في اليوم التالي اصطحب 'عبد الحميد' 'جمال' إلى طبيب متخصص في أمراض السرطان، وبعد إجراء الفحوصات اللازمة أظهرت النتيجة أنه بالفعل يعاني من سرطان القولون في المرحلة الثانية، وعليه أولاً إزالة الورم لوجود كتل ونزيف، وبعد ذلك يقوم بإجراء فحص آخر وبدء العلاج الكيميائي للقضاء على السرطان نهائياً بإذن الله..
༺༻
بعد أيام قليلة تمت إزالة الورم وخرج 'جمال' من غرفة العمليات إلى العناية المركزة ليبقى تحت الملاحظة. ومنع عنه الطبيب أي زيارة حتى من أفراد عائلته..
وأمام باب غرفة العناية المركزة اقتربت 'نرجس' من والدتها 'إيزابيل' وهما جالستان على كراسي الإنتظار..
"والحديث بينهما دائماً باللغة الفرنسية"
'نرجس' :- ماما !!
'إيزابيل' :- عارفه أنك عايزه تقولي أن دي فرصتنا نستغل تعبه ونخلي قلبه يحن عليكي !!
'نرجس' :- أيوة، لكن إزاي والدكتور مانع أي حد يدخل عليه ؟!!
'إيزابيل' :- بسيطة، لكن مش دلوقتي لأن 'جمال' لسه تحت التخدير. هنستنى لما يصحى !!
'نرجس' :- ماما، إحنا لازم نشوف طريقة تقنع بابا قبل ما تضيع الفرصة !!
'إيزابيل' :- هشش، خلي الكلام لبعدين. 'عبد الحميد' بيبص ناحيتنا !!
'نرجس' :- ااه حاضر !!
'عبد الحميد' - لنفسه - ... " يا رب صبرني. شبه الشياطين وهم بيوسوسوا لبعض !! " ...
بعد مرور ساعتين..
خرجت الممرضة 'أحلام' من العناية واقتربت من 'نرجس'..
'أحلام' - بهمس - :- البيه صحي !!
لمعت عيون 'نرجس' من الفرحة..
'نرجس' :- يلا يا ماما نروح لبابا. 'أحلام' سمحت لنا ندخل له !!
'إيزابيل' :- كويس، لكن خلينا نخلص من جوزك في الأول !!
قامت 'إيزابيل' واقتربت من 'عبد الحميد'، وقام عن كرسيه احتراماً..
'عبد الحميد' :- شفتكم انبسطتم. هي قالت لكم الممرضة بحاجة تفرحكم عن حالة عمي ؟!!
'إيزابيل' :- ااه قالت لنا أنه في حالة مستقرة اطمن !!
'عبد الحميد' :- حالة عمي مستقرة من وقت خروجه من أوضة العمليات، فإيه الجديد ؟!!
'إيزابيل' :- هي استقرار حالة عمك لحد دلوقتي ماتخليناش نقرح ؟!!
'عبد الحميد' :- هو أنتم فرحانين بجد؟ فكرت أنكم عايز ..!!
'إيزابيل' - مقاطعة - :- من مصلحتنا أنه يفضل عايش حتى نطمن على ميراثنا أنا وبنتي !!
'عبد الحميد' :- أه دلوقتي وضحت الرؤيا، والله بجد فكرت أنكم فرحتم بصحة عمي، مش خوف على ثروته !!
اقتربت 'إيزابيل' من 'عبد الحميد'..
'إيزابيل' :- وقت ما يجيب لنا حقنا، فعادي هو يغور لأي داهية، وأنت معاه لو عايز، وأخواته كمان !!
ارتفعا حاجبا 'عبد الحميد' مندهشاً من صراحتها، وتكلم بالعربية..
'عبد الحميد' :- اقلب القدرة على فمها تطلع البنت لأمها. اللهم اكفنا من غدرهم. يعني في يوم لو أنا تعبت، بنتك هتعمل فيا زي ما بتعملي في عمي ؟!!
'إيزابيل' :- تكلم بالفرنسية، أنت عارف أتي ماقدرتش أتعلم اللغة العربية كويس !!
'عبد الحميد' - بالفرنسية - :- صح خليكي على الفرنسي، العرب حاجة ثانية. عند العرب لو تخاصم زوجين وحصلت شدة لواحد منهم هتلاقي الثاني ينسى كل الخلاف اللي بينهم وجري خايف عليه !!
'إيزابيل' :- وبعدين إيه هيحصل؟ يعني هيكسبوا حاجة لو خافوا على بعض ؟!!
'عبد الحميد' :- أيوة، هيكسبوا الحب لبعضهم، والرحمة بينهم، والإحترام لنهاية حياتهم !!
هزت 'إيزابيل' رأسها أنه هراء ولا ترغب في سماع المزيد..
