فى طىّ الكِتمان.
🌸قتل ناعم 🔪
الفصل(15)
*تنويه :قصة المحامية إيمان حقيقية*
.. __________..
*منذ سنوات*
رفعت إيمان بصرها إلى أحمد وهى تفرك كلتا يداها ببعضهم البعض لتردف بنبرات مرتبكة
_بس الل بتطلبه دا صعب ي أحمد، صعب ودماغى مش قادرة تستوعبه
أطفأ احمد سيجارته وأردف وهو ينفث آخر دخانها
_مش صعب ولا حاجه ي إيمان، مش انتِ بتحبينى؟
أومأت إيمان برأسها ايجاباً ف أكمل هو وهو يمنع نفسه من الإلتفات يميناً ويساراً
_انا مخطط لكل حاجه والحكاية مش هتاخد وقت ولا هتنكشف، بس انتِ وافقى
_انا محامية وخايفه من ثغرة كدا ولا كدا يا أحمد
رفّ جفن إيمان عدة مرات ليلامس هو كف يدها بطريقه لا إراديه كى توافق وتخضع لرغبته مع قوله
_قولى بس انتِ أيوة، انا دارس كل حاجه كويس أوى
ظلّ يتلاعب ب أصابعها بحركان ناعمه ف نظرت هى إلى حركه يده وزمتت هى شفتيها وأومأت إيجاباً..
.. __________..
"الساعه الآن السابعه صباحاً"
إستيقظ مارسيلينو على صوت المنبه بهاتفه، اخذ يفرك بكلتا يديه عيناه وينظر بجانبه، لينزى ليست نائمه!
خطر بباله انها بالخارج حتماً تعد له وجبه الإفطار هو وأولادهم..
ترجل بكسل يجرّ رجليه جراً إلى الخارج، ولج إلى المرحاض وغسل وجهه وأسنانه وخرج يناديها
_لينزى، زوزووووه
بحث عنها بالشقه بالكامل ولم يجدها لا هى ولا أولادهم، مط شفته السفليه أن بالتأكيد هى بالخارج لموعد طبيب الاورام لإبنتهم ميلا، أو مثلاً تقوم بدفع إشتراك الانترنت، او بالنادى لأداء تمرين السباحه لإبنهم كاراس..
أراد أن ينهى نقاش عقله هذا، وقام بالإتصال بها ولكن هاتفها مغلق!
تنهد وجلس يحضر كوباً من النسكافيه ويحتسيه قبل موعد ذهابه إلى العمل، قذف هاتفه بلامبالاه مع قوله
_وأخيراً يوم أصحى من غير دوشه وقلق ويالينو لينوووو زى المعزة الزرايبي، أشرب النسكافيه بمزاج بقا
وأرن عالبت ميرال وندردش شويه قبل الشغل
هاااااح يا حليله يا ولاد
.. __________..
سيارة الترحيلات، تقوم بترحيل المسجونين إلى المحكمه حتى يتم محاكمتهم، وأثناء سيّرهم بالطريق حدثت مشادة بين إثنان من سائقى السيارة الأجرة والملاكى، حتى تطاول أحدهم على الآخر بالإعتداء بالضرب!
تجمهرت الناس حولهما، هناك من يفض العراك ومن يطلب الشرطه، وتعطلت سيارة الترحيلات ليخرج مجموعة من الملثمين يقومون ب إطلاق النار على العساكر والباب الحديدى الموصد وفجأة يخرج المسجونين ويفروّا ها ربين من السيارة ومن بينهم إسلام!
يفر هارباً إلى مكان لايعرفه احدا سواه هو وقاسم والسيدات التابعه لملذاته، وما ان يدلف إليه ليجد إحداهن فى إنتظاره مع قولها
_يا أهلاً ي إسلام بيه.. تخيل كل دا مستنياك!
ينظر لها إسلام فاغراً فاه مع عدم تفوهه بكلمه واحده.
.. _________..
فى هذه الاثناء..
كان قاسم ينعم بوقت جميل برفقة مريم وأولادها ب مدينه الالعاب _دريم بارك_ تعلوا ضحكاتهم مع كل مرة تعلوا بها اللعبه الكهربائية إلى السماء، ومنها إلى قطار المفاجئات وبيت الرعب ومع كل لعبة كانت تضحك مريم من قلبها ويبتسم قاسم إبتسامة عذبه كلما رآها تضحك.
