" روان "
- تصبح على خير
- وانتى من اهله
- صعدت الي منزلى وجلست افكر فى كلام أحمد عن موهبتى والمستقبل والاختلاف الكبير بين تفكيره وتفكير حسام .. لن انكر اننى تمنيت ان يكون احمد مكان حسام فى هذا الكلام .. لكننى مستائه من نفسى بخصوص موضوع خطبتى من حسام .. لقد كذبت .. لكننى لم اجد الرد المناسب على هذا الموضوع .. لقد صبرت بما فيه الكفايه على هذا الموضوع ويجب ان اتخذ قراراً حاسم بشأنه .. وجدت اصدقائى يكلمونى .. وبالطبع مثل العاده اخبرتهم بكل شيئ حدث منذ رؤيتى لاحمد حتى ايصاله لى الى المنزل .. فرحوا كثيراً ولا اعلم سبب فرحتهم تلك وبدأوا بالثرثره والضحك بل وزادوا ذلك عندما اخبرتهم انه ارسل لى طلب صداقه على الفيس بوك وبالطبع اخذوا فى الالحاح والزن حتى اقبل الطلب مع اننى كنت ساقبله ععلى اياً حال .. لم يعد شخصاً غريباً بعد الان .. لقد جلسنا وتحدثنا .. اكتشفت انه شخص لطيف و يتمتع بدم خفيف .. كلامه جميل و .... حسام ....
= إيه يا حبيبتى
- إيه يا حسام
= إيه كنتى بتعملى إيه كدا
- مفيش لسه راجعه من برا
= كنتى فين
- كنت بتمشى شويه وبشرب قهوه
= لوحدك
- اه لوحدى
مش هينفع طبعا اقوله انى قابلت احمد وقعدت معاه لانه هيعمل حوار ومشكله
= ومكلمتنيش ليه طيب اجيلك
- أنا عارفه انى لو كلمتك هتقولى مشغول او مش فاضى و عندى شغل ومش هتيجى
= افرضى مكنتش هقول كدا مثلا ...افرضى أنا فاضى يعنى
- معرفش بقا يا حسام
= مالك يا روان
- مفيش
= مفيش إيه لا انتى فيكى حاجه .. مالك
- حسام هو مش انت بتحبنى
= طبعا
- طب واخره دا ايه
= مش فاهم يعنى قصدك إيه
- يعنى اخره الحب دا ايه
= النهايه الطبيعيه لاى اتنين بيحبوا بعض
- اللى هى إيه
= هنتجوز طبعا
- امتا
= لما ربنا يسهل يا روان ..انا لسه قدامى شويه يعنى وانتى عارفه
- انت بقالك قد إيه بتقولى ربنا يسهل يا حسام كل ما اسألك او افاتحك فى الموضوع دا
= فى إيه يا روان
- فى ان أنا خلاص زهقت يا حسام ... زهقت من علاقتنا كدا وعاوزه احس بتغيير .... زهقت من كلام الناس واسألتهم المحرجه و كلامهم اللى مش عارفه ارد عليه
= انتى عاوزه تتخانقى وخلاص يا روان
- لا مش عاوزه اتخانق يا حسام بس عاوزه حل
= ودا كلام مين بقا ان شاء الله ... اكيد صحابك الهبل اللى زيك
- لا مش كلام صحابى دا كلامى أنا يا حسام ...وبعدين لا أنا هبله ولا صحابى هبل
= أنا اللى اهبل يا ستى حقك عليا
- انت شايف ان دا اسلوب كلام ناس عاوزه تحل يعنى يا حسام
= يستى لا نحل ولا نعمل اى حاجه ... أنا هقفل يستى واريحك منى خالص
- انت شايف دا الحل يعنى يا حسام
= اه ... سلام
" احمد "
حسام دخل يكلمك تانى ....انا كل ما بسمع سيرته او بشوفه بيكلمك او بيعمل حاجه ليكى ببقى هتجنن .... انتى مقولتيلوش ليه اننا اتقابلنا .... خايفه يضايق ويزعل يعنى .... إيه دا .. دا انتى اللى زعلانه ... الظاهر ان كلامى معاكى جاب نتيجه
