ومِتى أشوفك يا غايب عن عيني..
قتاله الفُرقه والله وبَعادك عن عيني..
_ مش هَيجي
= عندي أمل ف ربنا
_ هَتستنيه؟!
= ايوه
_ لأمتى؟!
= لحد ما ربنا يشاء ويجمعنا 💜
_ أتمني
= لا ما انا مستلماه أدعيه طول شهر رمضان ف كل صلاه و تراويح و قيام ليل و فجر فَ مش هايعرف يهرب مني
_ ههههههههه فصلتيني يخربيت فقرك، ربنا يجمعك بيه قريب
= يلا هَروح انام شويه قبل الفجر تصبحي ع خير يا صديقتي
_ وانتي من أهل الخير يا قمر هَبقى آرن عليكي أصحيكي، تصبحي ع خير
الفون بيرن ...
= رديت بنُعاس وبتتاوب، الووو ....
_ أصحي يا أختاه الفجر قرب يأذن
= حاضر صحيت آهو و هَقوم أتوضي، سلام، قُمت أتوضيت وبعدها الفجر أذن صليت وبعدها قرأت قرءان وقعدت أدعي و طبعاً هى دعوه واحده بس اللى ع لساني، يا جامع الناس ليوم لا ريب فيه أجمع بيني و بين يحييَ ف حلالك عاجلاً وليس أجلاً، أميييييين، قعدت ع المكتب وقولت اكتب شويه، النهارده اخر يوم رمضان و بُكرا العيد. بدأت اكتب ...
كل عام و أنت عيدي يا رفيق الروح..
أشتقت لك كثيراً..
متى ستأتي إلي..
أحتاجك، أُريد أن أراك..
أتمني من الله أن يجمعني بك قريباً يا رفيق رُوحي..
سبت القلم وقفلت الدفتر ورجعت نمت ع السرير و أنا قلبي مليان حزن و بفكر ف اليوم اللى ربنا هَيحققلي أمنيتي ويجمعني بيه ونمت
_ ما تصحي بقي يا إيمان ف حد ينام أول يوم العيد للعصر
= ايوه أقوم أعمل آيه يعني
_ تقومي تعملي آيه !! قومي نخرج ونفرقع بُمب وصواريخ ونتصور بِلبسنا الجديد وناكل ترمس وبسكويت وبتي فور وكحك
= أعتبريني عملت كل ده وسبيني أكمل نوم
_ آيه يا نيله الكئابه اللى أنتي فيها دى، بس انا عرفت هَقومك آزاى، راحت عند التلاجه وفتحت الفريزر وطلعت ميه بتلج و جايه ناحيتي
= أنا بصيت عليها بجنب عيني وشوفتها رُحت قُمت نطيت من ع السرير، اااييي..ااييييه ده يا فاطمه يا حبيبتي هدى نفسك انا صحيت اهو وهَلبس ونخرج ونتصور وناكل ونفرقع صواريخ زي ما أنتي عاوزه بس رجعي الميه دى مكانها و أهدى كده
_ وه ما كان من الأول طيب من غير وجع قلب ناس مابتجيش غير بالعين الحمرا، انجزي قدامك نص ساعه تكوني جاهزه فاهمه
= ح....حاااضر يا حبيبتى هَدخل أخد شاور بسرعه أهو وهَلبس ع طول، عملت نفسى داخله الحمام عشان تخرج وخرجت فعلاً و أنا رجعت تاني قعدت ع السرير، أسفوخس عليكي يا فاطمه الكلب منك للى كلت دراع جوزها، ومسكت الفون أشوف لو ف رسايل منه بس كالعاده ظني خاب لسه الواتس مقفول رميت الفون بعصبيه ع السرير وعيطت غصب عنى ودخلت الحمام أخد شاور و طلعت لبست و خرجت لفاطمه
_ ايوه بقى القمر ست البنات فرفش كده يا ببلاوي
= إبتسمتلها إبتسامه صفرا ومن جوايا نفسي أمسكها أعصُرها كده، بس ده مايمنعش إني بحبها وهى ف مقام أختي و أكتر وإنها سندي ومُنقذتي الوحيده
_ مع إن الابتسامه دى مش من قلبك بس ما علينا هَفرفشك برضو يلا بينا ناخد صوره قبل ما نخرج
= إتصورنا وخرجنا وفرفشنا ولعبنا، العيد خلص 🥺..
