كارول كانت قاعدة على العشا مع زوجها فريد وكان باين عليها انها مش طبيعية .. ولما سألها عن السبب .. قالتله ان ماجي اخت كارين زارتها وسألتها عن الشخص الي كانت كارين مرتبطة بيه .. وهنا ظهرت المفاجئة على ملامح فريد كمان .. وكأن اتفتح موضوع ما كانش يحب ابدا انه يتفتح تاني ..
سام كان قاعد بيرسم في ورقة بيضا وهو منتظر ماجي .. الي لما جت كان واضح عليها انها متضايقة .. ركن الورق الي كان بيرسم فيه .. ومسك الصور الي لقيتها ماجي .. والي اول ما قعدت خرجتها من شنطتها واديتهاله .. الصور كانت لكارين مع شخص تاني وواضح من الصور انهم مرتبطين .. ماجي كان ظاهر عليها الحزن الممزوج بالغضب .. سام فهم ان ماجي تعرف هوية الشخص .. ولما سألها .. قالتله انه يبقى فريد زوج كارول ..
سام اتصدم من الخبر .. وفهم ان كارين كانت على علاقة بزوج صديقتها .. لكن ماجي قالتله ان العكس هو الصحيح .. والي عرفه سام ان كارول ارتبطت بفريد بعد وفاة كارين بحوالي سنة ..كانوا قبلها بدأوا مشروع شغل سوا .. وبعدها بكام شهر اتجوزوا .. يعني كارين كانت مرتبطة بفريد في الأول .. وبعد وفاتها .. كارول اتجوزته .. سام قال: "عاوزة تقولي ان وفاة كارين كان في مصلحة كارول؟! "
كانت فكرة صعبة جدا على نفس ماجي .. معقول! كارول .. كارول يكون ليها يد في موت كارين! وبعدين سرحت وحالتها بدأت تسوء .. مش متصورة ان ممكن تكون صديقة اختها المقربة تبقى هي الي قتلتها !! .. سام لما شافها كدة حاول يهديها .. وقالها وهو بيضحك .. انه معاه دايما اقراص مهدئة كاتبهاله الدكتور بتاعه .. لكن مش هيديها منها وهيهديها بأسلوبه .. وطلب منها انها تسكت لدقايق وماتحاولش تفكر في أي شي .. وفـ الوقت دة رسم لها صورة كروكي سريعة .. كانت محاولة منه انه يخرجها من الحالة الي هي فيها .. وقالها ان دي طريقته في انه يهدي الناس .. لانه ما بيعرفش يعمل حاجة تاني غير انه يرسم .. ابتسمت وهي بتتأمل الصورة .. ومسكت الصور التانية الي كان بيرسمها سام .. كانت صور جميلة .. وقالتله انه موهوب فعلا .. وبأنه نجح مؤقتا في انه يهديها .. وقبل ما تمشي قالتله انها هتكمل بحث في حاجات كارين .. يمكن تلاقي اي شي يفيدهم ..
لكن للأسف بعد مرور وقت من البحث ما لقيتش اي حاجة ليها علاقة بفريد او كارول تاني في حاجة كارين .. وبدون تفكير ومن غير حتى ما تقول لسام .. قررت انها تروح لكارول وتواجهها ..
كارول كانت مصدومة من كلام ماجي وتلميحها بانها استفادت من وفاة كارين .. وقالتلها ان كارين ما كانتش صديقة وبس .. كانت اكتر من اخت .. ومش مصدقة انه ازاي ماجي تظن فيها حاجة زي كدة .. وان الحاجة الوحيدة الي كذبت عليها فيها لما قالت انها ماتعرفش مين الشخص الي كانت كارين مرتبطة بيه .. لأنها كانت عارفة انه فريد .. الي لما اتعرف على كارين كان خاطب .. لكن لما قابل كارين وحبها .. قرر انه يفسخ خطوبته ويرتبط بيها بشكل رسمي .. بس الموضوع دة كان محتاج شوية وقت .. وخصوصا ان خطيبته كانت بنت صديق والده .. وكان بينهم كمان شغل ومصالح تانية ..
وفي الفترة الاخيرة قبل وفاة كارين كان فيه بعض الخلافات بينها وبين فريد بسبب انه اتاخر في فسخ الخطوبة .. وهي كانت عاوزاه ياخد خطوة .. حتى انها قالتله انه لو ما عندوش الشجاعة انه يعمل كدة .. هتروح هي بنفسها وتقول لخطيبته على كل حاجة .. لكن فريد كان بيقولها انه هيتصرف لأن الموضوع حساس وممكن يتسبب في خسارة كبيرة في شغله وهو لسة محتاج شوية وقت عشان يرتب اموره .. لكن للأسف حصل الحادث .. ودة الي خلى فريد كان منهار وحاسس بالذنب .. وبأنه اتاخر فعلا كتير .. بعد وفاة كارين بوقت قليل فسخ خطوبته .. وصفى شغله مع والد خطيبته .. وكان هو وكارول على تواصل .. وبعدها فتحوا مشروعهم سوا ومع مرور الوقت قربوا من بعض واتجوزوا ..
وسبب ارتباك كارول لما سألت ماجي عن الشخص الي كانت كارين مرتبطة بيه .. هو شعورها بالاحراج من ماجي .. يعني انها تعرف .. ان صديقة اختها اتجوزت الشخص نفسه الي كان المفروض انه كان يتجوز اختها ..
ماجي كانت بتسمع للكلام الي بتحكيه كارول وهي مش قادرة تكذبها .. الكلام كله بالنسبالها كان منطقي .. وخصوصا ان مفيش اي دليل على غيره .. لكن في نفس الوقت كان فيه تفصيلة وقفت عندها .. مسألة الخلافات الي كانت بين كارين وفريد .. وتهديد كارين لفريد انها تروح تقول لخطيبته على كل حاجة .. لكنها ماقدرتش تناقش التفصيلة دي مع كارول طبعا .. هي اظهرت قدامها انها تفهمت الموقف وانها اتسرعت في الحكم لما اتصدمت بمعرفة ان فريد كان حبيب كارين .. وان الموضوع كله كان سوء تفاهم مش اكتر ..
نفس الاستنتاج الي كان بيدور في ذهن ماجي كان حاضر في ذهن سام .. وخصوصا ان سام قدر عن طريق معارفه انه يعرف معلومات تؤكد كلام كارول .. عرف انه كان بيجمعه شغل مع أحد رجال الأعمال .. وبعدها بفترة قليلة خطب بنته .. لكن بعد اقل من سنة .. فسخ الخطوبة وصفى الشغل .. وفتح مشروعه الخاص اعتمادا على بعض الاموال الي كسبها بالاضافة لأموال شريكته في المشروع والي اصبحت بعد كدة زوجته .. لكن خطيبته السابقة قالت انه انتهازي .. وانه بعد ما استفاد من اموال والدها .. لقى مصلحته في مكان تاني عشان كدة تركها ..
وبـ الي عرفه سام عن كيفين اصبح واضح انه عنده دافع قوي انه يتخلص من كارين .. ذهنه اتجه لسيناريو ان كارين لما هددت فريد بأنها هتقول لخطيبته على علاقتهم .. ولانه هو طبعا خاف على مصالحه وشغله .. فقرر انه يتخلّص منها .. وماجي ماكانتش مستبعدة دة .. لكن بردو رجعوا لنفس النقطة .. اية الدليل؟! لو افترضنا ان الكلام دة صحيح .. ازاي يقدروا يثبتوه؟!