية صغيرة .. هدت شوية .. واتجهت باتجاه البيت .. ما كانش قادر يحدد ملامح الي سايقها .. لحد ما وقفت العربية قدام بيته ونزلت منها بنت في اواخر العشرينات .. ولقاها متجهة ناحية باب البيت ..
لما فتح لقاها واقفة وبتبتسم .. قالتله انها لما لاحظت البيت بتاعه من بعيد فكرت انها ترتاح عنده لحد ما المطر يقف او حتى يخف شوية .. لانها قلقانة من السواقة بليل مع المطر الغزير دة .. سام رحب بيها وعملها حاجة تشربها .. وفضلوا يدردشوا شوية .. عرف ان اسمها كارين وانها مدرسة في مدرسة ابتدائي .. ولما لاحظت عنده بعض اللوحات وعرفت انه رسام كانت مبسوطة جدا .. وقالتله انها بتحب الفن بشدة .. وفضلوا يتكلموا عن بعض الأعمال الفنية الشهيرة .. سام كان منسجم جدا ومستمتع بالحوار معاها .. ولما عدى حوالي ساعة والمطر لسة ما وقفش .. عرض عليها سام انه يرسمها .. وقالها ان فيه معرض بيحضرله الفترة الجاية ولو تحب ممكن الرسمة بتاعتها تبقى من ضمن لوحات المعرض .. وكارين كانت متحمسة جدا ..
بعد حوالي ساعة ونص المطر كان وقف وسام كمان كان رسم الخطوط العريضة والتفاصيل المهمة في اللوحة وقالها انه لسة هيشتغل عليها وبعد كدة هيعرضها عليها الاول ولو عجبتها هيعرضها في المعرض .. كارين كانت مبسوطة جدا وقالتله انها سعيدة انها اتعرفت عليه .. وانهم اكيد هيبقوا اصدقاء .. وهو كمان كان شايف كدة .. اخد منها رقم تليفونها وكمان عنوانها وقالها انه في خلال اسبوع او 10 ايام بالكتير المفروض هينزل المدينة عشان يخلص شوية حاجات وهيبقى في الوقت دة اللوحة خلصت فهيبقوا يتقابلوا ويوريهالها .. واتفقوا على كدة فعلا .. واخدت عربيتها ومشيت ..
وهو باصص عليها وهي بتختفي بعيد بالعربية .. كان شاعر انه متضايق .. على اد ما كان نقل في المكان دة عشان يبقى لوحده .. على اد ما كان مش عاوزها تمشي .. برغم انه بس قابلها من ساعات .. وقال لنفسه انه يخلص اللوحة بتاعتها في اسرع وقت عشان تبقى حجة كويسة انه يشوفها تاني ..
بعد كام يوم كان واقف بيبص على اللوحة بنظرة رضا .. ومتوقع رد فعل كارين لما تشوفها .. واخدها ونزل المدينة .. طول الطريق اكتر من مرة كان بيحاول يتصل بيها لكن الموبايل على طول مغلق .. قال ممكن تكون في شغلها او اي شي .. وفكر انه يعدي على بيتها ..
وفعلا لما خلص كل الحاجات الي كانت وراه .. وبعد محاولات تانية للاتصال لكن بردة نفس النتيجة .. راح مباشرة على بيتها .. ست كبيرة فتحت الباب .. وهو ابتسم وقال :" مساء الخير .. ممكن اشوف كارين؟ .." الست ظهر على ملامحها الحزن الشديد والتأثر .. لدرجة انها كانت هتفقد توازنها وهنا ظهرت بنت قربت منها ولحقتها وقالتلها :" اية يا ماما مالك .. تعالي ريحي شوية .." وبعدها انتبهت لسام وسألته : "اهلا بحضرتك .. خير؟ " سام كان شاعر بالاحراج لكنه ابتسم وقال: "كنت بسأل .. هل كارين موجودة؟ .." البنت كمان ظهر عليها الحزن وقالت: "هو حضرتك ماتعرفش؟ .. " سام بقلق: "خير؟ " البنت قالت: "كارين عملت حادث وتوفاها الله .. "
اللحظة دي كانت صعبة جدا على سام .. برغم انه ماشافش كارين غير مرة واحدة .. لكن كانت تركت بصمة في قلبه .. الي شعر ان شي فيه اتكسر لما سمع خبر موتها .. بص فـ الأرض ومن غير ما يسأل عن شي .. لف وشه بخيبة امل كبيرة جدا ومشي .. وكان ظاهر عليه اثار الصدمة .. ماجي اخت كارين راحت وراه وسألته .. "انت كويس؟! .." بصلها وقال: "انا اسف .. بس كانت مفاجئة بالنسبالي .." ماجي شعرت بوجع سام وسألته: "كنتوا تعرفوا بعض من زمان؟!" سام قال: "لا ابدا .. الاسبوع الي فات .. اليوم الي كان فيه مطر غزير .. ارتاحت عندي في البيت و.. " هنا قاطعت ماجي كلام سام وقالت باستغراب .. "الاسبوع الي فات! .. اكيد فيه حاجة غلط .. " سام كان باصصلها ومش فاهم تقصد اية .. وهي كملت .. " كارين عملت حادثة وماتت من ثلاث سنين .."