ف يوم كان عندي إجتماع ف المعرض بتاعي، اليوم مكانش لطيف من أولهُ و كله طاقه سلبيه وأنا عماله أتعصب ع حاجات تافهه وبزعق ف الموظفين من غير سبب مقنع
_ إيمان إهدى عشان خاطري و روحي انتي خدي شاور سخن كده و ريحي نفسك و نامي و أنا هكمل
= أنا برضو بقول كده لأني فقدت أعصابي خالص، مش عارفه ليه بيحصل معايا كده يا فاطمه
_ معلش يا حبيبتي متضايقيش نفسك أنتي بس عشان مش نايمه من إمبارح فَ مودك مش لطيف روحي نامي وهَتبقي زي الفل يلا
= حاضر، خرجت من المعرض بس حسيت إني مش عاوزه أروح البيت عاوزه أقعد ع البحر شويه وفعلاً عملت كده قعده وخدت نفس عميق ومَليت رِئتي بالهوا الحلو بتاع البحر بعدها حسيت إني مخنوقه و عاوزه أعيط
إديت الفرصه لدموعي اللى حبسها من الصبح تنزل براحتها و إتكلمت وأنا بعيط و ماسكه طوبه صغننه بشخبط بيها ع الصخره اللى قاعده عليها، شايف كل اللى انا فيه ده بسببك
قولتلي هسافر سنه واحده اظبط شغلي وبعدها أجيلك وتبقي ملكي للأبد عدا سنه وبعدها أختفيت أرقامك أتقفلت و إيميلاتك برضو أتقفلت وأصحابك مَيعرفوش عنك حاجه، خذلتني وكسرتني وسِبت روحي وقلبي بينزفو، زعقت بكل قوتي، عملت فيااااااااااا كده ليييييييييييييييه ....
- إيمان .....
= سكت للحظه ومسحت دموعي وبصيت ورايا.......، فقدت وَعيي
_ مش معقول يا إيمان انتي تخصص نوم ف الأعياد بس يابنتي اصحي بقينا الضهر فاتتك صلاه العيد و فاتك الذبح آيييييييه بقي ناويه تصحي بعد العيد
= فتحت عيني بالعافيه شوفت نور الشمس قوي غمضت عيني تاني وقولتلها بنرفزه، أعملي الستاره ع الزفت الشباك
_ لا لما تصحي الأول
= مش هتزفت وسِبيني ف حالي بقي
_ كده طيييييب أنتي اللى جبتيه لنفسك، قامت وفتحت الفريزر وطلعت الميه المتلجه تاني و جايه ناحيتي
= شوفتها وقُمت قعدت ع السرير بنرفزه وإتكلمت بعصبيه شديده لأول مره مع فاطمه، أنتي آييييه مَبتفهميش قولتلك سِبيني ف حالي وأطلعي براااااااا
_ فضلت بصالي شويه و ساكته
= أنا أدركت اللي عملته وعيوني دمعو ولسه هَعتذرلها لَقيتها كملت مَشي ناحيتي
_ لا يا حبيبتي الشويتين دول أعمليهم ع حد تاني مش عليا أنا
= مسكت إيديها بالشفشق قبل ما تفضيه عليا، خلاص خلاص أنا أسفه والله قايمه أهوووو خلاص
_ يعني لازم توجعي قلبي كل مره معاكي فيها آيه لما تسمعي الكلام ع طول من غير لماضه ورخامه
= عندك حق أنا أستاهل ضرب الجزمه والله مَتزعليش مني مش قصدي حقك عليا
_ خلاص عفوت عنك قومي يلا خدي شاور وأنا هَحضر الفطار
= و أنا قايمه و ماشيه افتكرت حاجه فَ رجعت تاني لفاطمه بسرعه، فاطمه فاااطمه أستني
_ امممم خير
= هو آيه اللى حصل أخر مره لما كنت ع البحر
_ فاطمه اتوترت شويه، اااا.... أخر مره كنتي ع البحر من يومين اه واحد من الموظفين شافك وأنتي فاقده الوعي وقالنا ولحقناكي ع طول وخدناكي ع المستشفي وعلقولك محاليل كان عندك إرهاق شديد و ضغطك كان واطي جداااااً
وفضلتي محجوزه لحد ما ظبطوكي وظبطولك الضغط وبقيتي كويسه والدكتور كتبلك ع خروج النهارده الفجر و جبتك هنا بقي وسَبتك ترتاحي بس لما لَقيت اليوم هَيضيع علينا قولت مَبدهاش بقي لازم تصحي وبس
= قولت بصوت مرعوش، أنااااا شوفته
_ قالت بتوتر، ش...شوفتي مين
= يحييَ أنا شوفت يحييَ يا فاطمه قبل ما أفقد وَعيي
_ لا طبعا أنتي كنتي تعبانه ومش مركزه وقتها أكيد كان بيتهيئلك
= لا مش بيتهيئلي أنا متأكده أني شوفته زي ما أنا شايفاكي كده وبعدين أنتي بتتكلمي بثقه ليه كده كأنك كنتي معايا مثلا
_ لا يا إيمان مكنتش معاكي بس لو كلامك حقيقي هو فين دلوقتى مَودكيش المستشفي ع طول ليه طيب مجاش اطمن عليكي ليه مَتصلش بيكي ليه
= بقيت مشوشه حسيت الدنيا بتلف بيا ومسكت دماغي من الوجع، فاطمه سندتني بسرعه وقعدتني ع السرير
_ يا إيمان بالله عليكي إهدي ومَتتعبيش نفسك أكتر و أنسيه بقي الأنسان ده
= حاضر مَتقلقيش أنا كويسه روحي أنتي جهزي الفطار عشان جعانه و أنا دقيقه كده وهَقوم أغسل وشي
_ متأكده ؟!
