يوميات سجين
اليوم الأول:
قعدت أستكشف شوية في الزنزانة و الانطباع العام أنها مريحة علي الأقل أحسن من بقايا حريق المزرعة ,في مراية هنا ! مع التفكير أنا معنديش اي تصور أو شكل لنفسي ! فلما شفت شكلي حسيت أني سمعت حاجة ,كان احساس غريب بس مش مهم , الحارس أداني الكراسة و القلم علشان أكتب اي حاجة أفتكرها ,بعد اللعبة الي لسة لعبها حاسس أني استهلكت كل خلية في مخي و عايز أنام ؟ بس هل فعلاً من الأمن أني أنام هنا !
بص ببساطة هما يقدروا يقتلوني في اي وقت , بس هل ممكن يكون ده اختبار ؟ هل هما عارفين حقيقتي ؟ لا لو عارفين مكنش هيكون في داعي للاستجواب ده أصلاً و مكنتش حياتي هتتعرض للخطر !
الموضوع لحد دلوقتي معقد و أنا مش قادر أفكر, قررت بعدها بما أني مش قادر أستخدم عقلي فهستخدم عضلاتي و أتدرب شوية هنا لحد ما أنام
اليوم الثاني:
رجعت لطبيعتي و بدأت ألاحظ شخبطة علي الحيطة , مفهتمتش منها حاجة لحد دلوقتي بس شكلي هطول هنا فقدامي وقت للاستكشاف و التفكير و التحليل . بمناسبة التفكير و التحليل جه الوقت علشان أتدرب علي القدرة الي اكتشفتها من حوالي أسبوع
الموضوع أبتدئ من حوالي أسبوع و أنا مكنتش في صحة كويسة و عمال أفكر في الخطوة الي هعملها و في قمة التوتر و فجأ سمعت صوت مكنش اي صوت لا ده كان صوتي من جويا كان في صوتين بيتكلموا جويا و العجيب أني كنت سامع الأثنين في نفس الوقت و التركيز والوضوح و الكفاءة بس بعدها صدعت و حسيت بتعب , حسيت أني بتوهم بس اليوم الي بعدة حاولت أجرب و أشتغل تاني , بالطريقة دي ضاعفت سرعة تفكيري و ده الي خلاني أتسأل " أنا مين ؟ " و ده الي دفع فضولي لحاجتين أولهم أن الاجابة ممكن تكون في الداخل مش الخارج فحاولت و حاولت أعرف اية كمان, و في مرة و أنا بحاول أستكشف نفسي حسيت بدوخة شديده و قبل ما يغمي عليا لاحظت أن نبض قلبي قل فحاولت أسرعه و لحسن الحظ عرفت ,كان ممكن أموت فعلاً لو أغمي عليا فقررت مأخاطرش أكتر من كدة و أروح للحاجة التانية الي هي المكان ده , الميزة هنا أن في حراس فلو حصلي حاجة هيسعفوني و كمان سهل أني أخدعهم
بس منكرش أن الموضوع أفادني في جهاز كشف الكذب ده و أخر دور من اللعبة
بس في نفس الوقت الموضوع ليه عيوب فقدرة "عقل الغراب" بحس بعدها بإرهاق شديد و قدرة "قلب الغزال" ممكن لو النبض قل عن معدل معين أو زاد عن معدل معين أموت
حظي حلو أني أخفيت نفسي لما كنت في المكان ده قبل كدة ده حتي أسمي أخفيته !
