الانتحار لو لاحظنا هنلاقي إن هو بقى من أكتر العادات انتشارًا دلوقتي في العالم كله...
ولكن المؤلم أكتر إن هو بقى منتشر أكتر في المجتمعات المسلمة... على الرغم إن الانتحار محرم في الإسلام...
مش بس محرم، ده هو كبيرة من كبائر الذنوب، وقد ثبت تحريمه في الكتاب والسنة...
تعالوا مع بعض نشوف يعني إي انتحار كده في البداية...
الانتحار:- هو قتل الشخص نفسه عمدًا، ويُعد جريمة ومعصية يأثم فاعله...
فقد حرمه الله سبحانه وتعالى في كتابه الكريم، فقال الله عز وجل في سورة النساء الآية ٢٩....
بسم الله الرحمن الرحيم ﴿يَا أَيُّهَا الَّذِينَ آمَنُوا لَا تَأْكُلُوا أَمْوَالَكُمْ بَيْنَكُمْ بِالْبَاطِلِ إِلَّا أَنْ تَكُونَ تِجَارَةً عَنْ تَرَاضٍ مِنْكُمْ وَلَا تَقْتُلُوا أَنْفُسَكُمْ إِنَّ اللَّهَ كَانَ بِكُمْ رَحِيمًا﴾ . صدق الله العظيم...
ممكن حد يسأل نفسه لي تم تحريمه؟!
أنا مبأذيش حد، وكمان دي حياتي ونفسي وأنا حر فيها...
فتعالوا كده نعرف لي تم تحريم الانتحار وإي هي الحكمة من تحريمه....
الحكمة من تحريم الانتحار:- أن الإنسان ملك لخالقه ومولاه، فلقد أعطاه الله الروح والجسد وأمر الملائكة بالسجود له، وأنزله إلى الأرض ليعمرها وليكون خليفة الله فيها...
فلا يجوز للمسلم إنهاء حياته بقتل نفسه، فجسمه أمانة ائتمنه الله عليها ولا يجوز إتلاف الجسم، لأنه لا يجوز العبث بالأمانة...
وهكذا يكون المنتحر قد ارتكب ذنبين عظيمين ألا وهما:-
١/عدم الرضا بقضاء الله.
٢/التعدي على ما لا يملكه.
طبعًا الإنسان ممكن يختار في حياته أشياء كثيرة..
كاختيار أكله، شربه، لبسه، ثيابه، عمله...
ولكن من المؤكد أن هناك قيودًا لهذه الحرية وأن هذا الاختيار لا يتجاوز حدود الممكن...
فالإنسان لم يوجد نفسه، ولم يحدد المواصفات التي يُخلَق بها، ولا يملك لنفسه أمر الموت والحياة، فلا يستيطع الإنسان أن يقرر متى سيُولَد، أو كم سيعيش، ولا حتى يستطيع أن يدفع عن نفسه الموت...
فهو بلا شك مفتقر للآخرين، فليس للإنسان أن يخرق القوانين أو أن يتعدى على الغير، فحريته تستلزم احترام حقوق الآخرين، وكونه لم يوجد نفسه، يلزم افتقاره إلى الخالق الذي أوجده ووهب له الروح والجسد، وهو الله عز وجل خالق كل شيء، فالنفس ملك لله وقتل الإنسان نفسه تجاوز لحدود الاختيار الذي منحه الله له...
بمعنى أن:- مفهوم الحرية الشخصية، لا يخرج عن كون الشخص عبدًا مملوكًا لله وليس له مطلق الحرية...
وقال رسول الله صلى الله عليه وسلم"من تردى من جبل فقتل نفسه فهو في نار جهنم يتردى فيه خالدا مخلدا فيها أبدا، ومن تحسى سما فقتل نفسه فسمه في يده يتحساه في نار جهنم خالدا مخلدا فيها أبدا، ومن قتل نفسه بحديدة فحديدته في يده يجأ بها في بطنه في نار جهنم خالدا مخلدا فيها أبدا "صدق رسول الله صلى الله عليه وسلم.
فرغم تحريم الدين الإسلامي للانتحار ولكن نراه منتشرًا جدًا بين الشعوب المسلمة الآن، تعالوا نشوف مع بعض إي السبب؟!!
عايزين نسأل نفسنا أول كام سؤال كده...
س١:- هو اللي انتحر ده مسلم؟!
ج١:- أيوة مسلم.
س٢:- طب هو عارف إن الانتحار ده محرم؟
ج٢:- أيوة عارف.
س٣:- طب هو عارف إن هو هيخش النار وعارف عقوبة المنتحر؟!
ج٣:- أيوة عارف...
طيب لما هو عارف إي اللي يخليه ينتحر وينهي حياته ويخسر دنيته وكمان يتعذب في آخرته؟؟!!
في الوقت الحالي أكتر المنتحرين من الشباب صغير السن وأكترهم ممن لم يبلغوا سن العشرين!!!
فماذا رأوا من ظلم أو من حزن أو من غم أو من مشاكل في حياتهم تخليهم ينتحروا؟!
ده لسه مشافوش حاجة يعني ومهما كان عندهم مشاكل هتبقى مشاكل صغيرة وتافهة على قد سنهم...
-- ده بقى أول سبب وأهم سبب من أسباب الانتحار...
وهو التقليل من حجم المشاكل والضغوطات والأزمات النفسية لدى الشاب صاحب ال١٧عام، أو الفتاة صاحبة ١٩عام...