= ايوه يلا قومي بقي بقولك جعانه
_ حاضر
= بعد ما خرجت انا بدأت أعيط، معقوله كان بيتهيئلي فعلاً يعني هو مجاش أصلاً للدرجه دي، ايه اللي مخليني لسه بفكر فيه وبحبه لدرجة أني بتخيله بعد سنه ونص من غيابه مش عارفه أبطل أحبه لييييه، مسحت دموعي وقومت أتسندت ع الحيطه لحد ما دخلت الحمام غسلت وشي وطلعت
_ يلا يا ست البنات الفطار جهز
= حاضر، طلعت فطرت وبعدها خَدتني و وقفنا ف البلكونه وفضلنا نفرقع صواريخ و نلعب مع العيال ولما خلصنا دخلنا وأتفرجنا ع التليفزيون ع مسرحية العيال كبرت و أحنا بناكل لب و كحك ....
تالت يوم العيد ...
= قاعده ع البحر ومستمتعه بالهوا وهو بيلعب ف شعري وبيطيره
_ ايمو تعالي نرجع البيت يلا بسرعه
= ليه يا فاطمه
_ النهارده سبوع بنت مى صاحبتنا و لازم نلبس و نروحلها
= ايه ده هي مى أتجوزت
_ يوووووو دي قربت تجوز بنتها
= اللي سبوعها النهارده
_ اوووووماااال
= الاه دى الأيام بتجري بسرعه اوى
_ خلينا بقي نجري اسرع منها عشان نلحق السبوع
= حاااااضررر، رجعنا البيت ودخلت أختار طقم
_ أنتي بتعملي آيه
= بختار طقم
_ لا أنا مختارالك هَتلبسي الفستان ده، طلعته من ورا ضهرها
= الله شكله رقيق أوى بس ليه لونه ابيض
_ أمال أنتي عاوزه تحضري السبوع بأسود
= لا مش قصدي بس شكله عرايسي أوي
_ شكله حلو وينفع لمناسبه انجزي بقي وألبسيه عشان مَنتأخرش و أنا كمان هروح ألبس
بعد ساعه ...
_ ما شاء الله ولا قوة إلا بالله، بدر ف تمامهُ يا ايمي الله أكبر عليكي يا حياتي
= حاسه أني رايحه فرحي والله
_ طبعاً
= آيه؟!!
