" احمد "
غلبنى النوم .... نمت .... صحيت على باب الشقه بيخبط بدرى ... مين يا ترى اللى هييجى بدرى كدا يعنى .... إيه دا .... روان .... هى مسافرتش ولا إيه ... ولا دا كان مقلب منها ....
- انتى مسافرتيش ليه
- السفر اتأجل يوم قولت اعملهالك مفاجأه واجى افطر معاك
هى مفاجأه حلوه فعلا الحقيقه ... بس هينفع ادخلها البيت وانا قاعد لوحدى...قصدى يعنى ان أنا عايش لوحدى وكدا معتقدش انها هتوافق تخش وكدا زياده امان ليها والحاجات دى طبعا...خصوصا انى لوحدى..
- بجد تصدق فاكراك عايش مع عشرين واحد ... يبنى أنا واثقه فيك
- طب يست الواثقه اتفضلى
دخلت روان ... قالتلى خش البس وجهز نفسك ويالا عشان ننزل نفطر ... سيبتها قاعده برا فى الصاله ودخلت أنا غسلت وشى ولبست هدومى وخرجت .... خرجت لقيت حاجه مكنتش لا على بالى ولا أنا عامل حسابها خالص ....
- روان أنا عملت كدا عشان اقدر اوصلك وابقى معاكى
- انت شايف دا مبرر يخليك تتجسس على حياه وخصوصيات حد ... انت عارف انت عملت إيه
- حميتك ... أنا كنت بعمل كدا عشان احميكى
عمرها ما هتفهم انى عملت كدا عشان احميها من حسام واحميها من اى خطر ممكن يحصلها .... مش هتفهم انى عملت كدا عشان ابقى معاها وجنبها وان مش مهم الطريقه طلاما احنا الاتنين بنحب بعض وبقينا مع بعض ... أنا معملتش حاجه غلط أنا كنت بحاول اقرب منك يا روان وابقى جنبك عشان اعرفك واقدر ابقى أنا وانتى جنب بعض بجد ....انا انقذتك من حاجات كتير اوى يا روان كانت بتهددك وكانت عاوزه تأذيكى .... أنا كان لازم اعمل فيه كدا ...
- عملت فيه إيه
- قتلته
- انت بتقول إيه
- قتلته علشانك
عمرك ما هتصدقى انى مكنتش اقصد اعمل كدا ... أنا مش قاتل يا روان ... هو مات بالغلط .. هو اللى موت نفسه زى ما بقولك كدا ..... صدقينى هو دا اللى حصل والله أنا مش بكدب عليكى ... أنا مبعرفش اكدب يا روان ... أنا عملت كدا عشانك ... عشان أنا بحبك
- وانا كمان .... أنا نسيت اعمل حاجه كدا .... انزل انت اسبقنى وانا هعملها واحصلك
- طب ما اجى معاكى نعملها سوا وبعدين نروح سوا
حاسس ان انتى مش ناسيه حاجه وان دا اى كلام بتقوليه عشان تهربى من هنا يا روان وتروحى تبلغى عنى او تعملى اى تصرف هيخليكى تندمى عليه ....
- استنى " يوقفها "
- إيه
أنا مش هينفع اسيبك تخرجى من هنا يا روان .... مش هتخرجى من البيت دا الا على مكان واحد بس .... مكان أنا كنت اتمنى تشوفيه ... بس مكنتش اتمنى تروحيه وانتى عامله كدا .....
- بس فى مشكله
- مشكله إيه
- أنا مش هقدر اثق فيكى
- قصدك إيه
- قصدى انك مش هتخرجى من هنا
- انت اتجننت
- انتى اللى بتكدبى و عاوزه تعملى حاجه وانا مش هسمحلك تعملى كدا
- سيبنى امشى يا احمد
- مش هيحصل
مسكتها من رقبتها وضغطت عليها جامد ... لا أنا مش بخنقها ... أنا بخليها تفقد وعيها ..... وعملت دا فعلا ....مكنش صعب عليا انى انزل احطها فى العربيه وابدأ اتحرك على المكان اللى لازم روان تقعد فيه شويه ... لازم تقعد فيه شويه عشان تصدقنى و ترجع تثق فيا تانى ... لازم نروح عليه ... لازم نروح على بيت خالى ....
