- انتي ساكنه هنا ف المنطقه يا قمر؟
= قطعت تسبيحي وبصتلها، أفندم !!
- أصل انا أول مره أشوفك فَ بسأل انتي ساكنه هنا؟
= أبتسمتلها، اه ساكنه هنا
- غريبه ازاى مَعرفكيش انا عارفه كل اللي ف المنطقه
= اه ما انا مش باجي هنا
- أنتي ساكنه ف أنهي شارع
= ف شارع ......، اللي ع أوله سوبر ماركت .......
- ايوووووه عرفته وعندكو واحد ف الشارع حسن بخه
= ضحكت، ايوه عمو حسن صاحب بابا
- انتي ف أنهي بيت بقي
= انا تالت بيت ع اليمين
- عرفته انتي بنت كريم صح
= ايوه فعلاً
- بسم الله ما شاء الله كبرتي وبقيتي قمر 14 الواد أبوكي ده حبيبي احنا اكتر من الاخوات والله وكنا بنلعب مع بعض ف الشارع و أحنا صغيرين
= انا قاعده زي الهبله عماله اضحك و أهز راسي و خلاص
- و أمك صاحبتي بموت فيها والله و انا رضعتك كذا مره
= انا اتخضيت و بصيت حواليا بشوف حد سمعها ولا لا، ايه اللي حضرتك بتقوليه ده يا طنط امال ماما كانت بتعمل ايه
- هَحكيلك، أصل انا وقتها كنت لسه برضع أبني مروان وأمك كانت تعبانه و محجوزه ف المستشفي وانتي يا حبت عيني مَكُنتيش قابله الصناعي و كنتي بتصرخي من الجوع يا حبيبتي، فَ قولت لأبوكي هَرضعها أنا، وفضلت أسبوع أرضعك لحد ما أمك قامت بالسلامه وخرجت من المستشفي، هي عامله ايه صح الندله دي مَبقتش تسأل خالص
= الحمدلله بخير، هَقولها أن حضرتك سألتي عليها بس أقولها مين
- طنطك دولت يا حبيبتي
= هَوصلها سلامك يا طنط دولت حاضر
- طبطبت ع ضهري، أصيله وبنت أصول أبقي قولي لأبوكي هاجي ازوركو قريب عشان وحشتوني
= كحيت عشان كانت بتخبطت ع ضهري مش بتطبطب، حاضر حاضر يا طنط، و كملت باقي التراويح و خصلت و نزلت بلبس الجزمه بتاعتي، سمعت طنط دولت بتتكلم جنبي
- أمال فين أخوك يا حبيبي
_ صوت شتوي بيتكلم، مروان راح يجيب الزبادي
= انا خلصت وبصتلها وأبتسمت، عاوزه حاجه يا طنط
- عاوزاكي بخير يا روح طنط، أعرفك ع أبني الكبير اسر، دي إيمان بنت عمو كريم صاحب بابا يا اسر فاكرها اللي كنت برضعها و هي صغيره
= انا فضلت أكح من الأحراج وكنت بتمني الأرض تنشق وتبلعنى
- اسم الله عليكي يا حبيبتي شكلك اتحسدتي و انتي تبارك الرحمن كده فلقة قمر
= انا هديت و وشى كله بقي احمر من الكسوف، وابنها واقف كاتم الضحكه، لا انا بس شرقت وانا باخد نفسي بس مش أكتر طيب يا طنط هَروح انا بقي عشان اتأخرت
- ماشي يا حبيبتي خلي بالك من نفسك و سلميلي ع أبوكي و أمك
= حاضر يوصل، خدت بعضي و طيرت من قدامهم ع البيت فتحت الشقه ودخلت و وقفت سندت ع الباب اخد نفسي
* مالك يا إيمان وشك أصفر كده ليه وبتنهجي
= بس الله الرحمن الرحيم ف ايه يا ماما حد يخض حد كده
* اسم الله عليكي من الخضه يا روح امك مالك بقي هو حد كان بيجري وراكي ولا ايه
= مسكت أيديها ودخلنا أوضتي وقعدنا ع السرير، اسكوووتي يا ماماااا ع اللي حصل
* ايه اللي حصل يا حبيبتي
= وانا ف المسجد لَقيت واحده ست بتسألني انتي ساكنه ف المنطقه وفضلت تستفسر وطلعت عارفاكي أنتي و بابا