طب لي منقعدش معاهم ونسمعهم ممكن يكون يكون عندهم مشاكل وضغوط هما مش جاهزين ولا قادرين يواجهوها لوحدهم...
وممكن المشاكل دي حتى لو بانت صغيرة أو تافهة ليك هي عندهم مش كده، ومش لاقين ليها حل لأنها أكبر من أنهم يحلوها، وإنت ممكن عندك الحل ليها بس إنت مفكرتش تسمعهم أصلًا...
في الحالة دي انت بتكون سبب من ضمن الأسباب اللي بتخليهم يفكروا ويقبلوا على الانتحار...
لي محدش فاهمني؟
لي شايفين مشاكلي تافهة؟
أنا تعبت... أنا مخنوق... أنا مش قادر أستحمل...
أنا قررت مش هكمل... أنا هنتحر واخلص نفسي وأكيد الانتحار هيبقة راحة ليا...
وإنت للأسف مسبتش ليه أي حل تاني غير ده...
بالنسبة ليه هو الحل الوحيد اللي ممكن يحل مشاكله ويريحه من الضغوطات والتعب النفسي اللي هو كان فيه...
فنصيحة لكل أب... لكل أم... لكل أخ... في الحقيقة هي نصيحة لكل إنسان...
بلاش تقلل من مشاكل حد، ياريت نحاول نسمعهم ونقرب منهم، ممكن المشاكل اللي هي عندهم كبيرة جدًا دي وهتدفعم للانتحار تلاقي إنت ليها حل ببساطة...
وممكن هما مش عايزين حل ولا حاجة هما بس عايزين حد يسمعهم... حد يحسسهم إنهم موجودين ويهمه إنهم يكونوا كويسين مش شايفينهم أطفال لسه ومشاكلهم تافهة....
وبرضو من أسباب الانتحار هي التسلط...
فالكثير من الشباب دلوقتي بيعانوا من مشكلة التسلط وبالأخص من الأهل وده بينهي بيهم المطاف للانتحار...
كتير من الأهل دلوقتي بيبقوا عايزين أولادهم يعيشوا الحياة اللي هما راسيمنها ليهم... وبيقرروا إنهم يلغوا حياة أولادهم ويحرموهم من أقل حقوقهم وهي إنهم يعيشوا حياتهم زي ما هما عايزين مش زي ما أهلهم عايزين...
وعلشان كده الشباب دي مش بتلاقي حل إنهم يتخلصوا من التسلط ده إلا الانتحار...
إنت متخيل وصلوا لإي؟؟؟!
وصلوا إنهم مش لاقيين حريتهم إلا في إنهم ينهوا حياتهم وينتحروا...
فنصيحة لكل أب وأم وأي شخص بيمارس التسلط على الشباب والأطفال...
بلاش تفرض نهج عليهم لازم يسلكوه غصب عنهم... بلاش ترسم ليهم حياة غير حياتهم وهما مش عايزينها وتطلب منهم إنهم يكملوا وينجحوا... متلخهوش يلجأ إن هو يدور على حريته بأي شكل من الأشكال حتى لو كان الشكل ده هو الانتحار...
وكمان ممكن التنمر يكون من أهم الأسباب اللي بيدفع الشخص اللي بيتعرض للتنمر للانتحار، حتى لو كان التنمر ده على سبيل الدعابة أو الهزار، فانت بتبني عند الشخص ده عدم رضا على شكله أو تصرفاته وبتخليه يحس بنقص شديد... وده اللي بيخليه يفكر في الانتحار وده اللي حصل مع مريم اللي اتكلمنا عليها في الفصل الأول...
وفي كمان أسباب تانية زي الأمراض النفسية والوضع الاقتصادي والإدمان، والبطالة والعزلة الاجتماعية والوحدة وممكن يكون سبب الانتحار، إن الشخص ده مر بتجربة مؤلمة ومش قادر يتخلص من أثرها وملقاش حد جمبه...
رغم كل الأسباب دي احنا مبنحاولش نفكر لي الشباب دي بتنتحر، لي مهندس في بداية حياته أو دكتورة في عز شبابها أو طالب لسه مبدأش حياته في إنهم ينهوا حياتهم وهي لسه بتبدي... بس خلاص هما شافوا في الانتحار ده الحل الوحيد من اللي هما بيعانوا منه رغم إنهم عارفين إنهم مش بس هيخسروا حياتهم، ده كمان هيخسروا أخرتهم بس برضو بيشوفوا ده الراحة ليهم...
أنا ذكرت الأسباب دي وهي كلها أسباب وليست مبررات إطلاقًا... فالانتحار ذنب كبير وجريمة في حق الله وفي حق النفس لا يوجد ليها أي تبرير...
ولكن...
بدل من إننا نحكم على الشباب اللي بتنتحر بالجنون والكفر ونفصل نقول..
هو انتحر لي؟ ده لسه صغير يعني شاف إي في حياته صعب؟! وكلام من ده كتير.
خلينا نبدأ نفكر اللي بيدفعهم لكده ونحاول نساعدهم..
بدل ما بنقدملهم كل الأسباب اللي تخليهم ينتحروا وبعد كده نقول إي ده؟!
ده مات منتحر.. ده كده مات كافر...
فخلي بالك كويس علشان متبقاش إنت سكار...
والشاب اللي بتدفعه من فوق الجبل وهو مبيقدرش يحمي نفسه يبقى موفاسا...