_ أنا بحب أقرأ عن الماورائيات و عندي فضول أعرف عن العالم ده أكتر و أكتر و فضولي ده كان هيقضي ع حياتي .. ف مره كنت قاعده و لقيت فوني بيرن .. دي سِدرة صاحبتي .. الوو
= ايوه يا أماليا وحشاني خالص يا قلبي
_ وانتي كمان يا قلبوبي عامله ايه
= الحمدلله يا حبيبتي وانتي
_ الحمدلله بخير
= عاوزه أشوفك يابنتي
_ تعاليلي حالاً أنا ف البيت أهو
= لا أنا عاوزه أقضي معاكي وقت بعيد عن البيت
_ عاوزه نتقابل فين طيب
= فاكره الشله بتاعت الجامعه
_ اه طبعا
= حلو أوي كلنا طالعين رحله لسيناء تعالي معانا عشان نعيد ذكرايتنا و نتبسط
_ أوي أوي هتروحوا أمتي و هنتجمع فين
= فجر يوم الجمعه الجايه وهبعتلك اللوكيشن اللي هنتجمع فيه حالاً
_ خلاص تمام يبقي أشوفك وقتها بإذن الله
= إن شاء الله يا روحي عاوزه حاجه مني
_ سلامتك يا قلبي تصبحي ع خير ....
فجر يوم الجمعه ...
_ ايوه يا سِدرة أنا خلاص قربت عليكوا .. ماشي يا حبيبتي سلام .. ركنت العربية ونزلت سِدرة جريت عليا سلمنا ع بعض ومكناش مصدقين أننا أتقابلنا تاني بعد تاخرجنا بكام سنه وبعدين رجعنا للشله وسلمت عليهم واحده واحده .. والله وحشتني لمتنا دي جداً يا بنات بجد ياريت نرجع نتجمع ونشوف بعض تاني دايماً
* ما أحنا ناويين نعمل كده فعلاً يا أماليا
_ إن شاء الله يا حبيبتي مش يلا بينا بقي نركب الأتوبيس ولا فاضل حد مجاش
= لا يا قلبي كلنا كده كاملين
_ تمام .. ركبنا الاتوبيس ...
= أصحي يا أماليا يلا يا حبيبتي وصلنا
_ قولتلها وأنا بتاوب .. بجد محستش بالطريق
= هتحسي أزاي و أنتي نايمه من أول ما ركبنا
_ معلش أصلي مش متعوده ع ساعات السفر الطويله دي، نزلنا وخدنا الشنط وصلنا المكان اللي هنبات فيه وسط الصحرا و الجبال حوالينا، طلعنا الخِيم بتاعتنا ونصبناها ف شكل دائرة كبيرة وبعدين جبنا الحطب و ولعنا النار ف النص و قعدنا حواليها وطلعنا الأكل وبنشويه وبعدين حطينا الأكل قدامنا وكل واحده لبست دفايتها وبدأنا ناكل، منظر الشمس و هي بتغُرب تحفه أوووووي
= أيوه منظر يسحر سبحان الله
* تعالوا ناخدلنا صورة قبل ما الدنيا تضلم
_ قومي طيب صورينا، قامت صورتنا كذا صورة وقعدت، خلصنا الأكل و قعدنا نلعب و نحكي و الدنيا لَيلت علينا
× أنتوا سامعين الصوت ده
سكتنا كلنا ...
