" روان "
توجهت الي حسام .. عندما وصلت وجدته قد طلب لى الطعام والشراب الذى احبهما .. بالطبع يريد ان يسكتنى قبل حتى ان اتحدث .. ولكنها حركه لطيفه منه
= أنا اسف على اللى حصل امبارح
- وهو حصل إيه امبارح
= الله ما خلاص بقا قولت اسف
- وهو حصل حاجه تستدعى انك تتأسف
= لا محصلش
- والله ... يعنى الخناق دا كله والزعيق و تعامل الراجل بأسلوب مش كويس وفى الاخر تقول محصلش حاجه
= طب ما انتى عارفه اهو .... أنا اسف والله بس أنا اليومين دول مضغوط فى الشغل و مش كويس
- ماشى يا حسام هعديهالك المرادى
= والله أنا مش عارف من غيرك فى حياتى كنت هعمل إيه
- كنت هتضيع طبعا عشان أنا حد قمر وانت متقدرش تستغنى عنى
= لا دا اوفر دا بصراحه.... اكيد كانت حياتى هتبقى احلى
- والله
= طبعا يا بنتى على الاقل كان زمانى نايم دلوقتى ومرتاح مش بفكر ازاى اصالحك من امبارح وبحاول اعملك الجو اللى بتحبيه دا
- بصراحه الحركه حلوه
= عشان بعملها لواحده حلوه اوى
- " بيعرف ازاى يضحكنى ويخلينى احبه اكتر "
= والله احلى ضحكه فى الدنيا ولما بشوفها على الصبح كدا يومى بيبقى زى العسل زيك كدا
- طب بس بقا عشان خدودى هتحمر دلوقتى وهتكسف ومش هقدر اتكلم
= طب ما دا المطلوب هوانا هعوز حاجه تانيه
- طيب أنا هقوم اخش الحمام واجى
= طب بسرعه بس متتأخريش
- حاضر
ذهبت الى الحمام حتى ارد على الذين لا يكفون عن الثرثره و الزن .. يريدون معرفه ماذا فعلت مع حسام .. اخبرتهم بكل شيئ وبعدما انتهيت خرجت لحسام مره اخري
- اسفه معلش اتأخرت
= لا ولا يهمك
- فى حاجه ولا ايه
= لا دا مهندس زميلى بيكلمنى عشان أنا اتأخرت وكدا بيستعجلنى
- طب لو متأخر يالا نقوم
= مش هتزعلى يعنى
- لا طلاما متأخر على شغلك فأنا مقدرش اعطلك عنه
= انتى قمر والله ..طب يالا
- يالا
ذهبت الى منزلى بينما ذهب حسام الى عمله .. وعدنا مره اخري الى نفس ذلك الروتين الممل بعدما كان يسير اليوم جيداً جداً .. شعرت بالملل من الجلوس فقررت النزول لشرب القهوه فى مكانى المفضل وبالطبع كل صديقاتى اعتذروا عن المجئ فاضطررت الى النزول وحدى .. نزلت و توجهت الى المكان وطلبت قهوتى .. امسكت بهاتفى وبدأت فى تفحصه من كثره الملل
" احمد "
- نازله تشربى قهوه لوحدك ... طبعا كلهم مكسلين ينزلوا معاكى المشوار بعيد اوى ... بس ممكن تكون دى فرصتى ...... دايما لازم تكون متوقع اى حاجه .... وانا كنت عامل حسابى فى حركه زى دى ....ودا انسب موقف ومكان اقدر اشوفك واتكلم معاكى فيه ..... أنا مش هتأخر عليكى يا حبيبتى .....