'إيزابيل' :- خلاص أسكت، جيت اقولك أني و'نرجس' عاوزينك تروح للفيلا وتجيب لنا هدوم حتى نغير الهدوم اللي علينا !!
'عبد الحميد' :- روٓحوا وارتاحوا، عمي مش هيصحى دلوقتي، فبلاش تضيعوا وقتكم على الفاضي !!
'إيزابيل' :- إحنا قاعدين علشان أي حد يجي يزور 'جمال' يشوف أننا قايمين بواجبنا معاه !!
'عبد الحميد' :- أيوة أنا فاهم سبب قعدكم هنا مش حب لعمي، قصدي أنه محدش عارف بمرضه، فمحدش هيجي اطمني. ودلوقتي يلا خذي بنتك وروحوا !!
'إيزابيل' :- قولت لك لا مش هنروح !!
'عبد الحميد' :- خلاص معاكي موبايل اتصلي بـ 'علية' وخليها تجهز لكم هدوم في شنطة وتبعثها مع 'أكرم' !!
'إيزابيل' :- هوفف خلاص مش عايزين هدوم، روح جيب لنا أكل من مطعم راقي ممتاز مش من كافتريا المستشفى، وماتنساش تجيب لنا قهوة. هو أنت ناوي تسيبنا نموت من الجوع ؟!!
'عبد الحميد' - بابتسامة - :- مش دا أحسن ليا وليكم !!
'إيزابيل' - بعصبية - :- روح هات الأكل يمكن يطلع مسموم ونرتاح منك !!
نظر 'عبد الحميد' إلى الأعلى..
'عبد الحميد' :- آمين، ربنا يسمع منك !!
صمتت 'إيزابيل' وتركت 'عبد الحميد' قبل أن تحدث بينهما مشكلة فيرفض الخروج، وتفشل خطتها..
خرج 'عبد الحميد' من المستشفى ودون إضاعة للوقت، دخلت 'نرجس' و'إيزابيل' غرفة العناية بسرعة بمساعدة الممرضة. ورأت 'نرجس' والدها فائق من التخدير. فبدأت تتظاهر بالبكاء ورمت بنفسها بين ذراعيه..
'نرجس' :- الحمدُلله على سلامتك يا بابا، هيء مارضيتش أروح إلا لما أشوفك وأطمن عليك !!
'جمال' :- آااي يا بنتي وجعتيني، لسه خارج من عملية صعبة !!
'إيزابيل' :- بنتك مسكينة مش مصدقه أنك فقت من التخدير، إستنيناك أكثر من ست ساعات علشان نشوفك وأنت كده تقابلنا ؟!!
'جمال' :- اعذروني، مش قادر أتحمل التخدير والوجع !!
'نرجس' :- يا ريت كنت أنا، ماكنتش أعرف أن مرضك خطير لدي الدرجة !!
'جمال' :- دا سرطان مش حاجة بسيطة، بيهاجم الجسم كله !!
'نرجس' :- ما دمت عارف أن مرضك خطير لدا الحد فأنت راضي اتبهدل من بعدك ؟!!
'جمال' :- ومين هيعمل كده ؟!!
قاطعت الممرضة عليهما الحديث..
'أحلام' :- بسرعة لو سمحتم أخرجوا قبل ما يجي حد ويشوفكم وتحصل لي مصيبة !!
ابعدتها 'إيزابيل' عن 'جمال' و'نرجس'..
'إيزابيل' :- إحنا دفعنا لك ولما نخرج هندفع لك مرة ثانية، لكن دلوقتي سيبينا خمس دقائق لوحدنا. يلا اطلعي واقفلي الباب وراكي !!
فرحت الممرضة عندما سمعت كلمة "دفع"..
'أحلام' :- حاضر هخرج واسيبكم لوحدكم بس بسرعة لو سمحتم !!
'إيزابيل' :- طيب قولت لك خمس دقايق وهنخرج يلا أمشي !!
'أحلام' :- أمرك مدام !!
خرجت الممرضة من الغرفة، ةأشارت 'إيزابيل' لابنتها أن تسرع في الحديث قبل أن يعود 'عبد الحميد'..
'نرجس' :- بابا أنا خايفه مش عارفه هيحصل لي إيه لو مُت لا قدر الله. أنا بنتك الوحيدة، المفروض تجب لي كل حاجة من غير ما تفكر. أنت علشان مين تعبت كل السنين اللي راحت؟ مش علشاني أنا ؟!!
حن قلب الأب على ابنته..
'جمال' :- أيوة، لكن حاجات كثيرة هتحصل لو بعت لك كل حاجة !!
'نرجس' - بغضب - :- شفت إزاي بتفكر في كل حاجة إلا مستقبل بنتك بعد ما تموووت ؟!!
'إيزابيل' - بهمس - :- 'نرجس' !!!
أدركت 'نرجس' خطأها..
