" روان "
روحت المستشفى لصحبتى وفضلت قاعده معاها لحد بليل وبعدين روحت .... غيرت هدومى وعملتلى اكل وبعدين قعدت ....افتكرت احمد وكلامنا الصبح وان أنا ممكن اكون ضايقته انى منزلتش معاه او طنشته ... ممكن يفتكر انى بتهرب منه او حاجه .... فكرت اكلمه... بس قولت لا ممكن يكون نايم او بيعمل شغل مهم .... فتحت الاكونت بتاعه وقعدت اتفرج عليه واتفرج على صوره .... مش عارفه إيه اللى خلانى اعمل كدا بس حسيت انى مبسوطه وانا شايفاه ... مش عارفه مالى .... اكيد مش هتوصل لدرجه انى احبه بسرعه كدا يعنى .... بس وليه لا احمد جدع ومحترم وبنى ادم بجد وكان واقف جنبى طول الفتره اللى فاتت ومستناش منى مقابل او حاجه ودايما كنت بتقل عليه ومكنش بيتكلم ... دا غير انه هادى وشكله كيوت اوى وطفل اوى كدا فى نفسه ....فضلت اتفرج على صوره وبوستاته وكل حاجه ليها علاقه بيه .... حاله الانبساط والابتسامه المرسومه على وشى دول أنا عارفاهم .... مش عارفه إيه مصدرهم بس حساهم ومستغربه اوى .... قعدت حوالى ساعتين بتفرج على صوره .... غلبنى النوم ونمت ... نمت ... صحيت الصبح مش بدرى اوى بس استغربت لما ملقيتهوش كلمنى او باعتلى اى رساله زى عوايده عشان ننزل نفطر سوا او بيصبح عليا ... كدا أنا اتأكدت انه ممكن يكون زعل ... أنا هكلمه أنا
- الو ... صباح الخير يا استاذ احمد
- صباح النور .. أزيك يا روان
- أنا كويسه .. إيه مكلمتنيش يعنى عشان ننزل
- معلش نمت ومخدتش بالى .. أنا لسه صاحى اصلا
- أنا قولت ممكن تكون زعلت من موقف امبارح او حاجه
- موقف إيه اللى حصل امبارح
- إيه انت اتخضيت كدا ليه ... انى قولتلك صحبتى والمستشفى وكدا ممكن تكون افتكرتنى بتحجج او حاجه
- لا خالص أنا حتى عارف انك روحتى المستشفى
- يا سلام وعرفت ازاى بقا ان شاء الله
- قولت انتى مش هتكدبى يعنى وانا عارفك
- والله .. طب يالا ننزل نفطر ولا انت زهقت منى
- لا خالص أنا اقدر
- طب يالا ننزل .. اشوفك هناك كمان ساعه
- ماشى
- باى باى
- سلام
نزلت روحت الكافيه وفضلت قاعده واحمد كان لسه مش وصل ... فضلت قاعده مستنياه .... اتأخر اوى الحقيقه ... زادت عن الساعه نص ساعه .... اهو وصل اهوو
- إيه ياعم التأخير دا كله
- معلش كان فى مشوار ناسيه وروحت اعمله قبل ما اجى
- طب كنت قولى كنت نزلت متأخر شويه
- معلش والله مجاش على بالى غير بعد ما قفلنا ..متزعليش منى
- لا أنا مقدرش ازعل يسيدى بس طبعا لازم تتعاقب على تأخرك دا
- اتعاقب
- اه طبعا هتتعاقب
- وهتعاقبينى زاى
- هاكل بيتزا اكتر منك النهارده
- يا ستى لو على كدا كليها كلها مش هتفرق معايا
- مالك يا احمد
- مفيش يا روان
- لا انت في حاجه مضايقاك او فيك حاجه
- عادى يعنى حوار كدا متشغليش دماغك بيه
- لا ازاى بقا .. احكيلى
- مش عاوز اتعبلك دماغك
- والله عيب عليك ياعم الكلام دا
- مش عاوز اضايقك بس
- يعنى ينفع أنا افضل احكيلك كل حاجه وانت مش تحكيلى اللى مضايقك كدا
- دى حاجه ودى حاجه تانيه يا روان
- لا الاتنين نفس الحاجه واتفضل احكى بقا عشان مش اضايق بجد
- طب هتسمعينى
- هسمعك يبنى اخلص بقا
- مش عارف احكيلك ازاى او اقولك إيه والله
- قول و احكى اى حاجه واحكى بأى طريقه وانا هفهمك واسمعك
- مش عاوزك تقولى عليا حاجه او كدا
- قولى طيب فى إيه وانا مش هقول حاجه يا سيدى
- بص الحوار هو ان امبارح حصلت حاجه أنا مش مصدقها لحد دلوقتى
- حصل إيه
- حصل ......