* و دي مين دي
= أسمها اييييه أسمهااااا ايييييه ااااااه طنط دولت
* اااااه دولت دي كانت جارتنا من زمان وعزلت من الشارع و راحت شارع تاني قريب هنا
= بس انا زعلانه منك يا ماما ازااااي تخلي واحده تانيه ترضعني
* ماما فضلت تضحك، هي حكتلك
= دي طلعت فضحاني ف العيله كلها يا ماما لن أنسي لكي هذا الموقف
* الله يابت ما انا وقتها كنت تعبانه ومَينفعش أرضعك وانتي مَكُنتيش بتحبي اللبن الصناعي ومن حظك هي كانت معانا وأبنها التاني عنده 9 شهور فَ قالت لأبوكي هاتها، الست كانت بتعمل خير يعني
= طب انا ذنبي ايه انها تفكر أبنها الكبير بيا و أبقي واقفه هَموت من الأحراج
* ضحكت جامد، الله مَفيهاش حاجه يا إيمان ما اسر كان بيشيلك بعد ما تاكلي وبتقشطي عليه
= انا برقت من الصدمه😳، يا لهوي يا ماما يعني مش كفايه أمه كانت بترضعني لا وكمان بقشط عليه عشان كده الواد كان هَيموت و يضحك بس مَحبش يحرجني أكتر، يا فضحتك يا دودي برستيجي باظ قدامه خلاص
* ماما لسه عماله تضحك عليا، يخربيت فقرك يا إيمان يا حبيبتي انتي أصلا كنتي متعلقه ب اسر جدا و مَكانش بيحلالك النوم غير ف حضنه و هو شايلك
= انا فتحت عيني ع الأخر تاني😳😳، كماااااااان يعني أمه ترضعني وبعدين أقشط عليه وبعدين مَنامش غير لما هو يشيلني يااااختاااااااااي ع برستيجي اللي بقي ف الارض، أصدميني كمان يا ماما كنت بعمل ايه تاني
* بس هو فضلتي ع الحال ده لحد ما كملتي سنه وبعدين هما عزلو و الحياه أخدتنا من بعض بس بنسأل ع بعض كل فتره كده لحد دلوقتي، بس انا بقالي كتير مَكلمتهاش بصراحه
= هي بتسلم عليكو وبتقول هَتزورنا قريب
* الله يسلمها ست أصيله والله، طيب تعالي بقي نتفرج ع المسلسلات
= ماشي
بعد أسبوعين ......
= كنت قاعده مع صاحبتي قدام البيت بنفرقع صواريخ و شوفت طنط دولت بتقرب قُمت وقفت
- شدتني وحضنتني، أزيك يا حبيبتي فاكراني
= اه طبعا أزي حضرتك يا طنط دولت
- طالما شوفت وشك الجميل ده بقيت بخير يا حبيبتي
= الله يخليكي يا طنط
- أبوكي و أمك فوق
= اه أتفضلي، طلعنا وخبطت و ماما فتحت
* دولت ازيك يا حبيبتي وحشاني جدااااا، وفضلو يحضنو ويبوسو ف بعض وبعدين دخلو أوضة الضيوف
= لسه هلف و أنزل لصاحبتي تاني لَقتني بتشد من قفايا
* أنتي يابت أنزلي هاتي حاجه سقعه و تعالي ع طول عشان تقعدي مع طنطك دولت
= حااااضر يا ماما بس ف ايه أنتي ماسكه حرامي
* أنجزي وبطلي لماضه
= حاااضرررر حااااااضرر، نزلت وخدت صاحبتي و روحنا جبنا الحاجه الساقعه و أحنا راجعين حد خبطني من ضهري و زجاجة الحاجه الساقعه وقعت فرقعت، هاااااااااار أسووووووح، مش تفتح يا بهيم يا أعمي أنت ايييييه صاروخ معدي وبيشيل أي حد قدامه
_ الشخص وقف و لف رجعلي، انا بعتذر والله معلش مستعجل و ..........، أنسه إيمان !! انا أسف قسم بالله ما كنت أقصد حقك عليا
= انا أستغربت، هو حضرتك تعرفني
_ حط أيده ورا رقبته بإحراج، احمم انا اسر من أسبوعين ماما كانت بتصلي معاكي التراويح ......
