" حسام "
جايلى يطلب منى اعمل الحاجه الوحيده اللى ممكن تخرجنى من الازمه دى وفاكر انه لما يجبلى اكل كدا يعنى أنا هعملها .... يدينى التليفون بس وانا هحاول اعمل اى حاجه .... حتى لو قتلنى بالسكينه اللى فى ايده دى ..على الاقل الناس هتعرف مكانى ... ربنا يستر
- هاا ... مستعد
= يالا
اول ما ترد عليا لازم اقولها انه هو اللى خاطفنى واخليها تبلغ عنه يمكن يعرفوا يوصلولى
- الو
= روان أنا حسام ..روان .. الحقينى احمد خاطفنى يا روان
- انت بقالك قد إيه بتقولى ربنا يسهل يا حسام كل ما اسألك او افاتحك فى الموضوع دا
= إيه دا
- هو انت فاكر انى هخليك تكلمها كدا على طول ... مشكلتك انك فاكر ان الكل اغبيه زيك ....عارف وانا بقلب فى تليفونك لقيت إيه ...لقيت مكالماتك المتسجله وريكوردات الشات بينك وبين روان ... طلعتها وعملت منها الريكورد اللى انت سمعته دا عشان لو فكرت تعمل حركه كدا او كدا ... يبان قدامى ... انما لو اتعاونت ... فأقدر اساعدك " يضربه احمد"
= انت بنى ادم مجنووون
- انت اللى فاكر انك الوحيد اللى ذكى وان الكل اغبيه قصادك .. انت ليه مش عاوز تقتنع انك فى موقف مينفعش تعمل فيه حاجه من دماغك ..هاا .. ليه مش عاوز تسمع الكلام .. " يبدأ احمد فى غرز السكين فى قدمه " هقولك الكلام دا لاخر مره ... لو معملتش اللى طلبته منك .... هموتك .. واظن دى حاجه مش صعبه .. ومش هيبقى صعب انى اخفى جثتك من على وش الارض ... انت فاهم
= فاهم
- المره دى مش ريكورد ... لو فكرت تعمل اى حاجه قبل ما تنطق هتكون السكينه دى منوره رقبتك ... سامع ... اتكلم
- الو
= ايوا يا روان
- حسام .. انت فين
= مش مهم أنا فين
- حسام أنا اسفه .. والله العظيم اسفه على كل حاجه قولتهالك أنا غلطانه ... حسام أنا بحبك متعملش فيا كدا تانى ... أنا اسفه والله
= روان
- ايوا
- " يضع احمد السكينه على رقبته "
= أنا ... أنا مش عاوزك تكلمينى تانى
- يعنى إيه
= يعنى مش عاوزك تتصلى بيا تانى ... مش عاوز اعرفك تانى ... أنا مسافر ... و ياريت لا تسألنى عنى ولا تدورى ورايا ... أنا زهقت منك ومن علاقتك دى
- بس أنا بحبك
= انتى إيه مبتفهميش بقولك مش عاوز اعرفك تانى انتى غبيه ومعندكيش دم ... سلام
- برافو عليك يا حسام .. اهو أنا كدا هبدأ افكر امشيك من هنا
= انت مش قولت مسأله انى امشى هتبقى مجرد وقت
- دا قبل ما تفكر تتذاكى وتغلط
= انت إيه
- انت غلطت ولازم تتعاقب ... عشان لما تيجى تغلط تانى تفكر مليون مره قبل ما تعمل الغلطه دى .. وانا لسه عند وعدى الاولانى أنا هفكك عشان تاكل .. بس أنا مش هديك كل الاكل أنا هديك نصه بس ..عشان بعد كده تسمع الكلام من اول مره " يبدأ احمد فى فك يد حسام "
= مش خايف اهرب
- ياريت تحاول تهرب ... عارف يا حسام ... مشكلتك انك مش مصدق انك متعرفش المكان دا كويس ... المكان دا أنا عيشت فيه شويه لحد ما حفظته
= حفظته
- المكان دا اللى عمله حد اعرفه .... حد عمرى ما كنت اتخيل انه يكون كدا ... مكنتش مصدق ان الشخص دا يقدر يعمل كل دا ويعمل كدا
= مين الشخص دا
- أنا من رأيي كل واحد يخليه فى نفسه احسن وميركزش مع التانى ..مش كدا ولا إيه يا حسام
= انت مريض نفسى ولازم تتحبس
- قول اللى تقوله أنا وانا مكانك هنا برضوا كنت بقول كدا ... لحد ما كبرت واتعلمت وعرفت ان دا كان صح
= إيه الصح فى انك تحبس بنى ادم وتسلبه حريته
- أنا مش حابسك ... أنا بعلمك .. بعلمك انك لما تغلط لازم تتحاسب وتتعاقب .... بعلمك انك لازم تصبر ... تنكر انك مقعدتش تفكر مع نفسك فى كل حاجه غلط عملتها فى حياتك ... صدقنى بكرا تعرف ان اللى بعمله دا صح
= بكرا لما اخرج من هنا هخليك تندم على كل لحظه أنا قعدتها فى المكان دا
- تهديدك دا بيدل انك عارف انك ممكن متخرجش من هنا ... وان خروجك من هنا بأيدى أنا يا حسام ... كل يا حسام ... كل عشان انت مش عارف ممكن الاكل دا يجيلك تانى امتا ... وبخصوص سؤالك انك ممكن تهرب .. احب اعرفك حاجه ... الباب اللى انت شايفه دا أنا بمجرد ما بخرج منه بشغل سكينه كهربا .. يعنى الباب متكهرب ..يعنى لو فكرت تقرب منه هتموت ... ولو صادف وعشت ... انت مش هتعرف تخرج من هنا ... لان المكان دا تحت الارض يا حسام ... وانت مش معاك مفاتيحه ... مش قولتلك أنا الوحيد اللى بأيدى اخرجك
= انت مجنون
- سلام يا حسام .. وبالمناسبه جدعنه منى أنا مش هفصل عنك الكهربا وهسيبك تقعد فى النور ... كفايه عليك ضلمه لحد كدا ... أنا عارف احساس انك تعيش فى الضلمه ... سلام