جلسوا ليتناولوا طعام الغداء فى المطعم..
_أنا مبسوط أوى يا أونكل قاسم، حضرتك هتخرجنا كدا على طول
نظر قاسم نظرة مليئه بالحب ناحية مريم ليردف
_لو ماما وافقت طبعا هنخرج تانى ووتالت
إبتسمت مريم لتردف إلى إبنها
_عيب يا زين، مش عاوزين نتقل على اونكل ونتعبه
_ياريت كل التعب تعبكم يا مريم
قالها هائماً بعيناها، سابحاً بعسلهما لترتبك هى لأول مرة وتتصنع الإنشغال بتناول طعامها
فيهتف زين
_أونكل هو خلاص بابا مش هيرجع البيت تانى
بلل قاسم شفتيه وتلعثم فقام بمناولة زين قطعه من الدجاج المقلى مع قوله
_ينفع تخلص أكل عشان لسه فى ألعاب كتير هنلعبها
نظر إلى دينار ذات الستة اعوام ليهتف لها بحنان أب
_دودو كلى كويس عشان هجبلك غزل بنات كبيييييرة طولك
ضحكت الصغيرة وضحكت مريم ل يردف هو الى مريم بصوت خافض ملئ بالحنان
_مبسوطه يا مريم؟
_طول ماولادى مبسوطين أنا مبسوطه ياقاسم، كفاية أنك مستأذن من شغلك المهم عشان تخرجنا وتفسحنا
بجد كتر خيرك
_انا مبعملش واجب عليا يا مريم، انا بعمل كدا وانا مبسوط.. وانا حابب
حابب اشوفكم واكون وياكم
إرتبكت مريم أكثر إثر كلماته الأخيرة، فتصنعت الإنشغال ب إطعام صغيرتها، اما عنه فهو كان يتذوق طعامه هائماً فى تفاصيلها وكأنه إستفاق أخيراً على حقيقه واحده.. حقيقه كاد قلبه أن يخفيها طوال هذه السنوات
حقيقه يواجهها الآن وهى حبه لها لا محالة!
.. _________..
اليوم فى ضيافه حلقه من حلقات _بحبرهن السرى_كانت منال!
منال شقيقة القاتل طارق الحربي، ذاك الطالب الجامعى الذى قتل حبيبته وعد عبدالله لمجرد رفضها له، بدمٍ بارد ومع سبق الإصرار والترصد قام بطعنها بالسكين عده طعنات فى الشارع على مرأى ومسمع الناس والمارة!
_منال بتقولى أن طارق ساعد المجنى عليها وعد كتير طول سنين الكلية، إزاى
إحتست منال بعض الماء وقالت بتوتر
_طارق أخويا كان شاطر جداً، يعنى لولا موضوع التهتهه بتاعه دا كانت ثقته بنفسه هتكون أكبر من كدا
لكن بسبب التهتهه كان محط سخرية زمايله وزميلاته، محدش كان بيتعامل معاه إلا وعد
_القتيله!
أومأت منال ب رأسها لتكمل حديثها غير ناظرة إلى الكاميرا
_ايوة، وعد كانت بتخرج معاه وكانت بتحسسه انها بتحبه وكانت بتهتم بيه، وقصاد كدا كان طارق بيعملها المشروع بتاعها وبيذاكرلها اى حاجه تقف قصادها، يعنى أبحاث يعمل امتحانات ميد تيرم يبقى فضهرها
عادت قدس بظهرها لظهر المقعد وقالت بثقه
_يعنى كانت قصه حب متبادل
_طارق كان فاكر كدا، بس هى كانت بتضحك عليه لحد م تاخد غرضها
حكت قدس بذقنها وقالت لها
_إيه الل عرفك انها كانت بتضحك عليه
_طارق كلم باباها لخطوبة يعنى وهى رفضت مش باباها بحجه انه لسه مكونش نفسه
ومرة تانيه تقوله عشان موضوع التهتههه بتتكسف منه، كلام اهبل دمرت بيه نفسيه اخويا
شخصت قدس نظرها إلى ناظرى منال لتقول منقضه ك أنثى النمر
_أومال ليه اتحكم عليكِ بخمس سنين!؟
رفعت أنفها بكبرياء وقالت وهى تعقد ساعديها امام صدرها
_عشان انا الل حرضته يقتلها!