بس ده بيفتح باب لأسئلة يامه أية قصة المساجين الي هنا ؟ و اية المعلومات الي عايزنها منهم ؟
المهم دلوقتي الأكل وصل و أنا بقالي كام يوم مأكلتش هأكل و أكمل
اليوم ؟؟؟:
حاسس بإحساس غريب ,أنا كلت و مش فاكر حاجة بعدها , حاسس بالصداع و الدوخة خفيفة سألت الحارس بصلي بصة كره و احتقار و عينه كانت فيها نية للقتل أو ده الي أنا فأكرة , قعدت مع نفسي شوية بحاول أفهم الاحساس ده , الساعة كانت متغيرة مع اثار لأطباق و كوبيات أكني فقدت الوعي و حد سكن هنا , حاولت تاني مع الحارس بس مردش , قعدت في حيرة مش عارف في ايه ؟ الأكل دي الحاجة الي جت في دماغي أكيد كان في حاجة فيه بس ايه ؟! معرفتش أوصل لنتيجة لحد ما الحارس أتبدل ساعتها فهمت أغلب الحجات
أنا: هو النهارده اليوم الكام ليا ؟
الحارس: رقم 217 لقد أمضيت سبعة أيام منذ قدومك
أنا: سبعه ؟! طب هل في حد دخل المكان ده ؟
الحارس: لا لا أحد
أنا: ازاي ؟ مين الي كان بيأكل و يشرب هنا ؟
الحارس: أنت , و فلتخرس قليلاً
أنا: ليه بترد علي أسئلتي علي عكس الحارس الصبح
الحارس: أتقصد جاد ؟ أنه من قبض عليك و قد كان يريد قتلك وقتها في الحقيقة لا أعلم سبب هذا الحقد الذي يكنه لك
و ده الي خلاني أشك في نفسي علي حسب كلام الحارس فمحدش دخل الزنزانة و أنا مش فاكر 5 أيام بحالهم
الأكل و الميه وصلم و بعد الي حصل بدأت أركز في الأكل بس مكنش فيه حاجه بس كان في حاجه غريبة في الميه عقار ؟ معرفش بس الظاهر أننهم مش هيسبوني هنا في حالي ! كبيتها و طلبت ميه تانية و جاتلي ميه عادية مفيهاش حاجة و ده معناه أن الحارس مش عارف حاجة عن الموضوع , و النقطة دي بتأدي أن في تسلسل معين للأفراد و كل فئة محجوب عنها معلومات معينة بس معقول أن الحارس ملاحظش ؟ اية الي أنا كنت بعملة في أخر خمس أيام ؟؟
سألت الحارس و قالي أني كنت بتصرف بطريقة غريبة كنت بأكل وبشرب عادي بس كانت تصرفاتي غريبة
كنت لسة هحاول أفهم بس لقيت عينيا بتغفل فهنام دلوقتي و لما أصحي هفكر
اليوم الثامن:
حاجة عجيبة الي حصلت مكنش عندي وعي و مع ذلك كنت بأكل و أشرب و أتصرف زي اي حد طبيعي فهل ده معناه أنهم عارفين قدراتي و لا هما بيعاملوني كفار تجارب بس لو أنا فار يبقا كده في مراقب و بما أن الحارس الليلي قال أن مفيش حد دخل يبقا أكيد في مراقب دخل الصبح
أو أن في كاميرات في المكان فبدأت أدور و ألاحظ و أدقق بس ملقيتش حاجة ,المشكلة أني هنا وحيد فلو عايزين يعملوا تجارب فهما مش مضطرين يخفوا المادة في المية ,أنا دماغي ساحت في كل ده و محستش بالوقت الا و معاد الوجبة اليومية جه كان عبارة عن بطاطس من ساعة ما جيت و أنا بأكل في بطاطس ,بصيت علي المية و سرحت فيها يا تري ايه الحاجة الي الكباية دي ممكن تعمله فيا ؟
بحلقت فيها و عنيا مكانتش قادرة تسبها اية الحاجه الي عملتها فيا ؟ ده السؤال الي شغل دماغي و بدأت أحلل يعني جسد يتحرك من غير وعي ؟ في أغلب حلات المشي في النوم فالجسد بيعمل حجات هو متعود عليها زي الأكل و الشرب فده ممكن يكون معناه اية ؟ شغلت عقل الغراب لقرابة الساعة و طلع معايا اجابة الأقرب للصحة
الذاكرة مش بس في المخ لا حتي الجسد فيه ذاكرة حتي و لو مؤقته فأي حركة بتعملها يامه خلايا معينة بتبدأ تكبر حوالين الخلايا العصبية فبيخلي السيال العصبي أسرع يعني الحركة الي الجسد بيعملها يامه بيركز عليها و يخليها أسرع حتي و لو بمساعدة المخ فالمخ جزء لا يتجزئ من الجسد
مثال حي : دلوقتي عندك حسام , حسام هو بطل العالم في الكاراتيه و أخد جوائز يامه ,في مرة و هو ماشي وقع ففقد الذاكرة ,الذاكرة دي عبارة عن كل تجاربك و معارفك و خبراتك الي المخ مخزنها ,حسام وقف مش فاكر حاجة لقي قدامة بلطاجيه بيهجموا علية ,هيكون من المنطق أنه يخسر علشان كل تجاربه و المعارك الي دخلها و التقنيات الي أتقنها كلها أختفت بس مش ده الي حصل حسام كسب بسهولة بس ازاي ؟ ده لأن الجسد عنده ذاكرة خاصة بيه منفصله عن الي في المخ و لو كان السبب في تكوينها
يعني ببساطة لو أنا شربت من الكباية هفقد الوعي و جسدي هيتحرك بناء علي الذاكرة الي المخ كونها و زرعها في الجسد و انفصلت عن المخ و ده ممكن يساعدني لو قدرت أعرف أنا بعمل اية فده هيديني لمحة عن الماضي بتاعي
أنا لسه مش متأكد من النظرية دي بس ده الي طلعت بيه
........هو أنا ليه شرحت كل ده ؟!
