" خوف بطعم الكورونا "
بكتبلك قبل كورونا ما تنهي الكون
إن انا مجنون بيكي وحابك فِ ظروف صعبة ..!
بكتبلك فرصة ان العالم
ملهي وخايف من دة الجرثوم
هكتب عن حبك، وقت اما الناس بدأت تكتب على الموت
اللي بقى أسرع من دقات قلبك
شايفة العالم ..!
بقى اي وضعه
والدنيا بقت اسود بهتان
ولحد الأن انا مش خايف
هكتبلك كل دقيقه وثانية تفوت وتمُر
هكتب والعُمر أَمر من الصبار
إن انتي التينة اللي مَحلية حياتي
وعايشة في وسط الشوك
هكتب لليوم
اللي انا هاخدك منهم ليا
هكتب والصين خايفة وقلقانة وملهية ..!
الصين اللي فِ يوما ما كانت بتقول قادرة الدنيا
شايفة العالم ..؟
شايفة العالم واقف قلقان وواخد حذروا
من حكمه عظيمة لرب الكون
عرفهم معني القوة بجد
من نفخة هوا تدخل جسمك تنزل ع الارض
شوفتي الحكمة
أو عارفه صحيح ..!
قبل اما كورونا تبان من وقت بسيط
كنت انا زعلان بكتب وبقول
انا من يوليو 2002 وللحظة دي
بقنعني بأنه هيجي اليوم ومش هحزن تاني
وفي كل اما اكبر تعاندني الدنيا وتجرحني
ولسة بعافر
بقعد وبشوف التلفزيون "اسمع اخبار"
فبلاقي جرايم بأمانه صعب علي العقل يستوعبها
قتل ودم في كل مكان سرقة ونهب
ظلم وعافية..
احزان في بيوت ملهاش ولا لوم
بقى دة اسمه كلام
ف قلوب تتأذى ،، لو طالت جوه الحيط وتفوت والله هتمشي..!
واخيرا اشوف اعلان نووي
عن مدفع قادر يقضي على العالم
وأصوات تفجير من كل مكان
وبلاد تنهار.. وبشر تُغتال
وأرواح تُقتِل من روح تانية
ومش شرط بدم ..!
دي الروح تتأذى من كلمة لو
خرجت بس بسِم وغّـِل ..
بقلب عن كل الاحداث وبحاول اغير من مودي واشغل كرتون
ف بلاقي بسيط قاعد زعلان
بائس من الكون حتي الكرتون
حتي الكرتون ..!
ف بقوم وأخرج للناس والشارع واتمشى
يفاجئني الجاهل بفلوسه
يصدمني العالِم بشهادته
والفرق ما بينهم تربيزة ومشروب أو أكل
الجاهل قاعد يطمطع
والعالِم بيخدم ليه علي مَهل
عن كره الخير للغير والحقد اللي ماليهم
وخلاص فعلا عامي قلوبهم
والاقيني بقيت عايش مزهول
من دي أفعال ومكسور نفسي
بسئل نفسي ..؟
لو كان مكتوبلي بأني اعيش
وماموتش ف حرب من الفيروس
أو فيضان سَد من الماية
من عمر انا عشت جرايم فيه
اكتر من أكل الحلويات
ف بلاد يتفوت ليها بلاد
وان يعني اتجوزت وخلفت
هلاقي الواد يسئل أسئلة
معرفش ازاي أهرب منها
عن أهل هيتمنوا يشوفوا فشله
عن صاحب هيبيعه في غمضه عين
عن بنت هتجرح يوم قلبه
وعن بنت بدون قصده كما ابوة
هيجيلوا اليوم وهيجرحها
نرجع لكورونا واحزانها
ولناس اتحبست بين صندوق
مستنية الموت هيجيلها
لمصانع ومدارس قفلت
لدموع تماسيح نزلت ع الأرض
وبحكم الوقت اقدر اقولك
علامات الساعة خلاص بدأت
تكبر دلوقتي
بكتبلك قبل الحرب العالمية التالته
ان انا مش خايف يا حبيبتي
وبتمناكي كورونا تجيلي وتدخل جسمي
وقت اما العالم يتحول اموات علي الارض
هبقى انا مرمي ما بينهم لكن
مرمي ف حبك ودة يكفيني
وان كان نصيبنا نعيش
بتمني اكون جنبك
وان كان نصيبنا نموت "الجنة تجمعنا"
ف بلاش تبقي مع الكون ضدي
سيبك من الخوف اوعى تخافي
هفضل احبك.. وهفضل اعافر
علشان حبك .. يكمل ويدوم
وفي يوم الدنيا هتستلم
بعد إما تصفي البنأدمين
وهنضحك من كل قلوبنا
من غير اصلا ما نكون عارفين
اي سبب الضحك وجاي منيين
فهكتب وان جاني ١٠٠ فيروس
هكتب بحبك ولا هتكسف من الناس
هكتب بحبك وارسمك ثورة
وسط الهتاف طالبين عدالة وحق
يمكن إذا شوفتيها وضحكتي
الدنيا تيجي معانا من غير لأ
هكتب بحبك لو يجف النيل
وانا صبري صبر وبالي لسه طويل
يمكن اذا ردك بشوش وجميل
الماية تكتر تملي الوجود بالخير
هكتب بحبك كل وقت وحين
مليان حنين لو ترضي ع المسكين
طالبك حلال لو يوم تحني عليه
يمكن اذا ردك " انا موافقة "
يرسملك الضحكة والصعب
كله يليِن .
" متوحشِينيِش"
وحشتيني فَ جيت انطقها مَلقتكيِش " متوحشنيش "
بنيت جوايا صبر عظيم وقلت معاكِ نفسي اعيش " متوحشنيش "
حلفت بأني ابقالك سلام وأمان ومجرحكيش " متوحشنيش "
بكل حنان
رسمت سيناريو جوايا وبيت وألوان
ما يكمل إلا بعيونك
حلفت بأني ما هخونك
وكنت رحيم مَبتعبكيِش "متوحشنيش"
حاربت الكل علشانك .. وجبت الفل
وناديتك من الشباك .. سمعتيني ..
وقفلتي الشيِش " متوحشنيش "
فردت شراعي بضلوعي ف عز الشمس لأجل اوهبلك الراحة
قطفت من الشجر تفاح يا تفاحة
عصرت من الدموع أفراح
وجتلكِ نفسي بيكِ أرتاح
وحياتنا احنا اللي نبنيها
بكل هدوء
أنا وإنتِ وبيت ع القد .. وبوسة ع الخد
تكوني حلالي وست البيت وتاج على راسي يشرفني
بكل بساطة نسعدنا .. وما نسمح حد يبعدنا
سمعتي كلامي مَعجبكيش " متوحشنيش"
دموعي تسيِل كما الأنهار
بقالي سنين ببات ف النار
وتغلطي وألتمس أعذار
وف الاخر نطق قلبي
مَتتركنيش ف سبتيني ..!
" متوحشنيش "
هتمشي صحيح ؟؟
وماله امشي بس ياريت تخليكِ " متوحشنيش "
بدون أسباب كما بعدتي
متوحشنيش..
بجد عشان طول الوقت
وحشاني..
ومش عارف بدونك اعيش .