دخلت 'حنان' منزلها بلهفة واحتضنت شقيقها بشدة سعيدة بزيارته. وفي نفس الوقت، وصلت حافلة مدرسة ابنتيها 'فرح' و'سارة'. دخلتا المنزل وركضتا وعانقتا خالهما لأنه حنوناً عليهما ويعطيهما مبالغ جيدة لإسعادهما. بعد دقائق دخل 'فادي' الصالة..
'فادي' :- يلا الغداء جاهز على السفرة وأنتم يا بناتي الامورات تعالوا اساعدكم تغيروا هدومكم وتغسلوا يديكم !!
ذهب 'فادي' مع ابنتيه، وترك 'عبد الحميد' و'حنان' وحدهما..
'عبد الحميد' - باعجاب - :- ما شاء الله معاكي راجل مايقدرش بثمن. من زمان والكل بيحترمه لألتزامه وأخلاقه العالية !!
'حنان' - بابتسامة - :- الحمدُلله. عمره ما زعلني ولا حتى بكلمة واحدة !!
'عبد الحميد' - بتنهيدة - :- ما شاء الله ربنا يخليكم لبعض. طيب تعالي نقعد، عايز أتكلم معاكي في موضوع مهم قبل ما ييجوا البنات ويقاطعونا !!
'حنان' - باستغراب - :- حاضر !!
دخلت 'حنان' الصالون مع 'عبد الحميد' وجلست بجانبه على أكبر أريكة..
'حنان' :- أتكلم يا أخويا. إيه هو الموضوع المهم ؟!!
صمت 'عبد الحميد' للحظات وتردد في فتح الموضوع، لكنه اتخذ قراره عندما تذكر تصرفات زوجته..
'عبد الحميد' - ببطء - :- 'حنان' أنا عايز اتجوز !!
قامت 'حنان' من مكانها بفرحة وحماس..
'حنان' :- يعني خلاص طلقت بنت الإيه؟ مش قادرة انطق وأقول أنها كانت مراتك. لو تعرف من امتى وأنا مستنيه اللحظة دي، من زمان، مش قادرة أصدق أنك خلاص خلصت من المجنونة، دي خلت عيشتك طينه مهببة، نفسي دلوقتي أخرج وأوزع حلاوة طلاقك على كل من أقابله في الشارع. من فرحتي عايزه ازغرط !!
رفعت يدها فوق فمها استعداداً لـ "زغروطة" طويلة، لكن 'عبد الحميد' أمسك بيدها سريعاً قبل أن يسمعها أحد ويسألها عن السبب..
'عبد الحميد' - بغضب - :- اقعدي هتعملي إيه؟ وإيه اللي بتقوليه؟ أنا ماطلقتش 'نرجس' ومش عايز أطلق لأني مش عايز أحرم ولادي من أمهم، وكمان علشان والدها اللي أخد بإيدي واعتبرني زي ابنه بالضبط !!
'حنان' - بعصبية - :- ومن امتى هي كانت أم لولادك؟ ماتقلقش هم مش هيحسوا بفرق في وجودها أو من غيرها !!
'عبد الحميد' - بحدة - :- 'حنان' !!
'حنان' - بقهر - :- طيب خلينا في المهم. طالما أنك ماطلقتهاش فإيه اللي عاوزه مني دلوقتي ؟!!
'عبد الحميد' :- زي ما قولت لك، فعايزك تدوري لي على عروسة !!
'حنان' - ساخرة - :- بس كده؟ من أي سوق عايزني ادورها لسيادتك ؟!!
'عبد الحميد' :- أنا مابهزرش، أنا بتكلم بجد، عايز اتجوز تأديب لـ 'نرجس'. قرصة ودن يعني !!
'حنان' :- آه وبعدين هتطلق العروسة؟ يعني عاوز القرصة لكم شهر ؟!!
'عبد الحميد' :- على حسب الوقت اللي تحتاجه حتى تتعلم إزاي تحترم جوزها !!
'حنان' - بحدة - :- 'عبد الحميد'؟ أنت عارف أن الجواز حرام وأنت ناوي علي الطلاق؟ أسمع يا باشمهندس أنا مش هشاركك في الذنب، ولو عاوز تأدب مراتك فدور لك على طريقة ثانية أسهل لك وسيب فكرة الجواز بالمرة. بنات الناس مش لعبة تتجوزها وبعدين تطلقها ؟!!