_ صوت ايه يا نانا
× صوت رجول كأن حد بيمشي حوالينا
= لا يابنتي مفيش صوت
* بمناسبة الموقف ده .. سمعت إن ف مغاره قريبه من هنا مسكونه بالجن
~ يا جماعه ما بلاش السيرة دي ف المكان ده غيرو الموضوع
_ انا طبعاً بحب الكلام ف المواضيع دي وعندي فضول أتجاها، فين دي يا نور عارفه مكانها
* اه جنب الجبل اللي هناك ده .. ع فكره ممكن صوت الرجول اللي سمعتيه ده يا نانا بسببهم أحنا بالليل وهما أكيد أنتشروا
~ يوووووه قولتلكوا أسكتوا بقي و غيروا الموضوع احنا ليه منزلناش ف فندق بدل قعدتنا هنا اللي فيها خطر علينا دي
= يابنتي أهدي مفيش حاجه دي بترخم عليكي بس وبعدين الفنادق هنا غاليه أوي و أحنا جايين يوم واحد نستمتع بالطبيعه وهنمشي ع طول
_ نور ما تيجي معايا طيب عند المغاره دي أخد هناك كام صورة عشان أحطها ف البي دي أف اللي هكتبه عنها
= أماليا بطلي جنان و أصبري لما النهار يطلع
_ يابنتي عادي أخدلها صورة دلوقتي و صورة بالنهار
= لا يا أماليا المكان خطر لازم نفضل مع بعض كلنا
_ خلاص تعالوا كلنا نروح
~ نروح فين يا أماليا أنتي مستوعبه اللي بتقوليه بتقولك المغاره مسكونه بالجن وأنتي عاوزانا كلنا نروح عشان نتلبس
_ يا حبيبتي ما أحنا قاعدين أهو و هما كده كده حوالينا دلوقتي لو عاوزين يأذونا كانو أذونا مش هيستنوا لما نروح للمغاره
~ هو ده اللي هنستمتع بالطبيعه يا سِدرة يارتني ما سمعت كلامك وجيت معاكوا أنا هقوم أمشي
= أستني يا نانا بالله عليكي محدش هيقوم يروح ف مكان أحنا هنام دلوقتي و الصبح نبقي نقوم نستكشف و نتصور
_ أنا بعت لنور رسالة وقولتلها لما يناموا نتقابل و نروح المغاره بصتلي و هزتلي راسها بمعني ماشي، عيال رخمه و جبانه يلا ياختي أنتي وهي عشان نتخمد، كل أتنين دخلوا خيمه وقفلوا عليهم ودخلت أنا وسِدرة خيمتنا
= أنتي بتستهبلي يا أماليا مغارة ايه اللي كنتي عاوزه تروحيلها دلوقتي
_ يابنتي أنتي مكبره الموضوع ليه مفيهاش حاجه والله انا كنت هصور المغاره من برا و هرجع مش هدخلها يعني
= لاااا أنتي دماغك هربانه منك أنا هنام تصبحي ع خير
_ وأنتي من أهله، أستنيت ساعة وبعدين بدأت أنده ع سِدرة بصوت واطي عشان أتأكد هي نامت ولا ملقتهاش بترد ف بعت رسالة لنور يلا بينا لقيتها ردت وقالت يلا قومت أتسحب براحه وفتحت سوستة الخيمه بشويش خالص و خرجت براحه وقفلتها
* متأكده من اللي هنعمله ده يا أماليا
_ أنا شهقت بخضه، يخربيتك قطعتيلي الخلف ف حد يخض حد كده
* ضحكت، طب لما أنتي أتخضيتي وأنا بكلمك أمال لو ظهرلنا عفريت هناك هتعملي أيه
_ ما عفريت إلا بني أدم ياستي خليها ع الله أنتي بس حصني نفسك و أقري آية الكرسي و المعوذتين ومفيش حاجه هتحصل بإذن الله
* طيب وأنتي محصنه نفسك
_ أيوه متقلقيش أنتي جايبه الكشاف و الكاميرا معاكي بس
* اه أهم
_ تمام يلا بينا، فضلنا نتمشي لحد ما وصلنا للمغاره أنا جسمي قشعر بس ماهتمتش، هاتي الكاميرا و نوري الكشاف
* ماشي، نورت الكشاف
_ أنا بدأت أخد الصور، خلصت تعالي بقي ناخد صورة من جوا
