(1)
30 سنة
ولّع سيجارته وبص ليها وقام سائلها:
مين اللي دلوقتي الأضر ؟
سنة بانحت في صخر 30
ولا حد حس فْـ مرة عمري بإنه مَرّ
قولي بحق النار في جوفك
مين اللي ناره تكون أمرّ؟
أنا ولّا همّا
أنا .. ولّا ناس
سندت على اكتاف الأبوة
والأخوة
والأمومة المُفرطة !
حَبة سنين متفرطة لو تجمعيهم
يبقى ناتج جمعهم عيل يتيم
والله لو كان يبتسم
رغم الهموم هتقول عليه
)عيل وسيم(
كان كل ما يمر بسنينه أمام
قاعات الفرْح وآلات الزفاف
تلمع عيونه
ويقول كلام يفهم مداه
واحد من الراكبين معاه قطر السنين
لإنه بالطبع اتوجع
يفهم بإنه
إفتكر حُبه القديم ساعة ما قالت
"كل شيء قسمة ومعاد"
يفهم بإنه لما عاد
قالت خلاص .. فات المعاد
فَـ يعود بعينه من القاعات ينظر أمامه
تارك مشاهد فيها لمة وفيها زفة
وفيها مسكة إيد ولفة
وكان يجوز كان يبقى فيها ضرب نار
بس لاجلٍ يطفي نار الحُرقة فيه
كان يبتسم ويقول: أكيد انا ليا دور
هذا الفتى ..
كان نفسه يفرح زي باقي الخلق
أو ع الأقل
يلقى اللي وعدوه بيه لما كان
عيل ملوش مِ الدنيا غير حَبة لعب
يمسك وظيفة
يقعد مع الأصحاب في قعدة يقول نُكت
فيقولوا يااااااه .. يا ابن الخفيفة
كان نفسه يبقى مع الصحاب بيقول نُكت
مش يبقى نُكتة للصحاب
100 ألف باب اتدق والأيام عنيدة
إيده اللي شالت في المِحن
وقت المِحن صبحت وحيدة
وضعوا على صدره الحجر
زي اللي قال: أحدٌ أحد
وقالوا له اكفر باللي جاي
قال إني أؤمن حتى لو
كان اللي جاي أحلام بعيدة
الضعف ..
الضعف معرفهوش يا خلق
رغم الـ 100 هزيمة
تكتر هزايمه فَـ يبتسم
فَـ تزيد في قلبه 100 عزيمة
عاش الحياه أشكال وقال:
هذا قدر
ومازال مصدق كدب أولاد اللئيمة
ولّع سيجارة ثم تانية
ثم تالتة ثم أخرى وقال لها
قولي بحق ما عشت وياكِ الزمن
صاحب وَفِي
أين المفرّ
العُمر خيط والدنيا دي بتكرّ كرّ
قولي
بحق النار ما كانت يوم سبب
إنّ الكليم .. يبقى الكليم
مين اللي فينا صبح عديم المنفعة ..
وصبح أضَرّ ..؟!!
(2)
أنا وانتي في وسط البلد
مشينا كتير
وهي تتوه إذا مشيت
سكك مجهولة أراضيها
تتوه هي
و اتوه فيها
أمد الخطوة ناحيتها
وكل مُنايا ألاقيها
شاريها بقلبي والشاري إذا يكسب
يكون المكسب الأوحد
وجودها ونظرة لعينيها
مشينا كتير ..
كان شارع شامبليون فاضي
رغم الزحمة
أو وسط البلد المليانة بقهاوي كتير
وهبت مشاريبها كاسات رحمة
أول ما شافوها الناس
أنا شوفت عيونهم حاسداني
وده جهل الناس
اتمنوا ساعتها يكونوا بدال مني
وانا كنت معاها ..
ولكني
وحداني
وبعاني بكون أنا وحداني.
حبيتك .؟
آه حبيتك ..
تشهد خطواتنا فْـ شارع ٢٦ يوليو
قصاد دلمار وعطالله
تشهد وقفتنا قصاد مطعم جاد
علشان نختار مِ المنيو حاجات
حلوة وغاليه
شوفت المشهد !!
واقف وياها
وكإن أميرة بِلبس حرير
وقصادها السايس بِهدوم بالية
عارف أنا ليه وقفت معاها قصاد المطعم ؟
علشان أثبتلها إن جيوبي
جيوب مليانه ومش خاليه
آه حبيتك
ومشيتك سكة بدون ما احسب إيه أخرتها
معقولة تكون دي أخرتها
ذنب اللي مشيلك
واتمنى كنز الرحلة
يلقى نتيجة الرحلة الخيبة
ولا دي ضريبة بندفعها
علشان القلب بيتمنى
قولي ضريبة ..
إشمعنى الحب ملوش يعني ضريبة .!
قولي ضريبة ..
وزيديني هزيمه ، ماهيش عيبة
الكتف ان شال ألف هزيمة
مش هاتضره الألف وواحد
والدنيا ان نقصت قلب
خلاص
مش مشكلة لو نقصت واحد
عِدّيني فْـ عُشّاقك واكتبي:
مات واحد ..
وآدي كمان واحد
واكتبي عني "كان واد موهوم"
عينه عِليت واتمنت سيدها
مش فاهمه ازاي في عبيد بتشوف أميرات
قوم تُعجَب أو تطلب إيدها
قولي
وانا آسف ليكي عشان حبيت
ورسمتك بيت
وعشان هديت الحيط اللي تأخر خطوتي ليكي
مجنون وعساه هايفوق بيكي
زاد بيكي جنون
ضمن الأيام بوجود عينك
وانتي عيونك
كانت تستاهل حد يصون
ولكنه عشان عاش بيكي سنين زي الميت
وانتي بتزدادي فْـ قُربه حياه
قرر يخدع كل مشاهد هيشوف عينه
ويداري الآه
وسط البلد المليانة بناس
مول طلعت حرب
حلواني العبد
أو شارع شامبليون مثلًا
أو أي مكان داق مني لقلبك يوم وصلًا
بيقولوا لعينك أيامك باتت واضحة
أيامك هتخونك جدًا
وعيونك هتكونلك فاضحة
والبن اللي شربناه انا وانتي زمان
بكرة هنشتري أضعاف منه
بس انا هشرب
وانتي ..
هاتداري بيه أثر البطحة
القلب اللي غويتي أميره
ومليتي بدمع عينيه سريره
وصلبتي عيونه وظنيتي
هيبقى لقلبك زي أسيره
مبقاش بيشوفك إلهامه
يُمهل ولا يُهمل سبحان
الواد اللي اشترى يوم قلبك
بقى بيشوف قلبك سجانه