" احمد "
" يحلم احمد بحلم من تلك الاحلام اللتى يحلم بها دائما ...احمد الطفل يجلس مع خاله فى مكان غير واضحة معالمه .....
- يعنى خلاص كدا هفضل عايش معاك يا خالو
ايوا يا احمد
- طب ودا مش هيضايقك
خالص يا حبيبى انت عارف انى عايش لوحدى ومليش حد غيرك
- طب هما ليه عملوا كدا
هما مين
- بابا وماما
اللى حصل حصل يا احمد ومنقدرش نغيره
- طب هو أنا السبب
ليه بتقول كدا يا حبيبى
- أنا شوفت واحد مع ماما مره فى البيت ولما شافتنى قالتلى متقولش لحد وخصوصا بابا ...بس الموضوع كتر اوى والراجل دا بقا بييجى عندنا كتير فروحت قولت لبابا على اللى شوفته وبعدها بابا عمل كدا
انت عارف انت عملت إيه كدا يا احمد
- لا
انت كدا غلطت ... عارف اللى بيغلط لازم يحصله إيه
- يحصله إيه
لازم يتعاقب يا احمد لازم يتعاقب ..قوم معايا
- هنروح فين
لازم تتعاقب يا احمد
" يبدأ المشهد فى الوضوح ..يأخذه خاله الى الغرفه ويقوم بحبسه "
- يا خالو ...يا خالو افتح ... يا خالو أنا خايف ... عشان خاطرى افتح ... أنا اسف أنا معرفش انى غلطت ... والله ما هغلط ابدا
= متحاولش ...مفيش حد هيسمعك أنا حاولت زيك كدا برضوا وفشلت
- انت مين
= إيه مش عارفنى
- لا
= مع انك اللى جايبنى هنا
- أنا معرفش المكان دا
= المكان دا المكان الطبيعى لأى واحد بيغلط ولازم يتعاقب يا احمد
- انت عارف اسمى منين
= مش قولتلك انت اللى جايبنى هنا
- أنا خايف
= متخافش شويه وهتتعود على المكان دا
- أنا عاوز اخرج من هنا
= بس انت مش هتخرج من هنا تانى
- ليه
= عشان أنا لازم اقتلك زى ما قتلتنى " يهجم حسام على احمد فيستيقظ احمد على صوت هاتفه "
يا نهار اسود أنا نايم كل دا ... روان بتتصل عليا ..
- الو ... صباح الخير يا استاذ احمد
- صباح النور .. أزيك يا روان
طبعا لازم تستغرب انى مكلمتهاش .. مهى متعوده تصحى تلاقينى بكلمها بس اللى حصل امبارح دا بوظ كل حاجه ..
- أنا قولت ممكن تكون زعلت من موقف امبارح او حاجه
- موقف إيه اللى حصل امبارح
هى عرفت حاجه ولا إيه ... أنا خايف لا تكون عرفت او حست بحاجه او شافتنى ممكن .. بس ازاى وانا كنت مركز و واخد بالى ان محدش يكون شافنى ... أنا خايف اوى كدا ليه ..