إتسعت حدقه عين قدس لتردف لها بنصف إبتسامة
_وبتقولى دا وانتِ مبسوطه جداً
_طبعاً، خدت بحق اخويا من الغشاشه الل خدعته سنين وكسرته ب إيديها
_إنتِ وديتِ أخوكِ لحبل المشنقه، انتِ مدركه انتِ عملتِ إيه
إلتفتت بعيداً عن الكاميرات وهتفت قائله
_مش مهم، المهم انه خد حقه منها وعشان تبقى عبرة لكل واحده تفكر تعمل زيها وتخدع زميل لها بحجه الحب وهى غشاشه وكدابه لأن البنات دى كترت أوى، غابت التربية والاهل فى غفله
زفرت قدس بحرارة لتردف
_مش عارفه اقولك إيه يامنال، انت مش حاسه بذنب وعد الل ماتت غدر ولا بذنب اخوكِ
ولاحتى بالسنين الل أخدتيها فالسجن وبقا عندك سابقه وانتِ لسه سنك صغير
هبطت دمعه من عين منال لتردف بصوت يختلجه البكاء
_دا أخويا!! كان أحن الناس عليا بعد وفاة ابويا.. انا عارفه انى مش هشوفه تانى وانه هيموت
بس مبسوطه انه خد حقه.. وان شاء الله نبقى نتقابل فالجنة!
مسحت قدس عبره هبطت من إحدى عيناها رغماً عنها ونظرت إلى الكاميرا مع قولها
_لهنا والحلقه انتهت.. نلتقِ فحلقة جايه.. سلام تصبحوا على خير
#نورإسماعيل
.. __________..
شخصٌ واحد، واحدٌ فقط صادِق يغنيكَ عن جميعِ الحُشودِ ليكُون حشدًا عظِيمًا في قلبك ..
أتدرك معنى أن يَبعث الله لكَ شخص يشبهكَ تمامًا، يشبه صفاءكَ ونقاءكَ ورِّقة قَلبِك، شخصٌ يُمكنه أن يُخرجكَ من ضيقكَ لكونه فقط يعلمُ ما الذي سيبعث فيكَ البسمَة مجددًا، أتدركَ معنى أن يكن لكَ من خبايَا القدرِ قدرٌ لطِيف بعد سنونٍ طالَ بكَ وبدعائكَ بطلبه، في حينِ كونكَ تظن أنَّك على هامِش الحياة يراكَ بعينيه الحياة بأجمَعِها، ينبتُ في جوفكَ زهورًا من سلام، حتى برغمِ كثرةِ منْ حوله إلا أنّه لا يَجِد ذاته ومُستقرّه وقرَاره إلا بجواركَ، ويسأل لكَ السلامة في كل حينٍ، حينها؛ حينَها فقط تيّقن أنَّ عوض الله قد أتاك لا مَحاله!
على الهاتف.. كانت مريم وقاسم يتحدثا بعدما عادا من نزهتهم، حتى الآن لم تعلم مريم عن ماحدث بشأن هرب إسلام ولا إختبائه فى مكان ملذاته السرى!
_تعرف إنى بقالى كتير مكنتش مبسوطه كدا، بجد شكراً ياقاسم
إرتاح قاسم إلى فراشه واخذ يمسح على شعره وهو يردف لها بحنان
_عارفه يا مريم.. قبل اليومين دى كنت حاسس انى إنسان ميت مجرد بيعيد يومه
كنت حاسس انى مش مهم لأى حد ولو حصلّى حاجه فشغلى محدش هيتأثر
_بعد الشر!
هتفت بها دون أدنى تفكير، ليبتسم هو إبتسامه فرح ويرقص قلبه طرباً لتتنحنح هى بقولها
_قصدى يعنى بعد الشر عنك، متقولش كدا انت عارف انت غالى علينا إزاى
أثناء مكالمتهم الهاتفيه ولج زين مهرولاً يردف الى والدته
_ماما الحقى جايبين صورة بابا فالتليفزيون
هرولت مريم وإنتبه قاسم على الناحية الاخرى، لتقرأ مريم خبر ما أقساه... تم هروب ضابط الشرطه اسلام صبحي وتم قتله ب منزله فى..... على يد سيدة!!
قرأت مريم الخبر ووقعت مغشى عليها، ليصرخ اطفالها ف يهتف قاسم عالناحية الاخرى
_مريم!!!!
.. __________..
إنتظروا الفصل القادم
#فى_طىّ_الكِتمان
#قتل_ناعم
#نورإسماعيل