'عبد الحميد' :- طيب خلاص اطمني أوعدك أني مش هطلق. هخليها تبقى على ذمتي وأصرف عليها ولكن بشرط واحد ؟!!
'حنان' :- وفيه شرط على المسكينة، قصدي على العروسة؟ يلا قول سمعني ؟!!
'عبد الحميد' :- أنها ماتحاولش تتعرف عليا لأني مش عايز أتعرف عليها، يعني تقعد مكانها في بيت والدها ومصروفها هيجي لها كل أول شهر !!
'حنان' - بذهول - :- ومين دي اللي هتقبل على نفسها تتجوز وهي قاعدة في بيت والدها ؟!!
'عبد الحميد' :- واللهِ في ستات كثير هتوافق !!
'حنان' - بإستهزاء - :- ومين دي المجنونة ؟!!
'عبد الحميد' :- أيوة هو دا المطلوب منك !!
'حنان' - بدهشة - :- ادور لك على عروسة مجنونة ؟!!
'عبد الحميد' :- أسمعي أنتي يا مجنونة، الأمر بكل بساطة أنك هتنقي لي أبشع عروسة تشوفيها !!
فتحت 'حنان' فمها مذهولة من وصف أخيها للعروس..
'عبد الحميد' :- قفلي بقك، عايزه تعرفي ليه ؟!!
أومات برأسها ببطء..
'عبد الحميد' - بغرور - :- لأني عايز أضرب العصفورتين بحجر واحد !!
'حنان' - بدهشة - :- إزاي هتضرب 'نرجس' والعروسة في وقت واحد؟ قصدي في إيه بيشتركوا؟ الحقيقة أنت اليوم مش طبيعي !!
'عبد الحميد' - متذمراً - :- لو تشغلي مخك الصغير معايا شويه هتقدري تفهميني بسرعة. أول حاجة هتموت 'نرجس' لما تعرف أني تجوزت عليها واحدة بشعة مش من مستوى جمالها، وهينكسر غرورها. والحاجة الثانية هي 'العروسة البشعة' مش عايزها تجي لي في يوم وتقولي أني حرمتها من الجواز والخلفة بجوازها مني وهي أصلاً ماكانتش تحلم تلاقي راجل يقبل بيها !!
هزت 'حنان' رأسها بحزن على أفكار أخيها..
'حنان' :- وهو في ست بشعة الأيام دي بالعمليات والميك اب !!
'عبد الحميد' :- مش كل واحدة تقدر تدفع تكاليف عملية سمكرة وتجديد. يعني مش صعبة تلاقيها !!
'حنان' :- طيب نورني وقولي فين الاقيها؟!!
'عبد الحميد' :- سهلة جداااً !!
'حنان' :- جداً؟ طيب سهلها عليا الله يسهل عليك. لعلمك أنا ماشيه وراك بس لأني عايزة أشوف 'نرجس' ميتة من القهر زي ما بتقهرني وتحرق قلبي عليك !!
'عبد الحميد' :- هاهاهاها طيب أسمعي يا مقهورة. هتدوري على واحدة فيها تشوهات خلقية، وبكده هتلاقي العروسة المطلوبة منك !!
'حنان' :- يعني أنت عايزني أقول لكل خاطبة دوري لي على عروسة مليانه عاهات؟ إيه اللي بتقوله؟ هيفكروا العاهة موجودة في رأسي أنا؟ اسمع يا أخويا واضح أنك جعان قوي دلوقتي ومش داري باللي بتقوله !!
'عبد الحميد' - بضيق - :- يووووه جيت لعبد المعين يعن..!!
'حنان' - تقاطعه بحماس - :- لا لا خلاص اطمن أنا لقيت لك العروسة، وعلى حسب طلبك بالضبط !!
'عبد الحميد' - بلهفة - :- يعني هقدر أتجوز الليلة؟ ما هي أكيد هتوافق تتجوز بسرعة !!
'حنان' - لنفسها - ... " هجوزك 'توليب' صحبتي لأني عارفه أخلاقها وأدبها. ومعاها هتعرف إيه معنى الزوجة الصالحة. وهتعرف الفرق بين الجواز المستورد والجواز البلدي الأصيل !! " ...
'عبد الحميد' :- يلا قولي أنتي تعرفيها؟ وإمتى هتروحي تكتبي الكتاب مع جوزك ؟!!
'حنان' - بفزع - :- يا لهوي وجوزي ماله؟ أنت بتفكر تجوزه معاك ؟!!