= افتكرته وبقول جوايا يا ليله زرقا انت طلعت أبن دولت ايه ياربي الأحراج ده من أسبوعين كان شايفني بتكسف وكيوت ودلوقتي كنت هَبلعه عشان زجاجة الحاجه الساقعه انا برستيجي أتهان خاالص مع العيله دي
_ أنسه إيمان أنتي كويسه
= كويسه ازاى وانا كل شويه كرامتي تسيح ع الأرض بسببكو
_ أفندم ؟!!
=اااااا .. انا تمام متقلقش انا اللي أسفه ع اللي حصل مني يا أستاذ اسر
_ لا ده انا اللي أسف ع البهدله دي والله، لحظه و راجع، دخل السوبر ماركت
▪︎ف حد يعمل ف القمر ده كده، أنتي ع طول بتحدفي دبش كده حرام عليكي
= كنتي هتعملي ايه يعني لما واحد يزوقك ويوقع منك الحاجه الساقعه الاتنين لتر وتفرقع و تدلق ف الشارع
▪︎كنت نزلته يلحسها من ع الأرض بس لو لَقيته عسول كده هَقوله حصل خير و أجيب واحده تانيه
= أهو اللي حصل بقي وبعدين ما تلمي نفسك، و كمان انا مَعرفش انه أبن الست اللي كنت بسلم عليها من شويه
▪︎ ايه ده بجد لا ده انا هطلع معاكي بقي وأقعد عشان أشوفه
= ايه يا بت التلزيق ده، أظبطي نفسك وأتلمي بقي عشان جاي
_ أتفضلي واحده تانيه أهيه بدل اللي وقعتها وبعتذرلك تاني مره يا جميل
= ليه الأحراج ده بس يا أستاذ اسر مكانش له لزوم والله انا كنت هجيب واحده تانيه
_ لا والله ابداً دي غلطتي يبقي لازم أصلحها
= ماشي يا أستاذ اسر شكراً، مامت حضرتك عندنا
_ ايوه ما هي كلمتني وانا ف الشغل وقالتلي تعالي ع هناك، و انا لسه مخلص شغل أهو و رايحلها يلا بينا نروح بقي
= اه يلا، رجعنا و صاحبتي كانت عاوزه تطلع معانا بس انا رفضت و قولتلها لما يمشو هَكلمك، طلعنا و ماما فتحتلنا
* ايه اللي أخرك يا هانم، خدت بالها من اللي واقف ورايا، اسر حبيبي تعالي ادخل، دخلو وانا روحت المطبخ حطيت الحاجه الساقعه ف الكوبايات و خرجتلهم و حطيت الصنيه ع الترابيزه قدامهم وأديت لكل واحد كوبايته
- عقبال ما اشرب شربات فرحك يا حبيبتي
= ربنا يخليكي يا طنط
* ماما بصت لاسر، وبتشتغل ايه بقي يا اسر
_ منظم حفلات و مؤتمرات
* ما شاء الله ربنا يوفقك يا حبيبي و خطبت ولا لسه
_ ل ........