اليوم التاسع:
كنت هموت النهارده كذا مرة لأن ضغط دمي كان عالي ممكن من التوتر فقررت أستغل الفرصة و أتدرب علي قدرة قلب الغزال و أفكر في نفس الوقت بقدرة عقل الغراب ,.......أنا مش حلو في التسمية
و أنا بفكر جت في دماغي فكرة لو طورت قدرة عقل الغراب هل من الممكن أني اشوف حركة جسدي و أنا مش بواعيي ؟ علمياً الموضوع مستحيل فأزاي أكون واعي و غير واعي في نفس الوقت ؟! بس مكنش في حد اسمه " العلم " ظهر و جه وقالي أن ده مستحيل فافي حجات يامه كانت مستحيلة و بقيت جزء عادي من الحياة فمفيش حاجة مسلم بها هنا
فقررت أتدرب و أعرض حياتي للخطر ف في اللحظات دي العقل بيطلع قدرات الجسد الكاملة و في حالتي هو بيديني مفتاح لباب مكنتش أعرف أنه موجود
جه الأكل الي كان لسه بطاطس الظاهر أن ده أكل المساجين هنا و كالعادة كبيت المية و طلبت واحدة تانية
و أنا بتدرب وكالعادة في اليوم ده كنت شايف الموت بس سمعت صوت أتنين بيتكلموا عن ناس هيجوا بعد أسبوع , هل ده توهم بسبب قربي من الموت ؟ هل ده كان بجد ؟ و لو بجد هل دول جاين يختبروا حاجة عليا ؟
لقيت محتوي حلو أفكر فيه بس لو ده بجد فأنا لازم أتطور القدرة دي قبل ما يظهروا علشان ميعرفوش أني فهمت الي بيعملوه
اليوم العاشر:
بدأت أفقد الأمل من الخطة دي بالرغم من أني وصلت 75 دقيقة مع عقل الغراب بس مش حاسس أن في أمل
اليوم كان نوعاً ما عادي مفيش حاجه غريبة حاولت أتكلم شوية مع الحارس الي اسمه جاد بحيث أتأكد من الي سمعته قال كلام غريب و معقد مش فاكره أو مهتمتش بيه بس المحصلة كانت صفر
بقيت أقدر أستخدم القدرة دي من غير ما أدوخ أو أصدع و الفرق ما بين المرة و التانيه حوالي 6 ساعات فبقيت أقدر أستخدمها في اليوم مرتين و من غير أثار جانبيه بس زي ما قلت في الخطة الرأسية مفيش اي نوع من أنواع التقدم
خدت استراحة قصيرة من المحاولة و لا حظت الكلام الي كان مكتوب علي الحيطة ,بدأت في تحليله لحد ما جاتلي جملة و هي الأقرب للصحة
" الموضوع أبتدئ في الليلة دي فضلنا محبوسين شهرين لحد لما وصلوا افتكرناهم حبل النجاة الي هينقذنا بس طلعوا حبل الاعدام الي هيتلف علي رقبانا "
مفيش تعليق لأني مش فاهم حاجة ,ده دلوقتي كلام عشوائي
بدأت ألاحظ تشققات في المكان
أنا حالياً تائه مش عارف أعمل اية بس عندي احساس أني بكره هلاقي حل
اليوم الحادي عشر:
قدرت أوصل لمدة 90 دقيقة بس مفيش النتيجة الي أنا عايزها أنا بحاول حالياً لأن مفيش حاجة تانية أعملها
روتيني اليومي بقا عبارة عن صحيان – تدريب – أحاول أكلم الحارس الصباحي الي أسمه جاد بس في الغالب مش بيرد – جاد بيسلم الأكل الي هو عبارة عن بطاطس و الشرب و بيبدل مع الحارس الليلي – أكب الميه و أطلب من الحارس الليلي ميه تانية – بحاول أجمع معلومات من الحارس الليلي بس الظاهر أن رتبته قليليه – أتدرب تاني علي أمل أقدر أنفذ الخطة الي في دماغي – موصلش لحاجة فأكتب الي حصل في المذكرة و أنام علي أمل