'عبد الحميد' :- إيه أجوزه، أفهمي، هعمله له توكيل يكتب كتابي عليها، لأني زي ما قولتلك مش عايز اشوفها أو تشوفني، على الاقل في الوقت الحاضر، يمكن هحتاج اشوفها في المستقبل. يعني لو ماقدرتش أخلي 'نرجس' تروح تشوف ضرتها لوحدها !!
'حنان' :- أفهم منك أنك مش ناوي تعمل لها فرح ؟!!
'عبد الحميد' :- هاهاهاها تعرفي شكلك جميل وأنتي بتنكتي؟ وهو مين يا بنتي اللي عايز يحضر فرح واحدة مليانة عاهات وبوش يقطع النفس ؟!!
'حنان' :- أستغفر الله العظيم من كلامك. النصيب لما ييجي مابيعرفش لا عاهة ولا سليم كله نصيب !!
'عبد الحميد' :- حاضر يا حضرة الشيخة. يلا روحي جيبي جوزك أعمل له توكيل وخلصي لي الموضوع في أقرب وقت !!
'حنان' - بخبث - :- وأنت مستجعل ليه؟ مش عايز تعرف على الأقل اسم عروستك ؟!!
'عبد الحميد' :- مايهمنيش أعرف اسمها لكن يلا طالما لقيتي العروسة الحسناء اللي هتشرف بإسمي فقولي حتى أعرف إسم عيلتها !!
'حنان' - بسرعة - :- هي من عيلة معروفه وتتشرف بنسبها. هجوزك من 'توليب' بنت عم 'عبد الصبور' الله يرحمه !!
قام 'عبد الحميد' من مكانه بعصبية والتفت إلى 'حنان'..
'عبد الحميد' :- أنتي عايزه تجوزيني بصحبتك؟ ماتفكريش إنك هتقدري تربطيني بيها. قولتلك مش عاوزها بنت عادية !!
'حنان' - بمكر - :- ومين قال لك أنها بنت عادية ؟!!
'عبد الحميد' :- تقصدي إيه ؟!!
'حنان' :- 'توليب' عمرها دلوقتي 36 سنة تقريباً زي عمري، يعني ماسألتش نفسك هي ليه ماتجوزتش لحد دلوقتي ؟!!
'عبد الحميد' :- فسري كلامك ؟!!
فكرت 'حنان' في أفكار لجذب 'عبد الحميد' لـ صديقتها..
'حنان' :- أول حاجة ماعندهاش خالص أي ملامح جمال. والحاجة الثانية والدها مات النهارده الفجر ومابقاش ليها سند. يعني لو حبيت تطلقها في يوم هتقدر تطلقها وأنت مطمن أنه ماحدش هيجي لك يسألك عن سبب طلاقك ليها وتدخل في محاكم وقضايا لو ماقبلتش بالطلاق، مثلاً !!
'حنان' - لنفسها - ... " بس ده بعدك يا أخويا مش هسيبك تفرط فيها، دي ملاك بيمشي على الأرض !! " ...
أكملت 'حنان' كلامها..
'حنان' :- والحاجة الثالثة أنها مليانة عاهات زي ما أنت عايزها بالضبط !!
'عبد الحميد' - بحذر - :- بس أنتي عمرك ما قولتي لي إن فيها حاجة ؟!!
'حنان' : ومن امتى أنت كنت فاضي وتسمعني أو توافق تتعرف عليها؟ وأيام دراستنا كنت مسافر في فرنسا فإزاي كنت هتشوفها أو تعرف اللي فيها ؟!!
'عبد الحميد' :- وإيه اللي فيها؟ مش عايزها تجي لي في يوم وتقول أني ضيعت شبابها !!
تذكرت 'حنان' إحدى عيني 'توليب' تعاني من ضعف شديد في البصر..
'حنان' :- بص هي عمياء !!
'عبد الحميد' :- هاهاهاها ضحكتيني، اومال هي درست وتخرجت إزاي ؟!!
'حنان' :- هي مش عمياء بالضبط. هي شبه عمياء. واللهِ بقول لك الحقيقة !!
استرخى 'عبد الحميد' على الأريكة ووضع رجل فوق الآخرى..
'عبد الحميد' :- كملي بدأتي تقنعيني !!
تذكرت 'حنان' أن 'توليب' اخبرتها ذات يوم عن خطأ طبي حدث لها عند ولادتها أدى إلى قصر ساقها اليسرى، ولهذا السبب تسير بشكل غريب، لكن من يراها يظن أنها تمشي دلال. وترتدي حذاءً طبياً يزيد من طول ساقها..