- هَيخطب قريب يا أميره ياختي، وجهت نظرها ليا و أبتسامتها من الودن للودن
* والله الف الف مبروك ياحبيبتي، من العيله بقي ولا من الشغل
_ اسر قاعد باصص لمامته بعدم فهم وأستغراب
- لا جيران يا حبيبتي، بصتلي تاني بنفس الأبتسامه الواسعه
* والله طب كويس ربنا يتممله ع خير، الولاد كبرو وكبرونا معاهم يا دولت
- ضحكت جامد، لا طالما لسه مَتجوزوش و جابولنا عيال يبقي أحنا لسه صغيرين
* ماما ضحكت معاها، ربنا يفرحنا بيهم ياختي و نشيل عيالهم قبل ما نموت
= انا و اسر ف نفس واحد، بعيد الشر عنكم، أمي و أمه فضلو يضحكو، و انا وهو أتوترنا
- أمال أبو إيمان بيجي أمتي من الشغل
* زمانه جاي حالاً يا حبيبتي
- اه والنبي لاحسن عاوزه أسلم عليه قبل ما أمشي
* تمشي فين لا أنتو هَتتسحرو معانا
- لا والله ما ينفع خليها مره تانيه
• بابا دخل، السلام عليكم
كلنا ف نفس واحد، عليكم السلام ورحمة الله وبركاته
- أزيك يابو إيمان عاش من شافك يا راجل
• سامحيني يا أم اسر عارف أني مقصر والله
- بدأت تعيط، خلاص يا اخويا ما اللي كنت بتسأل علينا عشانه راح وسابنا لوحدنا و محدش بقي يعبرنا
* صلي ع النبي يا أم اسر ربنا يباركلك ف اسر ومروان يارب
_ اسر مسك أيد أمه وبيهزر معاها، خلاص بقي يا أمي يعني أحنا جايين عند الناس ف الأيام المفترجه دي عشان ننكد عليهم، أهدي بقي يا ست الكل
- انا أسفه يا جماعه والله غصب عني بس أفتكرت لمتنا زمان مع بعض
= انا من جوايا بقول، يارب ما تجيب سيرة انها كانت بترضعني تاني
- معلش يا إيمان يا حبيبتي أعمليلي كوباية شاي من أيديكي الحلوه دي
= حاضر يا طنط من عنيا
- تسلملي عنيكي يا غاليه يا بنت الغالي
= أبتسمتلها، وقُمت دخلت المطبخ و أتنفست بعمق، الحمدلله أنها مَتكلمتش عن حاجه انا ربنا نصرني، وبدأت أعمل الشاي، خلصت وخارجه بيه ملقتهمش، هما راحو فين يا مامااااا
* لَقيت ماما جايه عليا و ع وشها أبتسامه واسعه و لسه هتحضني
= الشاااي يا حجه هَيسلخنا
* خدت الشاي من أيدي وأدته لبابا، خد يابو إيمان أشربه بمناسبة الخبر الحلو ده
= انا أبتسمت ببلاهه، خبر ايه يا ماما فرحيني معاكو
* حضنتني، مبروك يا روحي كبرتي و بقيتي عروسه، ومسحت دمعه من عنيها
= لا يا شيخه أنتي لسه واخده بالك دلوقتي
• بابا فضل يضحك
* مسكتني من وداني، ما هي لماضتك دي اللي هَتوديكي ف داهيه، أقصد يا جزمه انك هَتتجوزي يعني
= انا شَهقت جامد، انا هَتجوز لييييه يا ماما انا عملتلكو ايه بس
* ماما بأستغراب، عملتلنا ايه !! هو ايه اللي عملتلنا ايه ما طبيعي أنك لازم تتجوزي
= أتكلمت بنرفزه زي الأطفال، لا يا ماما مش عاوزه اتجوز دلوقتي انا لسه صغننه
* أمي هنا فقدت أعصابها😂، ناااااااااعم صغننه مين يا روح أمك ما أنتي ما شاء الله شحطه كبيره أهو، بت أحنا خلاص وافقنا و هَيجي بعد أسبوعين يقرأ فاتحه، قبل ما انا أقراها عليكي دلوقتي
