كونى واحد من اللى عانوا مع كتب التسويق النظرية، و أفكار الشركات العتيقة عن التسويق،
واللخبطة بينه وبين مصطلحات تانية زىّ البيع، قررت أنى اكتب كتاب يوصّل التسويق ونظرياته
وأساليبه العالمية الحديثة واللى بتشوف التسويق من المنظور الشامل الواسع.
ليه استخدمت اللغة العاميّة فى الكتاب؟
على الرغم من حبى الشديد للغة العربية، واستخدامى ليها باستمرار فى أى حاجة بكتبها عن
التسويق، لكنّى كنت ادّام معضلة تسويقية كبيرة، وهى إنّ فى مسافة كبيرة جداً ما بين
المحتوى التسويقى الأجنبى والمحتوى التسويقى العربى.
اللى جرّب يقرا فى كتب التسويق العربية، وأغلب الكتب دى هى كتب جامعية، ومع الاحترام
الكامل لها، لكن أغلب الكتب دى بتورّينا التسويق فى قالب نظرى جامد، وغالباً هيبقى قدامك
طريقين بعد ما هتجرّب القراية فى الكتب دى، يا أما هتفهم التسويق غلط و تكرهه، يأما هتبدأ
تدوّر على كتب أجنبية فى التسويق عشان تبدأ تعرف أكتر عن المجال بشكل أدق، واللى انا
عملته فى الكتاب ده هو محاولة اختصار المسافة دى.. ما بين الكتاب العربى والكتاب الأجنبى،
بشكل ميقلقش اللى بيقراه من تكرار تجربة مملة مع التسويق، و فى نفس الوقت يختصرله أهم
اللى موجود فى الكتب الأجنبية عن التسويق.
اللغة اللى استخدمتها هى لغة بسيطة جداً، لغة بنستخدمها مع بعض، وبنسمعها فى كل حتّة،
وبتشمل كل الكلمات اللى كنت محتاجها عشان أوصّل المعلومة التسويقية بشكل سلس وسريع
جداً، بما فى كده استخدامى للمصطلحات الانجليزية، وهتلاحظ ان المصطلحات الانجليزية فى
الكتاب مش ترجمة حرفية للمصطلحات العربية، لكن هتلاقيها كلمات بتوصّل المعلومة بوضوح و
ببساطة وده اللى كنت محتاجه فى الكتاب ده.
لمين الكتاب ده؟
الكتاب ببساطته، وشموليته فى نفس الوقت، بيوجّه المعلومات اللى فيه لكل الفئات اللى
محتاجة تعرف عن التسويق، خصوصاً الفئات اللى متعرفش كتير لسّه عن التسويق. ممكن يقراه
فئة المبادرين اللى محتاجين يعرفوا عن التسويق عشان يفيدهم فى شغلهم الخاص، او فئة
الموظفين او خريجي الجامعات فى بداية حياتهم المهنية وعاوزين يتعرفوا على المجال التسويقى
فيختاروا ويقرروا إذا كانوا هيمشوا فى مجال التسويق، وهيمشوا فى أنهى جزء من ه، أو فئة اللى
عاوزين يعرفوا عن التسويق بجانب شغلهم الأساسى أياً كان..
فى الكتاب ده انا اعتمدت على كتب ومصادر كتير فى التسويق كان أهمهم الكتاب الكوتلرى
واللى أكيد انت محتاج تقراه لو هتبدأ ،’Principles of Marketing – الأشهر ’أساسيات التسويق
تتعمق أكتر فى التسويق.
على العموم.. ده كان جهدى المتواضع اللى حبيت احطهّ فى تجربة جديدة أتمنى انها تفيدكم
وتعجبكم إن شاء الله..