_ أحم طبعاً قريب بإذن الله، يلا بينا بقي أتأخرنا
= حاضر يلا، أنتي عسوله أوى كده ليه ده سبوع مش كتب كتابك
_ أبو أُم لسانك اللى عاوز قطعه ده، اتفضلي يا جمررر
= بس ده مش بيت مى
_ ما هو مش لازم تعمله ف بيتها هي عَزمه ناس كتير فَ قالت تعمله ف قاعه شيك
= هي عَزمه كمان الموظفين بتوعنا هي تعرفهم منين
_ لا دول أنا اللى عَزماهم عشان يعملوا واجب وكده يعني
= طب هما كل اللي موجودين هنا بيبُصولي وفرحانين ليه كده
_ عادي يا إيمان مَتدوقيش ع كل حاجه كده
= بس دي مش أجواء سبوع خالص فين البلالين و الزينه بتاعت الأطفال فين مى انا مش شايفاها ليه
_ الله مالك يا إيمان ما تصبري لحد ما تيجي ونفهم اللي هيحصل منها
= أنتي بقيتي قفوشه و خُلقك ضيق اوي ع فكره، طب ممكن سؤال من غير زعيق
_ ياااا صبر أيوب، نعم يا ستي أتفضلي أسئلي
= هو أنتي مقعدانا ليه ع الكوشه ( كرسي العريس و العروسة )، و ليه ف كوشه ف سبوع أصلاً
_ أولاً أنتي شايفه ف كراسي فاضيه؟
= لا
_ حلو ثانياً بقي لما تيجي نيله هانم أبقي أسئليها ليه الكوشه ف السبوع
= يا ساتر عليكي خلاص حاضر هتكتم أهو
بعد ربع ساعه نور المكان كله أتطفي
= يالهوي هو النور بيقطع ف القاعات الكبيره عادي يا فاطمه كده مش المفروض ف موَلد أنا مرعوبه اووووى
_ .....................
= فاطمه أنتي مش بتردي ليه، بحسس بإيدي جنبي يمين و شمال مش لَقيه فاطمه لسه بفتح الفون بتاعي عشان أشغل الكشاف لَقيت النور جه بدور ع فاطمه بعيني لَقيت قاعد جنبي شيخ ايوه شيخ لابس عباية و ع راسه الطاقيه بتاعت الشيوخ دي معرفش أسمها آيه
و ف ترابيزه قدامنا و عليها دفتر و جنبه قلم و أوراق، هو حضرتك مين و قاعد هنا ليه، لَقيته بصلي و مَنطقش، رُحت قُمت وقفت و لسه همشي أشوف فاطمه راحت فين
سمعت حد بيتكلم ف مايك و ألأنوار كلها أتجمعت ع مكان جانبي ف القاعه و المفروض اللى بيتكلم ف المايك هيخرج من المكان ده و أنا واقفه متسمره مكاني من الصدمه و مش بتحرك
- لحظه يا أنسه إيمان خليكي مكانك و هَتفهمي كل حاجه حالاً
= أنا بَشبه ع الصوت و مستنيه صاحبه يظهر عشان أطمن وظهر فعلاً وأنا عيني برقت والكلام أتحشر ف بوقي مش عارفه أنطق و مش عارفه أستوعب اللى شايفاه بيحصل قدامي، لَقيته جه وقف قدامي وأتكلم تاني
- بصي يا إيمان هو مفيش وقت للتفسير فَ نشوف اللي هَيحصل دلوقتي وبعدين أفسرلك كل حاجه ع طول، تمام؟
= أنا واقفه جوايا مشاعر مُختلطه ومش عارفه أنطق
- يبقي تمام أتفقنا أوكي، قعد ع رُكبتهُ وقال بكل حب و حنية، و أخيرااااً جه الوقت اللي كُنا مستنينه يا إيمان حلمنا بيتحقق أهو صحيح أنا أتأخرت عن المُهله اللي أدتهالك و أخباري انقطعت عنك
بس كل ده هَشرحهولك بعدين المهم دلوقتي أننا نحقق حلمنا، تتجوزيني يا إيمان؟ طلع علبه من جيبه وفتحها فيها الخاتم اللي كنا مختارينه زمان مع بعض و قالي هَجبهولك ف الخطوبه
= أنا بصاله و دموعي نَزله ف هدوء ومش بتكلم عكس اللي جوايا عاوزه أصرخ ف و أزعق ليه عملت فيا كده ليه سِبتني مره واحده وأختفيت ليه وجعت قلبي ليه كسرتني، بس مش عارفه أتكلم شوفت فاطمه واقفه وراه و هي بتضحك وبتعيط وبتهزلي راسها بمعني وافقي، وأنا برضو مش عارفه أنطق وبدأت أحس أني هَفقد الوعي بس بحاول أتماسك، رجعت بصتلهُ