• وهنا بابا كان لازم يتدخل قبل ما تخنقني😂، باااااس براحه يا أميره يا حبيبتي مش كده بنتنا شاطره و هَتسمع الكلام، ماما قصدها يا حبيبتي أنهم هَيجو عشان تتعرفو ع بعض كويس و لو أرتاحتي و وافقتي بأذن الله هنقرأ فاتحه
= و مين ده بقي أن شاء الله
* اسر أبن طنطك دولت
= انا فتحت عنيا ع الأخر 😳، ناااااعم أسر اللي كنت بقشط عليه و انا صغيره وبنام لما يشيلني
* ماما أنشكحت اوى، ايووون
= مش موافقه
* مش موافقه لا ده أنتي عاوزه تتربي من الأول بقي، و قلعت الشبشب و لسه هَتحدفني بيه
= خلاص خلااااااااص حاضر هَقعد معاه الأول وبعدين أقرر
* أمي بنرفزه، بت أنتي مفيش هَقرر دي و أنتي هتلاقي زي اسر فين أدب و أخلاق و طيبه و حنيه و دم خفيف و مال و جمال، عاوزه ايه تاني أنتي
• خلاااااص يا أميره البنت قالتلك هَتقعد معاه وبأذن الله يحصل قبول و نصيب
* ماما بصتلي ب شر، عارفه لو مكانش أبوكي موجود كنت عملتك بوفتيك، تلاشيني بقي الفتره دي خالص لحد ما الناس تيجي وتمشي
بعد أسبوعين ....، طنط دولت جت هي و اسر و مروان اللي يعتبر أخويا ف الرضاعه، كان يوم منيل لما طفحتني طنط دولت
• طيب يا ولاد اطلعوا ف البلكونه الجو حلو هناك
* ماما ميلت ع وداني، خليكي رقيقه وأتكلمي عدل مع الواد وبصوت واطي و بأسلوب حلو عشان مامسحش بيكي سيراميك الشقه
= ايه يا ستي العنف ده حااااضرررر هَعمل كل اللي قولتيه تحبي ابوسهولك من بوقه كمان
* أمي ضحكت، لو عرفتي تعملي كده ياريت عشان الواد يطلب يتجوزك بسرعه و أخلص منك قصدي و أفرح بيكي
= قد ايه انتي أم عظيمه 🥺 مَشوفتش أم بتحرض بنتها ع الرزيله عشان توقع العريس قبل كده
* شوفتي أمك بتحبك ازاى، يلا ياختي أتفضلي
= حاضر يا ست الكل، قولتله اتفضل، و دخلنا البلكونه، و وقفت أتفرج ع الشارع و الناس و سرحت ونسيته
_ أحم، طيب تحبي أسيبك مع نفسك شويه
= ايه ده انت لسه هنا
_ نعم ؟!!
= ااااا ..اانا سرحت بس معلش، بصراحه انا مش عارفه أقول ايه وأتكلم ف ايه فَ لو حضرتك عاوز تقول حاجه أتفضل
_ اولاً بلاش حضرتك و أستاذ دي قوليلي اسر عادي انا مش الدكتور بتاعك ف الجامعه
= ازاي بس مش هَعرف و حضرتك أكبر مني يعني
_ مَتحسسنيش أني عجوز يا إيمان ده كلهم 6 سنين بس مش أكتر، ده أول طلب أطلبه منك هَتكسفيني
= حاضر، لا طبعاً مَقدرش أكسفك
_ أممممم شطورة مُريحه وبتسمعي الكلام، يبقي هَتقوليلي ايه؟!
= ليه حاسه أنك بتتعامل معايا ع أني طفله
_ لا طلعتي لمضه، طيب ما أنتي بالنسبه ليا طفله او بمعني أصح طفلتي، وبصلي ف عنيا جامد
= انا أتكسفت و وشي أحمر جامد
_ اللي يشوفك مكسوفه دلوقتي مايشوفكيش من فتره لما كنتي هتاكليني بسبب الحاجه الساقعه
= أتكسفت، ده أنت قلبك أسود اوي
_ ضحك، طنط و ماما حَكولك ع اللي كنتي بتعمليه معايا و أنتي صغيره
= يارب الأرض تنشق وتبلعني يارب عشان أخلص من الأحراج ده بقي، طيب يا اسر أنت بتشتغل ايه بقي
_ فضل يضحك، بتغيري الموضوع هااااه، خلاص مش هَحرجك أكتر من كده، يا ستي انا منظم مؤتمرات و حفلات تبع شركة ......
