(بنت الضلوع)
لأنك حبيبتي
بشوفك بعيني
أحلى الصبايا
لأنك بدمي
بحس بسكوتك
بحبك بخوفك
يا أجمل حكاية
يا شوقي اللي حاضر
يا عمري اللي جاي
وجودك معايا
ده أجمل منايا
يا أجمل أنيس
يا أجمل ونيس
يا شهد السنين
يا عمر الحنين
يا بنت الضلوع
في عينك خشوع
في وشك براءة
بتمحي الخطايا
يا أجمل حكاية
يا أحلى الصبايا
رضاكِ رضايا
شقاكِ شقايا
ولما تلمع عينيكِ
بحس بهوى
وأدندن غُنايا
ولما أشوف الحزن فيهم
بحس بذنوبي
واموت جوه جلدي
ده حزنك حبيبتي
معناه انكساري.
************
(لحظات انكسار)
كل واحد فينا له حكاية
وهو فيها بطل قصته
ممكن حكاية
تكون سعيدة
وجايز كمان
جداً حزينة
كل حد فينا
حسب طريقه وسكته
وأوقات كتير
كان لينا في يوم
حق الاختيار
وقدمنا ميت فرصة
وقصادها كمان
ميت قرار
وليالي تانية اتسرقنا
وعشنا لحظات انكسار
وبسرعة قوام وقفنا
وعيشنا لحظات انبهار
ومش كل
محنة نمر بيها
حتى لو كانت مغمسه
شوية مرار
نرفع ونسلم الراية
ونطاطي راسنا
ونقول خلاص
في لحظة فارقة
بِيِجي وقت
نحلي فيه
كل سنين
الذل والانكسار
باختصار
يأسك وفرحك بين ايديك
وانت بس
ليك حق القرار
وكل هزيمة عشتها
كانت مجرد تجربة
وانتهت أكيد بالانتصار
ولأنك حبيبتي
وجودك معايا
كسرجوايا
حواجز خوفي
والإنهزام
وبقيتي حبيبتي
أنتِ أجمل قدر
وأعظم اختيار.
**************
(تناقضات)
أنا الأقوى
أنا الأضعف
أنا المَيّه
أنا البركان
أنا الضفدع
أنا العقرب
أنا الفقير
أنا الغلبان
أنا النمرود
أنا الأقوى
أنا التعلب
أنا المكار
أنا الجاني
أنا المجني
ببساطه كده أنا إنسان
**************
(سَلّم الراية)
عارفين أسوأ ما في الدنيا
إنك تعيش ساكت جبان
تطاطي، تسلّم الراية
عشان تعيش حبة أمان
تغْفر عشان لقمة
وانت حرام عايش جعان
جعان مش بس في اللقمة
جعان صحة، جعان هدمة
جعان تكون بيوم إنسان
تداري ياعيني في الدمعة
وتداري جوه حِيطان
وتقول ياحيطة ضميني
نفسي أحس م الدنيا الأمان