- السكوت علامة الرضا يعني موافقه، راح لبسني الخاتم وباس أيدي و غمزلي وبعدين قام وقف وراح مقعدني، أتفضلي أقعدي كده، راح قعد جنب الشيخ الناحيه التانيه، يلا يا شيخنا أكتب الكتاب
× أزاي يا أبني العروسة شكلها مش موافقه و ف الحاله دى لا يجوز الزواج
- لا يا شيخنا هَفهمك، راح مميل ع ودان الشيخ وقاله حاجه
× لا حول ولا قوة إلا بالله ماشي يا أبني يلا بسم الله.......، بارك الله لكُما و بارك عليكُما وجمع بينكُما ف خَير، وهنا كل اللى موجودين قامو يسقفو ويزغرطو وصحاب يحييَ يصفرو، ولَقيت فاطمه بتحضني وهي بتعيط
_ أخيراً يا روحي دعوتك أتحققت و ربنا جمعك بيه ألف ألف مبروك يا نن عيني أنتي وربنا يسعدكوا يااااااااااارب
= أنا لسه مصدومه ومش عارفه ولا قادره أخد ردة فعل غير الصدمه أنا مش مصدقه اللي بيحصل أصلا هو أنا فعلا خلاص كده أتجوزت يحييَ يعني يحييَ كده بقي جوزي و أنا مراته يعني خلاص كده اللي نفسي ف أتحقق يعني حقيقي ربنا أستجاب لدعائي وجمعني بيه بجد،
بعيط برضو ف هدوء بس المره دى من الفرحه كل حاجه حصلت بسرعه و من غير ما أعرف وبقيت مراته الله حلوه اوى كلمة مراته دى محسساني بالأمان و الدفء كده ياااااا الله قد ايه الشعور ده حلو اوووووووى إن الحاجه اللي فضلت فتره كبيره بتتمناها و عايش ف قلق وخوف و وجع بسببها ومتأكد أنها مستحيل تحصل وفجأه كده ومن غير مقدمات تحصل
لأن ربنا رايد أنها تحصل وكاتبهالك بس ف ميعاد محدد ياااااااا الله ع كمية الفرحه اللي أنا فيها الحمدلله يارب شكراً يارب أنك حققتلي أكتر أمنيه كان نفسي فيها شكراً ياااارب، مسك إيدي وهو مبسوط زى الطفل اللي مامته قالتله لو خلصت كوباية اللبن ليك مُكافأه شيكولاته، وأنا المُكافأه بتاعته، وقفنا ف نص القاعه و لسه نفس النظره ف عنيه و مسك المايك و بدء يتكلم
- أولاً شكراً ع وجودكم وأنكم وافقتو ع دعوة كتب كتابي و شرفتوني، ثانياً .......، نزل ع الأرض وسجد، كل اللي ف القاعه سقفو جامد تاني وصحاب يحييَ برضو فضلو يصفرو، قام من ع الأرض و عيونه مليانه دموع ومش قادره اوصفلكو نظرة الحب و الفرحه اللي ف عنيه ليا عامله أزاي، عاوز أشكر ربنا كتييييييييييييررررر اوى اوى اوى ع أغلي هديه بعتهالي بجد،
صوته أتخنق و عيط وكل اللي موجودين اتأثرو هما كمان وأنا طبعاً مستمره ف العياط، أن...أناااا عارف أني سببتلك وجع كبييييير الفتره اللي فاتت و هَعرفك سبب أختفائي بالطريقه دي ايه
بس قبل كل ده أرجوووووكي أرجووووووووكي، ونزل ع رُكبته قدامي و هو بيعيط زى الطفل اللي مش عاوز مامته تسيبه وتمشي، أرجوكي سامحيني أرجوكي، رفع راسه وبصلي ومسك أيدي وبيقولي بهمس و رجاء، سامحيني أنا أسف
= هنا أنا قدرت أتحرك أخيراً مَدتله أيدي ف هدوء ومسكته من كتفه و قومته يقف وبصتله شويه وأنا لسه بعيط وبعدين قولت، مسامحاك
- ساب المايك وضمني ليه جامد
= وأنا تلقائيا بادلته وضميته بكل قوتي ويكأني أخر مره هَضمه فيها، وهنا صوت عياطنا أنا وهو عِلي مش عارفه فضلنا قد ايه ع الوضع ده بس لَقيت فاطمه بتشدني و حد من صحابو بيشده وبيهدونا، مسحنا دموعنا و هو رجع مسك المايك تاني وأتكلم