= اهااااا ربنا يوفقك يارب
_ أعترفلك بحاجه
= خير
_ انا بحبك من و أنتي صغيره ع فكره
= 😳😳
_ اه والله و ببقي معاكي ف اي مكان بتروحيه، بس أنتي طبعا لما بتلمحيني مش بتعرفيني، نسيتي، أستنيتك لما بقيتي بِكر رشيد كده و قولت لأمي أني عاوز أتجوزك
= انا بقت بكر رشيد يا اسر من أولها بتشبهني برجاله، بس خلاص انا هدخل اقولهم انك بتشبهني برجاله و مش عجباك
_ 😳، أنتي بتقولي ايه يا إيمان، بِكر رشيد يا ماما يعني أقصد كبيره و عاقله، بس خلاص رجعت ف كلامي لا باين عليكي أنك كبيره ولا عاقله أنتي طفله فعلا
= كفايه غلط لحد كده يا أستاذ اسر و خلاص طلبك مرفوض مع السلامه يلا، سَبته و جيت أخرج
_ يابنتي أستني مَتتعبنيش معاكي
= سيب أيدي بعد أذنك
_ حاضر بس أستني لسه مخلصتش كلامي
= أفندم أتفضل
_ انا أسف مش قصدي اللي فهمتيه
= ولما مش قصدك بتعتذر ليه
_ عشان مَحبش أشوف طفلتي زعلانه
= انا أتكسفت و بقول جوايا وبعدين بقي معاه بدأ يخطف قلبي و كده مش كويس خالص
_ يا خراشي عليك و أنت مكسوف كده وشبه الفراولايا، ومسك خدودي الاتنين وبيهز وشي يمين وشمال
= انا شايفاك خدت عليا اوى
_ قولتلك طفلتي يابنتي ده أنتي كنتي بتخدليلي دراعاتي عشان تنامي و مش بس كده لا ده لازم افضل رايح جاي بيكي ولازم أفضل أتكلم معاكي مع أنك مَكنتيش فهماني بس كنتي بتحبي تنامي ع صوتي، كان ف جمله بَقولهالك كانت بتفرحك اووووي وتفضلي تضحكي
= لا خلاص انا مَبقتش أتصدم أشجيني كنت بتقول ايه
_ كنت بفضل أقولك هتجوزك لما تكبري اول ما تسمعيها تفضلي تسخسخي من الضحك وتتعلقي ف رقبتي أكتر
= بس ده ما يدُلش ع حاجه اي طفل ف سني هتقوله اي كله هيضحك و يفرح حتي لو قولتله هَرميك من البلكونه هو كده كده مش فاهم و فاكرك بتلعب معاه وهَيضحك عادي
_ لا لا أنتي مش فهماني انا لما كنت بتكلم معاكي بتبقي عادي بصالي ببراءة الأطفال وبس أنما لما كنت بقولك الجمله دي بالذات كنتي بتتبسطي اوي، وبعدين أنتي بتجادلي ف ايه انا اللي كنت شايفك وحاسس بيكي و فاهمك
= خلاص يا سيدي مَتزعلش نفسك، بس عموما الكلام ده حصل و انا صغيره اوى يعني دلوقتي مش فاكره حاجه و مش فاكراك أصلاً
_ عارف انا عاوزك تديني فرصه أعرفك ع نفسي من أول و جديد و أخليكي تحبيني زي ما كنتي بتحبيني و أنتي صغيره
= يا الله ع الأحراج اللي كل شويه يحطني ف
_ هاااا يا ايمو قولتي ايه، ياستي ولو مَرتحتيش ننهي الموضوع بهدوء و مش هَجبرك ع حاجه
= ان شاء الله اللي ف الخير يقدمه ربنا
_ يعني أعتبر دي موافقه
= قولت اللي ف الخير يقدمه ربنا
_ تمام خلاص لو عاوزه فتره تفكري براحتك مش هضغط عليكي يلا ندخلهم، دخل هو وانا شاورت لبابا من بعيد
• عن أذنكو دقيقه، خرج، ها يا حبيبتي قررتي ايه
= بصيت ف الارض بكسوف، موافقه
• بابا رفع وشي بأيده، عن أقتناع و من قلبك ولا عشان ترضي ماما بس
= لا عن أقتناع
• بابا فرح، بجد يا قلب بابا
= أبتسمتله بحب وهزتله راسي، ايوه بجد
• حضني، ربنا يسعدك ياحبيبتي و يتمملك ع خير، دخلنا وقعدت جنب ماما
* ماما ميلت عليا، عملتي ايه يابنت الموكوسه
= كل خير يا ماما عيب عليكي
* طب قررتي ايه فرحي قلبي
= م.......