* لا طبعا أنتي بتهزري هو حلو أوي كده تعالي نرجع
_ هاخد صورة واحده بس ونرجع والنبي
* لا يا أماليا مينفعش ندخلها دلوقتي
_ يا نور ما أحنا واقفين قدامها أهو عادي ناخد خطوة لجوا بقي
* لا يا أماليا يلا نرجع
_ أنتي خايفه ولا ايه يا نور
* طبعاً لازم أخاف أنتي مش شايفه الدنيا جوا كُحل أزاي
_ ما أحنا معانا الكشاف يابنتي وهينورلنا
* بتبص حواليها بقلق، يلا يا أماليها أنا بدأت أسمع صوت خطوات
_ ده تلاقي حد من البنات صحي و جه يشوفنا تعالي بقي بسرعه ندخل ناخد صورة ونطلع قبل ما حد يشوفنا، شدتها من إيديها و دخلنا بسرعه قبل ما هي تتكلم
* نهارك أسود أنتي أزاي عملتي كده
_ ولعي الكشاف بسرعه يا نور مش وقته
* نور لزقه فيا و خايفه و من كتر التوتر الكشاف وقع من إيديها
_ أيه يا نور ده مش تمسكيه كويس
* أ..أنااا خاااايفه يلااا نطلع والنبي
_ حاضر يا نور يا جبانه ولعيلي كشاف الفون طيب عشان أجيب الكشاف اللي وقع ده
* نورت الكشاف و أحنا الأتنين بصين ف الأرض، يالهوي الكشاف راح فين
_ أهدي يابنتي هتلاقيه أتدحرج كده ولا كده تعالي ندور، بنمشي أحنا الأتنين وبصين ف الأرض وعمالين ندخل جوا المغاره أكتر، أهوووو، جريت أجيبه
* يالهوي يا أماليا متسبنيش، وجريت لزقت فيا
_ وطيت جبت الكشاف و بنلف أحنا الأتنين شوفنا ع نور كشاف الفون رجول حيوانات لونها أسود أتجمدنا ف مكانا
* نور حاولت تتكلم، أم..أما..أمالياا أ.أنتي ش..شاايفه اللي أ..ناا ش..شايفاااه
_ أنا بحاول أداري خوفي و أتماسك، ايووه يا نور، فضلت أرفع الكشاف واحده واحده لحد ما شوفناهم أربع كلاب حجمهم عملاق لونهم أسود وعنيهم حمرا لون الدم و منوره
* نور لسه هتصرخ
_ أنا كتمت بوقها، هششششش أوعي تعملي كده لو عاوزه نخرج من هنا ع خير أهدي و متطلعيش صوت
* بتعيط و بتترعش، طيب ه..هنعمل أيه
_ هنقرأ قرءان
* أنا.. أنا نسيت كل اللي حفظاه
_ خلاص قولي ورايا بس بصوت واطي، بدأت أقرأ آية الكرسي بهدوء، الكلاب فتحوا بوقهم وأنيابهم الكبيرة بانت وبيطلع منهم صوت زمجره مخيف أوي و بيقربوا مننا بهدوء مخيف وأحنا عمالين نرجع لورا كل ما يقربوا
* نور مسكت فيا أكتر وهي عماله تعيط، خلاص هنموت يا أماليا
_ أنا قولتلها بتأكيد وقوة وثقه معرفش جبتها منين مع أني مرعوبه زيها الوضع فعلاً مُخيف جداً ومفيش أمل أننا هنعيش، متخافيش يا نور هنطلع من هنا بخير، و فضلت أقرأ آيات من كذا سورة لحد ما لقيت كلب منهم هيهجم علينا خلاص هنا أتأكدت أننا ميتين غمضت عيني جامد وقولت لنور بصوت عالي، أتشاااهدي....، محصلش حاجه بس سامعين صوت الكلاب المخيف و كأنهم بيتخانقوا، بفتح عيني لقيت أسد لونه أبيض جداً و عملاق زيهم ومعاه 5 لبوات نفس الحجم و اللون داخلين ف أشتباك دموي مع الكلاب دول، مسكت نور وقولتلها فتحي عينك
* نور بتترعش جامد ومنهاره ف العياط
_ حضنتها، نور يا حبيبتي فتحي عينك أحنا بخير شوفي اللي بيحصل
* نور ع نفس الحاله بس فتحت عنيها واحده واحده، اييييه ده ايه اللي بيحصل