بالرغم من التطور الملحوظ في قدرة عقل الغراب الا أنها عاجزه عن تحقيق الي في دماغي , بدأت أشك أن ده فعلاً مستحيل و غير ممكن عملياً بس مفيش طريقة تانية ,لو معرفتش أطورها و أشرب العقار الغريب ده هتقفش و أنا معنديش أدني تصور من الممكن يعملوه فيا
اليوم الثاني عشر:
صحيت النهارده علي أغرب حاجة شفتها في حياتي الي هي حوالي 40 يوم ,الحاجة دي خلتني أتسأل هل أنا بشري ؟ أنا عارف أني مش شخص طبيعي بس هل أنا كائن غير بشري ؟
الحاجة الي أنا شفتها خلتني أعرف أني كنت ماشي في طريق غلط و الحل كان في عنيا حرفياً
الموضوع أبتدئ لما أنا قررت أنام بس معرفتش فضلت صاحي باصص علي الساعة و هي بتتحرك ثانية بثانية فضلت علي الوضع ده لمدة ساعتين مش فاهم أنا مش عارف أنام ليه بالرغم من الإرهاق الي عندي لحد ما سمعت صوت كان صوت شخير بس مش من بعيد لا ده كان قريب أوي مكنتش عارف فين لأني مكنتش قادر أتحرك معرفتش وقتها ليه ؟ قعدت أحاول أعرف الصوت ده جاي منين لغاية لما أنتبهت أنه كان مني أنا ! بس ازاي ؟
قعدت أراقب الساعة و أنا مش قادر أتحرك لحد ما فجأ أتحركت و أتقلبت علي السرير
هنا استوعبت أني الموضوع مش أني عارف أنام لا أنا نايم ! و عنيا مفتحة و قادر أشوف كل حاجة
طبعاً أفترضت أني بحلم بس كان واقعي بشكل أنا مش متخيلة !
قعدت أفكر و أنا متوتر و بقول لنفسي ايه الي هيحصل لو ده مش حلم؟ هل رغبتي في قدرة زي دي خلت عقلي اللاوعي يكشفها ؟ أنا في الأول افتكرت ان دي ممكن تكون طفرة جنينه , موهبة بس دلوقتي ايه هي الحاجة الي تثبت أني بشري ؟ و لا حاجة ممكن أكون اي حاجة و ده بيأخدني لسؤال أعمق يعني أيه كونك بشري ؟ هل شكل ؟ أو صفات ؟ أو تتولد من البشر ؟ أنا شكلي بشري بس لو أنا مش بشري يبقي أنا ايه ؟
أنا حالياً مش فاهم حاجة بس معتقدش أن في طفرة أو موهبة ممكن تعمل كده ! بالتفكير أنا لما جيت المكان ده أول مرة أخفيت اسمي بس ليه ؟
هل بجد أنا كائن تاني غير بشري بس متشارك معاهم في الصفات الشكلية
ممكن تكون دي كلها افتراضات علي حلم , طريقة واحدة نتأكد
اليوم الثالث عشر:
الموضوع أتكرر تاني ما أعتقدش أنه حلم النسبة قليلة جداً و المرة دي قررت أستخدم عقل الغراب و أنا نايم و النتيجة كانت ناجحة ,أنا قعدت طول ما نايم أفكر و وصلت في أني مش مفروض أفكر في هويتي للوقت الحالي و هكتفي بأني "مميز" علي وصف عمر
أنا حاسس بالإرهاق كل ده بيحصل دلوقتي و فجأ كمان الظاهر أن قدرة "عين البوم" بتسببلي نوع من أنواع الوهم البصري و الارهاق
ايوة أنا عارف أني مش حلو في التسمية بس ده الي بيجي في دماغي في الوقت ده و مش هفضل أقول "القدرة الي بتخليني واعي و أنا نايم بالرغم أني مفروض مكنش واعي"
بس من ناحية نظرية العقار الي في المية بيدخلني في حالة شبة النوم بس لمدة طويلة و مش عارف هل هفضل شايف تحركاتي بعين البوم لمدة قد اية ؟ خصوصاً أن القدرة دي لسه ظاهرة عندي فهتم بيها الفترة دي و أحاول أتدرب عبيها ازاي ؟ هنام مع السلامة في حاجة أهم من الكتابة
