" احمد "
روحت البيت وانا مش مستوعب الموقف اللى حصل من شويه دا ..... مكنتش متوقعه خالص ولا كان على بالى انه هيحصل ..... مش عارف هل روان صدقتنى فعلا وطنشت الحوار ونسيته ولا عملت إيه بظبط .... معتقدش الحوار هيعدى كدا وخلاص كأن مفيش حاجه .... هقولها إيه ... هحكيلها إيه بظبط .... هحكيلها عن هبه ..... هحكيلها عن واحده كنت اعرفها قبلها و كنت بحبها وخانتنى .... ايوا خانتنى .....خانتنى وكان عندها القدره والبرود انها تقف فى وشى وتقولى كدا ....والخاين مينفعش يتزعل عليه .... اوحتى نفتكره ... بس روان مش هتعدى الموضوع دا على خير أنا متأكد ... ربنا يستر .... نمت ... نمت وصحيت .... رنيت على روان مردتش ... يمكن تكون لسه نايمه او حاجه .. لما تصحى اكيد هى هتتصل ... لبست ونزلت الشغل ... يوم روتينى عادى فى الشغل كالمعتاد ... لحد ما تليفونى رن ... روان .... اكيد مش لسه صاحيه دلوقتى .... رديت عليها ....
- الو
- إيه يا روان
- انت فين
- فى الشغل
بتتكلم بطريقه غريبه ... أنا كنت عارف انها مش هتعدى الحوار دا على خير و هتسأل فيه ... اتفقت اقابلها كمان نص ساعه فى الكافيه اللى بنقعد فيه ... روحت على هناك وقعدت استنيتها ... بدأت افكر يا ترى إيه اللى هيحصل ... هقولها إيه ... اقولها الحقيقه كلها ... كل حاجه ... ولا احاول اقولها حاجات وحاجات ... لازم اراعى ان أنا هتكلم عن بنت كنت فى يوم من الايام بحبها مع بنت أنا دلوقتى بحبها وبتحبنى ... اى كلمه هتتقال هتبقى بحساب ... لازم افكر فى الكلام الاول وارتبه فى دماغى عشان ابقى مستعد ... قطع تفكيرى دا دخول روان وبدأنا كلام
- إيه يا روان فى إيه حصل حاجه
- بص يا احمد انت عارف اننا بنحب بعض ولا لا
- طبعا عارف
- وعارف ان اى اتنين بيحبوا بعض لازم يكونوا صرحاء مع بعض ولا لا
- طبعا
- طيب أنا عاوزه اعرف حوار هبه دا ومن غير كدب
- ما أنا قولتلك
- لا انت مقولتليش حاجه
- هحكيلك فيه إيه
- أنا عاوزه اعرف منك كل حاجه عن الحوار دا وبصراحه ومن غير لف و دوران
- مش حابب احكيلك الحوار دا
- ليه بقا
- هيضايقك
- لا احكى وملكش دعوه
- متاكده
- أنا سامعاك
- من اربع سنين كدا اتعرفت على هبه دى فى عيد ميلاد واحد صاحبى و هى كانت معزومه فيه وبدأنا نتكلم وننزل وكدا لحد ما حبينا بعض وكنت بحبها جدا وخلاص كانت بنسبالى العوض اللى ربنا بعتهولى يعوضنى عن كل حاجه وبعد فتره كبيره و احنا سوا لقيتها بتقولى احنا ننفصل احسن و سافرت ومعرفتش عنها حاجه
- بس كدا
- اه بس كدا
- مفيش اى حاجه تانى
- لو فيه مش هقولك ليه طيب
- يعنى انت متعرفش هى ليه سافرت او أيه السبب اللى خلاها تقطع علاقتها بيك او اى حاجه
- يعنى
- يعنى إيه يعنى ..عارف ولا لا
- عارف بس مش عاوز احكي الكلام دا
- ليه
- مش حابب اتكلم فى الموضوع دا ولا حابك تعرفى
- احمد انت لو مقولتليش دلوقتى إيه اللى حصل اعتبر اللى بينا انتهى ..
" روان "
روحت الكافيه ... لقيت احمد قاعد مستنى ... روحت قعدت وبدأت معاه الكلام ...
- إيه يا روان فى إيه حصل حاجه
- بص يا احمد انت عارف اننا بنحب بعض ولا لا
كان كل همى واللى أنا عاوزاه انه يحكيلى الحقيقه وميحاولش يكدب عليا .. عوزاه يوضحلى الكلام اللى حكتهولى ساره .. عاوزه اسمعه منه .. عاوزه اصدقه وارجع اثق فيه تانى .... يارب يقولى الحقيقه وميكدبش ..
- مش حابب احكيلك الحوار دا
- ليه بقا
- هيضايقك
- لا احكى وملكش دعوه
بدأ يحكيلى ... فيه تشابه كبير بين اللى بيحكيه واللى ساره قالتهولى ... بس لحد دلوقتى مقاليش ليه سابوا بعض او هى سافرت ليه او إيه اللى وصل الامور لكدا ... عاوزه افهم ... عاوزاه يشرحلى كل حاجه ... حاسه انه بيكدب ...مش عارفه ليه مش مصدقاه ....ليه يعمل كدا ...
- عارف بس مش عاوز احكي الكلام دا
- ليه
- مش حابب اتكلم فى الموضوع دا ولا حابك تعرفى
عمال يماطل ويحاول يتهرب من الكلام .... كل دا بيأكدلى انه مخبى حاجه او بيكدب عليا ... مش عارفه ليه خلاص ثقتى انعدمت فيه .. حاسه انى اتخدعت .. بجد مش متخيله انه بيكدب عليا ... محستش بنفسى غير وانا بقوله ...
