سَكِّن ف قلبك ربنا وإمشي
ما تُقفش عاجز وانت فيك الروح ..
ضيقتك عشان خايف
خايف عشان تِسلم
تِسلم عشان تِأمَن
تِأمن بخوف زايف
كل الطرق سهلة وانت اللي مش شايف
طيبين ..
والدنيا متفَضَّلش الأكل غيرنا
مَية جارية .. بس مبتجريش في زيرنا
ريقنا ناشف مش عطش ..
بِ يجِف ريقنا كل منراعي في ضميرنا
من اللاشئ إلى المجهول
إلى المُدرك إلى الواعي
من الغامض إلى اللامع
إلى المضطر والساعي
من شخص مر على التجارب كلها
دون إنحياز لنتيجة أو داعي
كل اللي خوضت عشانهم المعركة
"قالوا منعرفهوش .. قتلوني بدراعي"
إرمي نفسك تحت عجل اليأس شيلُه،
لف بيه أكبر ميدان
زُق طوبة جنب طوبة لَبِّس الاوهام ساتان
وِدوا ناس
وَدوا ناس
بروِزوا تراب المداس، واذكروهم بعد حين
وَدوا ناس
وَدوا ناس
شرّبوهم للجِناس، طلعوهم م العينين
قشة الغريق والله دون معنى
ولا ١٠٠ سفينة هتلحقه
لما سواد الليل يفرد ستارته على النهار،
يعمَى الأمل
- هيموت وحيد وطبيعي قشة تغرقُه
جميل الروح تزيد الروح جمال شكله
جميل القلب والله
وكل القلب في مشاكله
شوفت يا رمان !
ورق الدوواين بقى أرخص من ورق البفرة
سوق الاحلام بقى يشلِب دم،
بقى زي الموس من غير شفرة
تعرف زايد!
كان حلمُه يلف الكون كله
كان حلمه العالم بجوايزه،
لَفولُه العالم في سيجارة ومبقاش طفرة
والواد غلبان .. عفى بس جبان
قولي يا رمان ...
كام قرص فلافل صفَّى الزيت على حبر ديوان !
كام كيلو تراب زادوا قيميتهم علشان بقوا دُرج لألف كتاب !
حد يجي يقولي ممكن
حد يجي يقولي جايز
حد يجي يرُد حلمي
ويشرب الوهم ف أزايز
حد يجي يسمِّي عنّي، بس مَرة
يدوق هزيمتي وهو فايز
بتضيق وبنضحك واهي ماشيه
فيارب المعدن ع القاشية
معرفش حاجه عن العمار غير دعوة أمي ♡
وبقيت بهرب م الناس بالناس
واخرج من لمة أغرق لمّا،
أخسَرني رصيد وأخسرني وأعيد والخوف كَنّاس
لمّا السنين هتمُر هتجبرَك تنسى
لما الوجع ضيفك هيجبرك تقسى
وتعيش بدمعك وانت بتغني ...
عيشت كل الجاي في الفايت
لكن مقدرش اعارض كام نفَس من ربنا
حيلتي أخ وأخت وجنينة
وأمي شجرة، تِخصَّب الطينة .. علشان نعكِّز ربنا
سابني القدر واقف في محطة الرحلة
مستني قطري يمد قضبانه ويسحبني م الوحلة
عيل وتايه في زحام صدره
مختارش حاجه في سكتُه .. طعم الفروض أحلى
متهتمش ..
بعالم سلبي مش منصف
في جوه هناك ف اخر ركن من روحك
حياتك .. أوعى تتهمش
العمر ليل كداب والشمس فضّاحه
مش شعر
دي قباحة
دنيا يا تفاحة والجنة في البرقوق
مخنوق ومات مخنوق من حبل افكاره
طعم الكافيين في عينيه،
نيكوتينُه أسرارُه
فضَّى الحياة في ربعين
واتباعوا زي العفش
مافاضلش غير ربعين ..
والنُص ميسقفش
وِد بيا الكون بحالُه ووِدِّني
حد زيك سهل يبني ويتبِني
لين القلوب مش ضعف ولا عيبَه
لين القلوب بيداوي فينا كسور، فَ بنِتِّني
لسه عيل
لسه بفتكرك واعيط
لسه بقطَع في الحنين
عشمان في خيط الحلم منك يلتقي بكفك يخيط
بقيت شاعر
بقيت بخسر
بقيت شاعر عشان بخسر
بقيت اقدر بقيت أكبر .. ولسه بفكر اكتبلك
شق الحيطان ده مكانش م المطرة
ده انا بس عيني ملحها زيادة
قسّمت عمري ع الوجع بالنُص
وضربت نفسي بس ناقص أُس
انا روحي جذر مربع الدنيا،
والقلب موجب بس فاي بتبُص
أكفينا شر الونس لو يختفي ويغيب
أقطع لسان الخَرس لو نادوا بالتجريب
أءذَن بضرب الجرس وأجري ملكش حبيب
خليني اقول ماكتِبش انا قلبي حرية
مَنْ الّذي أولَىٰ يِنْصَبّ عَرَقُه فُوْق جبين الأُمنيات تَمتدُّ باعًا، تِشعِل اللُمَض النيون في أرضُه وسكتُه !
- أطيب شرير مكسور بيطير، بس الأماني بنت ميتين الهزايم ضَلِّتُه -
- دافع وصولنا للأمان ملهوش دوافع غير وجود الخوف -
نفس الحقيقة في اعتراضك ع المرايا لو بكيت .. شايفاك
نفس انسحابك من علاقة عرِّت بواقي من الحنين جواك
نفس المواقف والشعور والقسى
ونفس خوفك م البشر واللين ونفس نفسك خايفه تبقى معاك
ناشف بطبعك زي جذع الشجر، ليّن بقلبك زي ورق الورد
عيشتك معاك، مِن الأمان ودفاه .. عيشتك معاهم
فيها لطشة برد
لكن ...
مَد السلام أضعف من التسليم
- واجه تَفُز -
مرض الهروب من البشر والمرض، ضيَّع عليك لذِة تعيشها سليم
"كان"
٣ حروف شايلين بشر م الصعب يتعدوا
مش مُصطفى زي النبي ومنيش ولي لأهل المقام
عيل غبي .. داعي بقلبُه ربنا
كَفِّن دماغي ورُدني علشان انام
- الضحك ناقص هَم بيضحَّك -
فأضحك،
يقول .. الهَم ليه فاضحك !
انا مش وحيد والله
انتوا اللي مش شايفين
انا عندي صحاب أوفى وأصدَق
وأكبر من كونهم بني أدمين
مهيش ازمة
نشيل الناس بلا لازمة
نوطي نمسح الجزمة .. فيقعوا مننا قاصدين