اليوم الرابع عشر:
أنا نمت 16 ساعة و صحيت علي اليوم الي بعدة , كنت متحمس للتدريب بس وأنا نايم نسيت حكاية الأكل و المرة دي جابولي لحمة !! و سخنه ! كنت بتقهر و أنا شايفها و مش عارف أتحرك و أكلها , عدي يوم بس الغريب و الي مجاش في دماغي أن مفيش ذبان أتلم علي الأكل ,لما كان الأكل بيجي كنت بأكلة علي طول فمكنتش ملاحظ الموضوع ده
بس الأهم أن في مفروض ناس جايين بعد يومين علي حسب الي أنا سمعته و المفروض أتقن القدرة دي علي ما يجيوا بس مقدرش أجبر نفسي علي النوم بس لازم فنمت علي ظهري طول اليوم مستني أني أنام بس زي المتوقع مفيش فايدة بس سمعت نفس الاثنين الي كانوا بيتكلموا من كام يوم و قالوا:
؟؟؟: لماذا نترك رقم 217 علي قيد الحياة ؟
؟؟: لأننا نستخدمه كفار تجارب
؟؟؟: اذن لما لا يكون في المختبر ؟
؟؟: لأننا لا نود المخاطرة فان كان ذلك الشخص علي قيد الحياة بطريقة ما و علم ما فعلناه يمكن أن تخسر المنظمة خسائر فادحة لا يمكن تعويضها الأن
؟؟؟: أتقصد الشخص الذي واجة الزعيم نفسة و قضي علي 100 منا ؟ الشخص الذي يلقب بـ..........
بس ده الي أنا سمعته مقدرتش أعرف هو مين الي بيتكلموا عنه ده
شخص قتل 100 واحد لوحده ؟ كان ممكن أتفهم غوريلا ضد العدد ده بس واحد ؟!
بس مش ده أغرب حاجة أتقالت اية علاقتي بالشخص الي بيكلموا عنه علشان يكون نقلي للمختبر مخاطرة
رقم 217 كنت ناسي أن ده الاسم الي بتنادي بيه هنا ,كل لما أقعد في المكان كل لما أشوف المكان ده أغرب
الأسئلة هنا بتكتر هل هوصل لمرحلة أعرف فيها الإجابات ؟
اليوم الخامس عشر:
جربت عين البوم في أخر كام يوم فترة حلوه أعتقد ,بصراحة لا بس الوقت خلص الناس دول جايين بكرة و معنديش اي خطة تانية ,المية أهيه قدامي و لأول مره مش هرميها بس الأول أراجع تقدمي
عقل الغراب: 120 دقيقة لكل 6 ساعات و الاَثار الجانبية شبة معدومة
قلب الغزال: ملهاش تقدم و اَثارها الجانبية حطتني قدام الموت مرات يامه
عين البوم: اكتشفتها قريب و مش قادر أتحكم فيها و اَثارها الجانبية الوهم البصري و الصداع و متدربتش عليها بما فيه الكفاية
دي كانت القدرات الرأسية في تحسينات في جسدي زي السمع بس دي متعتبرش قدرة استثنائية أسميها
أنا مش هبالغ لما أقول أني لو شربت من المية دي ممكن الورقة دي هتكون أخر حاجة عني
أنا شفت الموت كذا مرة بس ده مينمعش أني خايف ,في كل المرات الي كنت فيها علي وشك الموت كان بسبب نفسي من غير عامل خارجي ممكن تتشاف غرور ,ثقه أو مهارة بس مكنتش خايف من الموت لأن ده كان أنا بس دلوقتي مش هيكون أنا علشان كده في جزء جوايا خايف لا مرعوب مش عارف يعمل ايه أنا مش ضامن عين البوم أنها تعمل حاجه ,لو مكتبتش حاجة هنا تاني فيا الي هتدخل هنا أعرف أني مت ده لو طبعاً فهمت الكلام المشفر ده أعتقد أن هيكون عندك الوقت علشان تفك شفرة المذكرة دي ,أكيد يعني مش هكتب يومياتي بحيث اي حد يقرأها كده
سلام
اليوم العشرون:
أنا لسه عايش !! في حجات يامه حصلت بس الأهم أني لسه عايش ,عدت حوالي 5 أيام من ساعة لما شربت الكباية الي كان فيها العقار ,هحاول أرتب كل حاجة حصلت بس مضمنش أني هفتكر كل حاجة
لما أخدت الكباية كان جسدي بيتحرك لوحدة و أنا شايفه المستحيل بقا ممكن !! , التصرفات الي كنت بعملها أو الي جسدي بيعملها في حالة
"ظل الجسد" كانت عشوائية فعلاً مفيش حاجة مميزة لاحظتها وقتها
فضل الحال كده لحد لما جه ناس لابسين بالطو أزرق في فترة حراسة و كمان الي اسمه جاد و ده اثبات أن رتبته عالية ,و سمعت الحوار ده
عالم1: لنأخذ عينه أخري من دمه
عالم2: حسناً فتلك العينات ستساعدنا في اكمال مشروعنا بسرعة
عالم1: هل تمازحني بسرعة ؟ لقد تطلب الأمر من 10 أيام لاجراء التحاليل و لم تكتمل بعد نحن هنا فقط نتظاهر بأننا نقوم بشيء بكي لا يقتلنا اليد اليمني زياد
عالم2: لماذا تخبرني فأنا معك في هذا المعمل و أعلم بكل ذلك ! ان كان هذا الوضع مع الابن فماذا كنا لنفعل مع الأب
عالم1: من الجيد أنه مات منذ مدة كبيرة و الا كان سيزداد عملنا ارهاقاً
عالم2: نحن نملك 3 عينات الأن علينا العمل عليهم و فك الحمض الوراثي و هذا قد يستغرق سنين
عالم1: ربما علينا الطلب من اليد يمني زياد بعض المساعدة
لما سمعت كلمة "الأب" جالي احساس غريب مش عارف أوصفه من حنين و أمان بس بعدها تسأل و حيره هما يعرفوا أبويا منين ؟
حاولت أتحرك أمسكهم و أعرف, جالي الاحساس ده بعدها احساس أني هرمي بكل الخطة بكل حاجة علشان بس أعرف , معرفش الاحساس ده جالي ليه خصوصاَ اني مش فاكر اي حاجه عنه بس مقدرش انكره
شغلت عقل الغراب في حالة ظل الجسد و بدأت أحلل لمدة طويلة لدرجة أن في صوت تالت ظهر معانا علشان يفكر الظاهر أن ده مستوي جديد ,و وصلت لحاجة ,زياد هو المسؤول عن السجن و اليد اليمني للزعيم و أنه أكتشف هويتي في اللعبة الي كنا بنلعبها بالرغم من كل الحذر الي كان عندي ,افتكرت كلام زياد عن المساجين و أنهم هنا من سنتين مع الكلام في رسالة عمر ممكن أطلع بنظرية أن في حاجة حصلت للعالم من حوالي سنتين و قلة بس الي نجوا و في 3 مميزين و أنا واحد منهم
علي الأقل احتمالية كوني بشري ارتفعت , الي جاي ده مجرد افتراض بس أنا كنت سامع عن واحد قتل مية جندي من المنظمة أنا مش مصدق بس لو هو واحد من "المميزين" فممكن يكون الوضع منطقي أكتر
بعد لما العلماء دول ماشوا بحوالس ساعة شفت فراغ لثانية علشان أفتح عيني الاقي أن الساعة رجعت ساعتين و الحارس الي أسمة جاد موجود و أنا كنت واقف علي السرير مركز علي الزاوية العلوية للزنزانة ,استخدمت عقل الغراب لأن ليه لا يعتبر تدريب و استنتجت أنه عدي يوم و أن عين البوم أخرها 24 ساعة و لو وصلت للوقت ده هتحتاج يوم كامل علي ما تظهر تاني ببساطة أنا قعدت يوم بستخدمها و يوم لا لأنها كانت بتشحن تقريباً و لأني في الوضع ده مش بلاحظ الوقت معرفتش الا لما فتحت عيني و لقيت الوقت و جسدي متغيرين
المعلومة دي مكنتش أعرفها لأن مش من الطبيعي أنام يوم كامل !!