'نرجس' :- قصدي بعد الشر !!
شعر 'جمال' بالحزن على أنانية ابنته وفكر في حل للتخلص من الاستمرار في الكلام معها لأنه شعر بالتعب..
'إيزابيل' :- بنتك ماتقصدش حاجة، هي بس خايفه من اخواتك لو يزيد فيهم الطمع ويطلعوها من غير ميراث. وكمان 'عبد الحميد' بنتك مش مطمنه له !!
'جمال' :- ولا تقصد، مابقاش يهمني، اسمعوني أنا تعبان دلوقتي، ولما ترجع صحتي شويه هصدر قرار تكون 'نرجس' شريكة مع 'عبد الحميد' في إدارة الفندق والقرية، خلاص ارتحتم ؟!!
'إيزابيل' - بلهفة - :- يعني 'نرجس' هتقدر تمضي على أي ورقة رسمية ؟!!
'جمال' :- أيوة، أنا طلبت منها من زمان، وأكثر من مرة، تشتغل معانا، وهي خريجة هندسة بس عايزة الفلوس تيجي لها من غير ما تعب !!
دخل 'عبد الحميد' وسمع آخر كلماتهم..
'عبد الحميد' :- ودلوقتي بعد ما نجحت خطتم مع عمي، تقدروا تتفضلوا تسيبوه يرتاح منكم !!
فزعت 'نرجس' من صوت 'عبد الحميد' والتفت نحوه بكره..
'نرجس' :- وأنت مالك؟ هو بابايا أنا !!
التفت 'عبد الحميد' إلى 'إيزابيل'..
'عبد الحميد' :- وجوز الهانم أيوة عارف يا حماتي فمافيش داعي تكرري كلام بنتك، أنا فاهم حركاتكم، لكن اللي عايزكم تفهموه هو أنكم مش هتقدروا تاخذوا أي قرار من عمي وهو في دي الحالة، لأنه هينهدم كل اللي بنيناه طوال السنين !!
'إيزابيل' :- وإيه دخلك بينا وبينه؟ هو والدها وحر يجيب لها اللي عاوزه حتى روحه !!
اقترب 'عبد الحميد' بهدوء من سرير 'جمال' وجلس بجانبه على كرسي..
'عبد الحميد' :- سامع يا عمي؟ هيأخذوا روحك بعد ما تجيب لهم كل حاجة. الحقيقة أنا أسف لأنك سمعت منهم كلام زي السم وأنت في دي الحالة، فلو سمحت سيبني أرد عليهم !!
أومأ 'جمال' برأسه بحزن، وإلتفت 'عبد الحميد' إلى 'إيزابيل' و'نرجس'..
'عبد الحميد' :- إحنا خبينا مرض عمي عن الصحافة والناس لأنتم نسيتوا من طمعكم أنه في حاجة اسمها سمعة شركة، حاجة اسمها أسهم في بورصة، حاجة اسمها شركاء في الفندق والقرية السكنية، فلو مشي عمي بعد كلامكم وأصدر قرار إي قرار وهو تعبان هتحصل مشاكل كثيرة وهنخسر حاجات أكثر، وبغبائكم هتضيعوا كل حاجة ومش هتلاقوا ولا مليم. فأحسن حل تختاروه يا أما تحترموا عمي وتقفوا معاه في مرضه وأنا مستعد أشغل 'نرجس' عندي لحد ما تتعلم..!!
'نرجس' :- نعم؟ عايزني أنا صاحبه الكل أشتغل زي أي موظف عندك ؟!!
'عبد الحميد' :- بقيتي صاحبة الكل ولسه عمي موجود قدامك؟ يا غبية كان قصدي أنك محتاجة أول حاجة تتعلمي أصول الشغل وبعدين تقدري تديري أملاك والدك، لكن دلوقتي بقى تحدي بيني وبينكم، لو قدرتوا تأخذوا شبر واحد من ممتلكات عمي، يلا اخرجوا برا وسيبوا عمي يرتاح من وشكم وكلامكم !!
'نرجس' :- مش هنخرج بأمرك !!
'عبد الحميد' :- يلا يلا يا قمرات العفاريت، برا قبل ما انادي لكم الحراس يجيوا يطردوكم زي الكلاب المريضة !!
صمتت 'إيزابيل' وغادرت وسحبت 'نرجس' خلفها من ذراعها..
دخلت 'نرجس' سيارتها مع والدتها ونظرت إلى عجلة القيادة بحقد..
'نرجس' :- ماما إحنا لازم نخلص من 'عبد الحميد' قبل ما يموت بابا وتضيع كل أملاكنا !!
أسندت 'إيزابيل' مرفقها على نافذة السيارة وأسندت صدغها بإصبعها وهي تفكر..
'إيزابيل' :- أيوه يا 'نرجس'، لازم !!
༺༻