_ خدتها وقعدنا ع جنب بعيد عن اللي بيحصل ده وهي حضنتني جامد ومخبيه وشها فيا و لسه بتترعش ومرعوبه، دقيقة ولقيت جسمها هدي و مش بتتحرك عرفت أنها فقدت الوعي حضنتها وغمضت عيني و أنا بدعي أننا نخرج من المكان ده بخير وعماله بردد آيات وبعيط، بعد فترة معرفش قد ايه حسيت بهدوء ف المكان بفتح عيني براحه لقيت الأسد واقف قدامي بهدوء و وراه اللبوات، أنا بصراحه مكنتش خايفه كنت حاسه براحه و ف نفس الوقت رهبه من منظرهم، شكلهم بدأ يتبدل لشكل شاب طويل جسمه رياضي جداً لابس عبايه مَلكيه لونها أبيض شعره طويل ولونه أبيض دقنه طويله لونها أبيض بشرته لونها أبيض عينهُ لونها أزرق لون البحر ع راسه تاج دهبي كبير، اللبوات بقوا بنات لابسين فساتين لونها أبيض بشرتهم لونها أبيض شعرهم طويل لونه أسود ع راسهم تيجان لونها فضي
▪︎ الأسد اللي أتحول لشاب ده أتكلم بصوت عميق و هادي، أنتي كويسه يا أماليا
_ أنا من الصدمه مش عارفه أنطق
▪︎ أحنا لازم نخرج من هنا الأول و بعدين نتكلم
_ لقيت البنات وقفوا حوالينا وبقيت أنا و نور ف النص .....، فتحت عيني لقيتنا برا المغاره و الصبح بدأ يطلع ونفس الشاب و البنات قدامي، هنا أتكلمت بقي، أنتوا مين
▪︎ بنفس صوته العميق و الهادي، أنا جَمران جني مسلم ربنا سخرني ليكي عشان أحميكي من الشياطين اللي كانوا هيموتوكوا ف المغاره و دول خادماتي
_ أنا مندهشه من اللي بسمعه ده، هو أنتوا حقيقين ولا أنا نمت من الخوف وبحلم
▪︎ أبتسم، حقيقين يا أماليا بس محدش يقدر يشوفنا أو يسمعنا غيرك أنتي بس لأننا مسَخرين ليكي أنتي بس، حمدلله ع سلامتك، بس أنتي غلطتي يا أماليا مكانش ينفع تدخلي مكان زي ده و بالليل كده لو مكناش لحقناقوا كنتوا هتموتوا فعلاً
_ معاك حق بعترف أني غلطت أنا أسفه
▪︎ متعتذرليش أنا صاحبتك اللي تستحق الأعتذار، عموماً أحنا هنرجعكوا عند باقي صحابكوا دلوقتي عشان هيصحوا و صاحبتك دي لما تصحي مش هتفتكر حاجه من اللي حصلت
_ بجد أنا بشكرك أوي
▪︎ أنا تحت أمرك و ف خدمتك دايماً هتلاقيني ف أي وقت و أي مكان و وقت ما تحتاجيني قولي جَمران
_ أبتسمت، ماشي يا جمران، البنات لفوا حوالينا تاني.....، فتحت عيني لقيتني نايمه جنب سِدرة وبدأت تفوق
= بتتاوب، صباح الخير أنتي صاحيه من بدري ولا ايه
_ مثلت أني بتاوب، صباح النور لا لسه صاحيه
= طيب يلا نصحي باقي البنات عشان نفطر ونلحق نستكشف المكان هنا ونتصور
_ يلا بينا، طلعنا برا الخيمه ولقينا باقي البنات بيطلعوا وصبحنا ع بعض وبعدين لقيت نور بتقرب مني
* يعني مبعتليش أمبارح عشان نروح للمغاره
_ أنا فضلت بصالها شويه وبعدين أبتسمت وقولتلها، منا فضلت مستنيه سِدرة تنام خالص ومحستش بنفسي ونمت أنا كمان
* ضحكت، منا قولت كده برضوا طب أيه رأيك نروح دلوقتي
_ لا خلاص بقي مش لازم خلينا نفطر عشان نلحق نطلع الجبل ونتصور عليه
* ماشي
_ فطرنا ولمينا حاجتنا كلها ف الشُنط وطلعنا الجبل نتصور و نستكشف و أخر اليوم ركبنا الأتوبيس و رجعنا، و دي كانت أول تجربه ليا مع عالم ما وراء الطبيعه و مع الجني جَمران .
تمت
أسكريبت/ جَمران