- حسام هو مش انت بتحبنى
= طبعا
- طب واخره دا ايه
مش قادر اوصفلك أنا فرحان بيكى قد إيه ... انتى مش متخيله أنا قاعد بتفرج على الشات دا وانا فرحان قد إيه ومبسوط .... يارتنى كنت قعدت معاكى من زمان
- انت شايف ان دا اسلوب كلام ناس عاوزه تحل يعنى يا حسام
= يستى لا نحل ولا نعمل اى حاجه ... أنا هقفل يستى واريحك منى خالص
شوفتى بيتهرب ازاى من الكلام و من الموضوع قولتلك ان الواد دا مش بيحبك وانه ميستاهلكيش بس انتى مكنتيش واخده بالك ....صدقتينى دلوقتى
- انت شايف دا الحل يعنى يا حسام
= اه ... سلام
هرب طبعا شوفتى جالك كلامى ..... بس أنا مش هقدر اسيبك فى الحاله دى كدا لوحدك من غير ما اشوفك ...انا هفتح كاميرا اللاب يا روان ... عارف انى كنت وعدتك و وعدت نفسى انى مفتحهاش غير فى الحاجات المهمه اوى ... ومظنش فى اهم من انى اشوفك دلوقتى وابقى جنبك .....بتعيطى ....بتعيطى عشان خاطر حسام ... دا ميستاهلش اى دمعه تنزل من عينك ..ميستاهلش حتى انك تحبيه ...ميعرفش قيمه الحاجه اللى معاه ...قولتلك حسام دا كداب وخاين انتى مصدقتنيش .... طب متعيطيش عشان خاطرى ..... متعيطيش وشوفى أنا هعملك فيه إيه ... أنا هبعده عنك خالص ..... أنا هعمل اللى كنت قولتلك عليه قبل كدا ...اظن دا انسب وقت لكدا ..... أنا هنام بقا ... أنا اتطمنت عليكى انك نمتى وروحتى فى النوم وهديتى ..... تصبحى على خير يا حبيبتى
" يحلم احمد بحلم غريب مره اخرى ولكن هذه المره يرى نفسه وهو طفل وامه تتحدث معه ...
احمد حبيبى اوعى اى حد يعرف حاجه عن اللى انت شوفته دا وخصوصا بابا
- ليه يا ماما
حبيبى أنا عامله مفاجأه لبابا ومش عاوزاه يعرف اى حاجه اوعى تقوله هاا
- حاضر يا ماما
يتغير المشهد ليظهر والد احمد وهو يتشاجر مع والدته ....
يعنى انتى مش عاوزه تقولى و تتكلمى
انت انسان مريض ومجنون
انتى كمان جننتينى دا أنا شايفك بعينى و شايف كل حاجه
اخرس يا حيوان ... انت اكيد اتجننت
احمد حبيبى انت اللى هتقولى إيه اللى حصل
- محصلش حاجه يا بابا
احمد ما تكدبش على بابا انت عارف ان الكدب غلط
- مبكدبش يا بابا
احمد قول انت شوفت إيه
- مشوفتش حاجه
كمان مصمم تكدب ....اتكلم يا احمد ....قول شوفت إيه
يصفعه والده صفعه شديده تجعل احمد يستيقظ من النوم "
صباح الخير يا روان ..... عارف ان الاحلام دى كترت الفتره دى ...مش عارف بقا إيه سببها ... النهارده هاخدلك حقك من حسام ...النهارده هبعده عنك خالص .... مقدرش اشوفه بيخليكى تعيطى او يزعلك واسكت .... متستعجليش على رزقك هتشوفى هعملك فيه إيه .... هفتح تليفونه اعرف هو بيعمل إيه او رايح فين .... الاستاذ رايح يقابل واحده من اللى يعرفهم فى كافيه .... نفس الكافيه اللى بيقابلك فيه ...شوفتى قد إيه وصلت بيه البجاحه و النداله ... متخافيش أنا هعرف اتصرف مع اللى زيه .... أنا نازل يا حبيبتى .... حاضر هخلى بالى من نفسى ...........