'حنان' :- كمان هي عرجاء، يكفيك كده ؟!!
'عبد الحميد' :- أنتي مش بتكذبي عليا ؟!!
'حنان' :- والله كل اللي قولته حقيقة. دا أنت أخويا الوحيد معقولة أخدعك وأجيب لك عروسة سليمة ؟!!
انفجر 'عبد الحميد' ضحك على كلامها..
'عبد الحميد ' :- هاهاهاها حلوة دي. خلاص هسيب كل حاجة عليكي وعايزك بس تجيبي لي ورقة عقد الجواز. وخذي الشيك ده، أنا مضبت عليه وأنتي اكتبي عليه المبلغ اللي تحتاجيه لمصاريف الجواز !!
اعطاها 'عبد الحميد' الشيك، فأخذته بلهفة وابتسمت بخبث..
'حنان' :- إبشر يا أخويا اللي قولت لك عليهم هم العيوب الظاهرة، وما خفي كان أعظم، دي العاهات هتخرج منها كل يوم وهتنبسط منها قوي ومن اختياري !!
'عبد الحميد' :- هاه مش عاوز مشاكل. من البداية فهميها بكل حاجة !!
وضعت 'حنان' الشيك في حقيبتها ونهضت..
'حنان' :- حاضر، دلوقتي خلينا نروح نتغدا. أنا مااكلتش حاجة من الصبح. آه لكن في حاجة ؟!!
'عبد الحميد' :- إيه؟ رأسها من غير شعر ؟!!
'حنان' :- مش هنقدر نكتب كتابك عليها غير بعد أسبوع على الأقل، علشان ظروفها !!
'عبد الحميد' :- وهو كذلك. يعني شايفاني هموت نفسي عليها هاهاهاها !!
'حنان' :- خلاص على بركة الله يا عريس !!
༺༻
في فرنسا..
خرجت 'ايزابيل' والدة 'نرجس' من غرفة زوجها 'جمال' في المستشفى..
... " 'ايزابيل' 55 سنة، جميلة، رشيقة، طويلة، عيون خضراء مسحوبة قليلاً إلى الخلف، شعر أصفر قصير كاريه " ...
ورأت ابنتها 'نرجس' واقفة أمام ماكينة البيع وهي تفكر..
'ايزابيل' :- مالك؟ أنتي ليه زعلانه ؟!!
'نرجس' :- أنا رحت للدكتور أعرف اللي تاعب بابا !!
'ايزابيل' :- يعني أنتي عرفتي أنه مريض بالسرطان ؟!!
'نرجس' :- أيوة !!
'إيزابيل' :- وهو أنتي زعلانه عليه بجد ؟!!
'نرجس' - بلا مبالاة - :- اللي مزعلني هو أن الدكتور رافض أبلغ بابا بحالته. يعني قولي لي إيه أقول لبابا حتى يوافق أنه يكتب كل حاجة باسمي؟ هو لو مات، أعمامي هيشاركوني بكل حاجة. و'عبد الحميد' مش هيوافق على بيع القرية ونعيش هنا في فرنسا. عارفه يا ماما مافيش أحلى من أني أدخل له دلوقتي وأقوله الحقيقة. وأنتي هتطلبي المحامي يجي ويكتب عقد بيع أملاك بابا ليا. إحنا مش ضامنين هو هيعيش كم يوم ؟!!
ركضت 'نرجس' بحماس ودخلت غرفة والدها. مرت دقيقتين وسمعت 'ايزابيل' صراخه..
'جمال' :- برا براااا.
أنتي كذابة، أنا مش مريض بالسرطان. ليه يتقولي كده في وشي؟ أنتي شايفه الفلوس أغلى من أبوكي؟ دي خطة عملتيها مع والدتك علشان تاخذوا كل حاجة. أنا هتصل دلوقتي بـ 'عبد الحميد' أقوله يرجعني لمصر بسرعة قبل ما تتفقوا مع الدكاترة وتقتلوني. براااا !!
خرجت 'نرجس' من غرفة والدها ووقفت أمام الحائط تتنفس بعصبية..
'نرجس' :- هنعمل إيه دلوقتي يا ماما؟ بابا مش متفهم خالص !!
أقتربت 'إيزابيل' من خلفها واحتضنت كتفيها وهمست في أذنها كالشيطان..
'إيزابيل' :- معلش، إحنا هنرجع معاه لمصر وهناك هنشوف طريقة نأخذ حقنا بشطارتنا !!
༺༻