" روان "
فوقت فى مكان غريب ... ايدى ورجلى مربوطين ... حاسه انى مصدعه و دماغى بتلف بيا .... مش عارفه إيه اللى حصلى ... اخر حاجه فكراها انى كنت بتخانق مع احمد ... احمد ....
- حمد الله على السلامه
- أنا فين
- انتى فى اكتر مكان امان بالنسبه ليكى .... المكان دا عمر ما حد هيقدر يوصلك او يأذيكى فيه ... دا مخبأى السرى
- انت خاطفنى فين
- خاطفك .... هو فى حد بيخطف حبيبته يا روان ... أنا بس قولت اجيبك هنا عشان اخليكى تقعدى تفكرى مع نفسك وتقدرى تفهمى وجهه نظرى وتعرفى ان الللى عملته عشانك دا صح
- صح ... انت مجنون ... انت عارف انت عملت إيه .... انت قتلت بنى ادم ملوش اى ذنب ....
- اولا أنا مقتلتوش .... أنا وهو كنا بنتخانق اتكعبل وقع على الترابيزه اللى جنبك دى اتخبط ومات ... أنا مش قاتل يا روان
- انت خطفت حسام وجبته هنا غصب عنه وحبسته وعملت كل دا وفى الاخر قتلته
- حسام لما جبته هنا اتعلم حاجات كتير اوى وفكر فى اسلوب حياته والطريقه اللى كان عايش بيها ودا كلامه هو مش كلامى .. أنا مخطفتش حد .. أنا كل اللى بعمله بصلح الغلط اللى أنا شايفه .... أنا بعلم الناس انها تفكر قبل ما تغلط عشان لو غلطت تعرف انها لازم تتعاقب .... أنا بطبق العدل ... اللى غلط لازم يتعاقب .... دا اللى مفروض ولازم يحصل
- انت مجنون
- لما تقعدى هنا وتفكرى مع نفسك ... هتعرفى ان دا الصح واللى أنا بعمله علشانك دا هتستفادى منه قدام
- أنا بكرهك
- وانا مش هحاسبك على كلامك دا دلوقتى أنا عارف انك دلوقتى مش قادره تفكرى فى حاجه ... أنا هسيبك هنا وبكرا هجيلك .. متخافيش هجيلك
- انت بتقول إيه .... احمد فكنى .... احمد متسبنيش هنا ... يا احمد ... احمااد ...
خرج وقفل الباب وراه ولا كأنى بكلمه ....مكان مخيف وشكله مرعب ... وفكره ان حسام كان هنا واتقتل هنا تخليه مرعب اكتر ... أنا مش مصدقه كل دا .. أنا للدرجادى كنت عاميه ومش شايفه حاجه .... معقول احمد يطلع كدا ويعمل كل دا ..... أنا مش مصدقه ... وحسام ... حسام اللى ملوش ذنب فأى حاجه ... مات ...اتقتل من غير سبب ....انا مش مصدقه ان كل دا بيحصل ... أنا حاسه انى فى حلم .. لا كابوس ... كابوس ونفسى اصحى منه ... أنا خايفه اوى .... خايفه ومش عارفه اعمل إيه او اخلص نفسى من كل دا ازاى ....اعمل إيه يارب .. اعمل إيه ....انا لحد دلوقتى مش مدركه كل الموقف دا واللى أنا فيه .. أنا مخطوفه من احمد ... احمد حبيبى اللى قتل حسام اللى كنت بحبه عشان يقرب منى بعد ما اتجسس على كل حاجتى ... ولما عرفت كل دا خطفنى ورمانى فى مكان أنا معرفش عنه حاجه لوحدى ومش عارفه اعمل إيه .... أنا مش قادره افكر ... مش قادره اعمل اى حاجه .... أنا خايفه ....