" حسام "
أنا زهقت منها ومن أسألتها الغريبه دى بصراحه وكدا اوفر اوى
- يعنى اخره الحب دا ايه
= النهايه الطبيعيه لاى اتنين بيحبوا بعض
- اللى هى إيه
= هنتجوز طبعا
عاوزانى اقولك إيه يعنى ..... مش فاهم أنا إيه الاسئله دى ... وتزعل وتضايق لما اقفش واتخانق معاها زى ما عملت دلوقتى كدا...ما هى اللى بتحب النكد والمشاكل ...يووه ...انا زهقت منها فعلا ومن ردودها دى
- انت شايف ان دا اسلوب كلام ناس عاوزه تحل يعنى يا حسام
= يستى لا نحل ولا نعمل اى حاجه ... أنا هقفل يستى واريحك منى خالص
- انت شايف دا الحل يعنى يا حسام
= اه ... سلام
بنى ادمه خنيقه وبتحب النكد والخناق ومبتحبش تفرح ابدا .... ربنا يعكنن عليكى زى ما عكننتى عليا .... أنا هنام على الله اصحى رايق بعد القرف دا .....
= إيه يا قلبى
إيه يا حسام
= أنا صحيت وجايلك اهوو
انت فين يعنى بظبط
= أنا نازل اهوو خلاص
خلاص وانا روحت المكان اللى انت بتحب نقعد فيه على طول
= ماشى يستى يالا أنا جايلك اهوو سلام
روحت طبعا افرفش شويه واقعد مع حد بيحب يهزر ويضحك يخرجنى من موود الخنقه والاكتئاب اللى دخلت فيهم امبارح بسبب بنى ادمه بتعشق جلد الذات بس الغريبه انى شوفت حد متوقعتش انى اشوفه هناك .... الواد دا اللى اسمه احمد اللى كان مع روان .... إيه اللى جابه دا كمان هنا .... اكيد شافنى دلوقتى .... لو بيكلم روان او على علاقه بيها اكيد هيقولها ...بس لو كان بيكلمها كانت قالتلى أنا عارفها بتحب الرغى والكلام الكتير .....
= أنا هقوم اخش الحمام واجى خليكى قاعده
ماشى
قومت دخلت الحمام وفجأه لقيت صوت بيكلمنى ... الصوت دا أنا عارفه كويس ....
- استاذ حسام .. أزيك
= أزيك
- انت فاكرنى .. أنا احمد اللى كنت انقذت خطيبتك
= ايوا ايوا فاكرك ...
- عامل إيه
= أنا كويس
- طب الحمد لله ... امال استاذه روان فين
= معرفش الحقيقه هتلاقيها فى البيت
- امال مين اللى قاعده معاك برا دى
= يخصك تعرف
- لا أنا بسألك عادى
= استاذ احمد أنا من رأيي كل واحد يخليه فى نفسه احسن وميركزش مع التانى ..مش كدا ولا إيه ...فرصه سعيده يا استاذ احمد....
بنى ادم غتت ورخم وبيتدخل فى اللى ملهوش فيه ....انا من الاول مش مستلطفه .... مش عارف كانت عاوزانى اعامله حلو على إيه دا دمه واقف ... يالا يارب يولعوا هما الاتنين
= اتأخرت عليكى
كلك نظر بقا يا استاذ
= هو لو عندى نظر كنت بصيتلك
والله
= طبعا يا بنتى
خلصت القعده ومشيت وروحت الشغل خلصته ونزلت عشان اروح ولسه بفتح باب الشقه ..... فتحت عينى فى مكان مضلم ...ايدى مربوطه .... ورجلى كمان .... مش شايف حاجه ..... بدأ صوت يكلمنى ... الصوت دا أنا عارفه .... دا صوت .... احمد