دلوقتي هتكلم عن اليوم التالت ليا في وضع ظل الجسد
كان يوم مثير للاهتمام شفت فيه حجات من ذاكرة جسدي أدتني لمحة عن هويتي
في البداية كنت واقف علي السرير براقب زاوية الزنزانة شكلها كانت عادة ليا أو حصلت حاجة نشطت الذكرة دي في جسدي ده احتمال أو احتمال دي تكون حاجة عشوائية بس جوايا حسيت أنها حركة مميزة
و بعدين قعدت علي السرير و ايدي واخدة وضعية الكتابة و كنت بكتب حجات بس علي الهواء لو كنت بكتب في المذكرة كان زمان في منجم معلومات معايا بس للأسف
بس علي الأقل فكرة كوني بشري عاش حياة بشرية عادية بتطمني و تخليني مستريح من أعماق أعماقي
و بالنسبة لليوم الرابع القدرة كانت بتتشحن فمشفتش حاجة و الخامس كان شبة التالت غير أني كنت بعمل التمارين الجسدية بس
علي الأقل طلعت من حالة ظل الجسد بمعلومات مهمة بس مش مفيدة ليا في الوقت الحالي
بالنسبة للنهار ده فقررت أني مدخلش في الحالة دي دلوقتي لأن ممكن يكون ليه تأثير سلبي علي جسدي و أنا مش هتحمل اي مخاطرة دلوقتي علي الأقل
مكنش عندي فكرة أعمل ايه لبقية اليوم فقررت أني أتدرب علي قدراتي فهي السبب في نجاتي بس جالي خبر دمرلي الخطة الي كنت لسة حاططها و خلاني أفكر في كذا حاجة و احتمال
زياد دخل الزنزانة و قالي أن هيتم نقلي من الحبس الانفرادي بعد 9 أيام و سأل لو هقدر أتقلم معاهم و مشي و هو بيضحك , أنا لحد دلوقتي مش قادر أفهم زياد ده هو اليد اليمين و المسؤول عن السجن و قدر أنه يكتشف السر الي أنا بحاول أخبية عن طريق لعبة !!
أنا صراحة مش عارف بعد ما هنتقل هل هيبطلوا يحطولي العقار الغريب ده في الميه ؟؟ لو كده فأنا نحتاج أشربة علشان أجمع أكبر قدر ممكن من المعلومات عن نفسي فلو عايز أواجه حد قبل ما أعرف مين حلفائي أو أعدائي لازم أعرف نفسي
بس مش هاخد العقار النهارده لسه في حجات يامة أفكر فيها
اليوم الواحد و العشرون:
مفيش حاجة غريبه حصلت
اليوم الثاني و العشرون:
مكنش في حاجه مميزه ,فقررت أخد العقار النهارده
اليوم السادس و العشرون:
و زي المرة الي فاتت هحكي عن الي حصل الأول في حالة ظل الجسد
بدايةً لما شربت العقار حسيت بدوخة محصلتليش قبل كده و لقيت جسدي مرة واحدة حب النوم لليوم كامل , كنت هحس بالقهرة لو في نهار اليوم التاني دخل عليا الي اسمه جاد و قال شوية حجات كده مش مهمه كلام سخيف مستحيل لأنه بيخالف قوانين العالم بس في نفس الوقت كلامه كان منطقي بدأت أقتنع بيه
طبعاً هو بيكلمني و هو فاكر أني مش في واعي بس مقالش معلومات مفيدة , اليوم ده خلص بالشكل ده و فقدت الاتصال بجسدي لأن عين البوم كانت محتاجه يوم تريح
اليوم التالت في ظل الجسد محصلش حاجة جديدة أكتبها بس لما صحيت بعدها لقيت نفسي طلعت من الحالة و بقيت أقدر أتحكم بجسدي و ده معناه أن جسدي بيكون مقاومة ضد العقار ده فالمدة قلت يوم كامل
و بالمعدل ده فأنا عندي أربع محاولات بس حتي و لو استخدمت العقار ده بعد لما أمشي من المكان ده , بس الجانب الايجابي من المقاومة دي أني دلوقتي عندي وقت علشان أدخل في الوضع ده قبل لما أطلع من هنا بس لو عايز أحقق أقصي استفادة لازم أريح النهارده علشان عين البوم تقدر تشتغل كويس ليومين بدل يوم
الوقت المتبقي121:4:20:50