- تسمحيلي أحكيلك أختفيت بالشكل ده ليه
= هَزيتله راسي بمعني ايوه
- يوم ..... حسيت بتعب مش طبيعي فَ صحابي خَدوني ع المستشفي وعملت فحوصات و الدكتور بعد ما شاف الأشعه قالي يا أستاذ يحييَ للأسف أنت عندك كانسر بس الموضوع لسه ف الأول الحمدلله و الوَرم مش كبير فَ هَنمشي ع علاج كيماوي لفتره وبعدين نعمل فحوصات و أشعه تاني ونشوف الوَرم بقي قد ايه و نحدد نعمل عمليه ونشيله ولا نستمر ع العلاج و يختفي
بعدها، أنا طبعاً أنصدمت بس بعد كلام الدكتور وصحابي هديت و رضيت بقضاء ربنا وحمدته وقولت للدكتور عاوز ابدء علاج بس مش عاوز أتعالج هنا ف أسكندريه عاوز أتعالج ف القاهرة لأن مش هَعرف حد من معارفي الموضوع ده ف حولني ع مستشفي ف القاهرة فعلاً و حددلي مدة العلاج سنه،
6 شهور كيماوي وبعدين أعمل أشعه تاني ويطمنو ع الوَرم وقالي ف الأغلب هنعملك عمليه ونشيله وبعدين هتمشي شهرين ع علاج تاني وبعدها تعمل علاج طبيعي و بعدين تجيلي متابعه بعد 3 شهور نعمل فحوصات ونطمن كده خفيت نهائي ولا لا قدر الله الوَرم ممكن يرجع تاني، بس فضلت أفكر كتير أقولك ولا ف النهاية قولت حرام هتفضلي تعبانه معايا ومش هتسبيني فَ بلاش أتعبك معايا مع أني كنت محتاجك اووووووووى ف الفتره دى
بس مَقدرتش أخلي راحتي ع حساب تعبك، ف نبهت ع صحابي محدش يجبلك سيره و فَهمتك أني بفتح فرع جديد للمطعم ف القاهرة وهَحتاج سنه أكون ظبطت أموري فيه وبعدها نتجوز، و سافرت و الدنيا كانت تمام أول شهرين بس بعد كده تعبت، مش تعبت من العلاج و المرض و كده لا تعبت نفسياً بسبب بُعدي عنك كنت محتاجك اوي محتاج أشوفك أسمع صوتك محتاج دعمك محتاج لوجودك جنبي
ف الفتره دي بالذات، فَ مكانش العلاج بيجيب نتيجه معايا ف بيضطرو يوقفو ويدعموني نفسياً ويغيرولي جو عشان نفسيتي تتحسن وفضلت ع كده وأخدت وقت أطول طبعاً ف العلاج و أختصاراً عملت العمليه من 3 شهور وشيلت الوَرم ومن أسبوع رجعت و الدكتور طمني وقالي إن الحمدلله خفيت
تماماً، فرحت جداً وقولت لازم أول حد اشوفه أنتي ونكتب كتابنا ع طول وبعدين أحكيلك، وأنا ماشى بالعربيه شوفتك قاعده ع البحر فرحت جدااااً لما قربت سمعتك بتعيطي ندهتلك بس أنتي أول ما شوفتيني فقدتي الوعي أتخضيت شيلتك ودخلتك العربيه وطلعت بيكي ع المستشفي وكلمت فاطمه و عرفت منها وضعك ايه ونبهت عليها أنها مَتجبلكيش سيره عني لحد ما انا ارتب أموري واحجز قاعه و أعزم الناس ف اسرع وقت وحصل اللي حصل ده
وأهو أخيراً حققنا حلمنا وأتجوزنا، أنا أسف يا عمري وحياتي ودنيتي كلها حقك عليا و أقسم بالله لأعوضك عن فترة غيابي دى وأخليكي تنسيها خالص وعمري ما هَزعلك تاني ابداً ولا أخليكي نايمه معيطه أو بعيده عني يا أغلي نعمه و هديه بعتهالي ربنا .. بحبك
= أنا نطيت وضميته وهو شالني وفضل يلف بيا، وصوت المعازيم عِلي وهما بيسقفو ويزغرطو ويصفرو، وأشتغلت أغنية حماقي ( و أدي اللي ف خيالي بيحصل قصادي حبيبي جنبي وفي حضني الليله دي والله وبقيت معاااااه ......)، ورقصنا ع أنغمها.
(قَدْ جَعَلَهَا رَبّي حَقَّا)
كل عام و أنتَ عيدي يا رفيق الرُوح ..
أنت تعلم أنني أُحبك
لكنني أُحبك أكثر مما تعلم ♡
ماذا فعلت لقلبى ليتمناك لهذا الحد ؟!
تمت
بقلمي/ إيمان أحمد