ذهبت الي ذلك المكان الذى تجلسين فيه .. تظاهرت انها صدفه .. احلى صدفه
- إيه دا روان ...ازيك
- بشمهندس احمد إيه الصدفه دى
- احنا قولنا إيه على حوار استاذ وبشمهندس دى
- اه اسفه معلش ... انت بتعمل إيه هنا
- أنا على طول بقعد هنا
- غريبه أنا على طول قاعده هنا ومش بشوفك
- ممكن عشان مكنتيش تعرفينى او كنت باجى فى وقت مبتكونيش موجوده فيه
- ممكن
- اخبار ايدك إيه
- كويسه الحمد لله
- طب الحمد لله ... ممكن اقعد معاكى ولا فى حد
- لا اتفضل طبعا ياريت ..انا قاعده لوحدى مش لاقيه حاجه اعملها
- ليه ...مفيش حد من صحابك معاكى
- لا كلهم اندال كسلوا ينزلوا
- طب واستاذ حسام خطيبك
- فى شغله وكدا ومش فاضى
- ربنا يكون فى عونه
- بس انت عرفت ازاى ان اسمه حسام
- هه ..ما انتى اول ما شوفتيه ناديتى عليه بأسمه انتى ناسيه
- اه صحيح أنا اسفه بقا معلش ...مكنتش واخده بالى
- لا ولا يهمك
- طب وايه اللى خلاك تعرف انه خطيبى
- مهو كان واقف مستنيكى وقلقان عليكى وكدا فأكيد خطيبك ..صح ولا إيه
- هه .. اه صح فعلا ماشاء الله عليك انت لماح
- ولا لماح ولا حاجه دى حاجات اى حد ياخد باله منها ... مش حاجات صعبه يعنى
- فعلا عندك حق
- اللاب توب شغال معاكى كويس ولا فى حاجه
- لا دا شغال كويس جدا احسن من الاول كمان والله ..تسلم ايدك بجد
- دا شغلى
- تلاقيك كنت مهندس شاطر فى الكليه
- أنا مش خريج هندسه اصلا
- يااه بجد
- اه والله
- امال خريج كليه إيه
- لا أنا مدخلتش الكليه
- ليه كدا
- يعنى دا حوار طويل كدا ياخد وقت عشان يتحكى
- عندك مانع تحكيه
- لا خالص
- طب احكى هو احنا ورانا حاجه
- بصى يستى .... أنا والدى و والدتى ماتوا وانا لسه عندى 13 سنه واللى خدنى ربانى خالى لانه كان عايش لوحده ومش متجوز وكدا وهو اساسا صاحب محل الكمبيوتر اللى أنا شغال فيه دا دلوقتى ...وهو اللى معلمنى كل حاجه فى الكمبيوتر ..بس أنا بقا اتعلمت حاجات اكتر وتوسعت فى المجال دا وكبرت المحل زى ما شوفتيه كدا ... وبس فعشان كانت ظروف خالى متسمحش انى اخش الجامعه وكدا كملت تعليمى لحد ثانويه عامه وبعدين علمت نفسى بقا حاجات اكتر فى الكمبيوتر وكدا
- برافو عليك والله حاجه جميله فعلا واحسن حاجه يعنى هما اللى دخلوا كليات عملوا بيها إيه
- ليه انتى خريجه كليه إيه
- أنا خريجه فنون جميله
- بترسمى يعنى
- اه ...انا اصلا بحب الرسم و اللوحات وكدا وكنت برسم لوحات كتير جدا
- ماشاء الله بجد يعنى انتى شغاله رسامه
- لا أنا برسم هوايه مش اكتر
- امال بتشتغلى إيه
- لا أنا مش بشتغل
- امال بتصرفى منين يعنى وبتجيبى فلوسك منين أنا اسف يعنى
- لا عادى ... أنا بابا الله يرحمه كان سايبلى مبلغ كويس فى البنك بيطلعلى فلوس كل شهر بصرف منها وكدا كدا الشقه ملكنا فالدنيا ماشيه الحمد لله
- طب دى حاجه كويسه والله .. ماشاء الله والدك كان عنده بعد نظر
- اه الحمد لله لولا كدا كان زمانى متمرمطه او مستنيه اى حد ييجى يدينى فلوس
- لا احلى حاجه انك تعيشى ملكه نفسك وحره فى تصرفاتك وكدا و محدش يكون ليه عندك حاجه
- دا اللى أنا بحاول اعمله فعلا
- بس ليه مشتغلتيش فى مجال دراستك وخصوصا انك بتقولى انك حباه
- الموضوع صعب اوى ومحتاج وقت وصبر ومجهود وانا بصراحه بيأس بسرعه