- طب يالا ننزل .. اشوفك هناك كمان ساعه
- ماشى
اتفقت اقابلها كمان ساعه فى الكافيه ... بس أنا مش هينفع اروحلها بشكلى دا .. ولبسى اللى متوسخ كدا ...لازم اروح الاول البس اى حاجه وبعدين انزل ... أنا اتأخرت نص ساعه كامله عليها .. طب كنت هقولها إيه ..هقولها معلش اصل روحت اغير هدومى المتبهدله من دم حسام .... أنا لحد دلوقتى مش مصدق ... لازم احاول ميبانش عليا حاجه قدامها .. لازم ابان طبيعى ...
- لا أنا مقدرش ازعل يسيدى بس طبعا لازم تتعاقب على تأخرك دا
- اتعاقب
- اه طبعا هتتعاقب
هى عرفت منين حوار العقاب دا ... أنا حاسس ان هى عارفه حاجه وبتحاول توقعنى ... يكون حسام مماتش وعايش و راح حكالها ... بس ازاى وانا اللى دافنه بأيدى وكمان قافل عليه كويس اوى ... انا شكلى اتجننت ... يارب ما تاخد بالها من حاجه ..
- مالك يا احمد
- مفيش يا روان
- لا انت في حاجه مضايقاك او فيك حاجه
هو أنا باين عليا اوى كدا ... طب اعمل إيه .. اقولها إيه .. اتصرف ازاى ...ما أنا مش هينفع اقولها طبعا .. لا هى ولا اى حد ... هقولها إيه ... ما كنت قولتلها منمتش كويس او فى حاجه ... لازم الاقى حواراقوله دلوقتى ... لازم
- قولى طيب فى إيه وانا مش هقول حاجه يا سيدى
- بصى الحوار هو ان امبارح حصلت حاجه أنا مش مصدقها لحد دلوقتى
- حصل إيه
- حصل ... حصل ان جالى عميل من العملاء بتوع المحل امبارح خد بضاعه و حاجات بمبلغ كبير جدا و كتبلى شيكات
- وبعدين
- روحت اصرف الشيكات دى ملقتش فيها فلوس وبكلم الراجل مبيردش ومش عارف اعمل إيه
- بس كدا
- الحوار صعب اوى ممكن اخسر فيها فلوس كتير اوى
- طب اهدى طيب وهدى اعصابك مفيش حاجه هتحصل ان شاء الله ممكن تلاقى الراجل محطش فلوس فى البنك لسه او حاجه
- معرفش بس لو مجبش الفلوس هتبقى خساره كبيره اوى ... عمال افكر ازاى هعوضها
- مفيش حاجه تستاهل انك تفضل زعلان عليها كدا وخصوصا لو فلوس
- انتى مش عارفه المبلغ دا كان هيعمل معايا إيه
- تغور اى حاجه قصاد انك تبقى زعلان كدا بكرا تجيب قدهم عشر مرات
- اتمنى والله يا روان
- طب ممكن تفك بقى وتضحك عشان خاطرى " تمسك يده "
- والله هحاول بس أنا الموضوع مضايقنى جدا
- بقولك عشان خاطرى ولا أنا مليش خاطر عندك
- لا طبعا .. ربنا العالم انتى عندى إيه
- طب خلاص فك بقا واضحك كدا واتبسط وانسى الحوار دا
- ربنا يخليكى يا روان والله أنا مش عارف اقولك إيه
- يبنى انت عبيط .. متقولش حاجه طبعا هو أنا عملت إيه
- لا بجد والله ربنا يخليكى
- هو مش دا المفروض واجب الصحاب
- اه طبعا
- وبعدين يعنى لو معملتش كدا مين هيعمل يعنى يا استاذ احمد
- مفيش
- طب خلاص بقا أنا بعمل اللى حاسه وعاوزه انى اعمله
- ماشى يا ست روان
- طب يالا الاكل وصل اهو .. يالا ناكل وياعم هسيبك انت تاكل اكتر منى
- لا طبعا يا ناكل سوا قد بعض يا مش واكل
- خلاص ياعم لا خلاص ناكل زى بعض
- ماشى يالا ......