- احمد انت لو مقولتليش دلوقتى إيه اللى حصل اعتبر اللى بينا انتهى
- قصدك إيه
- قصدى انت فهمته يا احمد
- انتى بتكلمى بجد يا روان
- انت اللى مش عاوز تحكى حاجه
- ما أنا حكيت كل حاجه
- انت كداب
- لا أنا مش بكدب عليكى يا روان
- انت محكتش كل حاجه .. أنا عاوزه اعرف كل حاجه
- مش عارف اقولك إيه
- قولى الحقيقه
- الحقيقه ان هبه كانت خاينه
- ازاى
- خانتنى مع واحد اتعرفت عليه وهى بتكلمنى وبتحبنى .... وقررت انها هتكمل معاه حياتها وهتبعد عنى
- وبعدين
- لما جت قالتلى مستحملتش وحاولت امنعها واوقفها بس....
- بس إيه
- وعدتنى انها هتحاول تفكر فى الموضوع وان أنا مش وحش وان هى اللى معرفتش تحبنى زى ما أنا حبيتها وانها هتفكر فى كلامى
- وبعدين حصل إيه
- لقيتها باعتالى الرساله دى .. خدى اقريها
- هات ... حبيبى احمد ....انا هبه ... أنا اشتريت رقم جديد عشان مسافره خلاص مع البنى ادم اللى اخترت اكمل معاه حياتى .. أنا عارفه انى كنت وعدتك انى افكر فى كلامك بس أنا مقدرش اعيش معاك وانا متعلقه بحد تانى ... احمد انت احسن بنى ادم شوفته فى حياتى .. عاوزاك تعرف انك مش وحش او فيك عيوب عشان أنا اكرهك ... بس أنا اللى مقدرتش استمر فى علاقتنا وابادلك نفس مشاعرك ليا ... حسيت انى محتاجه اطلع من العلاقه دى ... صدقنى دا احسن ليا وليك ... احسن من انى استمر فى اقناعك واقناع نفسى انى بحبك وادمرك وادمر نفسى معاك .. احمد أنا مش عاوزاك تكرهنى عاوزاك دايما تفتكرلى اى حاجه حلوه عملتها علشانك وتفتكرنى بالخير واعرف انى هفضل فاكراك دايما وهتفضل على بالى عشان انت صديق وصاحب متتنسيش وبجد ربنا يرزقك بالبنى ادمه اللى شبهك اللى تعوضك كل دا وتكون بتحبك بجد وانت بتحبها .. أنا مش عاوزاك تحاول تكلمنى او تدور او تتواصل معايا .. صدقنى أنا هبقا اسعد لو كملت فى حياتك عادى ودورت على البنى ادمه اللى تستحقك بجد زى ما أنا عملت .. أنا كلمت صحابى وقولتلهم انى مسافره وانهم ميحاولوش يتواصلوا معايا .. لو حد منهم قابلك اوعى تقوله على رقمى دا او تقوله انى مسافره مع حبيبى ... ربنا يوفقك يا احمد ...هبه...
- ارتحتى لما عرفتى كل حاجه
- إيه دا
- دا اللى أنا مكنتش عاوزك تعرفيه وكنت بحاول انساه ومفكرش فيه
- وانت ليه مقولتليش على كل دا
- عشان انتى البنى ادمه اللى حسيت انها العوض يا روان وحسيت انك انتى اللى هتنسينى كل دا .. وفعلا عملتى كدا
- أنا مكنتش اعرف كل دا
- أنا محبتش اتكلم مع ساره كتير لان معنديش كلام اقوله ليها
- احمد أنا .. أنا بجد اسفه .. أنا مكنتش اعرف كل دا .. اسفه انى افتكرتك بتكدب عليا وانى محاولتش اصدقك او اشوف كل دا قدامى
- أنا عاذرك يا روان .. أنا بس كل اللى ضايقنى انك مش واثقه فيا
- أنا اسفه والله يا حبيبى حقك عليا .. بس أنا الموضوع كان مضايقنى وشاغل تفكيرى وكان لازم اعرفه ومكنش قدامى غير ساره لما انت رفضت تحكى ... وساره متعرفش كل دا .. أنا بجد اسفه
- خلاص ماشى ولا يهمك
- طب ممكن تضحك بقا عشان اعرف انك مش زعلان منى
- أنا مقدرش ازعل منك
- أنا بحبك
- وانا كمان يا روان
- طب ممكن اسألك سؤال
- اسألى
- انت ليه لسه شايل الرساله دى معاك
- عادى .. عشان كل ما انسى واحاول احن ليها افتكر اللى هى عملته معايا
- لا انت مش محتاج دا دلوقتى ... أنا جنبك ومعاك وهفضل جنبك على طول يا احمد فاهم .. بمزاجك او غصب عنك
- ربنا يخليكى ليا يارب
- ويخليك ليا ... طب ممكن بقا لو أنا غاليه عندك تمسح الرساله دى خالص ومتحاولش تفكر فيها ولا فأى حاجه ليها علاقه بهبه تانى
- حاضر
- توعدنى
- اوعدك
- بحبك
فضلنا قاعدين لحد ما الوقت اتأخر و روحنا ... روحت البيت وغيرت وقعدت .... أنا مش متخيله انى لفتره كنت شاكه فى احمد ومش واثقه فيه .. مش مصدقه انى كنت ظالماه للردجه دى ومكنتش واخده بالى من الحاجات دى كلها وسمحت لعقلى يضحك عليا و غضبى يسيطر عليا .. أنا بجد النهارده عرفت انى بحب احمد اوى .. أنا مش هقدر استغنى عنه .. ولا عمرى هفكر تانى انه ممكن يعمل حاجه تأذينى ... أنا واثقه فيه ثقه عمياء ... بحبه ......