• طيب يا جماعه نقرأ الفاتحه وبعدين نتكلم
كلنا قرينا الفاتحه وبعدها طنط دولت وماما زغرطو و حضنوني وباركولي و اسر كان باصصلي بفرحه وحب و حرك شفايفه بهمس وقالي، شكراً
فاضل أسبوع ع فرحنا....
= كنت قاعده ع السرير بالليل لَقيت الفون بيرن ببص لَقيت أسر حبيبي، اه فضلنا سنه مخطوبين وقدر يخليني أحبه ف الفتره دي، الوووو.....
_ الووووو
= بابا فين
_ بابا هنا، هنا أهو ومش مصدق ان فاضل أسبوع وخلاص هترجعي تنامي ف حضنه
= الله ما تتلم يا عم انت
_ خلاص يا وحش انا أسف، نمتي ولا لسه
= فردت ضهري ع السرير و غصب عني أتكلمت ب رقه شويه، لا لسه
_ الله طب ما أنتي حلوه و بتعرفي تبقي رقيقه امال ليه بتخضيني وبتتكلمي زي عم عبده معايا
= احم لا انا بتكلم عادي لا رقيقه ولا زي عم عبدو
_ لاااا انا عارفك كويس أنتي أصلاً رقيقه بس معايا بتتقمصي دور عبد الغفور البرعي مش عارف ليه مع أني خطيبك والله و نفسي تحني عليا بكلمه بدل ما أنتي منشفه ريقي من أول ما أتخطبنا
= أشرب ميه و هَتبللك ريقك يا عسل
_ ياااااا دمك الخفيف ماشي يا إيمان لما نشوف أخرتها معاكي
= أنت عارف أني مش بعرف أقول كلام حلو
_ لا بتعرفي بس شكلي انا اللي فشلت أخليكي تحبيني، بس عندي سؤال ليه مخليانا مستمرين مع بعض و هَندخل ع جواز ليه إيمان ف حد غصبك ع الجواز صح وقلبي بيقولي انه طنط هي اللي ضغطت عليكي
= انا أتضايقت و أتكلمت بسرعه، لا والله العظيم ما حد غصبني ع حاجه انا بحبك وهَتجوزك بأرادتي
_ أنتي ايه مَسمعتش
= بحبك و هَتجوزك بأرادتي
_ يا فرج الله اخيرااااااً نطقتي يعني كان لازم تطلعي روحي و أعمل كده عشان تتكلمي
= انا تداركت الموقف، سلام يا اسر، و قفلت ع طول، حطيت أيدي ع وشي من الكسوف، أنتي عبيطه يا إيمان وكسوفك ده هَيعملك مشاكل، لَقيته بيتصل فتحت و سكت
_ يابنتي بموت فيكي أقسم بالله ونفسي أسمعها منك
= ما انت عارف اني برضو بحبك بس انا بتكسف و بتوتر ومش بعرف أتكلم وبلاقي نفسي بحدف دبش ع طول بس مش ببقي أقصد
_ عارف يا أخرة صبري و دي أكتر حاجه عجباني فيكي براءتك وتلقائيتك و خجلك، كفايه عليا ياستي أني بشوف حبك ليا ف عنيكي وتصرفاتك ، ولو ع الكلام سهل هَعرف أطلعه منك بعد ما نتجوز
= أتكسفت كالعاده و هَغير الموضوع، أحم أنت هتنام ولا سهران
_ ضحك، لا يا حبيبتي هنام بس قولت اسمع صوتك الأول، و أنتي نامي مَتسهريش أكتر من كده عشان بعدين انا هَسهرك
= معروفه طبعاً أتكسفت للمره المليون وأتكلمت بنرفزه زي الأطفال، والله أنت رخم وانا مش هَرد عليك
_ فضل يضحك جامد، بحبك تصبحي ع خير يا طفلتي، قفل
= بعد ما قفل انا بوست الفون، هييييييييح و أنت من أهلي يا روح طفلتك
عملنا الفرح و أتجوزنا، و طلعت صلاة التراويح بتجيب عرسان فعلاً .
بس خلينا متأكدين أن لو ربنا مش كاتبلنا ده مش هَيحصل حتي ف صلاة العيد .
"لَعلّنا من بَعدِ بُعدٍ نَلتقي"
*تمت*
*بقلمي/ إيمان أحمد*