- لو أنا بحب حاجه وبحب اعملها وعاوز اوصل فيها لمكانه كويسه لازم استحمل واكون صبور ومثابر واسعى واحاول مره واتنين وعشره عشان لما احقق حلمى احس انى تعبت وان تعبى دا مش ضاع على الفاضى
- أنا مبعرفش اكون صبوره بقا واتحمل وكدا وبعدين أنا مش محتاجاه اوى يعنى دى مجرد هوايه عندى
- أنا لو مكانك ومعايا موهبه زى دى كنت هعمل بيها شغل كتير اوى
- ازاى
- يعنى كنت هسعى فيها و ادور واتعلم حاجات جديده واحاول اشتغل بيها و شويه شويه اكيد هوصل لحته كويسه
- أنا مبعرفش ابقى وشى مكشوف وبجحه زى ما بيقولو وبتكسف اروح اتكلم مع حد واسأل وكدا
- طب ما تخلى خطيبك يشوف ليكي حد فى الديكور وكدا هو اكيد مهندس وعارف الحاجات دى
- لا حسام مش فى دماغه اصلا الكلام دا ومش معترف بيا اصلا كرسامه وشايف ان دا تضييع وقت وانى بلعب وخلاص
- ازاى بقا دى موهبه ومن اجمل المواهب اللى ممكن تبقى عند اى بنى ادم والمفروض انه مهندس ودا فى مجال شغله وكدا وبعدين المفروض يشجعك ويكون فى ضهرك ومعاكى مش يحبطك ويسد نفسك
- عادى بقا هو حسام على طول كدا
- " بكرا نخلص منه يا حبيبتى وانا مش هسيبك غير لما تبقى حاجه عالميه " والله ملوش حق يعنى
- عادى بقا أنا متعوده منه على كدا
- والله ربنا يكون فى عونك
- ربنا يخليك والله يا بشمهندس احمد
- تانى بشمهندس
- قصدى يا احمد
- ايوا كدا
كانت ابتسامتها وهى ترد على كلامى من اجمل الاشياء التى رأيتها فى حياتى .. لا اعتقد اننى سوف استطيع نسيان تلك الضحكه طوال حياتى
- أنا هقوم امشى بقا
- طب استنى اجى اتمشى معاكى شويه وبالمره اوصلك
- لا مش عاوزه اتعبك المشوار بعيد
- لا ولا تعب ولا حاجه عادى أنا متعود
- طب ماشى يالا
مشينا سوياً الى منزلها .. كان مشواراً طويلاً .. ولكن الغريب بالامر اننى لم اشعر به .. ربما لانك عندما تكون مع شخص تحبه لا تشعر بأي شيئ غيره .. ادركت منذ تلك اللحظه اننى لن اشعر بأي شيئ صعب او طويل معكى يا روان .. ادركت اننى اخترت الشخص الصحيح .. ادركت اننى لن اتركك تضيعى من يدى .. ابداً
- يااه أنا مش مصدقه ان احنا مشينا من هناك لهنا
- ولا أنا بصراحه أنا محستش بالمسافه
- مبسوطه ان أنا شوفتك تانى واتكلمت معاك والله
- أنا اللى مبسوط والله بجد
- تصبح على خير
- وانتى من اهله
صعدت الى منزلها وبقيت انا افكر
- الكام ساعه اللى أنا قعدتهم معاكى دول عمرى ما هنساهم فى حياتى ومعتقدش انك كمان هتنسيهم لانى هفضل افكرك بيهم على طول وهفضل احكيلك أنا كنت عامل ازاى وقتها طول عمرنا لما نبقى احنا الاتنين سوا ...
توجهت الى منزلى .. بالطبع لم استطع ان اترك بمفردك .. من الواضح انكى سعيده بتلك المقابله وبحديثنا سوياً .. والدليل انكى تتحدثين عنى جيداً امام صديقاتك .. اعتقد اننى بدأت احب اصدقاءك .. لانهم يحبوكى .. ولكننى لا اعتقد انكى ستظلى تكلميهم دائماً هكذا عندما نكون سوياً .. لاننى لن اجعلك تشعري بأى لحظه ملل او زهق .. وجدت حسابك الشخصى على فيسبوك .. ارسلت لكى طلب صداقه واعلم انكى سوف تقبلينه .. لن انسى ذلك التاريخ ابداً يا روان .. اول مره نجلس فيها سوياً .. اول مره ارسل لكى طلب صداقه .. لا .. ليس الان